TITUS
Svan Prose Texts I (Upper Bal)
Part No. 45
Previous part

Text: 45 
Page of edition: 41 
Line of edition: 23 
45. სალდა̈თი ჯიბი ლა̈ირილხა̈ნქა


Line of edition: 24       21 oктябpя. ა̈ნბინე ლიუ̂ჩხე, მუსი̄ ანჴიდ, მარე ჟი მა̈მა ახსკიბ,
Line of edition: 25    ზაგრა̈ლჟი გარ ახსკიბ მუს, ლახუ̂ა̈რ ჩუ ადთო̈ნთე.

Line of edition: 26       21 ოკტონბერს. ათხად და̈̄რ ხეწა̈დ უჩხას ხა̈დურდ.

Line of edition: 27          _____

Line of edition: 28       სარდიონიშხა̈ნ ა̈მჴა̈დ ლა̈ირ 28 თებჷრუ̂ა̈ლისგა. მი ოთზჷზ
Line of edition: 29    1 მა̈რტისგა მინს. სირინოს ოთზჷზ 13 მა̈რტისგა.

Line of edition: 30       ნა̈ჲ ა̈თუ̂ნაბნა̈̄ნდ მახე კალონი ბედჟი 16-й მარტში.

Line of edition: 31       მი ა̈გიხა̈ნ ლა̈ირ დე̄სა მა̈ჴდა. ლიმჷრიე̄ ნა̈ირუ̂ ა̈მჴა̈დ, ეჩუნღო
Line of edition: 32    დე̄სა მა̈ჴდა. მი მუღუ̂ა თეთრ 77 მანეთ აშხ ჯიბისგა ი 3 მანეთ
Line of edition: 33    მუღუ̂ე, მა̈გ 80 მანეთ.

Page of edition: 42 
Line of edition: 1       16 ქრისდეშობისთუ̂ეს. კიდო პოზიციაჟი ხუ̂არდად სოფელ
Line of edition: 2    ბორიანს. დარა̈ლ მა̄მა ლიხ ხოჩა, მუს ჟი ხა̈̄ზ. მუში დალინას,
Line of edition: 3    მინდა̈რს, დე̄სა ხა̈̄ზ მუს.

Line of edition: 4       22 დეკენბერში კიდო პოზიციას ხუ̂ა̄რიდ 2... ლა̈დი ერე
Line of edition: 5    სგუ̂ებნე პოზიციას ხუ̂ა̈რიდ, აშხ ლე̄თ ჩუ ხუ̂აყუ̂რედ ი მე̄რუ̂ა ლე̄თ
Line of edition: 6    ყარუ̈ლ ხუ̂იშდ. ქა̈̄ნცა̄დხ 8 პოლკ.

Line of edition: 7       22 დეკენბერს ჩუ ონჴუ̂ა̈დდ ბორიანთე,

Line of edition: 8       ამეჟი ხა̄გხ, მა̈ჲ დრა̈უ̂ს ხუ̂არდად პოზიციაჟი.



_____


Line of edition: 9    ოკტონბერდ ეზერ დარა̈ლ ლა̈სუ̂ხ. 22, ჲერეჴშდ ი ჲარუ̂ ა̈დჰაუ̂დარ
Line of edition: 10    ჩუ ი მუს შიშდ ახსკიბ ჟი. მუშს დე̄სა ხა̈̄ზ ჩიქე.

Line of edition: 11       8 ნოენბერს მუში მინდა̈რს (ი) მუშს მუს დე̄სა ხა̈̄ზ, ადო
Line of edition: 12    იშგნა̈̄გ ჩია̈̄გ. ნა̈ჲ ხუ̂ა̈რიდ სარკისრ ნი გაზიმქა, კურკური ძირს,
Line of edition: 13    პოზიციაჟი. ამე ლეჯჰა̈რ ლი დანბალ.

Line of edition: 14       სოფელ ბორიანს პოზიციაჟი, 1-й дeкaбpяკიდო პოზიციას. 1 დეკაბარში
Line of edition: 15    კიდო... პოზიციაჟი ხუ̂ა̈რიდ.

Line of edition: 16       1917 გო. ზუმხას ხუ̂არდა̈ს სოფელ ბორიანს. მე̄სმე ზუმხა მა̄რ
Line of edition: 17    ათხედ. ჩიქე ღერთა̈ ჰამა̈რს ი ჯგჷრა̈̄გიშ შუ̂იდებდ ხუ̂ა̈რი. ამუნღო
Line of edition: 18    მინე იმედჟი ხუ̂ა̈რი. მუს ჩია̈̄გ ჟი ხა̈̄ზ, მჷცხი მა̄მა ლი ეში-ეში̄. მე̄სმა
Line of edition: 19    ზუმხას მი ი ტარა̈სი გარ ხუ̂ა̈რიდ უშხუდ. ობა̈ჲ ჭირ მიწუ̂ა, ეჩშელდ
Line of edition: 20    ხინსუ ხა̈წდად! სემი ზუმხა მა̄რ ათხე ლა̈შია̄ლისგა. დიდა̈ბ ღე̄რბათუ̂!

Line of edition: 21       მი ოთზიზ სალდათხანს 25 ქრისდეშობისთუ̂ეს, ქრისდე̄ ლადა̈ღ,
Line of edition: 22    ტერეზიას ი სალდათხანს.

Line of edition: 23       4-й იანუ̂არში ოთზიზ დადაშე̄რ 1 ლა̈ირ, ეგნატეს ოთზიზ 5 იანუ̂არისგა
Line of edition: 24    1 ლა̈ირ. ა̈გითე ოდზიზ ლა̄ირ 11 იანუ̂არისგა: 1 ა̈გითე, 1-й
Line of edition: 25    გოჯი̄ლს, 1-й სალდათხანს, 1-й მინასას, 13 მა̈რტისგა -- 1-й ლა̈ირ
Line of edition: 26    სირინოს. 11 მა̈რტისგა ოთზიზ 1-й ლა̈ირ ეგნატეს, 1 ლა̈ირ
Line of edition: 27    სალდათხანს.

Line of edition: 28       ალ ლისტჟი ხუ̂ა̈ჲრი, უ̂ოშუ̂ელდ ლა̈ირს ოთზჷზი ი იშეშთე.

Page of edition: 43 
Line of edition: 1       ალ ლისტჟი ხუ̂ა̈ჲრი, უ̂ოშუ̂ელდს ა̈მზჷზიხ ა̈გიხა̈ნ ი იშეშხა̈ნ
Line of edition: 2    ა̈მჴედნი ნაზუმახუნღო ლა̈ირ. მინასა̈̄შხა̈ნ ა̈მჴა̈დ 9 (ჩხარა̄მ) იანუ̂არისგა
Line of edition: 3    1-й (ეშხუ̂ი) ლა̈ირ; ეჩე̄სგა არდა გოჯი̄ლა̈ ლა̈ირი̄. ეგნატეშხა̈ნ
Line of edition: 4    ა̈მჴა̈დ 1-й (ეშხუ̂ი) 9 мapтa, მა̈რტისგა; ეჩე̄სგა არდა სალდათხანი
Line of edition: 5    ლა̈ჲრი̄.

Line of edition: 6       ამეჟი ხუ̂ა̈ირი, ესუ̂ა̈̄ჲს ოთზჷზი ლა̈ირს ნაზუმახუნღო 1917.



Line of edition: 7 
გოჯილ[ის] ილიას რის ბრალი აქს*


Line of edition: 8       "სემი ლჷზა̈ჲ ლი. მეკუ̂შდა ა̈დგილს ჯაყე̄ნა. ეჩხა̈ნქა ახღუ̂ა ალა
Line of edition: 9    ი მათხუ̂ა̈ჲ ესერ ხა̈ჲთუ̂ე. აშხუ̂ დრა̈უ̂ს ეზერდ ა̈რი, მე̄რუ̂ა -- მა̄მა.
Line of edition: 10    ამბა̈უ̂ მა̄მა ხოხა, ერე რა̈̄ქუ̂ეს. მიჟ ქა ესერ ხეგნი, ეჩუნღო ესერ
Line of edition: 11    ხა̈ჲთუ̂ე. ეჩუნღო ესერ ეზერ მა̄რე ხეფსი, ჟი ესერ ოხო̄ზნა̈ნიდ.

Line of edition: 12       ესუ̂ა̈̄ჲს ესერ უ̂ო̄შთხუ̂-ლჷჭიშხ ათკუ̂ა̄დუ̂ნე̄ნა, ეჯაი ესერ მაუ̂ინ
Line of edition: 13    ხა̄რ. ალას ხაკუ ესერ და̈შდიშ, ცა̈̄შ ი საფტინ ესერ ხაკუ
Line of edition: 14    ლისტღუნე ჟაგრა̈ლისგა".



_____


Line of edition: 15       20 ქრისდეშობისთუ̂ეს ლა̈სუ̂ ეჯჟი ხოლა და̈რ, ერე მა̄მა
Line of edition: 16    ხა̄დდა შუ̂იმ: ბიქუ̂ ი ქჷსე ხუღუ̂ა̈̄ნდა გუნ. ნა̈ჲ ყარუ̈ლდ
Line of edition: 17    ხუ̂არდად ი მუს ახდე ძღჷდ.

Line of edition: 18       ნა̈ჲ ა̈ნცა̄დხ 8-й პოლკ.

Line of edition: 19       22 დეკემბერს, ქრისდე ლადა̈ღ, ხუ̂არდად ნა̈ჲ სოფელ ბურიანს.
Line of edition: 20    მახე ნაჴა̈დ ხუ̂ა̈სუ̂დ პოზიციახა̈ნ. ჲორი თუ̂ე ანა̄დდა პოზიციას.
Line of edition: 21    ქრისდე ლადეღ ბორიანს ხუ̂არდად, ზუმხას აჯად ბორიანს ხუ̂არდად.
Line of edition: 22    მუს ჟი ხა̈̄ზ, მჷცხი მა̄მა ლი გუნ. ლჷცე ლიპრისდა̈̄ლს ბორიანს,
Line of edition: 23    16 იანუ̂არს ბორიანს ხუ̂არდად, 4-й фeвpaля კიდო ბორიანს.

Page of edition: 44 
Line of edition: 1       ამეჟი გოროდა̈ლ ხა̈ირახ სათურქა̈შ. პერსიას მიჩდა გოროდა̈ლს:
Line of edition: 2    ხოის, დილმანს, სტარი დილმანს (?); სათურქოს: ბაშკალას,
Line of edition: 3    ეშხუ̂ი აჯად გოროდს უ̂ანს, 2 ოზერი პილს, აჯად კოპს, მელიზგერდს,
Line of edition: 4    კარაკლის, ხარასანს, ახსანკალას, ეზრუმს, კუმკუმს, კარაბაზარს,
Line of edition: 5    ჩერბურხს, მუშს, პიტლის, თათუ̂ანს, ხანისკალა, გარნიყ, ლაშკერდს,
Line of edition: 6    სანაგან, არჩიჩ, შაღიბ კარამუჩ, დაუ̂დაკ (?).

Line of edition: 7       უ̂ოშუ̂ელდ გოროდს მიჩდა, ეჯა ხა̄გ ამეჟი. სოფელს მა̈ჲა ა̈ნჷნგრიში
Line of edition: 8    ჟი!



____


Line of edition: 9       2 ეკენისთუ̂ეში კიდო პოზიციაჟი ხუ̂არდა̈ს პიტლის ლეჟა̈̄ნ,
Line of edition: 10    6 კიდო ეკენისთუ̂ეს პოზიციაჟი. 9 კიდო პოზიციაჟი. 22 კიდო პოზიციაჟი.
Line of edition: 11    6 გიორგოგისთუ̂ეს კიდო პოზიციაჟი ხუ̂არდად. 10 გიორიგობისთუ̂ეს
Line of edition: 12    კიდო პოზიციაჟი. ნა̈ჲ ა̈ხუ̂ცა̄დდად 8 პოლკს პოზიციაჟი
Line of edition: 13    22 ოკტონბერში, მანამდი რეზერ(უ̂)ად ხუ̂არდად. 10 ნოენბერს აჯად
Line of edition: 14    პოზიციაჟი, 13 ნოენბერს კიდო პოზიციაჟი.

Line of edition: 15       ა̈დგილა̈რ ხა̈ირახ ამეჟი. მუშს ა̈დგილ ეზერ. მუშ ფელტი ძირისგა
Line of edition: 16    ლი. ჩუქუ̂ა̄ნ მინდა̈რ ლი ძღჷდ, თეს დეშ ხოჰე̄სგი მა̄რე. ეჯზუმ
Line of edition: 17    ეჩხა̈ნ-ამხა̈ნ ფელტა̈რ ლიხ, ნე̄სგა ლექუ̂ა მინდა̈რ, მარე მა̄მა ხა̄რ
Line of edition: 18    შუ̂იმ. ფელტა̈რისგა ჩია̈̄გ ლეყუნზელა ლი. მიჩა ნე̄სგა ლექუ̂ა ჭალა̈ჲ
Line of edition: 19    ესღრი. ლეჭმე იგნი ეჯჟი, ერე მა̄მა ხა̄რ შუ̂იმ. მინდა̈რ ლეჟა შდეხნი...
Line of edition: 20    ცხეკ ლი.



_______


Line of edition: 21       ნა̈ჲ ხუ̂არდად თანფა̈ უ̂ებიშ, ნა̈ჲ ერ თანაფს ლიბნედ, ეჩქა
Line of edition: 22    პოზიციაჟი, 16 აპრილისგა, მარე მა̈იდშუ̂ ხუ̂ეტნიდ: ჯჷმა̈შუნღო
Line of edition: 23    ი უ̂ებიშდ მა̄მაგუ̂ეშ ნეთხა̈̄ნ. უ̂ები ლადა̈ღი მა̄მაგუ̂ეშ ნეთხა̈̄ნ: დე ლეყდიდ ითხი მა,
Line of edition: 24    დეჲ აშ ნეჰუ̂დი, დეში ნიჴდეხ ჲენასდ. ხუ̂ეტნიდ
Line of edition: 25    მა̈იდშუ̂. ა̈დგილ ამე ეზერ ლი. ნე̄სგა ლექუ̂ა ღა̈რ ლი ი მინდორ
Line of edition: 26    ეჩხა̈ნ-ამხა̈ნ კოჯა̈რ ი..ი ცხეკა̈რ, ლაჩა̈ხუ̂ მასა̈რდ ლი
Line of edition: 27    მეჴდე. ეზერ გიმ ლი ამე ხადურდ.

Line of edition: 28       თანაფ ლადა̈ღ პოზიციას ხუ̂არდად. უფლიშ ჰაუ̂და̈რ ლა̈სუ̂ა. გუნ.
Line of edition: 29    მეშხე ლადა̈ღ ნა̄დ, ერე მჷტმად ხუ̂არდად. ლა̈დი გარ [ანჴა̈დ?]
Page of edition: 45  Line of edition: 1    დია̈რ. მე̄უ̂არ მა̈დილ ლა̈სუ̂. ჲარუ̈ნ ქა̄ნა̄დდა. ა̈დგილ ლი, იმე
Line of edition: 2    ნე̄სგა ლექუ̂ა ღა̈რ ი მინდა̈რ. ნე̄სგაჩუ ჭალა̈ჲ ანღრი, ეჩხა̈ნ-ამხა̈ნ
Line of edition: 3    სოფლა̈რ ლიხ ი მინდუ̂რა̈ლ. ფოლტა̈რ ი ლეჯჰა̈რ ჟი ხეშთხენი, ეჩქა
Line of edition: 4    ლახუ̂ა̈რ ლიხ. ა̈დგილ ეზერ ლი. ქურდა̈რ იზგეხ ამე.

Line of edition: 5       1 მა̈ისს პოზიციაჟი ხუ̂არდად, მარე ძღჷდ მა̈იდარობ ნა̄დდა
Line of edition: 6    ი ლადა̈ღ მე̄რუ̂ა(ნ) ყარუ̈ლდ ნა̄დდა ლე̄ზი. ძღჷდ თჷმი (ნა̄დ).

Line of edition: 7       ნა̈ჲ ონჴუ̂ა̈დდ გარნიკხა̈ნ პოზიციას, მუშ, 25 iюня. მუშხა̈ნ
Line of edition: 8    ოჩა̈დდ ნასტუფლენიად 28. 31 გუნ ლიშია̈̄ლ ნა̄დდა. ეჩქანღო
Line of edition: 9    უ̂ეშგდ ოტიხდ თუ̂ირქ. ნიშგუ̂ეჲ. . ლა̈სუ̂ ლჷქა̈ჩ ი ლჷდგა̈რ 44 .

Line of edition: 10       გერმანიახა̈ნ აშირ ი უსგუ̂ა̈̄შდ ათა̈ს პლენ სალდ(ა̈)თ.

Line of edition: 11       ქო̄თზჷგრედ 3 iюля ი ნა̈ჲ უ̂ეშგდ ონტა̈ხდ, ნიშგუ̂ეჲ პოლკ
Line of edition: 12    მუშთე ი მუშხა̈ნ ნიშგუ̂ეჲ ბათალიონ ბითლისთე ონჴუ̂ა̈დდ.

Line of edition: 13       დუ̂აცატ უ̂ასმოუ̂ო iюля ნასთუფლენი ჩუ̂ემინდ ი შიშდ ჟი ოხქიფდ
Line of edition: 14    ეჯჲა̈რ, თურქუ̂ა̈ლ, აკოფხა̈ნჟი. ეჯ ლადა̈ღ ხუ̂ა̈ჲ ა̈გის ოთგენედ, მარე,
Line of edition: 15    აშხუ̂ ა̈გის ხა̄დდახ ლჷნგჭე ი ეჩჩუ 2 iюля ნა̄დდა ლიშია̈̄ლ
Line of edition: 16    ი ძღჷდ ონხუ̂იტდ ი მინდ ხა̈დურდ ხუ̂ა̈ჲ ანხუ̂იტხ: ნიშგუ̂ეჲ როტა̈̄შ
Line of edition: 17    ხუ̂ა̈სდ ლჷდგა̈რ ი ლჷქა̈ჩ 84.

Line of edition: 18       ნა̈ჲ ონჴუ̂ა̈დდ პიტლისთე 9 iюля. ამე ხილ მასა̈რდ წუ̂ა გოროდისგა,
Line of edition: 19    ჰა̈ზუ̂ა̈რისგა. იშგნა̈̄გ კოჯ ი ლახუ̂ გარ ლი. გოროდ (?) ხილ,
Line of edition: 20    გაკ ი ბარყუ̂ენდ, ქილუ̂ა̈რდ, ჰებ, უ̂ისგუ̂. ქორ მა̈გ ბა̈ჩშუ̂ ლჷგე
Line of edition: 21    ლი, ლჷტა̄ბა.

Line of edition: 22       პიტლისთე ოჰედ 9 iюля. პიტლის ლიზ ეზერ გოროდ, ძღჷდ
Line of edition: 23    ხა̈დურდ, ლაშდა̈ხ მა̄მა ხა̈რ ჩუ. ქორ მა̈გ ბაჩა̈შ ლჷგ, სემი-ჲორი
Line of edition: 24    ატაჟიან მა̈გ. ბა̈ჩ მა̈გ ლჷტა̄ბე ლი. ნე̄სგა გოროდ ლექუ̂ა ჭალა̈ჲ
Line of edition: 25    ანღრი. ეჩხა̈ნ-ამხა̈ნ გოროდ ლი. გოროდისგა ხილ წუ̂ა. იშგნა̈̄გ აშხუ̂
Line of edition: 26    ჭყიუ̂ა̈რს მა̈ჲ ა̈ნთხე̄ლი? კოჯ გარ ლი.

Page of edition: 46 
Line of edition: 1       პიტლისხა̈ნ აჯად პოზიციათე ონჴუ̂ა̈დდ. უ̂ანსკი ოზერხა̈ნ 23 iюня
Line of edition: 2    თუ̈რქდ ჩუ̂ემინ ნასტუფლენიე. 24-26 ბოისგა ხუ̂არდად. უ̂ეშგდ
Line of edition: 3    ონტა̈ხდ თახთაუ̂ანთე 28 iюня. 29 iюля თახთაუ̂ანს ხუ̂არდად. პოზი(ცი)აჟი
Line of edition: 4    ხუ̂არდად. ნა̈ჲ ა̈თუ̂გიჭდ. თახთაუ̂ან ლი უ̂ანი ოზერი პილს.
Line of edition: 5    გემა̈რ იზელა̈̄ლხ. უ̂ანა̈შ ი თახთაუ̂ანი ნე̄სგა ლერთან ფოყხა̈ნ ა̈ნცა̄დ
Line of edition: 6    (თუ̈რქ), არმიანსკი დრუჟინას ახწინდახ ი ანრა̈კლეხ არმიანა̈რ.

Line of edition: 7       სერ ეჯღა ნა̄დდა პიტლისხა̈ნ ლეტეხ უ̂ეშგდ. თათუ̂ანხა̈ნ ონტა̈ხდ
Line of edition: 8    უ̂ეშგდ 30 iюля. თათუ̂ანსი დეშ ა̈თუ̂გიჭდ: თურქს მა̄მა ხა̄დდახ
Line of edition: 9    შუ̂იმ. ნა̈ჲ ჲორი პოლკ გარ ხუ̂ა̈სდ. უ̂ეშგდ ონტა̈ხდ 30 უ̂ერსტს.
Line of edition: 10    ოზერი პილს, უ̂ანიშ ი თათუ̂ანა̈ ნე̄სგა, გემა̈რ იზელა̄ლდახ მა̈შინოშ.
Line of edition: 11    ათხე თათუ̂ან თუ̈რქიშ ლი. ათხე ამეჩუ ნიგიჭ პოზიცია. ამეჩუ მინდა̈რ
Line of edition: 12    ლი. გუნ ეზერ ა̈დგილ ლი.

Line of edition: 13       2 aвгуcтa პოზიციაჟი ხუ̂არდად კოშა გაზიმქა. ეჩხა̈ნქა ოჩა̈დდ
Line of edition: 14    ნასტუფლენიად 8-?? აგუსტის და 15 აგუსტისგა პოზიციაჟი ხუ̂არდად,
Line of edition: 15    ლიმრიე̄ ლადა̈ღი. 19 ლა̈სუ̂ ეჯჟი ბოჲ, ერე მა̄მა ხა̄დდა
Line of edition: 16    შუ̂იმ. მარე 8, 7 (მე̄რე, მე̄შგუ̂დე) პოლკა̈რ არდახ სგუ̂ებინ, -- ნა̈ჲ ლეზერ
Line of edition: 17    ხუ̂ა̈სდ. ისგლადა̈ღუნღო ნა̈ჲი ლა̈შია̄ლთე̄სგა ა̈ნგადჷ̄ნ. ნა̈ჲ,
Line of edition: 18    პერუ̂ი როტას, ზნამია ლა̈ნბა̈რჲეხ, ეჩის ხუ̂ელჩად, 8 პოლკა̈ ზნამიას.

Line of edition: 19       ათხე ლი მე̄რე ლადეღ, ჩუ ლჷგ ლიშია̈̄ლ. მა̄მა ნიხა, უ̂ეშგდ
Line of edition: 20    ატა̈ხ, ჰა მა̄დე [თუ̈რქ]. ნა̈ჲ ჩუ ხუგდ ჩიქე. უ̂ასმოი, სედმოი პოლკა̈რ
Line of edition: 21    ხუ̂ა̈ჲ ანხუ̂იტხ. თუ̂ირქს ხა̈დურდ მა̄მა ხაყერხ შუ̂იმ, ეჯჟი ანხუ̂იტხ.
Line of edition: 22    ეშხუ̂ი კამანდერ პოლკა ოთჷრმედ ი შაპი აფიცრა̈ლ ობა̈შ, სალდა̈თ
Line of edition: 23    ხუ̂ა̈ჲ ი შტაბ, 4 პულიმიოტ. ათხე ნა̈ჲ აჯად...

Page of edition: 47 
Line of edition: 1       ეხლა ჩემო ძუ̂ირფასო დაო სალდათხან და სირინო (?), მაგუ̂ა̈რდ
Line of edition: 2    ხა̈რიდ, ჲედე იმჟი̄ნ ლი ისგუ̂ეჲ გუ̂ეშ? ათხე ღე̄რბათ (ხუ̂აბიც)
Line of edition: 3    ისგუ̂ეჲ ნა̈შდობა, ერე ღერთემ მაწუ̂ე̄ნას შუ̂იდებდ ისგუ̂ეჲ თხუ̂იმ.

Line of edition: 4       ლიგჲერგი̄ თა̈ ლი 10. ეშხუ ჰაუ̂და̈რ და̈̄ს ხოწუ̂ა. ეზერ დარა̈ლ
Line of edition: 5    ლიხ. პიტლის ლი ა̈დგილ ეზერ. ღა̈რისგა ლი: ეჩხა̈ნ-ამხა̈ნ ფელტ ი
Line of edition: 6    კოჯა̈რ ლიხ. ქორ მა̈გ ბა̈ჩა̈შ ლიხ, სემი ატაჟიან ლიხ. ჭყიუ̂ა̈რ ო̄შთხუ̂
Line of edition: 7    უ̂ერსტს დემე წუ̂ა. გოროდისგა ლახილ ლი: ჩია̈̄გ გაკ ი ქილუ̂ა̈რდ ი
Line of edition: 8    ბარყუ̂ენდ, უ̂ისგუ̂ ი ამჷნქა მა̄მაგუ̂ეშ ხა̄გ. სგჷმა̈რ ანღრიხ. აბანო
Line of edition: 9    ლი სგიმიშ.

Line of edition: 10       ოხუ̂ა̄გა̈̄ნდ ნა̈ბოზს ქა ი რიჰდ ონღურდად, რჷჰიჟი სგო̄ჰედ.
Line of edition: 11    მე̄რუ̂ა ლადა̈ღ ჲეშდ უ̂ერსტს აჯად ოჩა̈დდ. მუშს ლიზ ლეყუნზელა
Line of edition: 12    გუნ. მუშ(ი) ი პიტლისიშ ნე̄სგა ჩუ მეცლე (?) ლი მინდა̈რდ ი
Line of edition: 13    ჭყიუ̂ა̈რ ლა̄რტყამყ ხა̄გ. ა̈თუ მასა̈რდ ლი. ა̈დგილ ეზერ ლი. მე̄რუ̂ა
Line of edition: 14    პოზიციათე ოჰედ 13 iюня გარნიკს. ნა̈ჲ მუშხა̈ნქა ონჴუ̂ა̈დდ,
Line of edition: 15    ეჩქა შიშდ ნასტუპლენია ჩუ̂ემინდ ი 28 iюня ...

Line of edition: 16       14 მაისს კიდო პოზიციას ხუ̂არდად. ლახუ̂ს ხუგა̈ნდად. მჷცხი
Line of edition: 17    ლიზ ეჯჟი, ერე მა̄მა ხა̄რ შუ̂იმ ხა̈დურდ. ცხეკ ი ფელტ ჟი ხეშთხენი,
Line of edition: 18    ჟიქა̄ნ ნაკა̈რ ხა̄რ. ლახუ̂ ჩუ მეცლე ლი. ეზერ ლახუ̂ ლი.

Line of edition: 19       17 აჯად პოზიციაჟი ხუ̂არდად. მა̈ისისგა 27-гo, მა̈ისისგა, პოზიციაჟი
Line of edition: 20    ხუ̂არდად. 5 июня პოზიციას ხუ̂არდად. ჩუ̂ენ გამოუ̂ედით პოზიცი̄დან,

Line of edition: 21       კიკზანიდან (?).
Line of edition: 22    13 Iюня. ანცა̈̄დხ ახულუ̂ინსკი პოლკ.



______


Line of edition: 23       დაუ̂წერე 6 მაისს პოზიციაჟი. ა̈დგილ ლიზ მუშს ეზერ, სწორ
Line of edition: 24    ა̈დგილ ეჯჟი, ერე შუ̂იმ მა̄მა ხა̄რ. უ̂ენახა̈რს ხა̈დურდ მა̄მა ხა̄რ
Line of edition: 25    შუ̂იმ. მუშს ი პიტლისი ნე̄სგა ჩია̈̄გ მინდა̈რ ლი, ეზერ გიმ, ლარტყამოყ
Page of edition: 48  Line of edition: 1    ხა̄გ ლაჩა̈ხუ̂. ა̄მხა̈ნ ცხეკა̈რი მასა̈რდ ლიხ. ცხეკდ ჯიჰრა
Line of edition: 2    გარ ხა̄გ. ჭალჲა̈რა ანღრიხ ჩია̈̄გ, გუშგუ̂ეჲ ჭალა̈ჲდ ხოშა ეჩხა̈ნ-ამხა̈ნ,
Line of edition: 3    ჩი̄ხა̈ნ, ლახუ̂ ი სუ̈კ ლი. ლახუ̂ა̈რს მა̄მა ხა̄რ შუ̂იმ, ეზერ ლახუ̂ა̈რ
Line of edition: 4    ლიხ. მინდა̈რ ჩუ მეცლე ლი.

Line of edition: 5       26 აპრილს ქურდა̈ლს [ი] ნა̈ჲ ლიშია̈̄ლ ნა̄დდა. ნა̈ჲ ა̈ხუ̂ჴუ̂ა̈სგდ
Line of edition: 6    ი ჩუ ა̈ნჩა̈დხ. ნა̈ჲ ხუ̂ა̈ჲ ოდგა̈რდ ი მ[ინდ] ჲორი ა̈ნქა̈ჩხ
Line of edition: 7    ჰა̈შიდ. ეშხ(უ) იმე დო ა̈დქარუ̂ა̈̄ნ, დე̄სამა ა̈ნმეჴრა̈̄ნ. სემი დაჴა̈რ
Line of edition: 8    ოთღედ, ოხუ̂იშდ მანგა̈რ, ფექ ობა̈შ ონჴუ̂იდდ. ნა̈ჲ როტა გარ
Line of edition: 9    ხუ̂ა̈სდ. აშხუ̂ ნაგზა ქა ნა̄დდა ეჩხა̈ნ ნა̈ჴიდ ფექ. სემი ხუ̂ეტყბა̈̄ნდ
Line of edition: 10    უშხუ̂ა̄რ: მუქურთ(უ̂ელ) ი სომეხ ი მი, ადო ხუ̂ეტენდ მა̈იდშუ̂ ჟი.



______


Line of edition: 11       ჩერბურხა̈ნქა ონჴუ̂ა̈დდ ი 6 მა̈რტისგა მუშთე ოჰედ. 7 მა̈რტს
Line of edition: 12    მუშხა̈ნქა ონჴუ̂ა̈დდ. 8 მა̈რტს სგა ოჰედ (სგო̄ჰედ) პოზიციათე.
Line of edition: 13    31 მა̈რტს -- 20 აპრილს პოზიციაჟი ხუ̂არდად. აჯად 22-гo პოზიციაჟი.
Line of edition: 14    ხუ̂არდად ქაშუ̂ათობი საფტინს, მარე ხუ̂ეტნიდ მა̈იდშუ̂. უფლიში
Line of edition: 15    მიშლადა̈ღ პოზიციაჟი ხუ̂არდად. 29 აპრილს -- 6 მა̈ისს პოზიციაჟი
Line of edition: 16    ხუ̂არდად. 9 მაისში უ̂ეშგდ ონტა̈ხდ, 4 უ̂ერსტს პოზიციათე (?). ამე
Line of edition: 17    ხუ̂ა̈რიდ პოზიციაჟი ლახუ̂ა̈რს, სუკუ̂ა̈რჟი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.