TITUS
Svan Prose Texts I (Upper Bal)
Part No. 24
Previous part

Text: 24 
Page of edition: 23 
Line of edition: 5 
24. ლიწ უ̂რი


Line of edition: 6       მიშგუ̂ა მუ ლჷმა̈რდ ოთარშამჷყ. მათხუ̂ა̈ჲ ლჷმა̈̄რ, ეჩქას ქო̄თჩი̄ჟახ
Line of edition: 7    მიჩა დის ი მუს. ოთარშახა̈ნ ლეჟა ა̈მტეხ ქორთე,ეჩქას ხეწა̈დ ხეხუ̂ს
Line of edition: 8    ქორს, მიჩა დიეშ ი მუე ნა̈ყდა̄ნს (მიჩა უჭუ̂დია̄ლდ). ათხე ალ ხეხუ̂
Line of edition: 9    ხოჩა მადმა ლახბაჟჷნ მიშგუ̂ა მუს ი ჩუ̂აცუ̂ირ. ეჩქანღო მე̄რმე ზურა̄ლ
Line of edition: 10    ა̈დყედა̄ნე ხახუ̂დ. ამ დუ̂რეუ̂ს მა̈ნკუ̂ი̄ ხეხუ̂მი ჯჷმილდ მიშგუ̂ა
Line of edition: 11    მუ ჩუ̂ადგა̈რ. მიშგუ̂ა მუ ერ ადგა̈რხ, ეჩქას მიშგუ̂ა დი მიშგუ̂აჟი
Line of edition: 12    ღანაუ̂ ლა̈სუ̂. ლადგარა̈ლჟი მიშგუ̂ა მუს ხო̄ქუ̂ა: "მიჩ ესერ ხეხუ̂
Line of edition: 13    ღანაუ̂ ხა̄რ ი მიჩა გეზალდ ჩუ ესერ ა̈დწორე". მი ერ ეშდარა ლჷზა̈ჲთექა
Line of edition: 14    ოღუ̂ერ, ლჷზორისგა ერედ მა̈̄ქუ̂: "სი როქუ̂ უწუ̂რა̈̄ გეზალ!"
Line of edition: 15    (შუ̂ანა̈რს გუ̂ა̈მთქუ̂ა ამჟი).

Line of edition: 16       ეჩქას ქორთ' ო̄ღუ̂ერ ი ლა̈ხუ̂ჭუ̂ედ მიშგუ̂ა დის. მიშგუ̂ა დიდ
Line of edition: 17    ლიგუ̂ნ' ა̈დბინე. "იმღა როქუ̂ ხუ̂იჭუ̂დიე̄ლ ალის?" ქა ლიყლე მად
Line of edition: 18    ხეკუ̂ა̈დ. მი ეჩქას ბჷგიდ ლა̈ხუ̂ჭუ̂ედ: მუ მირდა ჲა̈რჷ მი? ამ დუ̂რეუ̂ს
Line of edition: 19    მიშგუ̂ა დიდ ქა̈̄მჷმბაუ̂ე მი მა̄გ: "სი როქუ̂ ჯირდა მუ შაუ̂ხან
Line of edition: 20    ნუაშე, მარე მა̈ნკუშ ხეხუ̂ ჩუ̂აცუ̂ირ. ეჩქანღო ეჩა ჯჷმილდ ჩუ̂ადგა̈რ
Line of edition: 21    ისგუ̂ა მუ".

Line of edition: 22       ეჩქანღო მიშგუ̂ა მუე მჷდგა̈რი, ბექმჷრზა გირგუ̂ლია̄ნ, ლუშნუ
Line of edition: 23    ლა̈რგიუ̂ა̄ლთე̄სგა მა̄დ ანჴა̈დ. ეჩქას მი ჩოდაგრ ა̈ლი, ჩოდაგრ ი
Line of edition: 24    პოლციათე ოღუ̂ერ. ა̈ლი არდა გალფხა̄ნშა პირსდა̈უ̂დ. ჩუ̂ამირმ მი
Line of edition: 25    ეჯნე̄მ. ეშდუ̂ოხუ̂იშდ ლადეღ დოლა̈სუ̂იფს ხუ̂არდა̈ს ნაუბახისგა ეჩუნღო
Line of edition: 26    სგა̄მჲეხ ცაგერთე. არა თუ̂ეუ̂ს ნაუბა̈ხისგა ხუ̂არდა̈ს ცაგერიშ.
Line of edition: 27    ეჩქას ეჩეჲსგა ხუ̂ა̈ჲ მა̄რა̈̄ლ მეტყუ̂ბა̈̄ნხ: მა̄რე̄მი მჷდგარა̄ლა, ქუ̂ითრა̈რ,
Line of edition: 28    ხოლე̄მი მუჩუ̂მინა̄ლა ალჲა̈რ თა̈უ̂დებჟი ქა̄ნფუ̈შდხ. ეჩქას მი ხუ̂იფიქრ,
Line of edition: 29    ერე "ალჲა̈რს ხუ̂ა̈ჲ მაშედ მა̄რე ხეთხა̈̄ნხ, ქა̄ნფუ̈შდხ". მი მაშედ მა̄რე
Line of edition: 30    და̈̄რ მეყა̈̄დ. ეჩქას ჩოთეჩდ ნაუბა̈ხხა̈ნქა (თა̈უ̂დებიშ ნა̈ბ მად ლამემხ)
Line of edition: 31    ი ქო̄ღუ̂ე შუ̂ა̈ნთე. ლაჩა̈დჟი ამთოფეხ მასა̈რდ, მარე მი ეში̄ მა̈მ
Line of edition: 32    ოფშუ̂. ამეჩუ ქორთ' ო̄ღუ̂ე. შიშდ ანჴა̈დხ ოთარშა თათარყან ი
Line of edition: 33    ლეუ̂ან. ალჲა̈რდ გუნ ა̈დსა̈სტკეხ მიშგუ ქა ლიჩედ. ჩუ ამირმხ თათარყანდ
Line of edition: 34    ი ლეუ̂ანდ, სგა̄მჲეხ ცაგერთე. ეჩეჩუ ლახუ̂ემხ ალჲა̈რდ პროკროუ̂ს თხოუ̂ნა:
Line of edition: 35    "მიშგუ̂ა მუე მჷდგა̈რის ნაკაზანიე ესერ მამა ლაჰოდე̄ნა
Line of edition: 36    ი ჩუუ̂ ადსინჯუ̂ეხ გუნ ბჷგიდ გუ̂ეშ". მი ჩუ̂ამზჷზეხ ქუთა̈̄შთე
Line of edition: 37    ბერკლა̈რშუ̂ ეშდოხუ̂იშდ ეკენითუ̂ეჟი.

Page of edition: 24 
Line of edition: 1       ქუთა̈̄ში ნაუბა̈ხისგა ამა̄დ ჩხარა თუ̂ე ი ხჷნსგა. ქუთა̈შხა̈ნ ჟ'ა̈მტიხხ
Line of edition: 2    ცაგე̄რთე ი ეჩეჩუ ათქუ̂იცხ თხუ̂იმ გუ̂აშუ̂: მი ა̈მქუ̂იცხ ერუ̂ეშდ ზა̈ჲ
Line of edition: 3    კატორღა. ეჩუნღო სგა̈̄მჰერხ ი ჩუ̂ამზჷზეხ თბილი ქალა̈ქთე. ეჩეჩუ
Line of edition: 4    ეშხუ ზა̈ჲ მეტეხისგა ამა̄დ, ჲერუ თუ̂ე -- ბაქოს, ეჩქანღო პეტრიუ̂სკას
Line of edition: 5    სემი ზა̈ჲ მი თა̈უ̂დებშუ̂ ქა ამფუ̈შდხ ი გუ̂ეშ ოთარდ ქა̈̄დტიხ პალატათე.
Line of edition: 6    პალატად ა̈მქუ̂იც ოხუ̂იშდ ზა̈ჲ როტა. გუ̂ეშ ოთარდ ქა̄დ
Line of edition: 7    ა̈დტიხ სენა̈ტთე. ეჩჩუნ ა̈მქუ̂იცხ სემი ზა̈ჲ ციმბირ. სემი ზა̈ჲ პეტროუ̂სკას
Line of edition: 8    ამა̄დ ი ეჩუნღო ა̈გითე ა̈ნტუ̂ხ.

Line of edition: 9          (ლატალი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.