TITUS
Svan Chrestomathy
Part No. 207
Previous part

Text: 202 
Page of edition: 183 
Line of edition: 34 
202. კონჩხა̈რ


Line of edition: 35       კონჩხა̈რ ლი ლჷდგა̈რიშ ქუნე გვეშ, ხედვა̈ჲ იჩვმინი ნადგარუნღო მუჟღურ
Line of edition: 36    ხეჭმენი, ეჩქას, შომვა̈ჲ ქვილჷმგენე კონჩხა̈რჟიშ ლა̈ჲსაჲქ ჩუ ლულგვარე ლი ი
Line of edition: 37    ა̈რა̈ყ ი ლენყე ლჷმარე ლი. კონჩხა̈რჟი, მუყვჟი ჲერვა̈ჲ, ეჯი ჴიდე ყვიჟს, ა̈რა̈ყს
Line of edition: 38    ი ლენყა. კონჩა̈რთე ლაშდხვალშალ უწსად დარ ღჷრი. ლჷწსე გარ ღჷრი მა̈გ.
Line of edition: 39    მიჩა სოფლიშ იმა̈ჲჟი ლაშდხვალ სგვებნე ლეთ, ესე იგი ტჷტა̈შ დირობ ლეთ,
Line of edition: 40    ამჟი ღჷრიხ მეზვბელა, მარე ა̈ჲნეხ დემგვაშ ი კონჩხა̈რეშ მუჩო̈მ მეზგე ხოჯა̈ბ ეჯ ლეთ
Line of edition: 41    სგაშხენ მადას კონჩხა̈რჟიშ ლა̈ჲსოლე ი დია̈რს ი ა̈რა̈ყს ხამნე ი ხათრე ი ეჯჟი
Page of edition: 184  Line of edition: 1    ნახარჯალუნღო ქა იპა̈ნტი ხა̈ლხ მიცა-მიცა ქორთე. მერმა ლადეღ ჰამს ეჯ ლეთ
Line of edition: 2    მელღვად ქა ლჷთიშა̈რ დოსდ ჴედნიხ სგა, კონჩხა̈რიშ მეჩო̈მ მეზგათე ი ჟ'ამარეხ
Line of edition: 3    ლაღვემ ლაჯაბ ზამა̈რს. ლაღვ ჩვაჲსურეხ ი სგა ხაგემხ ზამა̈რთეისგა ი ხობნეხ
Line of edition: 4    ლილმესგის ჩუ ლიჯბალდ. ჩუ ნაჯაბუნღო ქა იკედხ ი ჩვა̈ლღვეხ ლაგა̈ფიშ შელდჟი ი
Line of edition: 5    მელღვას მა̈გ ლჷმარე ხარხ, ეჩქას ლჷდგა̈რიშდ სგვებნავ მა̈გ მჷმარე ხარხ ლერექვ
Line of edition: 6    ი ლელდისგ, ჟ'ასყიხ ნახა̈ზდ, ე. ი. ჰასკამჟი ლერქვა̈რს ხადაწყეხ ეჯჟი შუ̈მიშდ,
Line of edition: 7    ერე ლახთოვშ (var. მუგვდა) ლჷა̈რ სგურ ეჩეჟი. ალის ტაბა̈გს ხოგემხ
Line of edition: 8    სგვებინჩუ, მა̈გ ნუკვიშ ლეზვბა̈რ ჟი ხადაწყახ, ეჯჟი. პაპ ჴედნი ი მა̈ჲ ლჷჟახვინე ლი
Line of edition: 9    ამლადღიშდ ალ ლჷდგა̈რიშ ლეჯგრიდ: ლეღვ, ა̈რა̈ყ ი დია̈რ ი ლერექვ ი ნახე,
Line of edition: 10    ვარჩხილ, ხილმა̈ხილ, ალი მაგ ნახაზ-სგვებინჩუ ტაბგა̈რჟი ხადაწყა. ალის ჩუ
Line of edition: 11    ჷჯგრი, იჩუ ნაჯჷრუნღო პაპს ხაჰვდიხ ჲერხის, ეჩჷნქაშს ხა̈ლხს ასგვრეხ ჩუ ი ჩუ
Line of edition: 12    ხორგივეხ ლეზობ ი ლეთრა. ნატბაგალუნღო ხა̈ლხ ქა ფხეჟნი. ა̈რყიშ მჷთრე
Line of edition: 13    ჲერვა̈ჲ ლი, მაშდჷმა̈რ ესღრი ქორთე. ხეხვა̈რ ბოფშა̈რ მინე ნამსოდა̈რსი ქ'ა̈ჲნეხ
Line of edition: 14    ქორთე. ეჩეჩუ სედნიხ კაჩმეგნა, მესპა, ი ნაჯოდ ლჷწსოლ. ხა̈ლხიშ ქა ნა̈ფხეჟუნღო
Line of edition: 15    ისგვრიხ კაჩმეგნა, მადეი მესპა ი ეჯა̈რ იტბაგალხ. ალ ტაბგობს ხაჟხა ღო̈შგე
Line of edition: 16    ტაბგობ.

Line of edition: 17       მერმა ლადეღ, იმვა̈ჲჟი ლაშდხვალ მერმა ლადეღ, ამჟინაჯოდ ლჷწსოლ ი
Line of edition: 18    მეზვბელა̈რ სგაიდ ტეხნიხ ნაკუნჩხ მეზგათე ი ა̈რა̈ყს ი ნა̈ჭმუნს ხოჴდეხ ალა̈რს. ალი
Line of edition: 19    ქა იზგჷრე, ეჩქანღო ქა ფხეჟნი მა̈გ კონჩხა̈რ ქა ლჷზგჷრე.


Line of edition: 20 
თენგიზ დადეშქელიანი. მაზერი. ა. შანიძე. 7. იხ.1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.