TITUS
Svan Chrestomathy
Part No. 208
Previous part

Text: 203 
Page of edition: 184 
Line of edition: 21 
ბ) გადმოცემები, ამბები
Line of edition: 22 
203. რიჩგიანრე ლიფუსდ ი ხვეტობ


Line of edition: 23       ამეჩუ, მაგარდელისგა, იზგახ სორთმანშერ, გვა̈რდრიჩგვიანა̈რ. დიდარ
Line of edition: 24    მეზგე ლჷმა̈რხ. ათხე ეჯი ადგილ ნიშგე გუა მილდიანს ხურვე. ალა̈რ, რიჩგიანა̈რ,
Line of edition: 25    მინ ყორჩუ და̈ს ლუმფიშვდინხ (\ ლჷმფიშვდინხ). მა̈ნკუ დაჴლა̈შ ეშხუ ნაშგვ
Line of edition: 26    ხა̈კვდახ.. ეშხუ დაჴჷლას სგა ლჷმიესგვინხვ ი და̈ს ხა̈ჭვდელახ, ეჯჟი ჩუ ლჷმჷშგინხ.
Line of edition: 27    ეჩქანღვე თვით ფირვს ლჷმიესგვინხვ ქორთე ი ეჯის იშგივხ. ეჩქანღვე ეჯზუ
Line of edition: 28    ოხკიდახ ლილჴმაშ, ერე ეჩქანღვე სიმაქა̈რსი დემ ლჷმფიშვდინხ მინე ყორა̈რჩუ,
Line of edition: 29    ეჯა̈რსი ძალოშ სგა ლჷმიესგვინხვ ქორთე ი ხოლამ ხაჩმუნახ.

Line of edition: 30       დრო̈ვ ომჩედ, ეჩქას ადა̈იდ ხოსა ჴამსა ოხკიდახ, ჩიმი ვეთხმალს ქორთე
Line of edition: 31    ხა̈სპუნახ, და̈ს იმგვაშ ხაჭვდალახ. თჷმი ახჴედა სოფელს. სოფელისგა ლჷმზიგხ ხოჩა
Line of edition: 32    მაროლ: ილამაზ ი ჯაშავ მილდიანა̈რ. აშხუნ ჯაშავ მილდიან დაბთე ომჩედელი
Line of edition: 33    ლაშდაბთე. ეჯის ხოჩა თვეფ ხა̈ღვენა. ალის აყმურზა რიჩგვიან ვა̈რგ ხაწდა ი
Line of edition: 34    ხოქვა: "მიჩა თვეფ ქა ესეროღვ ა̈ხფიშვდ მიჩა ფაყვს!".

Line of edition: 35       ქა ოხფიშვდა ჯასავს ი ქა ხოყირა ფაყვდ. ეჩქანღვე აყმურზას ხოქვა ჯაშავიშდ:
Line of edition: 36    "ალ თვეფ ესერ მიჩუ ლახვემ!" ჯაშვს მადე ლოჰოდა. ეჩქას აყმურზა ძალოშ

Line of edition: 37       ხოღაშგ ესნა̈რინ თვეფს. ამჟი ჯასავს თვეფ ქა ათშყედა ი ქა ხოყირა ფხულაქა
Line of edition: 38    აყმურზაშდ. აყმურზას ფხულე ქა ათქვეცა. ჯაშავ ქა ათჩედა.

Line of edition: 39       აყმურზას ჲორი მუხვბე ხა̈რდენა: ისლამ ი ციოყ. ეჯა̈რ ჯაშავს ლედგა̈რიდ
Line of edition: 40    ხეთხელივხ (\ ხა̈თხელინახ). აყმურზაშ მუს აზნავირ ხა̈შხენა. ეჯის მილდიანა̈რდ
Page of edition: 185  Line of edition: 1    ოხჭირა, ერე: "ქა ესერ აჩადხ ამხენქა, ეჩქას ესერ დემეგ ხოგხველიხ, ამდე ესერ
Line of edition: 2    დაგრობს ესერ ხაფსეხ".

Line of edition: 3       ჯაშავ მილდიან ქა ომჩედელი სოფელხენქა ლატლითე. ეჩეჩუ ეშხუ ზა̈
Line of edition: 4    ახარა, ქორთე დემეგ ლჷმზელალ. აშხვ ზაუნღო ოხბინა ქორთე ლიზელალ. ალი
Line of edition: 5    აზნავირს ჩუ ოთცხვირა ი ოხჭირა მილდიანა̈რდ, ერე "ათხენღვე ლუჟმად ესერ
Line of edition: 6    ირდიხ".

Line of edition: 7       აშხუნ აყმურზად ი მიჩა მუხვბემ ჯაშავს ჩუ ოთდარჯეხ ქართვა̈ნი ჩუქვან
Line of edition: 8    ჭალა̈ჲსგა. ამექა ეჩქას ბოგ ხა̈დენა ქართვა̈ნითე ქა ლიზ. ჯაშავდ ისლამ ჩუ ადგა̈რ
Line of edition: 9    ამეჩუ ი აყმურზად ხანჯა̈რ ხა̈ძგერ ჯაშავს. ამჟი უშხვარ ხაბურგენახ. აყმურზას ქა
Line of edition: 10    დემ ლუმფიშვდინ ჯაშავ. ამ დრევჟი ამთეჩუ ომჴედ მილდიანრე ხოშა ბაბა ყაზა.
Line of edition: 11    ალის აყმურზა ჩუ ოთდაგრა. ამეჩუ ლჷდგა̈რ ლჷმა̈რელი ადა̈იდ მილდიანრე ჩიჟე
Line of edition: 12    -- ყანსავ გაბულდან.

Line of edition: 13       ყაზას ჟი ოხმეჴრავნა სოფელდ. ამჟი ეჩთეჩუ (\ ეშჩეჩუ) ჩუ ომჩედელიხ
Line of edition: 14    ჯაშავიშ მუ მჷრზა, ძუბა, ამა̈იზ ი სოფლა̈რ. ჯაშავ ჟი ოხჴიდახ საკა̈ცხშვ. ამჟი
Line of edition: 15    ყანსავ, აყმურზა ი ისლამ ეჩეჩუ ოთხცვირახ ლჷდგა̈რ.

Line of edition: 16       მილდიანრე ლჷდგარუ დაბა̈რჟი ახღვენახ. ეჯჯი (\ ეჯჟი) ალის აზნავირ
Line of edition: 17    ხა̈წდა ი მჷრზაშდ ლოხტულა: "ხოლა ჩორგა̈ მჷრზა, ეზერ ლუხორ ესერ მადე ხარა
Line of edition: 18    ლა̈დი?!"

Line of edition: 19       ეჯის ლოხტიხა: "ამკა̈ლი ლუხორ მიჩ ესერი ჩუ ხარ, მიცა გეზლაშ თვეფ ი
Line of edition: 20    ხანჯა̈რ ესერ მიჩ ხორკა, მერმე გეზლა̈შ ლუვორჩხილ დაშნა̈ ი თვეფ ესერი მიჩ
Line of edition: 21    ხუღვე!" ალი ხოქვა აზნავირიშდ მჷრზას.

Line of edition: 22       ეჩქანღვე რიჩგიანარ დეშ ოლგენელიხ მაგარდელისგა ი ომჩედელიხ ლეჟა
Line of edition: 23    ბეჩვითე -- ნა̈შთქოლთე. ეჩეჩუ ადა̈იდ ახჴედახ ლიდგარელ ი ეჩქანღვე ჟი
Line of edition: 24    ომხვეტელიხ.

Line of edition: 25       მილდიანა̈რს ეჩქას ეცერხენ ახჴედახ მარე ი ქა ოთჰერახ ეცრიშ ვარგა̈რს.
Line of edition: 26    ეჯა̈რ ქა ლახჭვედნახ: "იმღა როქ ახჩჷდახ დაგრობ რიჩგიანა̈რცახა̈ნ?" ქა
Line of edition: 27    ოხუმბავახ, იმჟი ლჷმარ ეჯი ი მაჴვამ ესერ ხოქვახ ეცრიშ ვარგა̈რს. ეჯა̈რს მილდიანა̈რდ
Line of edition: 28    მასა̈რდ ლოჰოდახ ჟა̈გ ი ცხვი ი ქა ოხფიშვდახ ცხჷმა̈რთე ი ხოქვახ:
Line of edition: 29    ლჷნთხლადოღვ არდახ!"

Line of edition: 30       ამჟი ომხვეტელიხ ცხჷმა̈რისგა რიჩგვიანა̈რ.


Line of edition: 31 
კოსტა ჯაჭვლიანი. ცხუმარი. ა. შანიძე. 15. ვიი. 1971 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.