TITUS
Svan Prose Texts I (Upper Bal)
Part No. 87
Previous part

Text: 94 
Page of edition: 172 
Line of edition: 25 
94. ჯიჯბა̈ჴი̄ლ


Line of edition: 26       არდახ ჲერუ ხეხუ̂-ჭა̈შ. ალჲა̈რს გეზალ დე̄სა ხორდახ ი ჩილადეღ
Line of edition: 27    ნატუ̄სუნს ატუ̄სახ ი ხეჴჷ̄რა̄ლხ ღე̄რბათუ̂ გეზლა̈ ლითნეს. ჭა̈შ აშხუ̂
Line of edition: 28    ზუგუ̂თეჟი̄ნ ესღჷრდა ღერთა̈ ლაჴჷ̄რა̄ლდ ი ნატუ̄სუნს ატუ̄სა.

Line of edition: 29       აშხუ̂ ლადეღ ფუსნაბუა̄სდდ ჩუ̂ანზჷზე ა̈ნგუ̂ლეზ დეცხენჩუ̄ნ: "ჩუ̄უ̂
Line of edition: 30    ესერ აჩა̈დ ი ჟი̄უ̂ ა̈ნმეჴრე, ჲა̈რუ ლესუ̂ ჩილადეღ ამჟი̄ნ ნატუ̄სუნა̈
Line of edition: 31    მუტუ̄სე?, ა̈ნგუ̂ლეზ ჩუ̂ანჴა̈დ ი აშხუ̂ ზუგუ̂ჟი̄ნ ჩუ̂ესხუ̂ი̄დ მეჩი მა̄რე, ნატუ̄სუნს
Line of edition: 32    ატუ̄სა. "მიჩა ნატუ̄სუნა̈ ქუ̂ინს ესერ ფუსნაბუა̄სდიშმჷყ ოჰა
Line of edition: 33    ი ეჩას ესერ ოხზჷზა ჯა ლა̈მჴერდ: მა̈უ ესერ ხეკუ̂ეს მიჩ, ედე იმნა̈რ
Line of edition: 34    ესერ ატუ̄სე ჩილადეღ ი იმშა მუშგუ̂ემ ლი?" ა̈ნგუ̂ლეზდ ხა̈̄ქუ̂ინ. ალ
Line of edition: 35    მა̄რე̄მ ხა̈̄ქუ̂ინ: "მიჩ ესერ გეზალ მა̄მა ხორი ი ხეჴჷ̄რა̈̄ლ ესერ ღე̄რბათუ̂
Page of edition: 173  Line of edition: 1    გეზლა̈ ლითნეს". ა̈ნგუ̂ლეზ ჟი̄დ ატა̈ხ ი ფუსნაბუა̄სდიშს ქა
Line of edition: 2    ოხო̄მბუ̂ე. ფუსნაბუა̄სდიშდ ეშხუ უ̂ისგუ̂ ლახუ̂ე̄მ: "ჩუ̄უ̂ ესერ ოთჴიდ ალა
Line of edition: 3    ეჯ მა̄რას ი ნა̈ბიჴუ̂ ეჩასუ ხა̄მნე ი ნა̈ბიჴუ̂ მიჩა ხეხუ̂ს". ა̈ნგუ̂ლეზ ჩუ̂ანჴა̈დ
Line of edition: 4    ჩუბებუა̄სდთე ი ალ მა̄რე ჩუ̄დ ესხუ̂ი̄დ ალ ზუგუ̂ჟი̄ნ ი ნატუ̄სუნს
Line of edition: 5    ატუ̄სა. ა̈ნგუ̂ლეზდ ხა̈̄ქუ̂ინ ალ მა̄რას: "მიჩა ლიჴჷ̄რა̈̄ლ ესერ სგა ლოხუ̂სიმნა
Line of edition: 6    ღე̄რბათუ̂ ი მინს ესერ გეზალ ქა̈̄ხთენიხ აშხუ̂ ზაუ̂ისგა". ქა
Line of edition: 7    ლახუ̂ე̄მ უ̂ისგუ̂ ი ხა̈̄ქუ̂ინ: "ხჷნსგ' ე̄სერ მიჯნე̄მუ ლალე̄მ ი ხჷნსგა მიჩა
Line of edition: 8    ხეხუ̂სუ ხა̄მნე. ალ მა̄რე ქა̈̄ხბი̄შდ ალას, ხჷნსგა მიჯნე̄მდ ლალე̄მ ი
Line of edition: 9    ხჷნსგა მიჩა ხეხუ̂ს ხა̄მნე.

Line of edition: 10       ამი̄ ხეხუ̂ გაცხა̈ჲდ ჩუ̂ა̈დღანუ̂ა̈̄ნ ი ჭყინტ ა̈ხთენა̈̄ნ, ჟი ა̈ნპირსდეხ ი
Line of edition: 11    ჯიჯბა̈ჴი̄ლ ათჟა̈ხხ. ალა ეჯჟი̄ნ ცხემა̈ჲ ჩუ ლა̈სუ̂, ერე კამინს ლა̈̄თშუ̂
Line of edition: 12    იცხა̈მდა ი ირთხილს ლადეღუ̂შ. ჯიჯბა̈ჴი̄ლდ ლანყაუ̂თე ლი̄ზი ა̈დბინე
Line of edition: 13    ი ჭყჷნტა̈რს ჩი̄ს ცეჴემდა̈რ ხუღუ̂ა̈̄ნდახ ი მიჩ -- მა̄მა. აშხუ̂ ლე̄თ ა̈გითე
Line of edition: 14    ერ ანჴა̈დ, ხა̈̄ქუ̂ინ მიჩა მუს: -- მამა, ჩი̄ს ცეჴემდა̈რ ხუღუ̂ახ ი მი[ი] ა̈მტა̈̄ბ!
Line of edition: 15       -- ბაბას ისგუ მა̈ზიგ, ჩიქი დეშ ხი მეცჴემდა̈̄ლზუმ, ადო ცეჴემა̈დს
Line of edition: 16    ოქუ̂რა̈შსი̄ ჟი ა̈ჯტა̈̄ბნე სური̄.

Line of edition: 17       აჩა̈დ აჯაღ ლა̈შდრა̄ლთე ი ჭყჷნტა̈რს ჩი̄ს ცეჴემდა̈რ ხუღუ̂ა̈̄ნდახ ი
Line of edition: 18    ჯიჯბა̈ჴი̄ლს -- დე̄სა. ნა̈ბუზს ა̈გითე ანჴა̈დ ი ხა̈̄ქუ̂ინ: "ბაბა, ჩი̄ს ცეჴემდა̈რ
Line of edition: 19    ხუღუ̂ახ ი მი[ი] ა̈მტა̈̄ბ!" ჯიჯბა̈ჴი̄ლს ჟ'ოხუ̂ტა̄ბე მიჩა მუდ ცეჴემა̈დ,
Line of edition: 20    ა̈ნბუ̄წე ჟი ჯიჯბა̈ჴი̄ლდ ი ადკუ̂ა̈რ.
Line of edition: 21       -- ბაბა, ათხე ლათხე̄ლთე ღური ცხუ̂ი̄მიშ, მა̈ზუმ ჯუ̂ე̄დიადუ ა̈მშყედე̄ლა̈სუ̂.
Line of edition: 22       -- ბაბას ისგუ მა̈ზიგ, ღე̄რბათუ̂დ ი მა̄რად მა̈გ ისგუ თხუ̂იმ მითია̄ლა
Line of edition: 23    ი ნჷმა აჩე, ნჷმა ათკიჰა თხუ̂იმ, ცხუ̂ის ოქუ̂რა̈შსი̄ ჟი ა̈ჯტა̈̄ბნე.

Line of edition: 24       ჯიჯბა̈ჴი̄ლდ ეში̄ მა̄დ ა̈დჟომე ლი̄ზი ი აჩა̈დ ლათხე̄ლთე. ესღრი,
Line of edition: 25    ესღრი ი აშხუ̂ ა̈გის სგა ხეშტკჷნა̈̄ნ ცხუ̂ი კოჯისგა. ჯიჯბა̈ჴი̄ლ ქა ხობიდდა
Line of edition: 26    ი დეშ ახყუ̂იფ ქა ცხუ̂ი. სგა̄უ̂ ლოხჯუ̂ი̄რ ი ყო̄რ ხეყა̈რ. სგა̄ჩა̈დ
Line of edition: 27    სგა̈̄ნჩუ̄ნ ი სგა̈̄ნჩუ̄ნ ოქუ̂რა̈ ტა̈ხდჟი̄ნ ნანუ̄ლ აყუ̂რა. ალჲა̈რს უშხუ̂ა̄რე
Line of edition: 28    თხუ̂იმ ლახლატჷნდახ ი ჩუ̂ა̈დხეხუ̂ჭაშა̈̄ნხ. აშხუ̂ ლადეღ ჯიჯბა̈ჴი̄ლ
Line of edition: 29    მე̄რმა ოთა̈ხთე აჩა̈დ ი ამეჩუ̄ნ და̈̄უ̂ ხა̈̄ბდა. "ა̄, ჯიჯბა̈ჴი̄ლ-უნყუ̂ს ლა̈ნჴა̈დ
Line of edition: 30    შუ̂იდებდ, დ' ო̄ნყუ̂ს ხიჩო ეჩთა̄ნ მა̈დილს ი ჟი̄ნყუ̂ს დო მუფშუ̂დე!"
Line of edition: 31    ჯიჯბა̈ჴი̄ლს ლოხუ̂ჟინდა ალ და̈̄უ̂ ი ჟი ანფიშუ̂დ. ალ და̈̄უ̂ ეშ ლა̈ხკიჰა̈̄ნ
Line of edition: 32    ცხეკთე. ჯიჯბა̈ჴი̄ლდ მიჩა დი̄-ჲ მუ ქა̄ნჴიდ ამხა̄უ̂ ი ამეჩუ̄ნ
Line of edition: 33    ადზიგუ̂ნე.

Line of edition: 34       აშხუ̂ ლადეღ ჯიჯბა̈ჴი̄ლ ლა̈თხუ̂იარს არდა. ჯიჯბა̈ჴი̄ლდ ერ და̈̄უ̂
Line of edition: 35    ჟ'ანფიშუ̂დ, ეჯ და̈̄უ̂ სგა̈̄მჴედე̄ლი ი ჯიჯბა̈ჴი̄ლა̈ დი̄-ჲ მუ ჩუ ლოხმამა,
Line of edition: 36    თხუმა̈რს ყუ̂ელფჟი̄ნ ხაგუ̂რანა̄ლუ̂ნა: "ამჟი̄უ̂ ალფჷრე̄ლი ჯიჯბა̈ჴი̄ლ, ამჟი̄უ̂
Page of edition: 174  Line of edition: 1    ალჩხჷკნე̄ლი ჯიჯბა̈ჴი̄ლ!" ალ დუ̂რეუ̂ს ჯიჯბა̈ჴი̄ლი̄ ანჴა̈დ ყო̄რისგა ი
Line of edition: 2    ქა ხესმი და̈̄უ̂ა̈ გა̈რგლა. "აჲ, სი ნაჴე̄ცურა, მი სი ქა̄ჯთა̄უ̂სუფა̈ლ, ადო
Line of edition: 3    ჩუ ხა̈̄ბდა̈ს ბერჟა̈ ნა̄ჭოშ, ათხე მა̈გუ̂ა̈რდუ ლა̈ჯხელე̄ნ!" ხაფხეჭხ ალჲა̈რდ
Line of edition: 4    უშხუ̂ა̄რ, იბჷრგიე̄ლხ, იბჷრგიე̄ლხ ი ჩუ̂ა̈ნდე ჯიჯბა̈ჴი̄ლდ და̈̄უ̂.
Line of edition: 5       -- ე̄, მა̈დილ ჯე̄რი, ჯიჯბა̈ჴი̄ლ, ი ხა̈დურდ ჩუ ნჷმა ამდაგრა ი
Line of edition: 6    ისგუ̂ა დის ი მუს ჟი ჯისე̄ლუ̂ე.
Line of edition: 7       -- ეჲ, სი ნაჴე̄ცურა, ჟ'ა̈მსე̄ლა̈უ̂, ადო ჩუ ჯადგა̈რი!
Line of edition: 8       -- ეჯჲა̈რ ქა̈̄ხი̄ყ მიშგუ̂ა ჴადუ̂ხენქა ი მიშგუ პლატკულ ლა̄ხა̈ჭმ ი
Line of edition: 9    ეჯჲა̈რ შიშდ ჟი ა̈ნსე̄ლუ̂იხ.
Line of edition: 10       -- აჲ, სი ნაჴე̄ცურა, ეჩასი̄ ჩუ ხუ̂იჩო ი სიი ჩუ̂აჯდაგრი.
Line of edition: 11    ალ და̈̄უ̂ ჩუ̂ადგა̈რ ჯიჯბა̈ჴი̄ლდ ი მიჩა დი̄-ჲ მუ ჟი ანსე̄ლუ̂ე ი ალჲა̈რდ
Line of edition: 12    ხოჩა ლირდე-ლიზგე ა̈დჴიდხ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.