TITUS
Svan Prose Texts I (Upper Bal)
Part No. 86
Previous part

Text: 93 
Page of edition: 168 
Line of edition: 19 
93. ხუ̂ეჯე


Line of edition: 20       არდახ სემი ლახუ̂ბა. ალჲა̈რს ხორდახ ეშხუ ოქუ̂რა̈ ტაბა̈გ. აშხუ̂ინ
Line of edition: 21    ალჲა̈რს ლი̄თა̈̄ლ ოხჩჷ̄დხ, ხეკუ̂ა̈დხ ერე ჩუ̂ალჷ̄თე̄ლესუ̂ხ, მარე
Line of edition: 22    ოქუ̂რა̈ ტაბა̈გს დეშ იმჟი̄ნ ი̄თახ. ხოხუ̂რა̄მ მუხუ̂ბად ხა̈̄ქუ̂ინ: -- ეშ მა̄დე,
Line of edition: 23    მიშგუ ლახუ̂ბა, ი ნჷმა ა̈ლი̄თე̄ნდ, ადო ათხ' ე̄რ ღა̈რიბდ ლა̈რიდ,
Line of edition: 24    ეჩქა ხა̈დურდ ხოღრიბა̄მდ ლირდიდ. ეშხუ ლა̈დია̄ნათე ჲა̈რ ალჩედ,
Line of edition: 25    ღო ნო̄თაუ̂ ლა̈ლკეშგდ მა.
Line of edition: 26       -- ეშ ლუჩუ̂მინად, ჲაღო! -- ხა̈̄ქუ̂ინხ მიჩა ლახუ̂ბად. ხოშა̄მ მუხუ̂ბად
Line of edition: 27    ლა̈̄ქუ̂ინ: "ჯ' ე̄სერ ღჷრი ლა̈დია̄ნათე". ა̈ნმა̄რა̈̄ნ ალა ი ტაბგი ჭიშხი̄
Line of edition: 28    შჷნ ლა̈ჲყედნე. ესღრი, ესღრი ალა ი აშხუ̂ სოფელთე̄სგა ლა̈ხჴა̈დჷ̄ნა̈̄ნ.
Line of edition: 29    ალ სოფლი თხუმ იზგა ეშხუ მა̄რე, ჟახად ხუ̂ეჯე ხეჟხა̈̄ნ. ალ მა̄რე
Line of edition: 30    სოფლი თხუმ იზგა ი სოფლი ჰოკერ ესხუ̂ი̄დ, აქა̈̄ნი ოხკიდ ი ლა̈ხჭუ̂ედდა: -- იმაუ̂
Line of edition: 31    მე̄ზი ხი, სი ჭყინტჷლდ?
Line of edition: 32       -- იმაუ̂ ი ლა̈დია̄ნათე, ღა̈რიბ მა̄რე ხუ̂ი, ნო̄თაუ̂ ოხუ̂იკ ე̄სამა ნა̈დია̄ნუ̈̄რდ.
Line of edition: 33       -- ო̄, ჲაღო, მი ჯუ̂ეგი პატრონ ხუ̂ი, ჟ'ა̈მდია̄ნა̈ნ აშხუ̂ ზაუ̂ ი აშხუ̂
Line of edition: 34    ზაუნღო̄ნ ჯუ̂ეგს ისგდ ოყუ̂ლე ი მიშგუ̂ა ჯუ̂ეგი ხჷნსგა̄მ სი ლაჯუ̂ედნე.

Page of edition: 169 
Line of edition: 1       ალას ათხი̄დჷნდა ი ჟი ა̈თდია̄ნა̈̄ნ.
Line of edition: 2       -- ალა მა̈ჲ ლ' ა̄, ტუ̂ეტისგა ერ ჯუღუ̂ა?
Line of edition: 3       -- ალა მა̈ჲ-ი ოქუ̂რა̈ ტაბგი ჭიშხ, ნო̄თაუ̂-ჷჯ ოხუ̂იყდ ე̄სამა ამღა,
Line of edition: 4    მარე ათხე ალაი̄ მა̄მა მაწჷხ სერ-ი ლა̈ჲსურმა̈̄ტნე ი მა̈ხიადშუ̂ ჭალა̈ჲთე
Line of edition: 5    ადკუ̂ა̈რ. ალ ხუ̂ეჯედ სგა ლახბა̈რჲე ალ მა̄რას მიჩა ჯუ̂ეგ
Line of edition: 6    ლელდა̈ღდ. ალ მარე̄მი̄ სგა ლა̈ჲბა̈რჲე ხუ̂ეჯე̄ ჯუ̂ეგ ლელდა̈ღდ ი ხელდა̈ღდა.
Line of edition: 7    აშხუ̂ ზაუ̂ ხელდა̈ღდა. ეშხუ ლადეღ გარ ხოკალდა უ̂ადა̈̄ ლისრულა̄ლუ̂
Line of edition: 8    ი იმკახა ჯუ̂ეგი ლიყუ̂ლეს, ამ ლადეღ ესსიპდა ხუ̂ეჯე თხე̄რად ი
Line of edition: 9    ალ მიჩა ჯუ̂ეგს ოხშგა̈ბ ქა ი იმთე დო ოთჩა̈დხ კუმა̈შ, დეშმა
Line of edition: 10    ა̈ნმეჴრე. ხეთხა̈̄ლდა, ხეთხა̈̄ლდა, მარე დე̄მე მოშ ა̈ნთხე. ნა̈ბუზს სგა̄ჩა̈დ
Line of edition: 11    ხუ̂ეჯე̄შთე̄სგა ლაგუ̂ნუშ.
Line of edition: 12       -- იმნა̈რ ხიგუ̂ნი, სი მა̄რე? ათხე ლიგუ̂ნი მა̄დეჲ ხეკუ̂ეს ერე ხიღრა̄ლდე̄დ
Line of edition: 13    ი ხიმკახე̄დ: მჷხა̈რ ჯუ̂ეგს ა̈ლყუ̂ილედ ისგდ.

Line of edition: 14       ე̄, ხოჩა ხუ̂ეჯე, ხუ̂იმკახა̈ს სური, ხუ̂იმკახა̈ს, მარე მა̈გ ცუ̂იდდ
Line of edition: 15    ა̈მჩა̈დ, ზაუ̂ მურგუ̂ა̈ლ ეჯჟი̄ნ ოხულდეღ, ერე კუმში კირ დე̄ს' ო̄თაბრ,
Line of edition: 16    მარე ლა̈დი მირ ა̈მჴა̈დ ნაუბა̈დუ̂რი.
Line of edition: 17       -- ჰამა, სი მა̄რე, ჯათჷმ დამ დე̄სამა? ლა̈ხჭუ̂ედდა ხუ̂ეჯე.
Line of edition: 18       -- მა̄ჲ მო̄დ მეთმი, ა̈მშგა̈ბ ლა̈დი თხე̄რე ი კუმა̈შ იმთე დო ა̈მჩა̈დხ,
Line of edition: 19    დეშმა მოშ ოხუ̂მეჴერ.

Line of edition: 20       ჟი ლა̄პა̈რ ხუ̂ეჯე ი ჟ'ესფხიჭე ლაყა̈რს: დედეს ისგუ̂ა, მა̈ჲ მა̈ყრ,
Line of edition: 21    იმნა̈რ ა̈მიდგ კუ̂ა̈მ? -- სგუ̂ებინ ალ მა̄რე ესჭომა ი უ̂ეშგინ ხუ̂ეჯე ესღუ̂იჭდა
Line of edition: 22    ი ეჯჟი̄ნ ადკუ̂ა̈რ ქა, ერე ეშხუ მანგა̈რ მა̄დ ლახუ̂ე̄მ. სგა̄ნჴა̈დ
Line of edition: 23    ალ მა̄რე მიჩა ლახუ̂ბათე̄სგა ჰა̈რიდ.

Line of edition: 24       ათხე მანე̄სგრე მუხუ̂ბე აჩა̈დ ლა̈დია̄ნათე ი ტაბგი ჭიშხ ამნე̄მდი̄
Line of edition: 25    შჷნ ლა̈ჲყედნე. ესღრი, ესღრი ი ალაი̄ ეჯ სოფელს ათა̄სდ-ე́, ხედუ̂ა̈̄ჲ
Line of edition: 26    სოფელისგა ხუ̂ეჯე იზგა. ალ ხუ̂ეჯე ჩუ̄დ ესხუ̂ი̄დ ალასი̄ შუკუ̂ისგა ი
Line of edition: 27    აქა̈̄ნი ოხკიდ.
Line of edition: 28       -- იმაუ̂ მე̄ზი ხი, ხოჩა მა̄რე სი? -- ლა̈ხჭუ̂ედდა ხუ̂ეჯე. -- იმაუ̂-ი
Line of edition: 29    ლა̈დია̄ნათე.
Line of edition: 30       -- ალა მა̈ჲ ლ' ა̄, ტუ̂ეტისგა ერ ჯუღუ̂ა?
Line of edition: 31       -- ალა მა̈ჲ-ი ოქუ̂რა̈ ტაბგი ჭიშხ. ღა̈რიბ მა̄რე ხუ̂ი ი ნო̄თაუ̂
Line of edition: 32    ოხუ̂იყდ ე̄სამა.
Line of edition: 33       -- ო̄, ჲაღო მი ჯუ̂ეგი პატრონ ხუ̂ი ი ჟ'ა̈მდია̄ნა̈ნ. აშხუ̂ ზაუ̂ ხელდა̈ღდა̈ს
Line of edition: 34    ი აშხუ̂ ზაუნღო̄ნ მიშგუ̂ა ჯუ̂ეგს ისგდ ოყუ̂ლე ი ხჷნსგა̄მ სი
Line of edition: 35    ლაჯუ̂ედნე.

Line of edition: 36       ალას ათხი̄დჷნდა ი ჟი ა̈თდია̄ნა̈̄ნ. ტაბგი ჭიშხ ერ ხუღუ̂ა̈̄ნდა,
Line of edition: 37    ეჯაი̄ ჭალა̈ჲთე̄სგა ადკუ̂ა̈რ. ალა იმნა̈რ ათაკუ̂რ, სი მა̄რე, სა̈რგიბ
Line of edition: 38    ჯე̄რო̄ლ მა̄ლე! -- ხუ̂ეჯედ ხა̈̄ქუ̂ინ. ალ მა̄რე̄მ სგა ლა̈ჲბა̈რჲე ხუ̂ეჯე̄ კუმში
Page of edition: 170  Line of edition: 1    ჯუ̂ეგ ი ზაუ̂ მურგუ̂ა̈ლ ხელდაღდა. ეშხუ ლადეღ გარ ხოკალდა აშხუ̂
Line of edition: 2    ზა̈ჲთექა ი იმკახა ალ მა̄რე მე̄რმა̄მ ლა̈დღი ლირჰეს ი ჯუ̂ეგი ლიყუ̂ლეს.
Line of edition: 3    ალ ლადეღ ნა̈ბუ̂ზა̈̄შთე ხუ̂ეჯე თხე̄რად ესსიპდა ი ქო̄ხშგა̈ბ მიჩა
Line of edition: 4    ჯუ̂ეგს. ალ ჯუ̂ეგ იმთე დო აჩა̈დხ, დეშმა ა̈ნმეჴრე მჷლდეღდ. ნა̈ბუზს
Line of edition: 5    სგა̄ჩა̈დ ხუ̂ეჯე̄შთე̄სგა ლაგუ̂ნუშ.
Line of edition: 6       -- მა̈ჲ ლი, სი მა̄რე, ჯათჷმ დამ დე̄სამა? -- ხუ̂ეჯე ლა̈ხჭუ̂ედდა.
Line of edition: 7       -- მა̈ჲ მო̄დ მეთმი, ალამა̈გ ხა̈ნ ამა̄დ ლალდა̈ღს ი კუმში კირ
Line of edition: 8    დე̄სა ა̈მბა̈რ აშხუ̂ ზაუ̂ისგა ი ლა̈დი ეჯჟი̄ნ ნაუბა̈დუ̂რი მირ ლა̈მრა̈კ,
Line of edition: 9    ერე ოხშგა̈ბ მირ ჯუ̂ეგს ი იმთე დო ა̈მჩა̈დხ, დეშმა ოხუ̂მეჴერ.
Line of edition: 10       -- დედეს ისგუ̂ა, იმნა̈რ ამჴა̈ც, იმნა̈რ ა̈მიდგ კუ̂ა̈მ? შიშდ მიქხ,
Line of edition: 11    ადო ხოლა ლე̄თ ჯა̄რ ბა̄ზი!

Line of edition: 12       სგუ̂ებინ ალ მა̄რე̄მ ანსკინე ქა ქორხენქა ი უ̂ეშგინ ხუ̂ეჯე ა̈ხღუ̂ა̈ჭ.
Line of edition: 13    სგა̄ნჴა̈დ ალ მა̄რეი̄ მიჩა ლახუ̂ბათე̄სგა ცა̄რიე̄ლდ.

Line of edition: 14       ათხე ა̈ნმა̄რა̈̄ნ ხოხუ̂რა მუხუ̂ბილ ი ამნე̄მდ ტაბგი ჭიშხი̄ მა̄მა ლა̈ჲყედნე.
Line of edition: 15    ესღრი, ესღრი ი ალასი̄ ალ სოფელთე̄სგა ლა̈ხჴა̈დჷ̄ნა̈̄ნ-ა, ხედუ̂ა̈̄ჲ
Line of edition: 16    სოფელისგა ხუ̂ეჯე იზგა. ალ ხუ̂ეჯე ჩუ̄დ ესხუ̂ი̄დ სოფლი ჰოკერ
Line of edition: 17    ი აქა̈̄ნი ოხკიდ.
Line of edition: 18       -- იმაუ̂ მე̄ზი ხი, ხოჩა მა̄რე სი?
Line of edition: 19       -- იმაუ̂ ი ლა̈დია̄ნათე.
Line of edition: 20       -- ჲაღო, მი ჯუ̂ეგი პატუ̂რენ ხუ̂ი ი ჟი ა̈მდია̄ნა̈ნ აშხუ̂ ზაუ̂ ი აშხუ̂
Line of edition: 21    ზაუნღო̄ნ მიშგუ̂ა ჯუ̂ეგს ისგდ ოყუ̂ლე ი ხჷნსგა̄მ სი ლაჯუ̂ედნე.
Line of edition: 22       -- სი დე̄მ ჯედია̈̄ნი, ხიად. მა̈გ სი ჯინჩლი, ხოლა გადნიშ
Line of edition: 23    ესერ ხი.
Line of edition: 24       -- ა̄, ხოლა მა̄დე ხუ̂ი ღო, მარე სი დეშ ჯითრა მი, ადო ჩუ
Line of edition: 25    ლახე ამთერნე ხოჩა̄მდ, ეჩქა ამჟი̄ნ დე̄მის ლა̈̄ქუ̂ნინე.
Line of edition: 26       -- ო̄, ჲაღო მე̄რმა̈̄ლ მირ ჯინჩლიხ, ადო მი დე̄სამა მიმჴერა.

Line of edition: 27       ალ მა̄რეი̄ ჟი ა̄თდია̄ნა̈̄ნ ი სგა ლა̈ჲბა̈რჲე ხუ̂ეჯე̄ კუმა̈შ ლელდა̈ღდ.
Line of edition: 28    ალ მა̄რე ჩილადეღ თა̈კუ̂ს აშდრა̈ნდა. აშხუ̂ ზა̈ჲთექა ეშხუ
Line of edition: 29    ლადეღ ხოკა̈ლდა, ეჩქა მინდუ̂ერისგა კუმა̈შ მა̈̄ჲ მა ხეყა̈̄დდა ლელდა̈ღდ,
Line of edition: 30    მა̈გ ჩუ̂ათბა̄ლე თა̈კუ̂შ. ნა̈ბუზს ხუ̂ეჯეს მიჩა კუმა̈შ მინდუ̂ერისგა
Line of edition: 31    ჩუ მეყუ̂რე ხოხალდახ ი თხე̄რად ესსიპდა. ოხუ̂შგა̈ბ ქა, მარე კუმა̈შ
Line of edition: 32    ეჯჟი̄ნ ბჷგიდ ლა̈სხუ̂ ლჷბა̄ლე, ერე დე̄მნე̄მ მოშ ა̈ნქუ̂იცხ ჟი. ნა̈ბუზს
Line of edition: 33    სგა̄ჩა̈დ მჷლდეღ ხუ̂ეჯე̄შთე̄სგა ი ხა̈̄ქუ̂ინ: "ე̄, ხუ̂ეჯე, კუმა̈შ მა̄გ ლუკკოუ̂ად

Line of edition: 34       მაყახ ი ჟი ა̈ხშჷლდნა̈̄ლ, მჷხა̈რ უ̂ადა მიშთხენი ი ხეკუ̂ეს ერე
Line of edition: 35    ჩუ̂ა̈ლყულად კუმა̈შ". ქა̄ჩა̈დ ხუ̂ეჯე ი ჟი ა̈ნშჷლდანე ი დე̄სამა ხაკლი̄ნდა
Line of edition: 36    ი დეშმა ხა̈̄ქუ̂ინ. -- ო̄, ჲაღო, მჷხა̈რ ჩუ̂ა̈ლყუ̂ილედ ჯუ̂ეგს
Line of edition: 37    ისგდ.

Page of edition: 171 
Line of edition: 1       ჩუ̂ა̈დრჷჰა̈̄ნ მე̄რმა ლადეღ ი ხა̈̄ქუ̂ინ მჷლდეღდ: -- ხუ̂ეჯე, ჲაღო, ათხე
Line of edition: 2    დუ̂რეუ̂ ლი კუმში ლიყუ̂ლე̄შ.
Line of edition: 3       -- კუმა̈შს ჩუ̂ა̈ლყუ̂ილედ, მარე მი მაკუჩ, ერე, მი მა̈̄ჲ მახალ მიხა,
Line of edition: 4    ალა ჟი აჯთო̄ნა. ქა̄დე ქა̈̄მთე ი სგა̈̄თჩიხნა̈ნ ხორეუ̂ს, ღო მი ლემესგს
Line of edition: 5    ლოხჩიდნე ი ნო̄თაუ̂ ა̈ხთონ ე̄სამა.

Line of edition: 6       ალა ქა̄ჩა̈დ ი სგა̈̄თჩიხნა̈̄ნ ხორეუ̂ს. ხუ̂ეჯედ ანტუ̂არე ლამპა̈რ, ჟი
Line of edition: 7    ახბიდნე ხორეუ̂ს ი ქა̈მილდა̈რ გარ ასა̈დხ ხორუ̂იშ ი ალ მჷლდეღი̄
Line of edition: 8    ჩუ̂ა̈შიხ. ლა̄ჲფუ̈̄ლიე̄ლე ეჩუნღო̄ნ ხუ̂ეჯედ ი ჟი ა̈ნსე̄ლუ̂ა̈̄ნ ალა̄, მჷლდეღ. -- ა̈ხთონ
Line of edition: 9    ე̄სამაჲ? -- ლა̈ხჭუ̂ედდა ხუ̂ეჯე.
Line of edition: 10       -- ჟი იმ ოხუ̂თუ̂ე̄ნნა̈ს, სი მა̄რე, ლემასგუ̂ისგა? ლითუ̂რი მადეჲ
Line of edition: 11    ეჯაი̄ ჩუ̂ამა̈̄შდჷნ-ე́, ჩუ მა̈̄ჲ მიხალდა.
Line of edition: 12       -- ჲა̈ღო, სგა̄დ ღენ ა̈თჩიხნა̈ნ მე̄რმა ხორეუ̂ს!

Line of edition: 13       ალა სგა̄დ ა̈თჩიხნა̈̄ნ ხორეუ̂ს. ხუ̂ეჯედ ანტუ̂არე ლამპა̈რ, ჟი ახბიდნე
Line of edition: 14    ხორეუ̂ს ი ქა̈მილდა̈რ გარ ასა̈დ[ხ] ხორუ̂იშ ი მჷლდეღი̄ ჩუ̂ა̈დშიხა̈̄ნ. ესფუ̈̄ლიე̄ლე
Line of edition: 15    ხუ̂ეჯედ ი ჟი̄დ ა̈ნსე̄ლუ̂ა̈̄ნ ალა, მჷლდეღ.
Line of edition: 16       -- ა̈ხთონ ე̄სამაჲ? -- ლა̈ხჭუ̂ედდა ხუ̂ეჯე.
Line of edition: 17       -- ჟი იმ ოხუ̂თუ̂ე̄ნნა̈ს, სი მა̄რე, ლემასგუ̂ისგა? ლითუ̂რი მა̄დეჲ
Line of edition: 18    ალაი̄ ჩუ̂ამა̈̄შდჷნდა̄, ჩუ მა̈̄ჲ მიხალდა.
Line of edition: 19       -- სი მა̄რე ზექდ მირ ამჷშთხ ჟი. სგა̄დ ღენ ა̈თჩიხნა̈ნ, ჲაღო,
Line of edition: 20    მე̄სმა̄მდ ხორეუ̂ს!

Line of edition: 21       ალა სგა̄დ ა̈თჩიხნა̈̄ნ ი ათხე ჩუ̂ადბჷრჯე გიმ ი ჩუ̂აჩა̈დ ეჩელექუ̂ა.
Line of edition: 22    ანტუ̂არე ხუ̂ეჯედ ლამპა̈რ, ჟი ახბიდნე ხორეუ̂ს ი ჯა სგა̄ჩა̈დ ქორთე
Line of edition: 23    ი ჩუ̂ესგურდა. მჷლდეღდ ლა̈ჲრა̄გე ი ხუ̂ა̈ჲ მა̄მა ი ჟი ანჴა̈დ გიმი
Line of edition: 24    ჴურუხენჟი̄ნ, სგა̄ჩა̈დ ქორთე ი ხა̈̄ქუ̂ინ: -- იმღა მო̄მა ემფუ̈̄ლიე̄ლ,
Line of edition: 25    ხუ̂ეჯე?
Line of edition: 26       -- სი მა̄რე, ყუ̂ელფ მირ ა̈მსა̈დ ხოლა̄მდ, ადო ათხე ხუ̂ამა̈რჯუ̂და̈ს
Line of edition: 27    შიშდ ქა ლიჴედს-ა.
Line of edition: 28       -- ო̄, გოგმიზა̈ჲ, სი მა̈̄ჲ ჯიხალ, ეჯაჲ ჟ'ოხუ̂თონ ი ეშხუ ნუკულდ
Line of edition: 29    ქა̄ჲ ლა̈ჯა̈სრ. -- მჷლდეღდ ლა̈̄ქუ̂ინ. ხუ̂ეჯედ მიზეზ დეშმა ოხკიდ ი უ̂არი
Line of edition: 30    ლა̈̄ქუ̂ი̄სგ მა̄მა ხა̄დდა ი ჯუ̂ეგი ხჷნსგა ქა ლეჰუ̂დი ხა̄დდა.

Line of edition: 31       ალ მა̄რე სგა̄ჩა̈დ მიჩა ლახუ̂ბათე̄სგა ლუკუ̂მა̈შ. ალჲა̈რს მე̄უ̂არ
Line of edition: 32    ათხი̄დჷნდახ მუხუ̂ბე̄მი შუ̂იდებდ ლიჴედ ი კუმში ლიჴდეი̄. ალჲა̈რს ათხე
Line of edition: 33    ეზა̈რ ლირდე-ლიზგე ხა̄დდახ. აშხუ̂ ლადეღ ხოხუ̂რა̄მ მუხუ̂ბად ხა̈̄ქუ̂ინ
Line of edition: 34    მიჩა ლახუ̂ბას: "ათხე მი სა̄ბელდ ხუ̂ისპი ი სგა̈ჲ ლაჰო̈დთე ამჲედ,
Line of edition: 35    მარე ალე ჩუ ჯეშყეხ, ერე იმუ̂ა̈̄ჲ ა̈გის მი ჭიშხ ესუ̂ფხჷკნა ი ქიმ ოხუ̂კუ̂ა̈რი,
Line of edition: 36    ეჩჩუ̄ნ ნო̄სა ამჰო̈დიდ; იმუ̂ა̈̄ჲ ა̈გის ჭიშხი̄ დო̄სა ესუ̂ფხჷკნა ი
Line of edition: 37    ქიმი̄ დო̄სა ოხუ̂კუ̂ა̈რი, ეჩეჩუ̄ნ ქა̄მჰო̈დდ, მარე ლაბა̈მს ნო̄სა ლახგუდრა̈̄სგუ̂ნად
Line of edition: 38    ი ლაბა̈მ ნო̄სა ათნებად მიშგუ̂ა მჷყდის. ქა ჰა̄ლ ამჰო̈დიდ,
Page of edition: 172 
Line of edition: 1    ლაბა̈მ ქა̄მყუ̂იზდ ი სგა̈ჲ ესყედნედ". ხოშა ლახუ̂ბა ჩუ̂ა̈დსო̄ყა̈̄ნხ ამ
Line of edition: 2    ბედჟი̄ნ. "ქ' ე̄სერ ჰამა აჰუ̂დი̄ნეხ მიჩ, ლირდ' ე̄სერ მიჩ ოჰა მინეშდ ი
Line of edition: 3    ათხ' ე̄სერ იმნა̈რ აღუ̂პა̈უ̂ი მინს ი მიჩა თხუ̂იმსი̄?" ხოშა̄მ ლახუ̂ბას
Line of edition: 4    მე̄უ̂არ ხასდიკჷნდახ, მარე ამნე̄მ მა̄მა ჰაჯ ახკიდ. ალა სა̄ბელდ ესსიპდა
Line of edition: 5    ი ადჲეხ ხოშა̄მ ლახუ̂ბად ლაჰო̈დთე. ალჲა̈რს შუკუ̂ჟი̄ნ სგა ლახხუ̂ი̄დდახ
Line of edition: 6    ხუ̂ეჯე. ხუ̂ეჯედ ალ ლახუ̂ბა ჩუ̂ათირ ი ალჲა̈რდ დეშ ათირხ; ხუ̂ეჯე სგა
Line of edition: 7    ლა̈ხღუ̂აჭრა̄ლა̈̄ნ სა̄ბელს. სა̄ბელდ ქიმ ანკუ̂ა̈რ ი ჭიშხი̄ ადფხჷკნე. ალ
Line of edition: 8    ლახუ̂ბას ქა ლა̈ხშყა̈დხ, მინე მუხუ̂ბად იმუ̂ა̈̄ჲჟი̄ნ ადშგურა̄ნე, ი მა̄დ
Line of edition: 9    ათყიდხ ი აჩა̈დხ შუკუ̂ს. ხუ̂ეჯედ გა̈ნ ლოხუ̂ქუ̂იც ი ჩუ̄დ ესხუ̂ი̄დდა
Line of edition: 10    შუკუ̂ისგა მე̄რმა ფორმიშდ. ალჲა̈რდ ჩუ დეშჷდ ათირხ. ხუ̂ეჯე სგა̄დ
Line of edition: 11    ლა̈ხღუ̂აჭრა̄ლა̈̄ნ ი ხუნკუ̂ი̄და̈შდ ჲერუზუმ ლახჭარჟე ფა̈ს, მარე სა̄ბელდ
Line of edition: 12    ჭიშხჷდ ლაჲფხჷკნე ი ქიმი ანკუ̂ა̈რ. ალჲა̈რდ მა̄დჷდ ათყიდხ ამეჩუ̄ნ.
Line of edition: 13    ესღრიხ, ესღრიხ ი აშხუ̂ ა̈გის ბოგჟი̄ნ ჩუ̄დ ეხხუ̂ი̄დდა ხუ̂ეჯე ი სგა̄დ
Line of edition: 14    ლა̈ხღუ̂აჭრა̄ლა̈̄ნ სა̄ბელს. ალ სა̄ბელდ დე ჭიშხ ადფხჷკნე ი დე ქიმ
Line of edition: 15    ანკუ̂ა̈რ. ალ ლახუ̂ბა გუდ ანჴა̈დხ, ერე ამეჩუ̄ნ ჩუ ხეყა̈̄დდა ალ სა̄ბლი
Line of edition: 16    ქა ლიჰუ̂დის ი ჩუ̂ათყიდხ. ჰა̈̄ღუ̂ირს ოდემ ჩიქად ხუ̂ეჯე იხუ̂ია̈̄სგდა,
Line of edition: 17    ეჩქად ალ ლახუ̂ბად ხაფხეჭხ ი მა̄დ ათნებეხ. ალჲა̈რ ალას ერ იგჷ̄ნცა̄ლხ,
Line of edition: 18    სა̄ბელ ლა̄კუ̂ა̈ფხ ბოგჟი̄ნ ი სგა̈̄დსკინე ლიცთე̄სგა [ი] კალმახდ
Line of edition: 19    ესხიპდა, ხუ̂ეჯე ბა̈დდ ესსიპდა ი ჟი ა̈ნჷრმე. ალა ნე̄სყად ესსიპდა ი
Line of edition: 20    ქა̄ნსკინე ბა̈დხენქა, ხუ̂ეჯე ქიპდ ესსიპდა ი ქა ლა̈ხცუუ̂ა̈̄ნ. ალ ნე̄სყად
Line of edition: 21    ლა̈ჲბინე ლი̄ზი ი აშხუ̂ ა̈გის მჷლდღას ლემსგი̄ლ ხო̄შუ̂დახ, აჩა̈დ ამი̄
Line of edition: 22    მჷლა̈მქა ი ჩუ̂ა̈დშიხა̈̄ნ ქიპ. ალ სემი ლახუ̂ბა ქა̄ჩა̈დხ ლა̈ლზიგათე ი,
Line of edition: 23    იმუ̂ა̈̄ჲ მოშ ათწინდახ ქონა̈ბს, ადჲეხ მინე ა̈გითე.

Line of edition: 24       ალ ლახუ̂ბად ხოჩა ლირდე-ლიზგე ა̈ნჰეხ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.