TITUS
Svan Chrestomathy
Part No. 206
Previous part

Text: 201 
Page of edition: 183 
Line of edition: 11 
201. ლეგემ


Line of edition: 12       მახა ლჷდგა̈რიშ ლეგემ ხა̈მთქვარ შვანა̈რს. აი ალი მა̈ჲ ლი:

Line of edition: 13       მახა ლჷდგა̈რიშდ ატაბეხ სკა̈მ-ტაბა̈გს, მადეი ფიჩქილდს ი ლჷდა̈ფ სკა̈მს.
Line of edition: 14    ვოდე დო ლეგემს გა̈ნთე ჷგემხ, ეჩქად ჩი ჰამს ი ნებოზს ეჯ ტაბა̈გვშ ხოფანეხ მახე
Line of edition: 15    ლჷდგა̈რს. ალა̈რე ლაგამ ლი, ყვერბჩუ მაშენე თხუ̈მლასგვრა იმგვვა̈ჲ ირი, ეჩეჩუ
Line of edition: 16    ი ალა̈რჟი ლჷა̈რ მარა დეი ლასგვრად ასგვრეხ ი დეი ტაბა̈გდ ხოგემხ, ვოდე დო
Line of edition: 17    ლეგემ გა̈ნთე იგი. ლეგემ ზავ ლი წეს. ჲესჷნ ზავჩიქდ გა̈ნთე იგი, ჲესჷნ ზავი ქა
Line of edition: 18    ხოქა̈ბი: ალი ხოხა მეზგემ მა̈ღვენას. ლაფანაშ ტაბგიშ ლიკედს მეზგე ხონკი ლახე
Line of edition: 19    იმბეცი, ეჩქას ეჩქანღო ამჟი ლიფანე მადმა ლი ი სკა̈მ-ტაბა̈გ ქორისგა იშგან
Line of edition: 20    ბა̈რგლაშ ლაჴმა̈რიდ იმა̈რგხ. ლაფანაშ ტაბგიშ ლიკდალჟი მეზგა ხეკვეს ხადეს
Line of edition: 21    ლჷმარე ლა̈ჲსა, ლენყე ი ა̈რა̈ყ. ეჯი ლჷმარე ხარ, ეჩქას ა̈წსი ნა̈თია̈რს, მეზვბელა̈რს,
Line of edition: 22    პაპს ბიდე ი ეჯ ლეთ ჟი ლჷმარა ა̈რა̈ყსი, დია̈რსი ი ლეღვს ჩუ ხოჯჷრიხ. გვა̈მიდ
Line of edition: 23    სგახიქაშ წა̈მ ლახ მადე ხარ ლჷდგა̈რს ზურალ (ჰედ წა̈მ დაჩუ̈რ, მადეი დი, მადეი
Line of edition: 24    გეზალ), ეჩქას ეჯ ლეთ ჲერვალე ნა̈თი ღვაჟმარე მეშხა ნეფყუს ჟი ხოკედ ლჷღფჷრე
Line of edition: 25    ზურალს, ი ხომზჷრი, ერე ამუნღო ღერთემ თეთვნად გარ ესურდუნას ი ნეფყუს
Line of edition: 26    ლემასგვთე აკვანე ი ამჟი ხაყლე: "ისგუ ი ისგუ ნა̈თია̈შ მა̈რცხ ი მავინ ამჟი როქოვ
Line of edition: 27    ოლშიხელი ლემასგვისგა". სერ ეჩქანღო ზურალ თვეთვნა ნეფყუს იჭო̈ნი.
Line of edition: 28    გვა̈მიდ სგახიქაშ ნა̈თი ხეხვა̈რ ხვა̈ინ ლაფანაშ ტაბგიშ ლიკდალდ იურწყვევიხ
Line of edition: 29    ლჷდგა̈რს ი ვიშკს ეჯ ლეთ გარ იფშვდეხ.

Line of edition: 30       აი უშკემ ლიფშვდე ამჟი ლი წეს: მა̈ჲ დო შედშვ ირი ა̈რა̈ყს ხაჰვდიხ ურწყვს,
Line of edition: 31    ეჩთეისგა ჰედ ლეღვიშ (var. ლაღვემ) ნა̈კიცს, ამდეი თაშვემ ნა̈ფიცხვს აკვანეხ.
Line of edition: 32    ი ეჩქანქა ურწყვ ქა იხული ი ვიშკ მეფშვდე ხარ. ეჩქანღო ლჷშრავა იზბი.


Line of edition: 33 
თენგიზ დადეშქელიანი. მაზერი. ა.შანიძე. 7. იხ. 1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.