TITUS
Svan Prose Texts I (Upper Bal)
Part No. 88
Previous part

Text: 95 
Page of edition: 174 
Line of edition: 13 
95. კორაკიშუ̂ილ


Line of edition: 14       არდა ეშხუ ხელწიფ, ხორდა სემი ჭყინტგეზალ. აშხუ̂ინ ხა̈̄ქუ̂ინ
Line of edition: 15    ხელწიფდ მიჩა გეზლი̄რს: "იმუ̂ა̄ლ' ე̄სერ აშხუ̂ მინდუ̂ერისგა მურყუ̂ამ
Line of edition: 16    ლჷგ ი ეჩეისგა ნანუ̄ლ ა̈რი, ჟახად ესერ სურა̈თ ხაჟხა. ერუ̂ა̈̄ჲ ესერ
Line of edition: 17    ეჩას ხეხუ̂დ ა̈დხუ̂იე̄სგნეხ, ლიხჷლწიფს ესერ ეჩას ხომზჷრი".

Line of edition: 18       ა̈ნმა̄რა̈̄ნ ხოშა მუხუ̂ბე ი აშირ მჷჩა̈̄ჟი ლა̈ჲჴერნე ი აშირ მუქუ̂ეითი.
Line of edition: 19    ესღრი, ესღრი ი აშხუ̂ ა̈გის სომხი ყო̄რთეჟი̄ნ ლა̈ხჴა̈დჷ̄ნა̈̄ნ. ალ სომეხდ
Line of edition: 20    ხა̈̄ქუ̂ინ: "ჟი̄უ̂ ესერ ა̈ნშუ̂ემხ". ალჲა̈რდ ჟი ა̈ნშუ̂ემხ ი სა̈დილ ლალე̄მხ.
Line of edition: 21    ნა̈სდილობენ სომეხდ ხა̈̄ქუ̂ინ: "ლიბულქოუ̂ა̈̄ლუ ესერ ახა̄დხ".
Line of edition: 22    ახა̄დხ ლიბულქოუ̂ა̈̄ლ ი ხელწიფი გეზალს თეთრ მა̈̄ჲ მა ხუღუ̂ა̈̄ნ, ალას
Line of edition: 23    ჩი̄ს ქა̈̄ხბი̄შდ ნაბულქოუ̂ა̄ლი̄რ. ახა̄დხ აჯაღ ი, მა̈̄ჲ მა აფხნეგ-მა̄რე
Line of edition: 24    ხონჴერდა, ჩი̄ს ქა̈̄ხბი̄შდ [სომეხ]. ეჩუნღო̄ნ თხუ̂იმ ი თხუ̂იმ ა̈დქუ̂იცხ.
Line of edition: 25    ჟი̄დ ახწინდა სომეხ ი ხელწიფი გეზალს ჩუ ლესედ ხა̄დდა ალ სომეხცახა̈ნ.
Line of edition: 26    ამნე̄მდ ალ ხელწიფი გეზალ მელეღუ̂დ ლა̈ჲყედნე.

Line of edition: 27       აჩა̈დ ხუ̂ა̈ჲ ხა̈ნ ი დე̄მხენ ლა̈ხტა̈ხ ხელწიფს მიჩა გეზალ. ათხე
Line of edition: 28    მანე̄სგრე გეზალ ა̈ნმა̄რა̈̄ნ ი ამნე̄მდი̄ აშირ მჷჩა̈̄ჟი ლა̈ჲჴერნე ი აშირ
Line of edition: 29    მუქუ̂ეითი. ესღრიხ, ესღრიხ ი ალასი̄ ალ სომხი ყო̄რთეჟი̄ნ ლა̈ხჴა̈დჷ̄ნა̈̄ნ.
Line of edition: 30    ალ სომეხდ ხა̈̄ქუ̂ინ: "ჟი̄უ̂ ესერ ა̈ნშუ̂ემხ სა̈დილუ ლალე̄მხ". ხელწიფი
Line of edition: 31    გეზალდ ჟი ა̈ნშუ̂ემ ი სა̈დილ ლალე̄მ. ნა̈სდილობენ სომეხდ ხა̈̄ქუ̂ინ:
Line of edition: 32    "ლიბულქოუ̂ა̈̄ლუ ესერ ახა̄დხ". ახა̄დხ ლიბულქოუ̂ა̈̄ლ ი ჟ'ახწინდა სომეხ
Line of edition: 33    ხელწიფი გეზალს ი, თეთრ მა̈̄ჲ მა ხუღუ̂ა̈̄ნ, ჩი̄ს ქა̈̄ხბი̄შდ. აჯაღჷდ
Line of edition: 34    ახა̄დხ ი ჟი̄დ ახწინდა ი, აფხნეგ-მა̄რე მა̈̄ჲ მა ხონჴერდა, ჩი̄ს ქა̈̄ხბი̄შდ
Page of edition: 175  Line of edition: 1    სომეხ. ახა̄დხ აჯაღ ი თხუ̂იმ ი თხუ̂იმ ა̈დქუ̂იცხ. ჟი̄დ ახწინდა სომეხ
Line of edition: 2    ი ხელწიფი გეზალს ჩუ ლესედ ხა̄დდა სომეხცახა̈ნ ი ალა მჷრბიე̄ლდ
Line of edition: 3    ლა̈ჲყედნე.

Line of edition: 4       აჩა̈დ ხუ̂ა̈ჲ ხა̈ნ ი დე̄მხენ ლა̈ხტა̈ხ ხელწიფს მიჩა გეზალ. ათხე
Line of edition: 5    მაჰუ̂რე̄ნე გეზალ ა̈ნმა̄რა̈̄ნ. ხელწიფ დე̄მჟი̄ნ ფუშდა: "ჲერუ ხოშა გეზლი̄რ
Line of edition: 6    ესერ ჩუ̂ათთუ̂ეფა ი აჯაღ ესერ მიჩ დე̄მ ა̈კჰე ჩუ". ხელწიფი
Line of edition: 7    გეზალდ ეში̄ მა̄დ ადჟომე ლი̄ზი ი აჩა̈დ, აჩა̈დ ი აფხნეგ-მა̄რეჲ და̈̄რ
Line of edition: 8    ლა̈ჲჴერნე. ესღრი, ესღრი ი აშხუ̂ ა̈გის ჲარუ̂ მა̄რა ჩუ ხოკა̄ფახ ეშხუ
Line of edition: 9    მა̄რე ი ბერჟა̈ ტყენა̈რშუ̂ ხატყციხ. -- მა̈ჲ ამბა̈უ̂ ესერ ლი, მინ მა̄რა̈̄ლ,
Line of edition: 10    იმნა̈რ ესერ ხატყციხ ამჟი̄ნ ლჷსა̈რდ ალ მა̄რას?

Line of edition: 11       ალჲა̈რ ჰერს დეხდა ხა̈ტხეხ. ჩუ მეყუ̂რა მა̄რე̄მ ხა̈̄ქუ̂ინ: -- ხოჩა მა̄რე
Line of edition: 12    ჯა, მიჩ ესერ ხაგდე̄ნა ალ ჲარუ̂ მა̄რე̄მი აშირ მანა̈თ. დუ̂რეუ̂ჟი̄ნ ესერ
Line of edition: 13    დეშ ოთთჷმა ი ცოდა̈ ლახუ̂ა̈̄შინად ესერ ალჲა̈რს ჯაჲ ნა̈ბს ხახუ̂დი
Line of edition: 14    ლიყერიშ, ადო ალჲა̈რ ესერ დეშ ხა̈წრეხ მიჩ.

Line of edition: 15       ხელწიფი გეზალდ ჟი ა̈ნკიდ აშირ მანა̈თ, ოხუ̂იშდ თუმა̈ნ აშხუ̂ ლახუ̂ე̄მ
Line of edition: 16    ი ოხუ̂იშდ თუმა̈ნ მე̄რმას. ანღრი ალა̄, ხელწიფი გეზალ, ი უ̂ეშგინისგა
Line of edition: 17    ალ მა̈რე̄მდ ლახტუ̂ი̄ლ: "ჟი̄უ̂ ესერ ა̈ნღე̄ლუ̂ე, ჯ' ე̄სერი̄ მიჩა
Line of edition: 18    აფხნეგ ი̄რი; მიჩ ესერ ხაჟხა კორაკიშუ̂ილ ი მიჩა ლამარგ ესერ ი̄რი
Line of edition: 19    ჩიუ̂შ". ხელწიფი გეზალდ ქო̄ხო̄მბუ̂ე, იმუ̂ა̈̄ჲთე მე̄ზი ლა̈სუ̂. ესღრიხ,
Line of edition: 20    ესღრიხ ი აშხუ̂ თუ̂ეთნა̄მ სოფელთე̄სგა ლა̈ხჴა̈დჷ̄ნა̈̄ნხ. ალ სოფელისგა
Line of edition: 21    მა̈გ თუ̂ეთნე ლი ხა̈დურდ: გიმ ი მეგა̈მ, მა̄რე ი ქუ̂ინლჷმგენე, ხა̈დურდ
Line of edition: 22    მა̈გ თუ̂ეთნე ლი. ალჲა̈რ სგა ლა̈ხმუშგუ̂არხ ალ სოფლი მახუ̂შის -- და̈̄უ̂ს.
Line of edition: 23    ალ და̈̄უ̂ ქორს მა̄მა არდა ი მიჩა ხეხუ̂ს სა̈დილ ახმა̄რუნეხ. ალჲა̈რდ
Line of edition: 24    სა̈დილჟი̄ნ ქა̈̄დრა̄გეხ მე̄უ̂არ ი გუ̂იანდქა და̈̄უ̂ა̈ ხეხუ̂დ ხა̈̄ქუ̂ინ, ერე "სერ
Line of edition: 25    ესერ ქა̄უ̂ ა̈დკჷლდეხ, ადო ჯ' ე̄სერ ხოლა̄მ ჭა̈შმი პატუ̂რენ ლი ი ეჯ'
Line of edition: 26    ე̄სერ შიშდ ჴედნი ათხე".
Line of edition: 27       -- ეჩი̄ მაყალ ესერ მა̄მა ხა̄რხ მინს. -- ხა̈̄ქუ̂ინ კორაკიშუ̂ილდ.

Line of edition: 28       ალჲა̈რდ ჟი ა̈ნცხეხ ტაბა̈გ ი ქა̄ნჴა̈დხ ჭიშგა̈რს ქა̄მენჩუ̄ნ. ამეჩუ̄ნ
Line of edition: 29    ხაძგერ ჰაგუ̂ კორაკიშუ̂ილდ ი ეშხუ ჴა̈ლ გიმ აქუ̂იც ი სგა̄ჩა̈დხ ალჲა̈რ
Line of edition: 30    ალ თხრილთე̄სგა ი ჩუ̂ა̈თპა̈ჟხ. ანღრი ნა̈ბოზს თუ̂ეთნე და̈̄უ̂ ი თუ̂ეთნა̄მ
Line of edition: 31    რა̈შს ჟი ხასგურ ი მა̈გ ადთუ̂ეთნე ხა̈დურდ. თხრილი ნა̈ფდიათე ჰა̄ლ
Line of edition: 32    ანჴა̈დ, რა̈შ შიშდ ჩუ̂ა̈დბჷჯგნა̈̄ნ. და̈̄უ̂დ ხაჴიდ მადრა̈ჴ ი ღო აჯაღ
Line of edition: 33    ხაჴიდ, მარე რა̈შდ ბა̈̄ჴ მა̄დე ლა̈ჲბა̈̄ჴ. "ჯა ფა̈თქოშა̈ჲ, იმსგა̈ჲ ესერ
Line of edition: 34    კორაკიშუ̂ილ ა̈რი ამეჩუ̄ნ?, კორაკიშუ̂ილდ ჟ'ანსკინე თხრილხენჟი̄ნ
Line of edition: 35    ი ხა̈̄ქუ̂ინ: "ჯ' ე̄სერ კორაკიშუ̂ილ მა̄მა ი̄რი, მიჩ ჩუ დოშ ესხო̄ლი".
Line of edition: 36    ხაჴიდ დაშნა̈ჲ კინჩხქა ი ჩუ̂ანკუ̂ა̈რ რა̈შხენჩუ̄ნ. ალჲა̈რ სგა̄ჩა̈დხ ამი̄
Line of edition: 37    ქორთე̄სგა ი ამი̄ ხეხუ̂ კორაკიშუ̂ილდ ხეხუ̂დ ა̈დგურგუ̂ნე. ამ ლე̄თ კორაკიშუ̂ილდ
Line of edition: 38    ხა̈̄ქუ̂ინ მიჩა ხეხუ̂ს:

Page of edition: 176 
Line of edition: 1       -- იმუ̂ა̄ლ' ე̄სერ მინდუ̂ერისგა მურყუ̂ამ ლჷგ, ეჩისგ' ე̄სერ ნანუ̄ლ
Line of edition: 2    ა̈რი, ჟახად [ესერ] სურა̈თ ხაჟხა, ჰე̄სამ' ე̄სერ ხასმა ეჩი̄შ?
Line of edition: 3       -- მიჩ ესერ დე̄სამა ხასმა ი მიჩა უდილ ესერ ხაყა წჷრნი და̈̄უ̂ს
Line of edition: 4    ი იგებს ესერ ერე ეჩას ე̄სამა ხოხალდე̄დს ეჩი̄შ.

Line of edition: 5       მე̄რმა ლადეღ ჟი ანჷგა̈̄ნხ ი აჩა̈დხ, აჩა̈დხ ი აშხუ̂ წჷრნი სოფელთე̄სგა
Line of edition: 6    ლა̈ხჴა̈დჷ̄ნა̈̄ნხ. ალ სოფლი მახუ̂ში ლი ეშხუ წჷრნი და̈̄უ̂ ი სგა
Line of edition: 7    ლა̈ხმუშგუ̂არხ ალას. ალ და̈̄უ̂ ქორს დე̄სა არდა ი მიჩა ხეხუ̂ს სა̈დილ
Line of edition: 8    ახმა̄რუნეხ. სა̈დილ ქ' ე̄რ ადჯო̄დუნეხ, ეჩქა ხა̈̄ქუ̂ინ ზურა̄ლდ: -- ჯ' ე̄სერ
Line of edition: 9    ხოლა̄მ ჭა̈შმი პატუ̂რენ ლი ი მა̈დილუ ესერ ხე̄რახ ი ხუ̂ა̈ჲ ნო̄უ̂
Line of edition: 10    ა̈დრა̄გეხ? -- ეჩი̄ მაყალ ესერ მა̄მა ხა̄რხ მინს. -- ხა̈̄ქუ̂ინ კორაკიშუ̂ილდ.
Line of edition: 11    ალჲა̈რდ ტაბა̈გ ჟ' ერ ა̈ნცხეხ, ქა̄ნჴა̈დხ ჭიშგა̈რ ქა̄მენჩუ̄ნ ი ამეჩუ̄ნ
Line of edition: 12    კორაკიშუ̂ილდ ჰაგუ̂ ხაჴიდ გიმჟი̄ნ ი ეშხუ ჴა̈ლ ჩუ̂აქუ̂იც ი სგა̄ჩა̈დხ ამხა̄უ̂თე̄სგა.
Line of edition: 13    ნა̈ბუზს ანღრი წჷრნი და̈̄უ̂ ი წჷრნი რა̈შს ჟი ხასგურ. თხრილი
Line of edition: 14    ფე̄დიათე ერ ანჰე, ამეჩუ̄ნ რა̈შ ჩუ̂ა̈დბჷჯგნა̈̄ნ. და̈̄უ̂დ ხაჴიდ ი ხაჴიდ
Line of edition: 15    მადრა̈ჴ რა̈შს, მარე რა̈შდ ბა̈̄ჴ მა̄დ ლა̈ჲბა̈̄ჴ. "ჯა ფა̈თქოშა̈ჲ, იმსგა̈ჲ
Line of edition: 16    ესერ კორაკიშუ̂ილ ხეხუ̂ა ამეჩუნ, იმჷნ ესერ ხაყლუნი?" კორაკიშუ̂ილდ
Line of edition: 17    ჟი ანსკინე თხრილხენჟი̄ნ ი ხა̈̄ქუ̂ინ: "ჯ' ე̄სერ კორაკიშუ̂ილ მა̄დ ი̄რა,
Line of edition: 18    მიჩ ჩუ დოშ ესხო̄ლი". ხაჴიდ დაშნა̈ჲ კინჩხქა ი ჩუ̂ანკუ̂ა̈რ რა̈შხენჩუ̄ნ
Line of edition: 19    წჷრნი და̈̄უ̂. ალჲა̈რ სგა̄ჩა̈დხ ი ამი̄ ხეხუ̂ კორაკიშუ̂ილდ ა̈დგურგუ̂ნე
Line of edition: 20    ხეხუ̂დ. ამ ლე̄თ კორაკიშუ̂ილ ლა̈ხჭუ̂ედდა მიჩა ხეხუ̂ს:
Line of edition: 21       -- იმუ̂ა̄ლ' ე̄სერ მინდუ̂ერისგა ეშხუ ნანუ̄ლ ა̈რი ი ჟახად ესერ
Line of edition: 22    სურა̈თ ხაჟხა. მინ ესერ ეჩი̄ მჷთხე̄ლი ლიხ ი ჰე̄სამ' ე̄სერ ხომჴერე̄ნს.
Line of edition: 23    ხა̈̄ქუ̂ინუ მა.
Line of edition: 24       -- მიჩ ესერ დე̄სამა ხოხალ ეჩი̄შ ი აშხუ̂ ეშხუ სოფელს ესერ
Line of edition: 25    მეშხა̄მ და̈̄უ̂ს მიჩა უდილ ხაყა ხეხუ̂დ ი იგებს ესერ ერე ეჩას ე̄სამა
Line of edition: 26    ხოხალდე̄დს ეჩი̄შ.

Line of edition: 27       მე̄რმა ლადეღ ჟი ანჷგა̈̄ნხ ალჲა̈რ ი აჩა̈დხ. ესღრიხ, ესღრიხ ი
Line of edition: 28    სგა ლა̈ხჴა̈დჷ̄ნა̈̄ნხ აშხუ̂ მეშხა̄მ ქალა̄ქთე̄სგა. ამეჩუ̄ნ მა̈გ მეშხე ლი: მა̄რე
Line of edition: 29    ი ქუ̂ინლჷმგენე, გიმ ი მეგა̈მ, -- მა̈გ მეშხე ლი. ალ ქალქი მახუ̂ში
Line of edition: 30    მეშხა̄მ და̈̄უ̂ს ლა̈ხმუშგუ̂არხ. ალ და̈̄უ̂ ა̈გის დე̄სა არდა ი მიჩა ხეხუ̂ს
Line of edition: 31    სა̈დილ ახმა̄რუნეხ. ალჲა̈რდ სა̈დილჟინ ხუ̂ა̈ჲ ა̈დრა̄გეხ ი და̈̄უ̂ა̈ ხეხუ̂დ
Line of edition: 32    ხაშგუ̂მინ: -- ჯ' ე̄სერ ხოლა̄მ ჭა̈შმი პატრონ ლი ი მა̈დილუ ხე̄რახ ი
Line of edition: 33    ქა̄უ̂ ესკჷლდეხ. -- ეჩი̄ მაყალ ესერ მა̄მა ხა̄რხ მინს. -- კორაკიშუ̂ილდ
Line of edition: 34    ხა̈̄ქუ̂ინ. ალჲა̈რ ჟ' ერ ანჷგა̈̄ნხ, ქა̄ნჴა̈დხ ჭიშგა̈რ ქა̄მენჩუ̄ნ ი ამეჩუ̄ნ
Line of edition: 35    კორაკიშუ̂ილდ ჰაგუ̂ ხაჴიდ გიმჟი̄ნ ი ეშხუ ჴა̈ლ გიმ აქუ̂იც ი
Line of edition: 36    სგა̄ჩა̈დხ ამხა̄უ̂თე̄სგა. ნა̈ბუზს ანღრი მეშხე და̈̄უ̂, მეშხა რა̈შს ჟი
Line of edition: 37    ხასგურ ი თხრილი ფე̄დიათე ერ ანჰე, ამეჩუ̄ნ რა̈შ ჩუ̂ადბჷჯგნა̈̄ნ.
Line of edition: 38    და̈̄უ̂დ ხაჴიდ ი ხაჴიდ მადრა̈ჴ, მარე რა̈შდ ბა̈̄ჴ მა̄დე ლა̈ჲბა̈̄ჴ.
Page of edition: 177  Line of edition: 1    -- ჯა ფა̈თქოშა̈ჲ, იმსგა̈ჲ ესერ კორაკიშუ̂ილ ხეხუ̂ა ამეჩუ̄ნ? -- ჯ'ე̄სერ
Line of edition: 2    კორაკიშუ̂ილ მა̄მა ი̄რა, მიჩ ჩუ დოშ ესხო̄ლა!

Line of edition: 3       ჟი ა̈ნსკინე თხრილხა̈ნჟი̄ნ, ხაჴიდ დაშნა̈ჲ კინჩხქა ი ჩუ̂ანკუ̂ა̈რ
Line of edition: 4    და̈̄უ̂ რა̈შხა̈ნჩუ̄ნ. ალჲა̈რ სგა̄დ აჩა̈დხ და̈̄უ̂ა̈ ქორთე ი ალ და̈̄უ̂ა̈ ხეხუ̂
Line of edition: 5    კორაკიშუ̂ილდ სგა̄დ ა̈დგურგუ̂ნე ხეხუ̂დ. ამ ლე̄თ კორაკიშუ̂ილ ლა̈ხჭუ̂ედდა
Line of edition: 6    მიჩა ხეხუ̂ს:
Line of edition: 7       -- მინ ესერ ესღრიხ აშხუ̂ ნანუ̄ლა̈ ლათხე̄ლთე. იმუ̂ა̄ლე მინდუ̂ერისგა
Line of edition: 8    ესერ მურყუ̂ამ ლჷგ, ეჩისგა ესერ ა̈რი ი ჟახად ესერ სურა̈თ
Line of edition: 9    ხაჟხა. ჰე̄სამ' ე̄სერ ხოხალდე̄დს, ღო ხა̈̄ქუ̂ინუ მა.
Line of edition: 10       -- ჯ' ე̄სერ ლახთუ̂ე̄ნნე, ჲაღო, ეჯ ნანუ̄ლა̈ ძიძა̈ჲს ი ეჯასუ ესერ
Line of edition: 11    ახჭუ̂ედიე̄ლეხ ეჩი̄ გუ̂ეშ მა̈გ.

Line of edition: 12       ალ ამბა̈უ̂ კორაკიშუ̂ილს მე̄უ̂არ ათხი̄დჷნდა ი მე̄რმა ლადეღ
Line of edition: 13    აჩა̈დხ ალ ზურა̄ლთე. ესღრიხ, ესღრიხ ი სგა̄ჩა̈დხ ალ ზურა̈ლა̈ ლა̈ზგათე̄სგა
Line of edition: 14    ალ ზულა̄ლ იცხე̄ნია̄ლდა ი კორაკიშუ̂ილდ ხა̈̄ქუ̂ინ ხელწიფი
Line of edition: 15    გეზალს: "სგა̄უ̂ ესერ ლა̈ხქა̄ლა̈̄ნ ი ლისუ̂ჟი̄ნ ესერ შდიქუ ათგე". ალა
Line of edition: 16    სგა ლა̈ხქა̄ლ-ა́, ხელწიფი გეზალ, ი ლისუ̂ჟი̄ნ შდიქ ათგე. ალ ზურა̄ლდ
Line of edition: 17    მა̈̄ნკუ̂ი მე̄უ̂არ ა̈დსა̈სტკე, მარე კორაკიშუ̂ილდ ჩოთნაკე:
Line of edition: 18       -- ათხე̄ ლისდიკა̈̄ლ ესერ მა̈ჲ ჩიქქა̈̄შ ლი? ჯ' ე̄სერ დი ი̄რა ი
Line of edition: 19    ალა ჭყინტგეზალ. -- ზურა̄ლდ ლა̈̄ქუ̂ინ:
Line of edition: 20       -- იმშა მუშგუ̂ემ ესერ ლიხ, ხა̈̄ქუ̂ინხუ ი ღო ჰე̄სამ' ე̄სერ ხემჲე̄დი,
Line of edition: 21    ჯაი მუმურჯი ხე̄რა.
Line of edition: 22       -- მინ ესერ ლიხ, ჲაღო, მიჩა ლერდი სურა̈თი მჷთხე̄ლი ი
Line of edition: 23    მა̈დილუ ხე̄რა ი ეჩი̄შუ მა ხა̈̄ქუ̂ინ.
Line of edition: 24       -- ეჩხა̄უ̂ ესერ ხუ̂ა̈ჲ მა̄რე მეჩედ, მარე ამხა̄უ̂ და̈̄რ მოშ მეტეხ, --
Line of edition: 25    ზურა̈ლდ ლა̈̄ქუ̂ინ, -- ეჩი̄ მჷნწირ ესერ და̈̄რ ა̈რი.
Line of edition: 26       -- ამგუ̂ა̈ჲ ესერ მა̈ჲ ი̄რი? ეჩხა̄უ̂ ნაუ̄ზი ესერ მა̄მა ხა̄რ ი, მა̈დილუ
Line of edition: 27    ხე̄რა, შუკუ ლახთო̄ნე, იმჟი̄ნ ხაკუჩ ეჩხა̄უ̂თე̄სგა ლი̄ზი! -- ხაშგუ̂მინ
Line of edition: 28    კორაკიშუ̂ილდ.
Line of edition: 29       -- ჲაღო, ეჩას ესერ ჰაგა̈̄მისგა რა̈შ ხო̄ბ. ეჯ რა̈შ ესერ ქა
Line of edition: 30    ერუ̂ა̈̄ჲს ხეწდენი, ლითჷრტჷნის იბნე ი ეჯ ზურა̄ლს ჟი ა̈ჲცხუნე. ეჯ
Line of edition: 31    ზურა̄ლ ესერ უცეფდ რა̈შს ჟი ხესგუ̂რი ი თე̄[მი] ტკა̈ბს ესერ ქა
Line of edition: 32    იცხპე ჩი̄ს ი ქ' ე̄სერ ერუ̂ა̈̄ჲს ხეწდენი, თჷრქა̈დშუ̂ ესერ თხუ̂იმს ჟი
Line of edition: 33    ხა̈ქუ̂ცე ი ანზჟი̄ნ ხაცუ̂ე. ეჩი̄ მურყუ̂მა̈ ჰა̈ზუ̂ ესერ მა̄რე̄მი თხუ̂იმშუ̂ ქა
Line of edition: 34    ლჷჯგო̄რე ლი გირკიდ. ათხ ესერ მინს ეში-ეში ჰე ხაკუჩხ ეჩხა̄უ̂
Line of edition: 35    ლი̄ზი, ღო ეჯჟი̄ნუ მოშ აჩა̈დხ, ერე რა̈შ მინს ქა მო̄მა ხეწეხ. ჩუ̄უ̂
Line of edition: 36    ესერ ა̈თპა̈ჟხ ი სუმინ თხუ̂იმ ქა̄უ̂ ლახწუ̂ე̄ნეხ. აშხუ̂ინ ესერ ერ ხეწდენი
Line of edition: 37    მინს, ეჩქა ესერ ეჯა თჷრტჷ̄ნს ა̈ნკედნე, ეჯ ზურა̄ლ ჟი ა̈ნცხენი
Line of edition: 38    ი ჟი ლა̈ხსგური რა̈შს ი ქა̄დრინე ქა̈̄მთე. ეჩქა მინ ესერ ჩუ̄უ̂ ა̈თპა̈ჟხ.
Page of edition: 178  Line of edition: 1    ამჟი̄ნუ ესერ ჩუ̂ემინხ სუმინ ი სუმინ ერ ქა̈̄მთე ა̈ნჴდენი ი დო̄ს ხეწდენი,
Line of edition: 2    ეჩქა ესერ ჩუ̂ანბა̈ნი რა̈შს, ერე "ამგუ̂ა̈ჲ ესერ ჯა ლა̈თრუშ ჲა̈ს
Line of edition: 3    ესყე̄დდე̄დს, ეში̄ ესერ ნო̄სა̄უ̂ ანჲა̈ცხუ̂ნე!" ეჩას ესერ ლიუ̂ჟე ხალა̈ტ
Line of edition: 4    მე̄უ̂არ. ალჲა̈რ ათა̄გა̈̄ნხ შუკუ̂ს ი ჟი ა̈თლაკხ ალ მურყუ̂ამს. სგა̄ჩა̈დხ
Line of edition: 5    უქბოშ ჰა̈ზუ̂თე̄სგა ეჯჟი̄ნ, ერე რა̈შ დე̄სა ხეწა̈დ ალჲა̈რს. კორაკიშუ̂ილდ
Line of edition: 6    ხაჴიდ ჰაგუ̂ გიმჟი̄ნ ი ეშხუ ჴა̈ლ გიმ აქუ̂იც, სგა̄ჩა̈დხ ალჲა̈რ
Line of edition: 7    ამხა̄უ̂თე̄სგა ი ჩუ̂ა̈თპა̈ჟხ. ანქუ̂იჭეხ ალ თხრილხენჟი̄ნ თხუმა̈რ ი რა̈შდ
Line of edition: 8    შიშდ თჷრტჷ̄ნ ა̈ნკიდ. ზურა̄ლ ჟი ლა̄პა̈რ ლაყუ̂რახენჟი̄ნ, ჟი ლახსგურდა
Line of edition: 9    რა̈შს ი თე̄[მი] ტკა̈ბს გირკიდ ქა̈̄ნცხიპ მა̈გ ი და̈̄ს ხეწა̈დ. სგა̄ტა̈ხ
Line of edition: 10    მურყუ̂ამთე̄სგა ი ჩუ̂ადყურდა. კორაკიშუ̂ილდ ი მიჩა აფხნეგდ
Line of edition: 11    ჟი̄დ ანქუ̂იჭეხ თხუმა̈რ ი რა̈შდ ლითჷრტჷნი̄დ ა̈დბინე. ზურა̄ლ ჟი̄დ
Line of edition: 12    ანჲა̈ცხ, ჟი ლახსგურდა რა̈შს ი თე̄[მი] ტკა̈ბს გირკიდ მურყუ̂მა̈შ ქა̈̄ნცხიპ
Line of edition: 13    მა̈გ, მარე და̈̄რ ესწუ̂ე̄ნე. სგა̄დ აჩა̈დ მურყუ̂ამთე̄სგა ი ჩუ̂ადყურდა.
Line of edition: 14    მე̄სმა̄მდ კორაკიშუ̂ილდ ი მიჩა აფხნეგდ ჟი̄დ ანქუ̂იჭეხ თხუმა̈რ
Line of edition: 15    ი რა̈შდ თჷრტჷ̄ნჷდ ა̈ნკიდ. ზურა̄ლ ჟი̄დ ანჲა̈ცხ ი ქა̄დ ა̈ნცხიპ მა̈გ,
Line of edition: 16    მარე და̈̄რჷდ ესწუ̂ე̄ნე ი სგა̄დ ატა̈ხ ი ათხე რა̈ში̄ ჩუ̂ადნაბნე: "უ̄ჟდ
Line of edition: 17    ესერ ა̈მშდეხლი ჟი ი მიჩა ცოდუ ესერ ხა̈̄ცუ̂, ამგუ̂ა̈ჲ ესერ მა̈̄ჲ ლათრუშ
Line of edition: 18    ჲა̈ს ესყე̄ნდე̄დს ჯა ამხენქა, მიჯნე̄მ ესერ ჰერ ჟ' ესა ა̈ნკჷდას
Line of edition: 19    ი ჟი ჰე̄სა ანჲა̈ცხუ̂ნას!"

Line of edition: 20       კორაკიშუ̂ილდ ი მიჩა აფხნეგდ ჟი ანქუ̂იჭეხ თხუმა̈რ, მარე რა̈შ
Line of edition: 21    მა̄მა აფა̈შ. ჟი ანჴა̈დხ ჟიქა̄ნთე ი რა̈შ მა̄მა აფა̈შ. სგა̄ჩა̈დხ ალჲა̈რ
Line of edition: 22    მურყუ̂ამთე̄სგა ი ამეჩუ̄ნ ოქუ̂რა̈ ტა̈ხდისგა ჩუ̂აყუ̂რე ნანუ̄ლ ი ჩუ იუ̂ჟე.
Line of edition: 23    კორაკიშუ̂ილდ ხა̈̄ქუ̂ინ ხელწიფი გეზალს: "ქა̄უ̂ ესერ აჩა̈დ ი ქაუ̂
Line of edition: 24    ლა̄ხყახა̈̄ნ ნანუ̄ლს!" ხელწიფი გეზალ ქა̄ჩა̈დ ი ლიყხა̈̄ლს ხამა̈რჯუ̂და,
Line of edition: 25    მარე ალ ნანუ̄ლ ჟ'ანჲა̈ცხ, ლოხფუ̈̄ლ ალ ხელწიფი გეზალს ი ქახი̄ნ
Line of edition: 26    ადკუ̂ა̈რ.
Line of edition: 27       -- ე́ჲ, ალ' ე̄სერ მა̄მა ხესკეთი ათხე, ქა̄უ̂ ესერ ლა̈ჲყახა̄ლუ̂ნე! --
Line of edition: 28    კორაკიშუ̂ილდ ხა̈̄ქუ̂ინ. -- ქა̄უ̂ ესერ აჩა̈დ ი ქა̄უ̂ ლა̈ხყახა̈̄ნ! -- ხა̈̄ქუ̂ინ კორაკიშუ̂ილდ
Line of edition: 29    ხელწიფი გეზალს. ალა ესღრი ქა, მარე ნანუ̄ლ ქა ლახ
Line of edition: 30    ხოფუ̄ლი, გა̈ნთე აკუ̂ა̄ნე. კორაკიშუ̂ილდ ჟი̄დ ოხტე̄უ̂ე: -- ქა̄უ̂ ლა̈ჲყახა̄ლუ̂ნე
Line of edition: 31    ესერ, ადო ამჟი̄ნ მა̄მა ხესკეთი! -- ნანუ̄ლდ ხა̈̄ქუ̂ინ:
Line of edition: 32       -- ჲაღო, ღე̄რბათუ̂ ესერ მჷრე̄სგ ახკაფა ამჟი̄ნ, ადო ალ' ე̄სერ
Line of edition: 33    და̈̄ს მოშ ხობდაუ̂ა მიჩა̈შდ ი დ' ე̄სერ მინე მაყალ მა ხარა, მარე
Line of edition: 34    ამჟი̄ნ ესერ მჷრე̄სგ ახკაფა ღე̄რბათუ̂ ი ლა̈სუ ესერ, ჲაღო, ამჟი̄ნ
Line of edition: 35    ი ჯ' ე̄სერ ხეხუ̂ ი̄რი ამუნღო̄ნ ი ალა ჭა̈შუ ლა̈სუ̂.

Line of edition: 36       ალჲა̈რ ჩუ̂აცუ̂ირ კორაკიშუ̂ილდ ამეჩუ̄ნ ი ჯა აჩა̈დ მიჩა ლა̈ხხუ̂ათე.
Line of edition: 37    ლი̄ზა̈̄ლს ლა̈ნშა̈ნ ასკიბხ: "ხედუ̂ა̈̄ჲს ესერ მა ა̈თყერხ, ეჩქა
Page of edition: 179  Line of edition: 1    ესერ, ლჷჲა̈რ ხედუ̂ა̈̄ჲ ლესუ̂ხ, ეჩას ესერ ლაბრა̄ლჟი̄ნ ზისხშუ ახგუ̂ეშლე̄ნახ
Line of edition: 2    შიყუ̂ილ". კორაკიშუ̂ილ ერ აჩა̈დ, ეჩქა ალ ნანუ̄ლდ ხა̈̄ქუ̂ინ
Line of edition: 3    ხელწიფი გეზალს, ერე "მიჩ ესერ ლიუ̂ჟე ხალა̈ტ ი აშხუ̂ ოთა̈ხი ყო̄რ
Line of edition: 4    ესერ ნო̄სა̄უ̂ ადკარე". ალ ნანუ̄ლს ერ ჩუ̂ა̈თუ̄ჟდა, ალ ხელწიფი გეზალდ
Line of edition: 5    ადჭკუ̄რე: "ჩუ ესერ ღენა აკრე ალ ოთა̈ხი ყო̄რს, მა̈̄ჲ ესერ
Line of edition: 6    ი̄რი, ი̄რი". ადკარე ამნე̄მდ ალ ოთა̈ხი ყო̄რ ჩუ ი სგა̈̄ნჩუ̄ნ და̈̄უ̂ კეჟია̄ნ
Line of edition: 7    ხა̈̄ბჷდა ბერჟა̈ ნა̄ჭოუ̂შ. და̈̄უ̂ კეჟია̄ნდ ხა̈̄ქუ̂ინ ხელწიფი გეზალს:
Line of edition: 8    "მა̈დილუ ესერ ხე̄რა ი მიჩა სგუ̂ებინჩუ̄ნ ესერ ხმა̈ლილდ ხაკუ̂რა, ეჯა
Line of edition: 9    ესერ ქა̄უ̂ მოშ ოთკუ̂ა̈რ მიჩ. ჭიშხილდუ ესერ ლოხუ̂რეკ, ადო ტოტუ̂შ
Line of edition: 10    ესერ დეშ ხა̈შგდე". ამნე̄მ ლა̈̄ქუ̂ინ გუისგა: "მა̈ჲ ესერ ი̄რ ღო ამი̄
Line of edition: 11    ლიკუ̂ა̄ნეღა". ლოხუ̂რეკ ჭიშხ ი ქო̄თკუ̂ა̈რ ხმა̈ლ. და̈̄უ̂ კეჟია̄ნდ ალ
Line of edition: 12    ხმა̈ლშუ̂ ჩუ̂აქუ̂იც ბერჟა̈ ნა̄ჭა ი ჟი ა̈ნფუშდუ̄რე თხუ̂იმ. ალ ხელწიფი
Line of edition: 13    გეზალსი̄ ქო̄თკუ̂ა̈რ კინჩხ ალ ხმა̄ლშუ̂ ი ალ ნანუ̄ლს ხაფხეჭ ი ეშ
Line of edition: 14    ლახკიჰე მჷრა̈̄მთე. ალ ნანუ̄ლა̈ მჷნწირ დე̄სამა არდა, ოდ ღუ̂ა̈ჟმა̄რას
Line of edition: 15    დო ლა̈ხყუ̂ინო̄ლ, ი ალ და̈̄უ̂ კეჟია̄ნი̄ ამი̄ ნაბა̈მ ლა̈სუ̂, მარე ათხე
Line of edition: 16    ღუ̂აჟმა̄რე̄მი ტა̈ნი ნა̈თილუნღო̄ნ [გაუ̂ა] დეშ ხუღუ̂ა̈̄ნდა ი ალ და̈̄უ̂
Line of edition: 17    კეჟია̄ნი̄ ჩუ̂ათწინდა. ლა̈ჲსგურე ბარჯჟი̄ნ ი ეშ ლახკიჰე.

Line of edition: 18       აშხუ̂ ლადეღ კორაკიშუ̂ილ იბრა̄ლდა ი ლაბრალჟი̄ნ შიყუ̂ილ
Line of edition: 19    ზისხშუ̂ ჟი ა̈ხგუ̂ეშლა̈̄ნ. "აჰა̄, მიჩა აფხნეგს ესერ მირ ათყერა!" ალა
Line of edition: 20    ა̈ნმა̄რა̈̄ნ მიჩა აფხნეგ ხელწიფი გეზლა̈ ლათხე̄ლთე.

Line of edition: 21       ანჴა̄დ ალა ამაუ̂ ი ლჷდგა̈რ ესხუ̂ი̄დ. ამნე̄მ უ̂ეშგდ ოხუ̂ჭუ̂ე̄ნ სურა̄თი
Line of edition: 22    ძიძა̈იშთე ი ქო̄ხო̄მბუ̂ე ალა̄, დე ზურა̄ლ არდა ეჯ მურყუ̂ამისგა
Line of edition: 23    ი ეჩი̄ ჭა̈ში̄ ლჷდგა̈რ ხეკუ̂რა̈̄ნ ლარდაისგა. ძიძა̈ჲს მე̄უ̂არ ათლო̄ნდა:
Line of edition: 24    "მიჩა ლერდი̄ ნაშგურა̄ნ მა̄მ ესერ მჷრე̄სგ ხოჩუ̂მინა, ადო ეჩქ' ე̄სერ
Line of edition: 25    ალა მა̄მა ხეყრენ!" ამნე̄მ ლა̈კუ̂ცა̈̄ნილ ლახუ̂ე̄მ ი ჩუ̂ადშგურა̄ნე: "ალა̄უ̂
Line of edition: 26    ესერ ლახჭემ ლჷდგა̈რს ი ეჩქ' ე̄სერ ჟი ა̈ნსე̄ლუ̂ი". კორაკიშუ̂ილ ქა̈̄ხბი̄შდ
Line of edition: 27    ალ ზურა̄ლს ლა̈კუ̂ცა̈̄ნს, აჩა̈დ ეჩაუ̂-ე́, იმუ̂ა̈̄ჲ ხელწიფი გეზალ
Line of edition: 28    არდა ლჷდგა̈რ. ამნე̄მ თხუ̂იმ ი ტა̈ნ უშხუ̂ა̄რ ლახჭა̈რ, ლახჭემ ლა̈კუ̂ცა̈̄ნ
Line of edition: 29    ი ალა შიშდ ჟი ლა̄პა̈რ ლჷჲა̈რ.
Line of edition: 30       -- ხუ̂ა̈ჲ ესერ მჷრე̄სგ ხოუ̂ჟა! ლა̈̄ქუ̂ინ ამნე̄მდ.
Line of edition: 31       -- ცხა̈ჲ ესერ ხოუ̂ჟა: ტა̈ნ ესერ მო̄შ ხაკუ̂რე̄ნა მიჩა ი თხუ̂იმ
Line of edition: 32    მო̄შ ი ზურა̄ლ ესერი̄ დე̄სა ა̈რი.
Line of edition: 33       -- ღუ̂ ე̄სერ იმ ოხსე̄ლუ̂ა ჯა? -- ლა̈ხჭუ̂ედდა ხელწიფი გეზალ.
Line of edition: 34       -- იმ ესერ-ი́ მიჩა ხეხუ̂მი ძიძა̈იშთე ა̈მჩედლი ჯა ი ეჩას ესერ
Line of edition: 35    ლა̈კუ̂ცა̈̄ნ ლოხოდა, ეჯ' ე̄სერ ლოხჭემა მიჩა̈შდ ი ეჩნოუ̂შ ჟი ალსე̄ლუ̂ე̄ლი.

Line of edition: 36       აჩა̈დ ალა ქა ეჯ ლარდათე̄, იმუ̂ა̈̄ჲ მიჩა ხეხუ̂ აყუ̂რა ი გაცხა̈ჲდ
Line of edition: 37    დე̄სა ესხუ̂ი̄დდა. ამნე̄მ ლაგუ̂ა̈ნს ჩუ̂ა̈ნტუფუ̄რე მა̈გ. ალჲა̈რ ქა̄დ ატა̈ხხ
Page of edition: 180  Line of edition: 1    ძია̈იშთე ი ხაშგუ̂მინ კორაკიშუ̂ილდ: -- მა̈დილუ ხე̄რა ი ლახთუ̂ე̄ნუ მა,
Line of edition: 2    იგებს ესერ ერე ა̈ნჴჷრჴე̄ნს იმჟი̄ნ სურა̈თი ლითხე̄ლი.
Line of edition: 3       -- ძღჷდ გარჯ ესერ ლი ათხე ეჩი̄ ლითხე̄ლი. ეჩას ესერ და̈̄რ
Line of edition: 4    მოშ ხა̈წრე̄, და̈̄უ̂ კეჟია̄ნს. -- ძიძა̈ჲდ ხა̈̄ქუ̂ინ.
Line of edition: 5       -- ეში̄ იმჟი̄ნ ესერ ხეჩუ̂ე̄ნი ლითხე̄ლი, ჰაჯა̈ მჷკედ ესერ დე̄მჟი̄ნ
Line of edition: 6    ლიხ მინ. -- კორაკიშუ̂ილდ ხა̈̄ქუ̂ინ.
Line of edition: 7       -- ეში̄-ეში̄ ესერ ჰე ხაკუხ, ჲაღო ქ' ე̄სერ ლახთუ̂ე̄ნნე, მარე
Line of edition: 8    დო̄უ̂ ესერ ცუ̂იდდ ლა̈სუ̂! -- ძიძა̈ჲდ ხა̈̄ქუ̂ინ: -- აშხუ̂ მინდუ̂ერისგა ესერ
Line of edition: 9    მურყუ̂ამ ლჷგ. ეჯ მურყუ̂ამისგა ესერ ზაუ̂ისგა აშხუ̂ინ ყუ̂იჩ ყჷლე ი
Line of edition: 10    ეჩქა ესერ ეჯა ყიაჟი̄ნ სა̄ბელს აკუ̂ა̄ნე ი ეჩას ესერ ერუ̂ა̈̄ჲ მოშ ჩუ
Line of edition: 11    იხუ̂იე̄სგი, ეჩი̄ მეჰე ესერ დე̄სამა ა̈რი. მარე შომუ̂ა̈̄ჲ ესერ ეჯ ყუ̂იჩ
Line of edition: 12    ლიყლეს ა̈დბინი, ეჯ ლეთ ესერ მა̈̄ჲ ნა̈დირ ჩუ ირდი, მა̈გ გირკიდ
Line of edition: 13    ხეცხპენი ი ეჩას ხოდრა̈ჯიხ. ეჯ და̈̄უ̂ კეჟია̄ნს ესერ ეჯზუმ ოთნა̈ზუ̂რა
Line of edition: 14    ნა̈თხუ̂იარე, ერე შომუ̂ა̈̄ჲ ლე̄თ ყუ̂იჩ ლჷმყჷლო̈̄ნ, ეჯ ლე̄თ ესერ თუ̂ით
Line of edition: 15    ნა̈თხუ̂იარე ჩიდ ქა ოთხუ̂ია, მარე აშხუ̂ თხე̄რას ესერ ათკუ̂ა̈დუ̂ნე̄ნა
Line of edition: 16    ქა ი ეჩას ესერ ხოფხჭა სა̄ბელდ ი ეშხუ ჭიშხ ქო̄ხქუ̂ი̄ცა ი ათხ' ე̄სერ
Line of edition: 17    სემი ლჷჭიშხ რა̈შ გარ ხაყა. მინ ესერ ჰე მოშ ო̄შთხუ̂ ლჷჭიშხს ა̈დხუ̂იე̄სგნეხ,
Line of edition: 18    ეჩქა ესერ მინ ი̄რიხ ეჯ და̈̄უ̂ კეჟია̄ნა̈ მჷწრე.

Line of edition: 19       კორაკიშუ̂ილდ ი მიჩა აფხნეგდ ლა̈ჲბინეხ ლითხუ̂ია̈რ ი აშხუ̂
Line of edition: 20    ზაუ̂ისგა ინზო̄რახ ნა̈თხუ̂იარს. შომუ̂ა̈̄ჲ ლე̄თიშდ ლჷნშა̈ნ ლა̈სუ̂ ყუ̂იჩი
Line of edition: 21    ლიყლე, ეჯ ლე̄თ მინი̄ აჩა̈დხ ალ მურყუ̂ამთე. ისგლა̄თუ̂ ხოღელდახ ი
Line of edition: 22    ისგლე̄თჟი̄ნ ა̈დტუ̂ი̄ლ ყუ̂იჩდ ი ჟი ანკუ̂ა̈რ ყიაჟი̄ნ სა̄ბელ. ამ დუ̂რეუ̂ჟი̄ნ
Line of edition: 23    ალ მურყუ̂ამს გირკიდ ხეცხა̈პ, მა̈̄ჲ მა ნა̈დირ ჩუ̂არდა. მარე ყუ̂იჩდ ჟი
Line of edition: 24    ჰა̄ლ ანკუ̂ა̈რ ყიაჟი̄ნ სა̄ბელ, შიშდ კორაკიშუ̂ილდ ხაფხეჭ, ნა̈დირს
Line of edition: 25    ლოხბინეხ ნა̈თხუ̂იარე̄მი ლიშდე ი ეჯზუმ ხუღუ̂ა̈̄ნხ, ერე თუ̂ით ჩი̄ს
Line of edition: 26    ქა̄თხუ̂იეხ. ალჲა̈რდ ქო̄ხღეხ ალ სა̄ბელ ჰა̈დუ̂ირდ ი სგა̄ნჴა̈დხ სურა̈თი
Line of edition: 27    ძიძა̈იშთე̄სგა. ძიძა̈ჲს მე̄უ̂არ ათხი̄დჷნ, ლახე სა̄ბელ ჰა̈დუ̂ირდ ხეყა̈̄ნდახ.
Line of edition: 28       -- ათხ' ე̄სერ ჲაღო ეშხუ ჩა̈̄ჟი ლა̈̄ბ დია̈რუ ლა̈ჲყედნეხ.
Line of edition: 29    ეშხუ ჩა̈̄ჟი ლა̈̄ბ თუ̂ი ი ეშხუ ჩა̈̄ჟი ლა̈̄ბ ბამბა̈ჲ. ეჩხა̄უ̂ ესერ ერ ესი̄ზინიხ,
Line of edition: 30    მა̈̄ნკუ̂ი ესერ ჟეღრე ჯუ̂ეგს ა̈თდო̄ლახ, მარე მინდ ესერ ეჯჲა̈რს
Line of edition: 31    დია̈რუ ოთშიდხ ი ეჩქ' ე̄სერ ეჯჲა̈რ ქა̈̄ფშუ̂დეხ მინს. ეჩუნღო̄ნ
Line of edition: 32    ესერ ბუზუ̄ლა̈რ, ესხო̄ლახ, მარე ეჯჲა̈რს ესერ თუ̂ი̄უ̂ ესუ̂დეხ. ეჩუნღო̄ნ
Line of edition: 33    ესერ ესხო̄ლახ კოჯ. ეჯ კოჯა̈რ ესერ უშხუ̂ა̄რ ხოშყბჷნეხ, მარე
Line of edition: 34    მინდ ესერ ეჯჲა̈რს ლილჟირიე̄ლუ ლოხბინეხ ი ბამბა̈ჲსუ ესერ ხონხენდახ
Line of edition: 35    ი ეჩქ' ე̄სერ ეჯჲა̈რ ქა̈̄ფშუ̂დეხ.

Line of edition: 36       ძიძა̈ჲდ იმუ̂ა̈̄ჲჟი̄ნ ქა ლოხუ̂თუ̂ე̄ნ, ალჲა̈რდ მა̈გ ეჯჟი̄ნ ჩუ̂ემინხ.
Line of edition: 37    ათა̄სდხ მა̈̄ნკუ̂ი ჟეღი ჯუ̂ეგს ი კორაკიშუ̂ილდ შიშდ დია̈რ ოთშიდ
Page of edition: 181  Line of edition: 1    ხა̈̄ქუ̂ინ: "საბლუ ჟეღა̈რ, დო̄უ̂ ჯა̈იდჷნდახ ი ლახე̄მდ ალა̄, დია̈რ!"
Line of edition: 2    ჟეღა̈რდ ხა̈̄ქუ̂ინხ: "ნიშგუ̂ეჲ მახუ̂ში ამთა̄ნ დია̈რს მა̄დეჲ ტაბგი ნარყჷნუ̂ა̈ლს
Line of edition: 3    ლახე ნიშდე, ეჯაი ხაშა ი ლიყრულ მე̄უ̂არ ხაკა̈ფ. ღჷრდ,
Line of edition: 4    იმთუ̂ა̈̄ჲთე ესღრი, ხოჩა̄უ̂ შუკუ̂ ჯა̄რ! ისგუ მეთელ დე ეჩხა̄უ̂ ხუ̂იშდ ი
Line of edition: 5    დე ამხა̄უ̂". ალჲა̈რს ქა ლოხუ̂ქა̈̄ბხ ი ბუზუ̄ლა̈რს ათა̄სდხ. ბუზუ̄ლა̈რს
Line of edition: 6    კორაკიშუ̂ილდ შიშდ თუ̂ი ესუ̂დე ი ხა̈̄ქუ̂ინ: "საბლუ ბუზუ̄ლა̈რ, დო̄უ̂ე
Line of edition: 7    ჯა̈იდჷნდახ ი ლახე̄მდ ალა̄, თუ̂ი!" ბუზუ̄ლა̈რდ ხა̈̄ქუ̂ინხ: "ნიშგუ̂ეჲ მახუ̂ში
Line of edition: 8    ჰა̈რი ფარა̈ლჷნქა ჩუ დე̄მგუ̂აშუ̂ ნა̈ცუ̂რე ი სი ამჟი̄ნ ჯიჟრიდ-ა̄,
Line of edition: 9    თუ̂ის ნიდი. ხოჩა̄უ̂ გზა̄უ̂რობ ჯა̄რ, იმუ̂ა̈̄ჲთე ესღრი! ისგუ ქა მუფშუ̂დე
Line of edition: 10    ხუ̂იშდ ჩი̄თე". აჩა̈დხ ეჩხა̄უ̂ხიდ ი ჲერუ კოჯ ეჩხა̈ნ-ამხა̈ნისგა უშხუ̂ა̈რ
Line of edition: 11    ხოშყბჷნახ. კორაკიშუ̂ილდ ხა̈̄ქუ̂ინ: "საბლუ კოჯა̈რ, ამჟი̄ნ უშხუ̂ა̄რ დე̄მ
Line of edition: 12    ლა̈ხტჷრკილა̈უ̂იდა́? ჩუ̂ესგედად ღენა, ბამბა̈ჲს ლა̈ჯნა̈ხნე, ნო̄თა̄უ̂ ხომე̄ნშგუ̂ილ
Line of edition: 13    მა ჯა̄დდახ". კოჯა̈რს მე̄უ̂არ ათბაჟჷნდახ ი ხა̈̄ქუ̂ინხ: "სი ნა̈ჲ
Line of edition: 14    ჯიჟრიდ ი ბამბა̈ჲს ნინხენი, ნიშგუ̂ეჲ მახუ̂ში ბამბა̈ჲს მა̈დეჲ უშხუ̂ა̄რ
Line of edition: 15    ლახე ლოხხჷპჷ̄რიდ, ეჯღაჲ მა̄მა ფეშნი. მა̈̄ღენუ̂ა̈̄ჲ ბამბა̈ჲ ლა̈ნნა̈ხ, ისგუ
Line of edition: 16    მეთელ მა̄მა ხუ̂იშდ. ხოჩა̄უ̂ გზა̄უ̂რობ ჯა̄რ იმუ̂ა̈̄ჲთე ესღრი!"

Line of edition: 17       ალჲა̈რ, ქა̄ჩა̈დხ ალ კოჯქა ი სგა̄დჰეხ და̈̄უ̂ კეჟია̄ნა̈ ქორთე̄სგა.
Line of edition: 18    ამეჩუ̄ნ სურა̈თ ჩუ̂ესხუ̂ი̄დდახ ი და̈̄უ̂ კეჟია̄ნ ლა̈თხუ̂იარს არდა. სურა̈თს
Line of edition: 19    მეუ̂არ ათხი̄დჷნ ალჲარე ლიწედ, მარე გუნა̈ბ ლახა̄დ: -- ცუ̂იდდ ესერ
Line of edition: 20    ა̈მჴედე̄ლიხ ათხ' ე̄სერ და̈̄უ̂ კეჟია̄ნი̄ შიშდ ჴედნი ა̈გითე ი ეჩას ესერ
Line of edition: 21    დეშ ხა̈წრეხ მინ: ეჩი̄ მჷნწირ ესერ და̈̄რ ა̈რი. -- ეჩი̄ ღედ ესერ ნო̄მა̄უ̂
Line of edition: 22    ხა̄რ! -- კორაკიშუ̂ილდ ხა̈̄ქუ̂ინ. -- და̈̄უ̂ კეჟია̄ნს ესერ სემი ლჷჭიშხ რა̈შ
Line of edition: 23    ხაყა ი მინს ესერ ეჩი̄ უდილ ო̄შთხუ̂ ლჷჭიშხ რა̈შ ხაყახ.

Line of edition: 24       ალჲა̈რ. სემი მა̈გ, ჟი ლახსგურდახ ი ანღრიხ. ა̈დბა̈ჟ ალა და̈̄უ̂
Line of edition: 25    კეჟია̄ნდ ი შიშდ უ̂ეშგინ ა̈ხჭა̈მ. ახღუ̂იჭ ალა ი კოჯა̈ იმედ ხა̄დდა,
Line of edition: 26    მარე კოჯდ ალჲა̈რ ქა̄ფიშუ̂დ. ეში̄ ესღუ̂იჭ ი ბუზუ̄ლრე იმედ ხა̄დდა,
Line of edition: 27    მარე ბუზუ̄ლა̈რდი̄ ქა̄ფიშუ̂დხ. ესღუ̂იჭ აჯაღჷდ ი ჟეღრე იმედ ხა̄დდა,
Line of edition: 28    მარე ჟეღა̈რდი̄ ქა̄ფიშუ̂დხ. და̈̄უ̂ კეჟია̄ნს მე̄უ̂არ ათჷმბაჟჷნ, ერე მიჩა
Line of edition: 29    ყა̈რუ̂ლა̈რდ ჩიემ ესღალტეხ ი ქა̄ფიშუ̂დხ. ესღუ̂იჭ, ესღუ̂იჭ ი სგა̈̄ხფედილა̈̄ნ.
Line of edition: 30    კორაკიშუ̂ილდ ხა̈̄ქუ̂ინ მინე ლასგუ̂რა რა̈შს: "ხა̈̄ქუ̂ინუ ესერ
Line of edition: 31    მიჩა უდილს, ნო̄უ̂ ესერ ა̈ნხინ, ჯ' ე̄სერ ო̄შთხუ̂ ლჷჭიშხ ლი ი ეჯა
Line of edition: 32    სემი ლჷჭიშხ გარ ლი ი ნო̄უ̂ ახწინდა ეჯა". ალ ო̄შთხუ̂ ლჷჭიშხ რა̈შდ
Line of edition: 33    ლახტუ̂ი̄ლ უ̂ეშგმაუ̂: "ნო̄უ̂ ესერ ანჴა̈დ, ადო ლა̈დ' ესერ ხოლა̄მ ლადეღს
Line of edition: 34    ხა̈გნე!" ალ სემი ლჷჭიშხ რა̈შ ჩუ̂ა̈დბჷჯგნა̈̄ნ ი ბა̈̄ჴ მა̄დ ლა̈ჲბა̈̄ჴ
Line of edition: 35    სგუ̂ებნაუ̂. და̈̄უ̂ კეჟია̄ნდ ხაჴიდ ი ხაჴიდ, მარე რა̈შდ ეში̄ ბა̈̄ჴ მა̄დე
Line of edition: 36    ლა̈ჲბა̈̄ჴ. და̈̄უ̂ კეჟია̄ნს ჩუ ლესედ ხა̄დდა. კორაკიშუ̂ილ ი მიჩა აფხნეგა̈რ
Line of edition: 37    სგა̄ნჴა̈დხ სურა̈თი ძიძა̈იშთე̄სგა. ალა ძიძა̈ჲსი̄ მე̄უ̂არ ათხი̄დჷნდა,
Line of edition: 38    მიჩა ლერდი̄ ლიწედ. კორაკიშუ̂ილ მიჩა სამ ლა̈ხხუ̂ას ახა̄სდ ი
Page of edition: 182  Line of edition: 1    ქა̄ხა̄გა̈ნხ მა̈გ შუკუ̂ს. ესღრიხ, ესღრიხ ი ეჯ სომხი ყო̄რქა ლა̈ხჴა̈დჷ̄ნა̈̄ნხ-ე́,
Line of edition: 2    ხელწიფი გეზლი̄რს ერ ახწინდა ლაბულქოუ̂ა̄ლს. ალ სომეხ
Line of edition: 3    ჩუ̄დ ესხუ̂ი̄დდა ყო̄რჟი̄ნ ი ხა̈̄ქუ̂ინ ალჲა̈რს: "ჟი̄უ̂ ესერ ა̈ნშუ̂ემხ ი სა̈დილუ
Line of edition: 4    ლალემხ, ალჲა̈რდ ჟი ა̈ნშუ̂ემხ ი სადილ ლალემხ. სა̈დლი ლამა̄რაჟი̄ნ
Line of edition: 5    ხელწიფი ხოშა̄მ გეზალდ ლეღუ̂ ოხჴიდ ალჲა̈რს ტაბა̈გთეჟი̄ნ
Line of edition: 6    ი მანე̄სგრა̄მ გეზალდ -- დია̈რ. ნა̈სდილობენ სომეხდ ხაშგუ̂მინ ხელწიფი
Line of edition: 7    გეზალს: "ლიბულქოუ̂ა̈̄ლუ ესერ ახა̄დხ". ახა̄დხ ალჲა̈რს ლიბულქოუ̂ა̈̄ლ
Line of edition: 8    ი ჟი ახწინდა სომეხ, მა̈̄ჲ მა ხუღუ̂ა̈̄ნდა, ჩი̄ს ქა̈̄ხბი̄შდ, მიჩა ხეხუ̂ს ი
Line of edition: 9    მიჩა თხუ̂იმსი̄. ეჩუნღო̄ნ კორაკიშუ̂ილ ა̈ხბულქოუ̂ა̈̄ნ ი ჩიქე ხელწიფი
Line of edition: 10    ხოხუ̂რა გეზალ ი ეჩი̄ ხეხუ̂ ა̈ნტიხ, ეჩუნღო̄ნ ხელწიფი ხოშა გეზალ,
Line of edition: 11    ღო მანე̄სგრე გეზალ, ეჩუნღო̄ნ ეჯჲა̈რს, მა̄რა̈̄ლს, ერ ა̈ხბი̄შდდა სომეხ,
Line of edition: 12    ეჩას ა̈ხბი̄შდ კორაკიშუ̂ილ. ახა̄დდახ აჯაღ ი სომეხს მა̈̄ჲ მა ქონა̈ბ
Line of edition: 13    ხუღუ̂ა̈̄ნდა, ჩი̄ს ქა̈̄ხბი̄შდდა. უ̂ეშგიმპილს უშხუ̂ა̄რე თხუ̂იმ ა̈დქუ̂იცხ,
Line of edition: 14    ჟ'ახწინდა კორაკიშუ̂ილ ი ხომეხს ქა ლენჴრი ხა̄დდა კორაკიშუ̂ილიშდ.
Line of edition: 15    კორაკიშუ̂ილდ ი ხეწიფი გეზლი̄რდ სომეხს ქონა̈ბს იმუ̂ა̈̄ჲ მოშ
Line of edition: 16    ათწინდახ, მა̈გ ადჲეხ.

Line of edition: 17       ესღრიხ, ესღრიხ ი ხელწიფი ქორს ერ ლა̄ხფედი̄ლა̈ნხ, ეჩქა
Line of edition: 18    სგუ̂ებინ ბა̈ჟინ ადზჷზეხ, ერე "ხელწიფსუ ესერ ხახე̄ნეხ: მიჩა ხოხუ̂რა
Line of edition: 19    გეზალ ესერ ანღრი ი მიჩა ხეხუ̂ სურა̈თი̄ ახყა ი მიჩა ლახუ̂ბაი̄". ალ
Line of edition: 20    ხელწიფს გეზლი̄რ მა̈გ ლჷკჰე ხოხალდა ი მიჩა ლა̈ზგა ჩუ ლუღფუ̄რე
Line of edition: 21    ხა̄დდა. ალჲა̈რ სგა̄ჩა̈დხ ხელწიფიშთე̄სგა. ხელწიფ ქა ლა̈ხზაზ ჰა̈ზუ̂თექა
Line of edition: 22    ი ჩუ ლუთთუ̂ენე ლა̈სუ̂ ხა̈დურდ ჴასგა̈რშუ̂ გეზლი̄რე ლაჭკუ̂ა̈რისგა.
Line of edition: 23    ალჲა̈რს უშხუ̂ა̄რე ლიწედ მე̄უ̂არ ათხი̄დჷნდახ ი ძღჷდ ლა̈ხიადა̄ლ
Line of edition: 24    ი ქუ̂ერწილ აჩუ̂მინხ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.