TITUS
Svan Chrestomathy
Part No. 204
Previous part

Text: 199 
Page of edition: 181 
Line of edition: 1 
199. ლუხორ


Line of edition: 2       ლუხორ ლი მეზგემ მაბაციშ ნიშა̈ნ. ლუხორს ხოჩა ლჷმბეც მეზგე გარ იჩო,
Line of edition: 3    ჲესვა̈ჲს ფიშირ ჴანა̈რ ხორი ი კვეცენ მასა̈რდ ხოგ, ეჯი. ლუხორს უ̈არ ი
Line of edition: 4    სამზაუნდჷრ ხემარელ მეზგე. ლელხორ ჴანა̈რს მეზგე შიშდ ქამიზალს ა̈გნე ლახვთე ი
Line of edition: 5    მუჟღურდ ეჩეგ ხორი. მუჟღურ, ა̈რა̈ყ ი ლენყე შომა̈ჲ ჟი ლჷმარე ხარ, უ̈არღეთ
Line of edition: 6    ნაგზოშ სგო̈ბინჩუ ა̈ნშა̈ნი ლადეღს, მა̈ჲ ლადეღ ლუხორ იჩვმინი, ეჯის, ამ ლადღიშდ
Line of edition: 7    ჲერვა̈ჲ ეჯ მეზგაისგა ლუხვრა̈შ ტაბგიშ მესგვრე ლიხ, ეჯა̈რ მახა ლელდისგ ი
Line of edition: 8    ლერაქვ იმარეხ ი ლუხორ ლადეღ ლეღვ ი დია̈რ ი ა̈რა̈ყ მა̈გ ჟი ლჷმარე ლი ი
Line of edition: 9    ტაბგა̈რშვ ჩუ ლჷდაწყე ლი ყვერბ ლეჟა, ეჩქას სგა მესგვრა ხოჩამდ ჟი ლჷმარე სგა
Line of edition: 10    ხესგვრიხ ტაბა̈გს. პაპ ჴედნი ი ჩუ აჯგრი (var. ჷჯგრი) ტაბა̈გს, ალა̈რ სგა ხასგურხ
Line of edition: 11    ეჯჟი. მა̈ჲმა გა̈ნზვ ჩუ ხაწვა ზურალს ი ღვაჟმარა, ნახე ი ლეღვჟმა̈რ გა̈ნზ, ჩიგვაშვ
Line of edition: 12    ჩუ იჯგრიხ ლუხორჟი. ამ ლადეღ ლუხვრა̈შ ტაბგიშ მესგვრა მა̈გ ხოშა ფუსდ ლიხ
Line of edition: 13    ი ტაბა̈გხენქა ლეზვბურას ი ა̈რა̈ყს ი ხილ-მა̈ხილს აზზჷრა̈ლიხ ვარგა̈რშალ. ეჩქანღო
Line of edition: 14    ეჯა̈რ ჟი იგნალხ ტაბა̈გხენჟი. ეჯა̈რე ტაბა̈გს ჟ'ანჭურეხ ი ასგვრეხ ლჷწსოლს, ხა̈ლხს.
Line of edition: 15    ხა̈ლხ ამხავი, ე. ი. ლუხორეთეი, ლა̈წსიშვ გარ ჴედნი, მარე ლუხორჟი ჲერვა̈ჲ ნა̈თი
Line of edition: 16    ი ლუნთვირ ჩუ ხერდი ლუხორიშ მუჩო̈მს, ეჯის ჩი ა̈წსი. ლიწსინა̈ლი ლი წეს ამჟი:
Line of edition: 17    ხოთვრი ლუხორიშ მეჩო̈მ მა̈ხეღვაჟა̈რს ი ჩვაშგურანე, ჲა̈რ ლეწსი ხარ ი ჲა̈რ -- მადე.
Line of edition: 18    მეზგახენქა ჟახალჷმდოშ ჲა̈რ ხარ ლეწსი ი შელდშვ ჲა̈რ ხარ ლეწსი. ეჯის ჩი
Line of edition: 19    ლაგას ხა̈გნე. ეჩქანღო მჷწსინა̈ლი ქა ღჷრი ი ჲესვა̈ჲშთე ლუშგურანე ლი, ქა
Line of edition: 20    ხაყლე ჩი. ლუხორ ლი მაშენე ლეხირუ̈ლ სამ ი ვოშთხვ
Line of edition: 21    ლადეღღეთ, ვობა̈შინ ნაგზაღეთ ხეჭყრი ქა ი ლიხირუ̈ლ ი ლიქეიფ ლი ვიწყვდ.
Line of edition: 22    შვანა̈რს ამჟი ხაჯრავახ: ჲერვა̈ჲ ლუხვრა̈შ ტაბა̈გს ხესგვრი, ეჯ ლადეღ მა̈ჲ ხეღვენი
Line of edition: 23    ლეჯგრიდ, ეჯი ეჯაბუასდი ამჟი როქ ხუღვა ეჯის. აი ლუხორ ალი ლი.


Line of edition: 24 
თენგიზ დადეშქელიანი. მაზერი. ა.შანიძე. 7. იხ. 1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.