TITUS
Svan Prose Texts I (Upper Bal)
Part No. 22
Previous part

Text: 22 
Page of edition: 20 
Line of edition: 16 
22. ყინცაშა ი ბუბნიშა ხოშა̄ლე ნამარგუ̂


Line of edition: 17       ჰა̈ნდრაშა ნე̄სგუნს ჯუ̂ინალდ გუნ ეზერ მეზგე ლჷმა̈̄რხ. აშხუ̂ ლადა̈ღ
Line of edition: 18    ესნა̈რ ა̈დნა̈დხ ლა̈ჭმათე ხაზარა̈̄შთე, -- ათხე ნაუ̂რეზშა ლა̄რ'ე ლი
Line of edition: 19    ალ' ე̄სნა̈რ ჰა̈ნდრაშა ლჷმა̈რ. ჰა̈ნდრაშე̄რ ბუბნიშა ხოშა̄ჲ ხაწა. ალას
Line of edition: 20    ბუბნი ხაჟხე̄ნა. ბუბნიშა ქორა̈ ნამრიღუ̂ ჲელმჷყ ათხე̄ჲ ჩუ ლჷგ. ეჯჲა̈რ ჯუ̂ინალდ
Line of edition: 21    ჲელჲა̈ მა̄რე ლჷმა̈̄რხ ი გუნ მა̈ბციე̄რ მეზგე.

Line of edition: 22       აშხუ̂ჟი̄ნ ესნა̈რ თურქუ̂ა̈რ ა̈ხკუ̂ა̈ჰხ ალ ჲელჲა̈ ლატფუ̈რას. ანჴა̈დ
Line of edition: 23    ესნა̈რ ბუბნი ი ჟ'ახბა̈ჟ. ეჩქას რა̈̄ქუ̂: "ჰატ, ხოლა ჲელ, იმ ესერ,
Line of edition: 24    იჩო?" თურქუ̂ა̈რ ახგენე̄ნახ, ალ თურქუ̂ა̈რს ესერ ათხე თე̄რა̈რ ჩუ̂ათგენე̄ნახ
Line of edition: 25    ი მე̄რმა ლადა̈ღ ბუბნის ჟ'ოხურმა̄ლა. ჭუ̄ნირ ხარდე̄ნა ეჯკა̈ლიბ
Line of edition: 26    ალ ბუბნის, ერე ლახ ჲელჲა̈ სუ̂იფისგა ჩუ ლუმსგურო̄ლინ, ეჩქას
Line of edition: 27    ლიჭნუ̄რი ქაშუ̂ეჲთთე ჩუ ლჷმსჷმო̄ლინ.

Line of edition: 28       ჰა̈ნდრაშე̄რ ესნა̈რ ალ ბუბნი̄ჲ ხაწახ ლა̈ჭმათე ჰამა̈ ხა̈რჯ ერ ოთჴიდხ
Line of edition: 29    ნადა̈რს, ეჩქას ესნა̈რ ბუბნიდ რა̄ქუ̂: "მიჩ ესერ შიშდ ათხე̄უ̂ ლახუ̂ე̄მხ
Line of edition: 30    მიჩა დია̈რ!" მე̄რმა̄ლ ესნა̈რ ჩიქე დე̄მ იდიარა̈̄ლხ ი ბუბნის
Page of edition: 21  Line of edition: 1    ლი̄ცუ̂ ლოხუ̂ბინეხ. ამღა ბუბნი მა̄მ ანფა̈შ ი ჩუ̂ა̈დდი̄რა̈̄ნ. ამჟი̄ნ ესნა̈რ
Line of edition: 2    ლენჯა̈̄რა̈ ზანგლა̈გს ხაჴიდხ ლაფდა̄სუ̂ნად: ესნა̈რ მჷლხა̈რ ოხშგა̈ბხ
Line of edition: 3    ქაშუ̂ეჲთა̈რს ჰანწუ̂ა̈ლთე ი ფიშირ ადგა̈რხ. მე̄რმე ნადა̈რ ჰა̈ნდრაშა
Line of edition: 4    უდიარად აჩა̈დხ ესნა̈რ ლაფდა̄სთე ი ბუბნი -- ლჷდია̈რ. ხუ̂ა̈ჲს ოთჩა̈შ
Line of edition: 5    ესნა̈რ მიჩ' ა̄ფხნეგა̈რს ბუბნი ი ჟ'ესჰი̄დ მე̄რმა ლენჯა̈̄რი ფა̄და̈̄სს.
Line of edition: 6    მა̈გ ჩუ̂ა̈დნა̈ზო̄რა̈̄ნხ ესნა̈რ.

Line of edition: 7       ალ ფა̄და̈̄სს ყინცაშა გურმაჩი ხეჩდა. ალ' ე̄სნა̈რ ხოლა მა̄რე ლიზ ი
Line of edition: 8    ტუ̂ელდ და̈̄რ იკედ სოფელისგა. მა̈გ ჩუ ლუნზო̄რე ლიხ, ეჩქას რა̈̄ქუ̂
Line of edition: 9    ესნა̈რ ალ გურმაჩდ: "ეჯ' ე̄სერ [ე́, ჲერუ̂ა̈̄ჲ] ა̈გით' ა̄ჩეს ეჩქას დისუ ლახსგურე̄ნა
Line of edition: 10    ხახუ̂დ, ერაუ̂ა̈̄ჲ მიჩ მო̄დ ხეჭემს!"

Line of edition: 11       ოთჟოღ ესნა̈რ სგუ̂ებინ, სგა̈̄ჰი̄დხ მჷლხა̈რს. მჷლხა̈რ ესნა̈რ აშხუ̂
Line of edition: 12    ა̈გის იშუ̂მინეხ. ალჲა̈რს ბეშშა ხოშაჲ ხონჴრიხ. ამნე̄მ რა̈̄ქუ̂: "ღულა̈ჲ
Line of edition: 13    ესერ მირ ათხუ̂ერა ი მიჩ ესერ ალმა̈სგირა̈შდ მჷრა̈̄თბიშე̄რ თუ̂ეფ
Line of edition: 14    ხოყრა, ღო̄უ̂ ესერ ეჯა იქუ̄ნაუ̂ა̄ლ ი ეჯღ' ე̄სერ ახქუ̂ეცა განზა̈̄რ".
Line of edition: 15    ამის ესნა̈რ ლენჯა̄რა̈რ იჰუ̂ნა̈რიხ, ოთცა̄დუ̂ნეხ ესნა̈რ თოფა̈რს ი
Line of edition: 16    ფიშირ ადგა̈რხ მჷლხა̈რ, მე̄რმე მჷლხა̈რ ესნა̈რ ჩუ̂ა̈დი̄ტუ̂ხ, ბეშშა ხოშ'
Line of edition: 17    ე̄სნა̈რ ჩუ ლჷკა̈̄ფ ზი ი ისე̄მწა̈̄ლ: "ჟა̈გუ ესერ ჲა̈რდ ლოხუ̂დეხ მა̈დილუ
Line of edition: 18    ხე̄რახ!" ეჩქას ესნა̈რ ლიჟმუ̄ნე ხაზარშუ̂ ლჷმა̄რ -- თეუ̂ფი ჟა̈გუ̂შ.

Line of edition: 19       ყინცაშა გურმაჩ ანჴა̈დ ესნა̈რ ი ხა̈̄ქუ̂: "ჲაღუ̂' ე̄სერ ჟა̈გს ჯა ლოხუ̂დი" ესფხიჭ'
Line of edition: 20    ე̄სნა̈რ ხოშა̄მ ჩი̄რხუს, ესსიპე ი ნიჩუ̂ა̈რჩუ ხაჴიდ
Line of edition: 21    ი შდჷქა̈რ სგა̈̄ნჩუ ოთშიდ.

Line of edition: 22       ეჯ გზა̄უ̂რობჟი̄ნ იშგან ლამარგისგა̄ჲ ეჯგუ̂ა̈რდ და̈̄რ ალმა̈რგლიზ.

Line of edition: 23          (ლენჯერი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.