TITUS
Svan Chrestomathy
Part No. 165
Previous part

Text: 160 
Page of edition: 137 
Line of edition: 25 
160. ლიჩფჷლა̈̄რი შვა̈ნისგა


Line of edition: 26       ჭიშხ-ლელდი̄სგს ი ჩაფჷლს მო̄შ-მო̄შ აშხებდა მა̈გ. ობა̈შ ნუკვიშ ლა̈სვ ჩაფჷლ
Line of edition: 27    ი ჩი̄ მიჩა-მიჩა ჟახე ხეჟხა̈̄ნ. ალჲა̈რს ჩი̄ მო̄შ ლიშხბი ხეკვა̈დხ. მა̈̄ნკვი გვერა ჩვაჭკვრახ
Line of edition: 28    ღვაჟა̈რ ჩაფლა̈რდ. ჩაფჷლს ნაჯვდი სემი კამვინ (\\ კამინ) ხუღვა̈̄ნ ი ნამშა̈რი
Line of edition: 29    -- კამვინ ი სემი ფხულე. ჩაფჷლს ჩიქე ქა̈̄ხკჷნახ, ფა̈თვს ქა ხოშდახ. ეჩქანღო
Line of edition: 30    ორა̈̄შთე და̈̄სგდახ ი ეჩე̄'სგა ჩვაბქვახ. ჲერხი ჰირიკთე და̈̄სგდახ, იესვა̈̄ჲს ხუღვა̈̄ნ.
Line of edition: 31    ნა̈ჰრიკვ ჩაფჷლ შიშდ ჩუ ითთვა̈̄ნო̄ლდა ი ხოხვრა ლიჰიჭვი ხეკვა̈დ, ნავრაშ ჩაფჷლს
Line of edition: 32    -- ხოშა.

Line of edition: 33       ლა̈ჰი̄ჭვა̈̄რდ ათხე̄ჲ ხუღვეხ, ადო ჯვინალდ ცხა̈ჲ შუნ ხეღვა̈̄ნო̄ლხ საღჷრჭელ.
Line of edition: 34    ალა ლი კუდურ. ნაჯვდი ეშხუ საჯენზუმ ხე̄რა. ეჩის ჟი ხოჴვი̄რიხ სგვებინხა̈ნ , კა̄დოშ
Line of edition: 35    ი ასალშვ, ნაჯვდან ალბი ხჷნსგა̄მ ი ნალსკო̄დან ოხვიშდ ღეთ ფხულა ი მა̄დეჲ
Line of edition: 36    ხოშე̄ლს. ჟიქა̄ნ პილა̈რს ჩუ ხოკცჷ̄რეხ. ლუჴვი̄რი ძირქა სიფვრითშვ ჩუ ხოფტახ
Line of edition: 37    ეჩხა̈ნ-ა̈მხა̈ნი დაფა̈რს. ეჩქანღო ტყენს ატა̄ბახ. თხუმხა̈ნ ეჯასი ჩუქვა̄ნ ეშდ ღეთს
Line of edition: 38    ხოჭი̄რხდახ ი ეჩქანღო პილს სიფვრითშვ ქა ხოფტახ. ალ ტყენს სგ'ა̈̄და̈̄სგდახ ლუჴვი̄რ
Line of edition: 39    კუდურთე̄'სგა ალჲარე ექჷრდა̈̄შ მეფტა̈̄ლქა ყვიტს ხოსვა̈მდახ. სერ ალჲა̈რ ჩუ
Line of edition: 40    ინგჭო̄ლდახ ეჩჟი̄ნ, ერე ტყენს ჟიბა̄ვ ლა̈ტხა̄ჲ ჩუ ხა̄დ ი ჟი ლა̈ჯვი̄რი̄ ჩუბა̄ვ. ეშხუ
Line of edition: 41    მა̄რე ჟი ლუგვრუზა ჩაფჷლს ჲარვ ტოტშვ ა̈სი̄პანა ლუჴვი̄რისგა, მე̄რმე მა̄რე ტყენშვ
Line of edition: 42    ჟიქა̄ნჩუ ხოთლა ი სერ ამჟი̄ნ აშხუნღო ჩუ იჰი̄ჭო̄ლდა ჩაფჷლ. ჩუ ლუჰი̄ჭუნღო
Page of edition: 138  Line of edition: 1    ჩიქე ლჷყა̈ლ ბალყა̈ჩს ხაცვემდახ. ეჯა ჩვაწრა̈ნდა ჩაფჷლს. ეჩქანღო ლჷყა̈ლ ჯერა̈ბს
Line of edition: 2    ხოხჯჷნახ ი ჩაფჷლ ჩუ იმშხო̄ლდა. ეჩქანღო ნაცმუნშვ ჩვაცვემდახ. ზურალა̈̄რ
Line of edition: 3    ჩუ̄დ აბქვახ ამის. ეჩქანღო ჲეშვა̈̄ჲიშდ ლეშხბი ხა̄დხ, ეჩი̄ ჭიშხი ნაზიმდ ჟ'აცბუ̄რახ.
Line of edition: 4    ლაშხებდ მახა̈თ, ნე̄სყე-ჲ მჷჯა̈ბ ქანა̈ ნა̈ვნა̈რ ხუღვა̈̄ნხ ი ეჩნუვშ ჲარვ გუდ
Line of edition: 5    ჟ'აშხებდახ, ეჩქანღო ნე̄სგაჟი̄ნ პრატა̈რს ხოგა̈მდახ. ლათლჷ̄რა̈̄ლს ხოცვბახ ი ჩაფლა̈რ
Line of edition: 6    ლჷმა̄რე ლა̈სვხ.

Line of edition: 7       ჯაბრა̈რს ღვაჟა̈რ იჩომდახ ი ეშ აკა̄რზახ, ეჯღ'ე̄რე ლახვს ი კოჯს გა̈ბ ი ქვა̈სტ
Line of edition: 8    მა̄მ ლიხ. ლელვინთ ჩაფჷლს დე̄მის აჰი̄ჭვდახ. ეჯჲა̈რს ლუფათვდ ა̈შხბიხ. ხოტბიდა
Line of edition: 9    ლიხ ლჷფა̈თვ ჩაფლა̈რ . ტუფრა̈̄ ჩაფლა̈რსი ლჷფათვდ ა̈შხბიხ. ეჯჲა̈რ ხოტბიდა ლიხ.
Line of edition: 10    სგა̈̄ნ ჩაფჷლისგა მა̈გ წერა̈ქვს ინხენი, წერა̈ქვ ტებდი ლი-ჲ ჭიშხს დე̄მ ავფუნე.


Line of edition: 11 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.