TITUS
Svan Chrestomathy
Part No. 205
Previous part

Text: 200 
Page of edition: 181 
Line of edition: 25 
200. ლაშდხვალ შვა̈ნისგა


Line of edition: 26       იდგა̈რი მარე, ალი ხემა̈ჲ ქა კვეჰნი სოფელისგა (ი ქა კვეჰნი ამნოშ, ერე ეჯ
Line of edition: 27    ქორისგა ხეხვა̈რ იბნეხ ლიტმურალს ი ლილჭალს, ეჩქას სოფლა̈რ ჟ'ინზორალხ.
Line of edition: 28    ნა̈თი ჲერვა̈ჲ ლჷდგა̈რს, ეჯი ხონკი ღჷრი, ეჩჷნქა სოფლა̈რ მა̈გ აშხვჟი ღჷრიხ.
Line of edition: 29    ხეხვა̈რ სგვებნავ ღჷრიხ სგა ი შიშდ ყორჟი იბნეხ ლილჭალს მა̈გ აშხვჟი. ეჯა̈რ ქა
Line of edition: 30    ხა̈შდხეხ, ეჩქას ღვაჟა̈რ ხეჭმენიხ ი სგა ხეტენტალხ. ეჩქა მოლა ხა̈ნუნღო ქა
Line of edition: 31    ჴედნიხ კალთექა, ეჯ ქორა̈შ ღვაჟა̈რი ქა ხეჭმენიხ ი ხარხ შიშდ ლაშდხვალა̈შ
Line of edition: 32    გვაშემ ლაგას-ლა̈გნას. ლენყე ჰე ჩუ ხოგ ქორს მეზგა, ღვე უგვჰა ლახ ლი, ეჩა
Line of edition: 33    ლექვერთე ლი̄ნეს შიშდ სოფლიშ მა̈ხეღვაჟა̈რ იბრევიხ. ლენყე ჰე მეზგა ჩუ ხოგ,
Line of edition: 34    ლაშდხვალა̈შ ჰარა̈ყ ეჯღაი ჩი ლეყდი ხარ ი ამეღა, ჲა̈ს ხოგ ი ჲა̈ს მადე, ამიშ
Line of edition: 35    ლა̈კვჰალა̈ლითე შიშდ სოფლიშ მა̈ხეღვაჟა̈რიდ იმედეხ ლიზის. სოფლიშ სიმაქა̈რ
Line of edition: 36    ლჷდგა̈რიშ ეჯაბუასდთეშ ლერქვრე ლა̈შხბელის ხარხ შიშდ. არყიშ ფასდ ვარჩხილ ლახ
Line of edition: 37    ხოზ მეზგა, ეჯის ა̈ჲნეხ, ამდეი ქვილჷმგენა. არა̈ყ ჟი ინზო̈რი, მაზუ სა̈ჭირო ლი,
Line of edition: 38    ეჯზუ ი დირიშ ლინყეი ქა იზგჷრი (დია̈რ მა̈ზუ ლი ლენყე ი მაგვა̈რ მეგრე დია̈რ,
Line of edition: 39    ჰედ არა̈ყ ვოშა ზექა̈ჲ ლი ლეყდი, ალი მეგემ მაბაცს ხოხალ). ალა̈რ მა̈გ ჟი
Line of edition: 40    იმა̈რიხ, ეჩქას ლაშდხვალ ლადეღი ჩუ ლჷნშა̈ნ ლი ი ლაშდხვალ სგვებნე ნებოზს
Line of edition: 41    ჯოდიაშ ნა̈თი ჲერვა̈ჲ ხორი ლჷდგა̈რს, ეჯი ეჯ ლეთ ჴედნი მა̈გ ი სოფელისგა წა̈მ ჲერვა̈ჲ
Page of edition: 182  Line of edition: 1    ხარ ი სამხუბ, თვით აშირ დია̈რს ვისპას ა̈ჲნე. აშ მესვფელა თვით ჲერვაშდ დია̈რს
Line of edition: 2    ი თვით ლა̈ხნისგი არა̈ყს -- მეზგემ ქუნჟი. ალის მა̈გ სგა ჴიდეხ, ეჩქას ლჷდგა̈რ-სგვებინქა
Line of edition: 3    ჩუგემხ. ლჷდგარ-სგვებინქა ხეხვა̈რ მა̈გ გიმს ხესგვრიხ. ხოშა მეჩი ღვაჟა̈რ
Line of edition: 4    ქა ჴედნიხ ტაბგა̈რთექა ი ჩუ ხოფანეხ. ეჩქანღო ჟი ხედა̈წყიხ მა̈გ მინე-მინე
Line of edition: 5    ლასგვრას ი კაჩმეგნა ჩუ ხოდისგა̈ლიხ დირა̈რს ი წჷდაუ არა̈ყს ხა̈ჭმინეხ ჩი ჴედჟი.
Line of edition: 6    ეჩქანღო ხა̈ლხ ჟი იგნალ ი მიჩა-მიჩა ქორთე ღჷრი. ეჩქას ჩუ ისგვრიხ კაჩმეგნა.
Line of edition: 7    ეჯა̈რ ჩუ იხარჯალხ, ეჩქანღო მინე-მინე ქორთე ღჷრიხ. ეჩეჩუ სედნიხ ეჯ ლეთ
Line of edition: 8    ნაჯოდ ნა̈თია̈რ ი ქორშა̈რ.

Line of edition: 9       მერმა ლადეღ ქორს ხოჩამდ ქ'ადაწყეხ ყვერბს ი მოლა ხა̈ნუნღო იბნე ხა̈ლხ
Line of edition: 10    ლიჴედს. კუბ კა̈ცხა̈შ ლეჯა ლჷგ. თხურმა̈შმჷყ ხოშა ხოზ ჟი მუტვა̈რ.
Line of edition: 11    ეჩეჩუ მუჯვრას ხოსვემხ, ეჩა ჴა̈შვჟი ხორიკხ იარა̈ღ ლჷდგა̈რიშ, მიჩა ლეჯგრი ლერექვ
Line of edition: 12    ნა̈ნკდ ნახა̈ზდ ჟი მჷსყე ლა̈წევ ა̈გის ხარშა. ნა̈თი ზურალ მა̈გ კეშ ქა ლჷსპე ი
Line of edition: 13    ნეფყუ ჩუ მეკდე კჷრკა̈ნდ ხასგურხ კუბს ი ხელჭალხ თითოლჟი. შომა̈ჲ მეტენტალა
Line of edition: 14    ჴედნიხ ქამშხენისგა, ეჩქას კუბს მესგვრა ხეხვა̈რ მა̈გ აშხვჟი იბნეხ ლიტმურალს.
Line of edition: 15    შომა̈ჲ ხა̈ლხ ფიშირ ინზო̈რი, ეჩქას ხეგნიხ ლაგვანას. ჩიქი ღვაჟმარემ მუგვანე,
Line of edition: 16    ვოშვა̈ჲდ მოშ მუგვანე ა̈ხფა̈სიხ, ეცშელდჷნ; ეშხუ მუჟო̈ღვ ხოჩა მჷჰერ თხუმხენ
Line of edition: 17    იგნი, ეჯის ხეჭა̈რიხ ქა კა̈ცხა̈შჷნეშდ ყორაშ პილთექა ი ჟი ხადაწყახ მა̈გ, ეჩქას
Line of edition: 18    იშგენ ხა̈ლხ მა̈გ მუჭხვიდ ა̈რიხ. ეჩქას იბნე მუჟო̈ღვ ი მერმოლუი მა̈გ ჰერჟი
Line of edition: 19    იბნეხ ლიგვანეს ი აშხვჟი ირყინეხ ტო̈ტს. ლაგვანაჟი ყჷლეხ აი ამის: "ი̄ვა̈ჲ მია̄,
Line of edition: 20    ვა̈̄ჲ, ი̄ვა̈ჲ მიშგა ლირდე̄ს, ვა̈ჲ!" ამის ყჷლეხ სუმინ, კაჩლაგნოშ, ეჩქანღო ჩუ
Line of edition: 21    იჩქო̈ვიხ მა̈გ ი სუმინ ეჩქა ყჷლეხ ჩო̈ქჟი ალისიდ. ეჩქანღო ჟიიდ იგნალხ ი სუმინ
Line of edition: 22    ადა̈იდ კაჩუშიდ ყჷლეხ ეჯისიდ. ალი ლახ მარე ფიშირ ინზო̈რი, ურინ ხა̈გნეხ, მადეი
Line of edition: 23    სუმინი. ეჩქანღო ხა̈გნეხ ზურალა̈შ ლაგვანას. აი ზურალა̈შ ლაგვანა ამჟი ლი:

Line of edition: 24       ითშიხ ხოჩა მელჭალ ზურალს. ალის თხუმხენ ა̈გნეხ. ეჯის ქა ხეჭა̈რიხ იშგენ
Line of edition: 25    ხეხვა̈რ, იმა̈ჲჟი ღვაჟა̈რ ლჷგანხ, ეჯჟი. მა̈ნკუ კაჩუშ ი ეჩქანღო ჟი ხაჩქვევიხ.
Line of edition: 26    მუჟო̈ღვ ზურალ იბნე ლილჭალს. მა̈ნკუ ლა̈დიშ ლეშდხვი ჲერვა̈ჲ ლი, ეჯის ილჭე,
Line of edition: 27    ეჩქანღო ხეჭმენი ძგიდხენ ი ჲერვა̈ჲ მოშ ლახშყედნი, ეჩა ნა̈თი ლჷდგა̈რს ი ეჯ
Line of edition: 28    ჴევისგა̈შ ლჷდგა̈რს მა̈ჲ მოშ ხოჩა თვალა̈შ ანსახთისგა ლექვისგდ, ქა იშელდე ჩი.
Line of edition: 29    ვოშვა̈ჲდ ლა̈ჭს რექინე, ეჩშელდს ტო̈ტს იყერ ჯი ი მერმა ხეხვა̈რი. მერმე
Line of edition: 30    ხეხვა̈რ ეჯშელდჷნ ყითს ყოხერხ. ალი ქა იზგჷრი, ეჩქას ტაბა̈გს ამარეხ ლჷდგა̈რ
Line of edition: 31    გა̈ნხენჩუ. არა̈ყსი ჷგემხ ეჩეჩუ ი პაპს ხა̈გნეხ ჟი. პაპ ხეგნი, ეჩქას ნეცინ ლეტვროლს
Line of edition: 32    ატვრეხ ფიშირს ი ხა̈ლხ მა̈გ მუჭხვიდ იგნი, კუბს მესგვრა ხეხვა̈რ კაჩ იგნიხ ი პაპ
Line of edition: 33    ხეჩო წასაგებას. ალი იზგჷრი, ლჷდგა̈რს შიშდ ლაშდხვით' ა̈ჲნეხ. სგვებინ
Line of edition: 34    ხეხვა̈რ ხოჟო̈ღვხ ლა̈კილელშვ ი ლალჭალშვ, ეჯა̈რს მიჩა ნა̈თი ღვაჟა̈რ ესჭიმხ
Line of edition: 35    ლატმურალშვ. ეჩქანღო პაპა̈რ ესჭიმხ ი ეჯა̈რდ ლჷდგა̈რ ოსჭიმხ. ალის ესჭიმხ ხა̈ლხ
Line of edition: 36    ზა̈რშვ. საფლა̈ვჟი ხეხვა̈რ (გეზალ, მადეი დაჩუ̈რ) საფლა̈ვთეისგა ა̈სკნეხ
Line of edition: 37    ლალჭალოშ. ეჩქანღო ჟი იტხეხ ი ამქად ლჷდგა̈რსი ა̈სგვჯინეხ ი ალის ჩვაშდხვიხ ი ვერს
Line of edition: 38    ჟი ხაქვემხ, ეჩქას ზურალ მა̈გ საფლა̈ვ-კჷრკა̈რდ ჟი ხესგვრი ი კჷრკა̈ნდ ღვაჟმარემ
Line of edition: 39    ლაგვანასიდ ხა̈გნეხ იმა̈ჟი ქორს. ალი ქა იზგჷრი, ეჩქას ჲერხი მა̈ხეღვაჟა̈რ
Line of edition: 40    საფლა̈ვს აშდბუნეხ ჩუ. იშგენ ხა̈ლხ სგა ტეხნი მეზგემ ჰა̈ზვთეისგა ი ამეჩუ ჟი
Line of edition: 41    ხედა̈წყი მა̈გ ლასგვრას ჴედნი-ჴედნ, ზურალ ნა̈ნკდ ი ღვაჟმარე ნა̈ნკდ. კაჩმეგნე ჲერვა̈ჲ
Line of edition: 42    ლიხ, ეჯა̈რ მა̈ნკუ დია̈რს ჴიდეხ კალთექა, ეჯის ხორგივეხ მარემ ქუნჟი თვითს,
Line of edition: 43    წჷდაუ არა̈ყს ჴიდეხ სტამნა̈რშვ ნენსგათექა ი მა̈ხეღვაჟა̈რს მიჩა-მიჩა შედ ხუღვა ჩი:
Page of edition: 183  Line of edition: 1    ჲერს ხოშა ფაკნი, ჲერს კარვა, ჲერს ვედრა, ალა̈რს ქა ხოგვეშხ წჷდაუ
Line of edition: 2    სტამნა̈რხენქა ი ეჯა̈რ მინე-მინე ჴედთე ა̈ინეხ. სიმაქა̈რ ჯარა̈რშვ ღერღილს ჴიდეხ ი ტოტშვ
Line of edition: 3    დირა̈რჟი ეჯის ხოდისგხ ჩი. ჩუ ნატბაგალუნღო ხა̈ლხ ზჷმ-ზჷმშვ ფხეჟნი ი
Line of edition: 4    კაჩმეგნე ჲერვა̈ჲ ლა̈სვ, ე. ი. მესიპ (var. მესპა), ეჯა̈რ ისგვრიხ, ეჩქას ჩუ ი ჩუ იხარჯელხ.
Line of edition: 5    ეჯ ლეთ ჯოდიახენ ნაჴედ ნა̈თი ჲერვა̈ჲ ჩუ სედნი, ეჯა̈რ, ისგახიქაშ ნა̈თი, ეჯ ლეთ
Line of edition: 6    ჩუ იგნიხ ეჯ მეზგაისგა ჩუ უყვნად. მერმა ლადეღ ჰამს ჲერვა̈ჲ ნაჯოდ ჩვა̈სდენო
Line of edition: 7    ეჯ სოფელისგა, ეჯა̈რს ი ა̈რიშ მჷთრე ჲერვა̈ჲ ლი, ეჯის ჩი ქა ხეშმიხ ი
Line of edition: 8    ჩვატბა̈გიხ. ეჩქანღო ქა ფხეჟნი მა̈გ.

Line of edition: 9       აი, ლაშდხვალა̈შ გვეშ ქა ლჷზგჷრე.


Line of edition: 10 
თენგიზ დადეშქელიანი. მაზერი. ა. შანიძე. 7. იხ. 1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.