TITUS
Svan Chrestomathy
Part No. 198
Previous part

Text: 193 
Page of edition: 174 
Line of edition: 29 
193. ლიჩიჟალ ი ქო̈რწლობ შვა̈ნისგა


Line of edition: 30       ზურალა̈შ ლიყდა̈ნი აი ამჟი იჩვმინი: ლეჭშჷრი ხოთვრი მეცქვილს დინათე ი
Line of edition: 31    მიჩა ქორშა̈რთე. დინას ლახე ჩუ ხოცხა ი ქორშა̈რსი, ეზარ ხა̈ნს ეჯღაი იწირქიელხ
Line of edition: 32    დინა ი მიცა ჭირისუფლა̈რ ი შომა̈ჲ აშხუნღო თანახმას ჴედნიხ., ეჩქას ლეთს
Line of edition: 33    ხონშა̈ნიხ ი ეჯ ლეთ ლეჭშჷრი ხოთვრი სამ ი ვოშთხვ მარა დინაშ ქორთე, ალა̈რ ა̈ჲნეხ
Line of edition: 34    ეშხუ ზექა̈ჲ ა̈რა̈ყს ი სგა ღჷრიხ მეზგათე. ეჩეჩუ ჩუ ისგვრიხ, ეჩქას მოლა ხა̈ნუნღო
Page of edition: 175  Line of edition: 1    ა̈რყიშ ლითრეს იბნეხ. ი მეჴდაისგა მაშენე იერვა̈ჲ ხეჩჷდიხ, ეჯი, მა̈ნკუშ ჭიქ ქა
Line of edition: 2    ხოჴდენ' ეჯის ჟი იგნალ, ქა ღჷრი ლეჰრი დინაშ დი სგვებინთექა ი ხომზჷრი
Line of edition: 3    ბედნიარდ ლიმა̈რჯვს ი კალთა̈ჲთეჲსგა ხოდისგ მურგვა̈ლ მანა̈თს, ხედვა̈ის ხაჟხა
Line of edition: 4    ცხვიმიშ მჷქაფ ი ქა ხაჰვდი ჭიქ გვეში ა̈რა̈ყს. ეჩქანღო ეჯ ლეთ ეჯ მეზგე ქა ხემარელ,
Line of edition: 5    პა̈ტივს ხეჩო ი ეჯჟი ტეხნიხ მენშინალა. მოლა ხა̈ნუნღო ლეჭშჷრია̈შ დი ლახე აშ
Line of edition: 6    ხორი, ლადჩურა ი თვითარ ლეჭშჷრი ღჷრიხ ლეყდა̈ნი დინათე, ესე იგი, მახე
Line of edition: 7    თელღჷრა̈შ ლაწადთე. ა̈ჲნეხ ა̈რა̈ყს ი საჩქვა̈რს მახა თელღრა̈შდ. ა̈ჲნეხ ლერექვიაქს
Line of edition: 8    ი მოლა ლეზვრა̈ლ გა̈ნზს. ეჯ ლეთ სედნიხ ეჩეჩუ. მერმა ლადეღ ტეხნიხ
Line of edition: 9    ქორთე, ეჩქანღო ჩიჟე ჩქა̈რდ ი ჩქა̈რდ ღჷრი მიჩა ლა̈მთილთე ი ჩუ სედნი ეჩეჩუ
Line of edition: 10    ფიშირამჷნ. ალი ხოხა: მაგვა̈რ მალტა̈რ ლიხ მახე ხეხვ-ჭა̈შიაქ. ალი ლი, ლახ ნა̈ბოშ
Line of edition: 11    ლიყდა̈ნი ლი ზურალა̈შ, ეჩქას. ფიშირამჷნ ლი ზურალა̈შ მადეი მიცა ნა̈თია̈რე
Line of edition: 12    უმბლა̈რ ლიყდა̈ნი. ალი იჩვმინი, შომა̈ჲ ჰედ დინას ლეჭშჷრი მადე ხა̈ლხინ, მადეი
Line of edition: 13    ქორშა̈რს მოლე ჯინობ ხუღვახ ლეჭშჷრია̈შ ნა̈თია̈რცახა̈ნ. გვეშ ამკალიბდ ლი, ეჩქას
Line of edition: 14    ლეჭშჷრი ხოთვრი მარა დინაშ ქორშა̈რთე ფიშირამჷნ. ი ლახე ეჯღი ვა̈რ ხეტხენი,
Line of edition: 15    ეჩქას ჴედნი ლეჭშჷრი ი ჴამშუშ ხოდისგ ნიშა̈ნს ცხვიმი მჷქაფს. აი ალის იჩო ამჟი:
Line of edition: 16    ჴედნი ი მურგვა̈ლ მანა̈თს, მადეი მოლე იმგვალეგ იშგან ლეზვრა̈ლ გა̈ნზს ლეჰრი
Line of edition: 17    დინაშ ჰა̈ზვ-ჰაგმიშ ლჷნშა̈ნ ა̈დგის ა̈დისგ უშდილ. ეჩქანღო ჲესვალა ჩვაშგურანე,
Line of edition: 18    ერე დინაშ ქორშა̈რს ქა ხექეხ ალი, იმა̈ჟი ჯინემ ნიშა̈ნ ოსდე ი იმგვა̈ჲ ოსდე ეჯი.
Line of edition: 19    ეჩქას ქორშა̈რ ჟი ითხიხ ეჯის ი ქ'ა̈ჲნეხ ი მჷჰრი მახეღვა̈ჟიშ ჰა̈ზვთეჲსგა აკვანეხ.
Line of edition: 20    ეჯი ჟიიდ იკედ ი უშდილ სგაიდ ხა̈ტხე ი ალი იჩვმინი ფიშირამჷნ (სუმინ ი
Line of edition: 21    ვოშთხუნ ღეთ). ი აშხუნღო მოცქვილშვ ი მუთუმუნა მარემ ნაქვშვ ჰედ სგა იხნი მეზგე
Line of edition: 22    ნიშა̈ნს, მადეი ეჯღაი-ეჯღაი ვართე ჰე ხეგნი გვეშ, ეცქას დინაშ ჭირისუფლა̈რს
Line of edition: 23    ჰედი ხარხ ლეჩვემ მჷჰრიდ ხატ-ნაბა̈ნ, მადეი ხეშდენიხ უშხვარნენსგა ლი̄მახვ.
Line of edition: 24    ხა̈ტ-ნაბა̈ნთე ლახე ხეგნი გვეშ, ეჩქას მეგნა მაროლს ხონშა̈ნი დინაშ მჷჰრი ი ალ
Line of edition: 25    მეგნე მაროლ ი დინაშ ჭირისუფლა̈რ ხენჴრენიხ ქა ლაჴვმითე ი ამეჩუ დინაშ
Line of edition: 26    ნა̈თია̈რ იკედხ ამჟი ხატვ, ერე ამჟი სა̈დხ ი კა̈ფდ მინს ოსდერვასგვხ ი ამჟი ხა̈ტს ქა
Line of edition: 27    ხეჩმუდახ, ეჩქას მინ დემის იგხო̈ლიდახ ჟი: ამჟი ხატვ ჟ'იკედხ, ეჩქას სერ დინაშ
Line of edition: 28    მჷჰრიი ჩუ იშა̈რდი ი ჯიი ხატვ იკედ, ერე ამ გვაშემ ბედჟი სერ მუნდრევ მადმა ლი
Line of edition: 29    მინე. ალი ლი, ვართე ხეგნი გვეშ, ეჩქას. ჩუ ლახე ხესკვეთი მჷჰრის, ეჩქას
Line of edition: 30    ლჷნშა̈ნ ლეთ იმჟივა̈ჲ გვი̄რა ლინშინალეშ ბედჟი, ეჯჟი იჩვმინი.

Line of edition: 31       ეშხუ, ჲარვ ი სამ ზაუნღო დინაშ ქორშა̈რს ხაკფუნე ნაჭვლაშა̈შ ქა
Line of edition: 32    ლიკედს ლეჭშჷრი ი ალა̈რ ხოთვრიხ ეჩქას უსგვაღეთ ი იშგვიდ მარა მინე
Line of edition: 33    სამხუბხენქა ალა̈რს ეჯ ლეთ ლა̈ჲსოშ ი ა̈რა̈ყშვ ხოჩა პატივს ხეჩოხ ი მერმა ლადეღ ქა
Line of edition: 34    ილგო̈ნიხ მენჭულშალა ნაჭვლაშს.

Line of edition: 35       მენჭულშალა ხაჟხახ საზოგადოთ ეჯ მაროლს, ჲესვა̈ჲს დინაშ ქორშა̈რ
Line of edition: 36    ნაჭვლაშა̈შ ლალგო̈ნითე ხოთვრიხ დინაშ ლა̈მთილთე. ამხავ ხოთვრი მეზგე ჲეშდ ღეთ
Line of edition: 37    მარა ი ალა̈რე სამხუბენქა ლი წეს ლითვრი, ამრე მეხვბარა̈რ ლახ ფიშირ მეზგე
Line of edition: 38    ლიხ, ჲერხის გარ ხოთვრიხ ი მერხალდ ლახ ლიხ, ეჩქას თვითს მეზგემ ქუნჟი მეზვ
Line of edition: 39    ბარა̈რხენქა ხოთვრიხ ი ეჩჷნქა -- იშგენ ნა̈თია̈რს. ალ მენჭულშალა მერმა ლადეღ
Line of edition: 40    ქა ილგო̈ნიხ ნაჭვლაშს ი ეჩქანღო მეზგე ტაბა̈გსიდ ხოგემ ი გვა̈მიდ ხოთუმუნე
Line of edition: 41    ა̈რა̈ყს, ამა̈ჲჟი ქო̈რწლობჟი, ამჟი. ტაბგიშ ნა̈ცხემუნღო ქო̈რწლა̈რ იკვანეხ სგო̈ბინ
Page of edition: 176  Line of edition: 1    ნაჭვლაშს ი ღჷრიხ დინაშ ქორთე ი სგა ხა̈ბრევიხ ნაჭვლაშს. ეჩეჩუი ა̈რა̈ყს ითრეხ
Line of edition: 2    ი ეჩქანღო ღჷრიხ მინე-მინე ქორთე.

Line of edition: 3       ნაჭვლაშ ხოჩა ი ხოლა ზურალღა ჩიღა მეგუდ იკიდი, ამრე ჩი დრევჟი მეგუდ
Line of edition: 4    მად იკიდი. ნაჭვლაშ ქვეცნი ჩუ ჴევიშ ლჷთიშ მაროლშვ, ამრე ხვა̈ინ კუმშიშ
Line of edition: 5    მალტოვა̈რ მეზგე ქა მასა̈რს იკედ, ეჯის ხოვზუნე მერმე, ი ამჟი შუ̈მიშდ იცხემ, იცხემ
Line of edition: 6    გარ ი ლახე სურუთექა ხეჴდჷნი, ეჩქას ლუზვრობჟი ჴევისგა ჲერვალე ხოჩა მარე
Line of edition: 7    ყჷლე, ერე "ნაჭვლაშს როქვ მოლე ხა̈ყერხოვ, ხოჩა მაროლ, ედო ხჷნსგა მეზგე
Line of edition: 8    როქვ ჟი ხეხვტენი ამზუ ნაჭვლაშს ი ხვა̈ჲ-ხვა̈ჲს ამზუ მაბაც როქი მადე ხუღვა ი
Line of edition: 9    უჩიჟად როქ სედნი". ეჩქას ჴევ ითში ხოჩ-ხოცა მაროლს ი ეჯა̈რს მა̈ზუ ხაკა̈ფხ,
Line of edition: 10    ეჩეჟი სედნი ნაჟვლაშ. ეჩჷნ ჟიბოვ ჲერვა̈ჲ ა̈ნკედ ნაჭვლაშს, ეჯის ეჯ მაროლე ნა̈ქვიც
Line of edition: 11    შტრა̈ფსი ხაკედხ სოფლიშ ლჷთიშ მაროლ ი ქა ხა̈ტხუნეხ მჷკედ მეზგა
Line of edition: 12    ქა მუჰვდი მეზგათე. ნენსგაშ ნაჭვლაშ ქვეცნი ხოშა ლაღა̈ლდ უღვა ჴანა̈რ ი ფუ̈რ
Line of edition: 13    ი ფუ̈რ ნა̈ყდანურდ. აი ვობა̈შინ იმჟი იცხემ ნაჭვლაშ. ათა̈ს ჩხარაშირ ჲერვეშდიუ̈არ
Line of edition: 14    ზავჟი ბეჩვისი̄სგა ჩიბყვანა̈რდ თასავდ ი ქვია̈ნდ ლახვემხ ქვია̈ნიშ გეზალ უკაშ
Line of edition: 15    ხახვემ ძაღუშე ბესარჲაშ გეზლა̈შ ნინოშ ნაჭვლაშ ეშდივოშთხვ ფურეშ, ესე იგი
Line of edition: 16    ეშდივოშთხვ ფუ̈რიშ ლუგვენ, მარე ეჯის ა̈ხჭამ ქამიზალ, ეჩქას ა̈ნთიშანხ
Line of edition: 17    ნაჭვლაშა̈შ მუქვცე მაროლ ბეჩვი̄სგა ი ნაჭვლაშ ი ნა̈ყდანურ უსგვა ფურთეჲსგა ა̈ნტიხ
Line of edition: 18    ი ძაღუშერს ეშდივოშთხვ ფურხენქა უსგვა ფუ̈რ გარ ესცუ̈რხ. ეჩჷნქაშ ქა
Line of edition: 19    ლახტიხხ ჩიბყვანა̈რს. ჩიჟი ნაჭვლაშ ი ნა̈ყდანურ ბეჩვი̄სგა უსგვა ფურჟი გარ ლჷგ.

Line of edition: 20       ნაჭვლაშა̈შ ქა ნა̈ჴიდუნღო მერმა ზავ ზურალ ქა მეზი ლი ჭაშვთე. ამქადიშდ
Line of edition: 21    ზურალს ჟ' ამარეხ მიჩა ლამუარ. ხოყდიხ ლაყვრაშ ი ლა̈ნგაშ ლერექვს ი
Line of edition: 22    ლელდისგს, მა̈ზუსდო, ეჯი მაბაცს ხოხალ. ეჩჷნქა ზურალ ხომარე მიჩა ჭაშვ
Line of edition: 23    თხუმეჭჷშხე ნენსგაშ ლერაქვ. ი შომა̈ჲ ეხჩენ-ამხენ ექჷრდა დინაშ ლამუარ ი ლა̈მთილ
Line of edition: 24    ჟი ლჷმარე ლიხ ქო̈რწლობა̈შდ არა̈ყშვ, ლა̈ჲსოშ ი ლენყოშ, ეჩქას ჩვა̈ნშა̈ნიხ
Line of edition: 25    ქო̈რწლობა̈შ ლეთს. ამ ლეთ ნებოზს ლეჭშჷრი ხოთვრი ეშხუ ეშდვოხუშდღეთ
Line of edition: 26    ლვაჟმარა ი აშხვ ზურალს, ხოსა ლაღა̈ლდ დაჩუ̈რს, ემმა ხორი, მადეი ჲესვალა ჰასუ̈შს.
Line of edition: 27    მარე ლა̈ქურწილთე ხოთვრიხ ა̈რყიშ ხოჩა მუნთუნის გარ, ეჯღ' ერე ქო̈რწლობისგა
Line of edition: 28    ა̈რყიშ გუნ ლითუმუნე ლი წეს. ამის მა̈გ აშ ხემქჷრელ უშხვარ, ერე ჲერვა̈ჲ მოშ
Line of edition: 29    ქვერწლა̈რს ხოშამ ადშდჷმისგ. ალ ქვერწლა̈რ დინამ ლამუართე სგა ჴედნიხ,
Line of edition: 30    ეჩქას მა̈ნკუ ეჯა̈რს გარ ხოგემხ ჰა̈ში ტაბა̈გს, -- ესე იგი დია̈რს ი ყვიჟე-პერშვდას
Line of edition: 31    ეჯ ლეთიშ ლა̈ჲსოლე ატყბეხ ი უ̈არღეთ ქვინს ა̈რა̈ყს ხა̈ჭმინეხ. ეჩქანღო შიშდ
Line of edition: 32    ხოშა ტაბა̈გს ხოგემხ. ეჩქას თხუმხენ ქო̈რწლა̈რს ხასგვრეხ აშხვ ხოცა ა̈რყიშ მჷთრა
Line of edition: 33    მარა. დინა ალა̈რ ვოდ' ამეჩუ ტაბგობს იჩოხ, ინჴრინე ლაცლას ი სოფელისგა
Line of edition: 34    სიმაქს ი მახეღვა̈ჟს ქა ხეჭმენი ლა̈წსის მიცა აფხნეგდ მენჴრიდ ი ჲესვა̈ჲს ქუნზუმდ
Line of edition: 35    ლა̈თიალ ჩუ ხარ, ვარს და̈რ ხაყლე. მა̈ნკუშ ტაბა̈გს ხაჟხა ხა̈ცცობ. ამუნღო შიშდ
Line of edition: 36    ჷგემხ ხოშა ტაბა̈გს, ქვერწილ-მარა ასგვრეხ აშხუდ. თხუმხენ ეშხუ ხოჩა ა̈რყიშ
Line of edition: 37    მჷრთე ხასგურ, ეჩჷნქა ნა̈ნკდ ქვერწილ გარ სგურ. იშგენ ლჷწსე მარე, დინახენიშ,
Line of edition: 38    მა̈გ ნა̈ნკდ სგურხ, მეზგა მაგვა̈რ მოშ მაბაც ხეღვენი ქო̈რწლობჟი, ეჯგვა̈რ ხოჩა
Line of edition: 39    ტაბა̈გს ხოგემ ქო̈რწლა̈რს ი ლჷწსა ჩი. ა̈რა̈ყს საზოგადოთ ქვერწლობჟიშ გვა̈მიდ
Line of edition: 40    ლჷჴმა̈შს იჩო მაგ. ტოლუბა̈შდ ითშიხ ლამუარხენიშ მარა. მა̈ნკუ კათხშვ საერთოდ
Line of edition: 41    ალ ქვერწლობა̈შ ბედნიერობს იმზჷრა̈ლი, მერმა კათხჟი ლაჴვამა̈ლის ხა̈ჭმინე.
Line of edition: 42    ლაჴვამა̈ლიჟი ეშხუ ტოლუბა̈შ ჟი იმზჷრა̈ლი ი ქა ხოჴვამი მერმა ი ამჟი ხაყლე:
Line of edition: 43    "ჯგჷრა̈გ ლაჯვემ მიჩა ჟჷრ", ჰედ: "ისგვა სგვებინ ჯგჷრა̈გიშ ჟჷრ". ეჩქანღო
Page of edition: 177  Line of edition: 1    სამღეთ მარა ხაჰვდიხ აშხვჟი კათხა̈რს წჷდაუ, მარე ა̈რა̈ყ ჩი მეგუდ ხეკვეს ხოგენეს
Line of edition: 2    კათხა̈რისგა. ეჯა̈რ ჟი იმზჷრა̈ლიხ ი მინე შელდს ქა ხოჴვა̈მიხ. ეჩქას ლეჴვა̈მი ი
Line of edition: 3    მუჴვა̈მი ექჷრდა ფაყვა̈რს ჩუ იკედხ ი ლეჴვა̈მი მაჴვამს ხაყლე მუჴვა̈მის: "სავ მირი
Line of edition: 4    შვიდებ, ისგუ ლაჴვა̈მის როქვ ვოდ ოხჟვანდე, ეჩქად ისგუ ლირდეს ღერმეთ ი
Line of edition: 5    მარე ნომა როქოვ ახჟარა".ათხე ლეჴვა̈მი, მიჩა კათხ ჟ'ოხკვედნი, ალი̄ს ჟი
Line of edition: 6    იმზჷრა̈ლი ი ნომა ხოჴვა̈მი ქა ი მიჩა მუჴვა̈მის ხაყლე: ისგვა ამახვღვა როქვ გვარ ფაყვ
Line of edition: 7    ლეკედ ი სი როქვ ჟ'ესიგ ფაყვ". ალი ეჯრა იქვი, ერე საზოგადოთ შვა̈ნისგა
Line of edition: 8    ლჷდგა̈რმჷყ ლეღვჟმა̈რი ფაყვს და̈რ იგემ ჟი ლჷდგა̈რიშ ჩუ ლიშდხვალდ. ეჩქას მა̈ნკუშ
Line of edition: 9    მუჴვა̈მი ფაყვს ჟი იგემ. ამქად ლახე სგა ლა̈ხეშდჷნი ი ფაყვს დრევჩიქდ ჟ'ესგემ,
Line of edition: 10    მადეი ლეჴვა̈მის მადმა ლახშყედნი ფაყვა̈შ ჩუ ლიკედ, ეჯის წჷდაუ ჩვაშტრა̈ფიხ:
Line of edition: 11    აშხვ კათხს ქამასა̈რს ხათრეხ, ეჯნოშ ი ალი ამჟ' ესჭიმ, ვოდე დო ტაბა̈გს მესგვრე
Line of edition: 12    ქა დ'ა̈დხერსი მა̈გ. ეჩქანღო ტოლუბა̈შ იმზჷრა̈ლი სარვა̈შიშ კათხს. სარვა̈შ ლი
Line of edition: 13    სა̈რვინ, ესე იგი ალი ლი ამხენქა ნა̈სედ, ერე სარვა̈შჩიქდი ნათუნ ლი მარე ი
Line of edition: 14    ეჩქანღოი ოხღელი ლითრე ი "ჰედ ამქად როქ ემმაგვეშ ლა̈მქადენს, ამდეი ამუნღო
Line of edition: 15    როქ ემმაგვეშ ლა̈მქადეს მესა̈რვინენეს". აი ალ ამბა̈ვხენქა ლი ნა̈სედ სარვა̈შ ი
Line of edition: 16    ამღა ხაშხა ალ კათხს სარვა̈შ. ალი ჩი ქაიდ ხეჭმენი, ეჩქას ტოლუნა̈შ იმზჷრა̈ლი
Line of edition: 17    საყანს: "საყნა̈შ მა̈ლდოშვ ლჷმზჷრე ლი ალ მეზგე ი ალ მეზგემ ლჷწსე მარე,
Line of edition: 18    საყან ჟ'ოლწესელესვს ეჩა ი ლა̈დიშ ნენსგა საყნობ მაჩენამდ ჩუ ჲა̈ს ხამურჯენს,
Line of edition: 19    ეჯჟი მერმად ალ მეზგა ი მიჩა მექვერწილსოვ ათმარჯვა". ჟი იგნალხ ჲესვა̈ჲს
Line of edition: 20    კათხა̈რ ხუღვახ ი ვოდე დო ჩუ ლითვნალდ ი მერმემ ქა ლიჴვამალდ კაჩუშ ლჷგხ.
Line of edition: 21    ეშხუ ჲერვალე ზურალ მა̈ჲნძელიშ თა̈შ ლუხტურე სა̈ჲნშვ, მადეი ფაკნიშვ
Line of edition: 22    სგვებინხენისგა ხაგ მესყანელას ი ნა̈ჭმუნდ ქა ხოხლა ეჯარდ. ი ამჟ' ო̈სჭიმ ვოდე დო
Line of edition: 23    საყან ქა ხეშდენი. საყანს ეშხუ ხერას ჩუ ლა̈ჲთჷრეხ. ეცქას ქა ხოჴვა̈მიხ მინე შელდს
Line of edition: 24    ი წჷდაუ ეჯ შედა̈რს ჟი ხოგვერშლეხ ი ქა ხაჴვდიხ ლეჴვა̈მია̈რს. ეჯა̈რ ჟი იგნალხ ი
Line of edition: 25    კაღხა̈რს ქა ხებიშდიხ წჷდაუს ი მუჴვა̈მია̈რ ჩუ ისგვრიხ ი ფაყვა̈რს ჩუ იკედხ ი ჟი
Line of edition: 26    ლიგემ მადმა ხოშიდხ, ვოდე დო მინე ლეჴვა̈მია̈რ ჩუ დო ლა̈ჲთჷრეხ ი კათხს ქა დო
Line of edition: 27    ლაჰო̈დნეხ მინე შელდს. ეჩქად ხვა̈დინას (var. ხვა̈ჲდინას) ფაყვს ჟ'ესგემხ, ჩანჩალს
Line of edition: 28    ხათრეხ. საყნა̈შ კათხ ქა იზგჷრე ამჟი. საყანუნღო ხეჭმენი ჩა̈რინგ: "ჩა̈რინგიშ
Line of edition: 29    მა̈ლდშოვ ლჷმზჷრე ლი ალ მეზგემ ერდგვილ ი ამეჩუ მერდე მა̈გ".
Line of edition: 30    ჩა̈რიგუნღო წუ̈ლიშ დიეშ ი მუეშ ლა̈მზჷრა̈ლი ხეჭმენი, ეჩქანღო ხეჭმენი
Line of edition: 31    წუ̈ლიშ კათხ. ალის ხა̈ჭმინე თვითან წუ̈ლ, ამრე მაშენე ლჷჴმა̈შ ა̈რა̈ყ მა̈ჲ ჩუ ხეგნი
Line of edition: 32    მეზგა, ეჯის: ჰედ თვირ, მადეი ნატხან. თვითან წუ̈ლ ჩი მჷთრა სგვბინთექა ქა
Line of edition: 33    იხრესი, მიჩა შუვშ ხა̈ჭმინე, ვოდე ქა ხეშდენი. ალი იჩვმინი, ეჯღ'ერე კა̈ნდ
Line of edition: 34    ქვერწლა̈რე ლიშდმე მჷქარშვ ლი ი ღვეშგიმპილს წუ̈ლიშ კათხ ლჷჴმა̈შ ა̈რა̈ყშვ
Line of edition: 35    ხეჭმენი ი "ქა როქ ნა̈რდ ა̈დქა̈დის ი წუ̈ლიშ მორიდა̈ბ როქ ხოშა ლა̈ხერი",
Line of edition: 36    თვითან ჯი ეჯღა ხეჭმენი. ამ წუ̈ლიშ კათხა̈შ ლა̈ჭმინჟი ჲერვალე წუ̈ლიშ ქახიქაშ
Line of edition: 37    ნა̈თი მა̈ხეღვაჟ ფაყვშვ ქა ხეჭმენი ლაცლას, სიმაქა̈რს ი მა̈ხეღვაჟა̈რს, ი ჲესვა̈ჲს
Line of edition: 38    მა̈ზუ ხაკა̈ფ, ეჯი წუ̈ლიშ საჩქვა̈რს ა̈დისგ მა̈გ ფაყვთეისგა: ჲერ ვარჩხილს, ჲერ
Line of edition: 39    იშგან საჩქვა̈რს: მჷსკა̈დს ი ამკა̈ლიბს. წუ̈ლიშ კათხს ქა ხეშდენი, ეჩქას ლამარიაშ
Line of edition: 40    კათხს ხა̈ჭმინეხ. ამიშ ქა ლიშდხალდ სიმაქა̈რ ჟ'ამარახ წუ̈ლს ი ტაბა̈გს ჟი იცხემხ,
Line of edition: 41    ტაბა̈გ ჩუ ლჷგ, ეჩქას სიმაქა̈რს ი მა̈ხეღვაჟა̈რს ლაღრალ ი ლაშპა̈რი ხარხ.
Line of edition: 42    ამქადი-ამქად ჩუ ირჰი. ტაბგიშ ნაცხემუნღო ჲერვალე წუ̈ლიშ ნა̈თი მეა̈̄რას ხებჷრგი
Line of edition: 43    წუ̈ლს ი ყვერბ-კჷრკა̈ნდ ლერსგვანთე ქა ხა̈ჭმინე წუ̈ლს. წუ̈ლ სგვებინ ახყახ ი
Page of edition: 178  Line of edition: 1    ღვეშგიმ სადამიშ ლაღრალშვ ქა ხეჭმენიხ ი ამჟი ქა ჴიდეხ ყორქა. ამეჩუ წუ̈ლს ჟი
Line of edition: 2    ხასგვრეხ ჩაჟვ, მარე წუ̈ლიშ ლასგვრა ჩა̈ჟ ჭაშო̈მ ხეკვეს ოხზჷზას. წუ̈ლს ჩაჟვ ჟი
Line of edition: 3    ხასგვრეხ, ეჩქას მა̈ხეღვაჟა̈რ თოფა̈რს აკვანეხ ი ღაღრალშვ ესყახ ლა̈მთილა̈შ ქორთე.
Line of edition: 4    ეჩეჩუ ლა̈მთილთეისგა იჰია̈ლხ, ეჩქას ლიღრალს ი ლითოფს ლა̈ჲდ გუნ
Line of edition: 5    ხოჴმა̈შიხ. ყორთეჟი ჟი ინზო̈რიხ, ეჩქას ლა̈მთილა̈შ ყორჟი ხა̈ხვიესგხ კარვა ფექს,
Line of edition: 6    ლეტვრა მუტვარს ი ამეჩუ სგა ა̈ჲნეხ წუ̈ლს ი აშხვ შუვშ კარვა ჟი ხონჭჷთხა ი
Line of edition: 7    ლეტვარ, მერმა შუვშ ბეფშ ნაღვჟურ ხაყა, ეჯჟი ყვერბ-კჷრკა̈ნდ ლერსგვანთე ქა
Line of edition: 8    ხეჭმენი. ღვეშგიმ სადამიშ მუქვისგა ხაჭიმხ. ეჩქანღო ჭაშო̈შ ლჷწსე ჲერვა̈ჲ ლი,
Line of edition: 9    ეჯის დინაშ აფხნეგა̈რ ჩვასგვრეხ ი მაყანს ჩუ ხორგივეხ. მაყან ხაჟხა აი ალის:
Line of edition: 10    დინას ხაჰვდიხ ლამუარ ლა̈მთილთე დია̈რს ი ა̈რა̈ყს ი მა̈ნკუშ ტაბგობს ლეჭშჷრია̈შ
Line of edition: 11    ქორს ამნოშ ხეჩომხ ჭაშო̈მ ლჷწსოლს ი ამ ტაბგობჟი დინაშ აფხნეგ და̈რ ისგვრი
Line of edition: 12    ჩუ ი მესიპდი დინაშ აფხნეგა̈რ გარ იგნიხ. ეჩქანღო ლეჭშჷრია̈შ ქორშა̈რ ჰა̈ში
Line of edition: 13    ტაბა̈გს ხოგემხ წუ̈ლიშ აფხნეგა̈რს. ალ ტაბგობჟი წუ̈ლს ხოდისგხ სგვებინჩუ ტაბაგჟი
Line of edition: 14    ჟი მებჴვა ქუთს ი ეჯ წუთს იღეშგალხ ჭა̈შ ი დინაშ აფხნეგა̈რ, ჲერვა̈ჲ მოშ ხონკი
Line of edition: 15    ესფხიჭისგხ. ჭა̈შ ლახ ოთღეშგ, ხოხალ როქ, ერე "ხოშა მახვშიდ ჭა̈შ როქ ირდი"
Line of edition: 16    (var. ხოშა მახვში ჭა̈შ ირი როქ) ი დინაშ აფხნეგ ლახ ოთღეშგ, "ხეხვ როქ ირი
Line of edition: 17    ხოშა მახვში", ეჯი როქ ხოხალ. ხა̈ცცობუნღო ლა̈ხირუ̈ლ ი ალ ლა̈შდრალ ლი,
Line of edition: 18    ლათოფ (var. ლითოფ). ეჩქანღო ლაგურგუ̈ნალთე ღჷრიხ.

Line of edition: 19       მარე ამეჩუ დინაშ აფხნეგა̈რ ლიხ ხოშა პა̈ტივ ლეჩვემ. დინაშ აფხნეგ სიმაქ
Line of edition: 20    ი მა̈ხეღვაჟ მა̈გ თხუმთე სგურხ ი იშგენ ლჷწსე მერმახენ სგურხ. მა̈ჲ მოშ მეზგე
Line of edition: 21    ა̈ნჷნბეცისგ, გუნ პა̈ტივს ხეჩო. ტაბა̈გჟიშ კათხა̈რ იმვა̈ჲჟი დინაშ ლამუარა̈შ ქორს,
Line of edition: 22    ამეჩუი ამჟი ლი წეს. ეჯის ქამჩუ დინაშ დიეშ ი მუეშ სა̈დღინძელოს ხა̈ჭმინეხ ი
Line of edition: 23    ადა̈იდ ჭაშო̈მ დიეშ ი მუეშ. წუ̈ლ ლა̈მთილა̈შ ქორს ტაბგობჟი, ი ეჩქადი, ვოშვა̈ჲდ
Line of edition: 24    შუმიშ ლერექვ ხეღვენი, ჩი ქა იცადუნე, ალის იჩო ამჟი: მიჩა აფხნეგ ლაცლა
Line of edition: 25    დინოლ ქა ინჴრინეხ ეჩშელდჷნ მერმა ლარდათე, სგა ხა̈ქვ, ეჯა̈რს ქა ხა̈შყვჟეხ ი
Line of edition: 26    მერმა შუ̈მიშს სგა ხაქვემხ ი სგა ინჴრინეხ ეჯშელდჷნ ქორთე, იმგვა̈ჲ ხა̈ლხს ტაბა̈გ
Line of edition: 27    ხოგ ი ლა̈ხირუ̈ლ ხარ.

Line of edition: 28       მეგურგუ̈ნალს (წუ̈ლს ი ლეჭშჷრის ხენჴრენიხ სიმაქ მა̈ხეღვაჟ გარ.
Line of edition: 29    ამეჩუ ჲერვა̈ჲ ხოშა მალტა̈რ ლაცლა ხარხ, ეშხუ სიმაქ ი ეშხუ მა̈ხეღვაჟ, მჷსკდა̈რე
Line of edition: 30    მჷცადუნე ხარხ ი ალა̈რ მა̈ნკუშ გეზლა̈შ მჷპრისდი ხარხ. ნაგურგუ̈ნალუნღო
Line of edition: 31    მა̈ხეღვაჟა̈რ ლათოფს ა̈სყიხ ი ეჯჟი ლაღრალოშ ქორთე ტეხნიხ. ამეჩუ, ჟი ლჷმარე
Line of edition: 32    ლახ ლიხ, ტაბა̈გს ხოგემ მეზგე ი ნა̈ბოზდ ტაბგობ ხარხ ი გუნ ლითუმუნალ
Line of edition: 33    ლითრემ. ყვერბჩუ ლაღრალ ი ლაშპა̈რი ი ლითოფ ჩუ დემეგ ქვეცნი. ნა̈ბოზს ტაბა̈გს
Line of edition: 34    ჟი იცხემხ ი ქვერლა̈რ ღჷრიხ მინე-მინე ქორთე.

Line of edition: 35       აი ქო̈რწლობ ქა მეშდხე.

Line of edition: 36       მა̈ხე ნა̈ჴიდ წუ̈ლს სოფლიშ სიმაქა̈რ ი მა̈ხეღვაჟა̈რ აშგარ ხენყა̈ვხ, ერე ჟი როქ
Line of edition: 37    მად ა̈ხჟა̈რი.


Line of edition: 38 
თენგიზ დადეშქელიანი. მაზერი. ა. შანიძე. 18.იხ. 1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.