TITUS
Svan Chrestomathy
Part No. 191
Previous part

Text: 186 
Page of edition: 164 Line of edition: 1 
Line of edition: 28 
186. დი-გეზალ


Line of edition: 29       ლჷმზჷრე̄ვ ხიშდ ი დი-გეზალ ლიხ ი მე̄ვარ ღა̈რიბ ლიხ ი ლეზვებ მა̄მა ხუღვახ
Line of edition: 30    ი ჰამა̈ტჷტს ჰამს იფთვიხ ი ნა̈ბზვა̈შს - ნა̈ბოზს ი ამჟი ა̈რიხ. აშხვ ლადეღ ქა ადჯე̄ლვა̄ლეხ
Line of edition: 31    ი ქ'ა̄შიდხ ქა̈̄მთე ნაჯე̄ლვა̄ლვ ი ამლე̄თ ჩვადყურდახ. მე̄სმა ლადეღ ჰამს
Line of edition: 32    ჟ'ანჷ̄გა̈ნხ, ქ'ა̈̄დსგიდახ ქა̈̄მთე ი ხოშა კჷლთხი ჰა̈ლვა̈ მეგა̈მ ჟი მეჴდე ლა̈სვ ი თეს დეშ
Line of edition: 33    ხოჰიდახ. ეჩქა ანჴა̈დ ჭყინტჷლდ ი ჟ'ა̈თჭა̈მ ჰა̈ლვა̈ მეგა̈მს. ესღრი, ესღრი ი ათხე̄
Line of edition: 34    ლე̄თ მა̄მა ხოშთხენი შუკვ. გვიანდქას აჩა̈დ მჷრა̈̄მთე ი ხეწა̈დ აშხვ მეზგა. ბერჟა̈
Line of edition: 35    ქორ ხო̄გჷდა ი ქა ა̈ნსგიდა ქა̈̄მთე ეშხვი ზურა̄ლ. ხოშა ზურა̄ლ ლა̈სვ ი ჟ'ა̈ნჷრმე
Line of edition: 36    ჭყინტჷლდ ი ქორთე ადჲე ი ჩ'ესსგურე ბანდა̈რჟი, ტაბა̈გ ოხგე ი ქ'ა̄ნჴიდ რჷდინ-გურო̄ლ
Line of edition: 37    ი ესგურნა̄ლვნე ტაბა̈გჟი ი ჩი ნუკვი ლეზვებ ეშ ესჰარა̈̄ნ. ნჷნქა ლე̄ქვი̄სგ
Line of edition: 38    მა̈გ ხუღვა̈̄ნდახ. ათხე ჭყინტჷლდს ათხი̄დჷნდა ი ა̈დდი̄რა̈̄ნ მე̄ვარ. მა̈̄ჲ ნა̈ირ ლეზო̈ბ
Line of edition: 39    ხეკვა̈დდა: ქუთ ი ჭიშდვა̈რ ი ლეღვ - მა̈გ ლალე̄მ ხა̈დურდ. ათხე ჩვა̈დბურა̈̄ნ ი
Line of edition: 40    რჷდინ ი რჷდინ-გურო̄ლ ჩ'აშხვინ ზურა̄ლდ ი ეჩას ქა ხეწა̈დ ჭყინტ ი გვი ლახვე̄მ.
Line of edition: 41    ჩვადყურდახ ი ლა̈ჲმჷგნე ჭყინტჷლდდ ზურა̄ლა̈ ლივჟე ი ჟ'ანჷ̄გა̈ნ ი ჟ'ა̈ნკიდ
Line of edition: 42    რჷდინ-გურნა ი ესღრი ქა̈̄მთე ი ადკარე მა̈ნკვი̄ ყო̄რ ი ა̈ნკიდ ხოხრა სტურფუ̄ნ, ადკარე
Page of edition: 165 Line of edition: 1    მე̄რმე ყო̄რ ი ხოშა სტურფუ̄ნ ამნე̄მ ა̈ნკიდ ი ჟ'ა̈ნბა̈ჟ ზურა̄ლდ ი სგა ა̈ჰი̄დ ზურა̄ლ
Line of edition: 2    ი სგა ა̈ნტიხ ქორთე. ჩვადყურდახ ი ჩვა̈დუ̄ჟხ. მე̄რმა ლადეღ ჩვარდა ამჩუ.
Line of edition: 3    მე̄რმა ლე̄თ ლუყვნანღო ლა̄ჲმჷგნე ი ისგლე̄თჟი ჟ'ანგა̈̄ნ. ზურა̄ლ ბჷგიდ ივჟა.
Line of edition: 4    ქა̄ჩა̈დ ყო̄რთექა ი რჷდინ-გურო̄ლ ჩვათა̈̄შდჷნდა ი სგა ლა̈ხტა̈ხ ი ჟ'ა̈ნკიდ, ქ'ა̄დჲე.
Line of edition: 5    ჩვადკარე მა̈̄ნკვი ყო̄რ, ყო̄რდ ხოშა ჰერ ა̈ნკიდ. მე̄რმე ყო̄რ ადკარე, ყო̄რდ ხოშე̄მიშთა̄ნ
Line of edition: 6    სტურფუ̄ნ ა̈ნკიდ. ადკარე მე̄სმე ყო̄რ, ხოშა̄დი სტურფუ̄ნ ამნე̄მ ა̈ნკიდ ი
Line of edition: 7    ქ'ა̄ჩა̈დ ყო̄რჟა. ამ დრო̄ვჟი ჟ'ა̈ნბა̈ჟ ზურა̄ლდ ი ქ'ა̈̄თღვა̈ჭ. სგვებინ ალ ჭყინტ, ვეშგინ
Line of edition: 8    ზურა̄ლ ი ჩუ̄ჲ ოთჩა̈დ გიმი ჴურუჩუ. ჭყინტჷლდ ჩვაჩა̈დ ი ჩვა̈თჭა̈მ ჰა̈ლვა̈ მეგა̈მს,
Line of edition: 9    სგა ლახა̄გა̈ნ მიჩა დის ლაჴვრაისგა ი ლახტვი̄ლ: "დედე, ყორუ ესერ ოთკარე".
Line of edition: 10    "ეჯჟი̄ვ ესერ ა̈რი, მიჩ ესერ დო̄რ ხორი დედე̄ მე̄ქვი̄სგ!" "ადუ, დედე, ჯ' ე̄სერ
Line of edition: 11    ლი მიჩა გეზალ". "ჲაღო მეჴა̈რუ ესერ ანქვიჭე ლაჴვრაისგა". ანქვიჭე მეჴა̈რ ი ჩვათირ
Line of edition: 12    მიჩა დიდ ი ეშხვი აშხვთე ა̈დკა̄ფხ ი მე̄რმე მე̄რმათე. ჩ'ოთკარე ყო̄რ ი სგ'ა̄ჩა̈დ.
Line of edition: 13    "დედე, შიჲა̈რუ ესერ ათბა̈რ". შიჲა̈რ ქ'ა̄თბა̈რ. "დედე, ტაბა̈გუ ესერ ოხგე!"
Line of edition: 14    "მა̈ჲესერ ხუღვე ტაბგი ლეგემ?" "ეჯა ესერ მიჩა გვეშ ლი" ი ჩ'ოხგე. ჟ'ა̈ნკიდ
Line of edition: 15    რჷდინ-გურო̄ლ ი ქ'ა̄თგურნა̄ლვნე ი ჩი ნუკვიშ ლეზვებ ლეთრე მა̈გ ესდა̄წყა̈̄ნ,
Line of edition: 16    მა̈̄ჲ ლე̄ქვი̄სგ ჩუ ლი. იდჲარა̈̄ლხ ი ითრეხ ჰარა̈ყს. ზურა̄ლ ჩვა̈დშდჷმა̈̄ნ ი მიჩა გეზალს
Line of edition: 17    ხა̈̄ქვ: "ამჟ' ესერ მა̄მა ხაყა, კე̄სა̈რშე̄რს ესერ ქ'ა̈̄წჰიხ. ქა̄ვ ესერ აჩა̈დ". ი
Line of edition: 18    ქ'ა̄დზჷზე ძალოშ. ქ'ა̄ჩა̈დ ი ხატვი̄ლდა კე̄სა̈რს. კე̄სა̈რშე̄რდ ჟეღა̈რ ოხვსჷსნეხ ი
Line of edition: 19    ჩუ ვენდ გარ ოთჩა̈დ კე̄სა̈რს. ა̈გით' ა̄ნჴა̈დ ლაგვნოშ. "მა̄მ' ე̄სერ ხოჭირ" ი ქ'ა̄დზჷზე
Line of edition: 20    კე̄სა̈რშე̄რთე. ქ'ა̄ჩა̈დ ი ქ'ა̄ხტვი̄ლ. ქა ლახსიმნე ი ამჟი ხა̈̄ქვ: "ლჷწჰე ესერ
Line of edition: 21    ლიხ მა̈გ კე̄სა̈რშა ნიშგვეჲთე". ანჷ̄გა̈ნხ მა̈გ კე̄სა̈რშა ლუზრა̄ლ-ლჷბოფშვდ, ლუგოჭდ,
Line of edition: 22    ციცვა̈რ ი ჟეღა̈რი მა̈გ აჩა̈დხ ლჷწჰად ი ლა̈ჲბინეხ ლილხინ. ტაბგა̈რ ა̈ნგა̄ლეხ
Line of edition: 23    ი ლა̈ჲბინეხ ქეიფ ი ლიზო̄ბ-ლითრე. ჩვა̈დშდჷმა̈̄ნხ მე̄ვარ. კე̄სა̈რი ი ჭყინტჷლდა̈
Line of edition: 24    დი მალტა̈̄რ ლა̈სვხ ი უშხუდ სვიბდახ მეჰად. აჩა̈დ ხა̈ნ ი მა̄მაჲ კე̄სა̈რდ რჷდინ-გურო̄ლ
Line of edition: 25    იშგვმინ: "ქა̄ვ ესერ ლახდია̄ნეხ!" ჭყინტჷლდს ხა̈̄ქვინხ ი ლიცვა̈̄ლ ა̈დბინეხ.
Line of edition: 26    "ხამ' ე̄სერ, ერე მიჩ ალას ხეშგვემხ", მაცლა̈ნდს ესფხიჭე, მარე ჰაჯ მა̄დ ახკიდხ
Line of edition: 27    ი მიჩა დი̄ჲ ეჩხა̄ვ ლა̈სვ ი ქ'ა̄ხჴიდვნე, იგვა̈ნდა მეჰად ჭყინტჷლდ. აჩა̈დხ მა̈გ
Line of edition: 28    კე̄სა̈რშა ა̈გითე მაშდმა̈̄რ ი ხოჩა გუჟი. აჩა̈დ ხა̈ნ ი ხაშგვმინ ჭყინტჷლდდ რჷდინ-გურნა:
Line of edition: 29    "ქა̄ვ ესერ ლახტიხხ!" "ჲაღო ჩიქე ესერ მა̄მა ხა̈ტხეხ, ვოდ დო მინე ყო̄რჟი
Line of edition: 30    ხოშა წიფრა ხა̄გ, ვოხვიშვდ მა̄რე ესერ ჴალვს ვენდ გარ ხოჰი, ეჯა ესერ ჩუ̄ვ აქა̈ჩ,
Line of edition: 31    ეჩქა ესერ ქა ლახტიხეხ". ლიგვნი ა̈დბინე ჭყინტჷლდდ: "ალას ესერ იმჟი იჩო"
Line of edition: 32    ი ქო̄ხუ̄მბავე მიჩა დის. "ამღა ესერ ნომმავ იგვნი. ალას ესერ ჯა ლახთვენნე: მიჩა
Line of edition: 33    ლამვართე̄ძ ესერ აჩა̈დ!" აჩა̈დ მიჩა დიე̄ ლამვართე ი ქ'ა̄ნჴიდ ალსმი კა̄დო̄ლ. ლა̄ხა̄დ
Line of edition: 34    ლაქჩას, აქჩა ჰამუნღო-ჲ ნა̈ბოზდ ი ჩვაქა̈ჩ. ეჩუნღო ხა̈̄ქვ: "ათხეჲ ესერ მა̄მა
Line of edition: 35    ხა̈ტხე ეჩქად ე, ვოდ დო ესერ მინე ლეკა̈̄ნჩუ ეშხუ და̈ბ ლი, ეჯა ესერ ქა̄ვ აჴა̈ნ,
Line of edition: 36    ქა̄ვ ადლა̄შე, ღვ' ე̄სერ ჟი̄ვ ა̈ნთე, ჟი̄ვ ა̈ნხურჲე̄ლე, ეჩქა ესერ სგა̄ვ ოხჴიდ ბეღელთე̄'სგა,
Line of edition: 37    ჩუ̄ვ ესერ ოთდა̄წყე". "ალას ესერ ხა̈დურდ იმჟი იჩო" ი იგვნი̄დ. ა̈გითე
Line of edition: 38    აჩა̈დ ი მიჩა დის ხო̄მბავე. ეჯნე̄მ იმედ ხა̈̄ქვ: "იმნა̈რ ესერ იგვნი, მიჩა ლამვარს ესერ
Line of edition: 39    ხორიხ თვეთნე ჴა̈ნ ი მეშხე, ეჯჲა̈რს ესერ ქა ლახდია̈̄ნიხ". აჩა̈დ ი ქა ლახდია̄ნეხ ჴანა̈რ
Line of edition: 40    ი ქ'ა̄ჴა̈ნ ი ქ'ა̄დლა̄შე, ჟ'ა̈ნთე, იხურჲე̄ლე ი ჟ'ანხურჲე̄ლე, სგ'ა̈̄ნმა̄ჯე ბეღელთე.
Line of edition: 41    ეშხვი კაკლი̄დ ოთშყა̈დ, ეჯაი მჷრშკჷლდდ ჟი̄დ ა̈ნთხე ი ჭყინტჷლდ აჩა̈დ კე̄სართე.
Line of edition: 42    "ათხე ესერ ქა̄ვ ლახტიხ". "ათხე ესერი მა̄მა. მიჩა უდილ ესერ ა̈რი ი ეჩხა̄ვ
Line of edition: 43    ესერ ჰე ხეცა̈̄დი, ვოქვრა̈ მჷსკა̈დ ი ვოქვრა̈ სკა̈მ ესერ ხორი, ეჯა ესერ ქა̄ვ ოხჴიდ".
Page of edition: 166 Line of edition: 1    ათხე ჰა̈დურდ ლიგვნი ა̈დბინე: "იმხა̈ნ ესერ ოხჴჷდას?!" მიჩა დის ოხჷ̄მბავე, ეჯნე̄მჷდ
Line of edition: 2    ლოხვთო̄ნე: "მიშგვა ლამვარა̈ლს ხორიხ კვიკვა̈̄ლ, ეჩას ლაჯდია̈̄ნიხ ი ეჯი
Line of edition: 3    იმვა̈̄ჲთე იგვრანო̄ლდე̄დს, ეჩას ათეჭმ სიი̄". ქ'ა̄ჩა̈დ მიხა ლამვართე ი ქ'ა̄ნჴიდ კვიკვა̈̄ლ.
Line of edition: 4    ესღვა კვიკვა̈̄ლ ი ესჭიმ. ესღრი, ესღრი. ლა̈ხჴა̈დჷ̄ნ აშხვ ქვეყანათე ი ჟ'ა̈ნთხე
Line of edition: 5    ეჯ ზურა̄ლ ი ქა ხა̈̄ქვ, ერე "ამჟი-ჲ ამჟ' ე̄სერ ლი ი ვოქვრა̈ სკა̈მ ი ვოქვრა̈ კვიკვა̈̄ლ
Line of edition: 6    ესერ ქავ ოთზჷზე!" "აი, ეჯჲა̈რს ესერ ქ'ო̄თზჷზი მარე მჷსკა̈დ ესერ ჰე̄სა
Line of edition: 7    სგ'ა̈̄დდას, ეჩქა ესერ ჰე̄რო̄ლა̈რუ გარ ა̈მსედ ი სკა̈მჟი ესერ ჰა̄ლ ესგურდე̄ღს, ჩუ̄ვ
Line of edition: 8    ესგურდე̄დს, ჩუ̄ვ ესერ ალბა̄ქე̄ლი!"

Line of edition: 9       ქ'ა̄ნტა̈ხ ი ანღრი-ჲ ანღრი. სგ'ა̄ნჰე ა̈გიდ ი კე̄სა̈რსი ქა ლახვე̄მ მჷსკა̈დ ი სკა̈მ.
Line of edition: 10    სგა̈̄დდე მჷსკა̈დ ი სკა̈მჟი ჩვესგურდა ი ჰე̄რო̄ლა̈რ გარ ასა̈დ, ჩვა̈დბა̄ქა̈ნ ი რჷდინ-გურნა
Line of edition: 11    მიჯნე̄მ ა̈ნკიდ ი ხოჩა ლირდე-ლიზგე ა̈დჴიდ ი ლჷმზჷრე̄ვ ხიშდ!


Line of edition: 12 
ჲელი



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.