TITUS
Svan Chrestomathy
Part No. 192
Previous part

Text: 187 
Page of edition: 166 Line of edition: 1 
Line of edition: 13 
187. ლახვბა


Line of edition: 14       ღე̄რბეთ მა̈გუ ჯა̈მზჷრახ ი ლახვბა. ალჲა̈რს ხეყა̈̄ნხ სემი ფუ̈რ. ალჲა̈რს ხეკვა̈დხ
Line of edition: 15    ლი̄თა̈ლ მარე ფურა̈ლს ჩუ დეშ ი̄თახ ეჯღა ერე ეშხუ ხოშა ლა̈სვ, მე̄რმე ხოხვრა,
Line of edition: 16    მე̄სმე - ჰა̈დურდ ხოხვრა. მა̈ჲ ა̈ნგონვახ. ჩუ დეშ ი̄თეხ? ხოხვრა მუხვბად
Line of edition: 17    ლა̈̄ქვ, ერე "ჲაღვ' ე̄სერ ალჲა̈რს ქ'ა̄ჰვდინე ი ფა̈სს ესერ ჩვა̈დყვილეხ". ლა̈ჲრა̈კლე
Line of edition: 18    მაჰვრე̄ნა მუხვბად ფურა̈ლ სგვებინ ი ადჲე ლაჰო̄დთე. ესღრი, ესღრი, იმვა̄ლე
Line of edition: 19    ჯვე̄დია მინდვერისგა ჟ'ა̈ნშვემ ჯიჰრა ჩუქვა̄ნ. ეჩჩუ ჩვა̈თუ̄ჟდა. "ამთა̄ნდ ესერ მიჩა
Line of edition: 20    ქა ლუთვანღო დე̄სა ხავჟუნე̄ნა". ი ფირვ ეჩას ხაშჩუქვრე. ესღრი. ჯვე̄დია მინდვერისგა
Line of edition: 21    ლახხვი̄დ შდუგულდ. ეჩას ჴარჴისგა ხუღვა̈̄ნ შდიხი კაკა̈ლ. "მა̈დილუ
Line of edition: 22    ხე̄რა ი შდიხილდ ჩუ̄ვ ადკვა̈რ ი ფირვს ხაშჩუქვრი". ეშხვი თირვ შდუგვს ხაშჩუქვრე.
Line of edition: 23    ესღრი, ესღრი ი იმვა̄ლე ნა̈პო̄ლ ლახხვი̄დ. ეჩას ჴარჴისგა მჷტჷლდ ხუღვა̈̄ნ.
Line of edition: 24    ალ მჷტჷლდ ჩ'ათცვირნე, ფირვ ხაშჩუქვრე. სემი ლადეღ ახა̄დ შუკვჟი ი ვეშგდ
Line of edition: 25    ანტა̈ხ. ა̈გითე ერ ანჴა̈დ, ეჩქა ხა̈̄ქვ, ერე "იმვა̄ლე ხელწიფს ესერ ნანუ̄ლ ხაყა, ეჩას
Line of edition: 26    ესერ ჲერვა̈̄ჲ ჩვადა̄ცვნი, ეჩას ესერ ხაჰვდიხ." ანჴა̈დ მაჰვრე̄ნე მუხვბილ ი ქ'ო̄ხო̄მბვე
Line of edition: 27    ალა, ერე მიჯნე̄მ ეშხვი ფირვ ჯიჰრას ხაშჩუქვრე, ეშხვი -- შდუგვს, მე̄სმე --
Line of edition: 28    ნა̈პო̄ლს. ნანუ̄ლ ჩუ ა̈დი̄ცვნა̈̄ნ მე̄ვარ. ნანუ̄ლ მაჰვრენა მუხბას ხაშჩუქვრე. ი̄რო̄ლ
Line of edition: 29    ვახშმობა̈ დრო̈ვ. ლახა̄გა̈ნ ჲერე̄ ყო̄რს ი ხა̈̄ქვ, ერე ბა̄ზი ესერ ნო̄სამა̄ვ ხაყერ,
Line of edition: 30    თეთრს ესერ ხაშჩუქვრე. სამ ლე̄თ ამჟი ოთღორვე, ნანუ̄ლ ქ'ა̈ხყვა̈ლ ი მე̄რმე ჭა̈შ
Line of edition: 31    ა̈დგიჭ. მაჰვრე̄ნე მუხვბილს ათხჷ̄რჷ̄ნდა, იგვა̈ნდა, ქა ანჴა̈დ შგვიბილდ ი ესკვიფხნა̄ლე
Line of edition: 32    სგვებინქა. "იმღა ესერ იგვნი, მიჩა მუხვბე?" "ნანუ̄ლ ესერ ოთცუ̈რნახ".
Line of edition: 33    "ნომა̄ვ ღედ ესერ ხა̄რ" ამჟი ხეჭვდჲა̄ლდახ: შდუგვ ი ნა̈პო̄ლ. ანჴა̈დ შგვიბილდ ი
Line of edition: 34    ესკვიფხჲელე ნანუ̄ლა̈ ლათხურმა̈̄შ. ჩვადუ̄ჟნე, ეჯჟი ერე ლირჰა̄ლვ დე̄სა ანჲა̈ცხ.
Line of edition: 35    მე̄რმა ლე̄თ ანჴა̈დ ნა̈პო̄ლ ი ჴადვჟი ათწკინტო̄რე. ნანუ̄ლს მე̄ვარ ათხჷ̄რჷნ. მე̄სმა
Line of edition: 36    ლე̄თ ლა̈ხქა̄ლ შდუგვ ი ადყიჰე გარციცათე ჰაკვდუ̄ლ, ოთზჷზე ნეფხვნა ლეჟა, ახჩა̈ჩხვნე
Line of edition: 37    ეჯჟი, ერე ლირჰა̄ლვ დე̄სა ანჲა̈ცხ.

Line of edition: 38       მე̄რმა ლე̄თ ანჴა̈დ ნა̈პო̄ლ ი ჴადვჟი ათწკინტო̄რე. ნანუ̄ლს მე̄ვარ ათხჷ̄რჷნ.
Line of edition: 39    მე̄სმა ლე̄თ ლა̈ხქა̈ლ შდუგვ ი ადყიჰე გარციცათე ჰაკვდუ̄ლ (\\ ჰაკვა̈დ), ოთზჷზე
Line of edition: 40    ნეფხვნა ლეჟა ი ახჩა̈ჩხვნე ეჯჟი, ერე ლაყვრა ჩუაძგვიბ. ხაჴიდ იშვდ (\\ ვიშდ) ნანუ̄ლდ
Line of edition: 41    მიჩა ჭა̈შს ი ქ'ა̄დკვა̈რ. აჯაღ მაჰვრენე მუხვბილს ესსა̈დ ნანუ̄ლ. ეჯჲა̈რდ ხოჩა
Line of edition: 42    ლირდე-ლიზგე ა̈დჴიდხ ი ლჷმზჷრე̄ვ ხიშდ!


Line of edition: 43 
კალ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.