TITUS
Svan Prose Texts I (Upper Bal)
Part No. 85
Previous part

Text: 92 
Page of edition: 162 
Line of edition: 29 
92. თა̈უ̂ირ კე̄სა̈რ


Line of edition: 30       არდა ეშხუ თა̈უ̂ირ კე̄სა̈რ, ხორდა სემი ჭყინტგეზალ. აშხუ̂ინ
Line of edition: 31    ხა̈̄ქუ̂ინ ალ კე̄სა̈რდ: "ჰე̄, მიშგუ გეზლი̄რ, ერუ̂ა̈̄ჲ მოშ მიშგუ̂ა თე̄რლე
Line of edition: 32    ჟაგა̈რს ა̈მთიმნედ, უ̂ეშგინპილს ეჩას ეჯსედნიხ ლიმხოშ".

Line of edition: 33       ა̈ნმა̄რა̈̄ნ ხოშა მუხუ̂ბე ი აშირ მუქუ̂ეითი ლა̈ჲჴერნე აფხნეგდ ი
Line of edition: 34    აშირ მჷჩა̈̄ჟი. ესღრიხ, ესღრიხ ი აშხუ̂ ა̈გის აშხუ̂ ლიცს ა̈თლაკხ ი
Line of edition: 35    ჟი ა̈ნშუ̂ემხ ამეჩუ̄ნ. ა̈ნგუ̂ეშხ ალ ლიც კო̄ბშუ̂ ი უ̂ერცხლდ ესსიპდა;
Page of edition: 163  Line of edition: 1    ანგუ̂ეშხ აჯაღჷდ ი აჯაღ უ̂ერცხლდჷდ ესსიპდა. უ̂ოშუ̂ა̈̄ჲდინ ა̈ნგუ̂ეშხ,
Line of edition: 2    ეჩშელდინ უ̂ერცხლდ ესსიპდა. -- ე̄, ალა მო̄დე ი̄რა მიშგუ̂ა ბაბა̈̄ თე̄რლე
Line of edition: 3    ჟაგა̈რ, ჲაღო, სერ მა̈ჲ ი̄რა? -- ლა̈̄ქუ̂ინ კე̄სრი გეზალდ. ჟი ა̈ნგუ̂ეშხ ალა
Line of edition: 4    ი ა̈გითე ოხჴიდხ კე̄სა̈რს. ა̈გითე ანჴა̈დხ ი ქო̄ხო̄ნბუ̂ეხ კე̄სა̈რს, იმუ̂ა̈̄ჲ
Line of edition: 5    ლი ლიცი ლაგუ̂ა̈ბ.
Line of edition: 6       -- ატკჷდ, საბლუ, ალა ჰამა ი̄რა მიშგუ̂ა თე̄რლე ჟაგა̈რ: მი ლახე
Line of edition: 7    ტა̈ნი ლიბა̈რ მეკუ̂ა̈დ, ალ ლიცშუ̂ გარ ხუ̂იბრა̄ლდა̈ს.

Line of edition: 8       ა̈ნმა̄რა̈̄ნ ათხე მანე̄სგრე მუხუ̂ბე ი აშირ მჷჩა̈̄ჟი ლა̈ჲჴერნე ი აშირ
Line of edition: 9    მუქუ̂ეითი. ესღრიხ, ესღრიხ ი აშხუ̂ ა̈გის ეჯზუმ ბალეს ა̈თლაკხ, ერე
Line of edition: 10    აშირ მჷჩა̈̄ჟი ი აშირ მუქუ̂ეითი მა̈გ ჩუ̂ადლაფრე.

Line of edition: 11       ალა მო̄დე ი̄რა მიშგუ̂ა ბაბა̈̄ თე̄რლე ჟაგა̈რ, ჲაღო, სერ მა̈ჲ
Line of edition: 12    ი̄რა? -- ლა̈̄ქუ̂ინ კე̄სრი გეზალდ, ჟი ა̈ნკიდხ ალა ი ა̈გითე ოხჴიდხ კე̄სა̈რს.
Line of edition: 13    კე̄სა̈რდ ხა̈̄ქუ̂ინ:
Line of edition: 14       -- და̈რჟი̄ნ ლამჷნჩა̈ლდ ი ჰა̄უ̂და̈რჟი̄ნ ლასი̄მდ ალ ბალე გარ მუღუ̂ა̈̄ნდა ი
Line of edition: 15    ალა ჰამა ი̄რა მიშგუ̂ა თე̄რლე ჟაგა̈რ?

Line of edition: 16       აშხუ̂ მეთერდ ლა̈̄ქუ̂ინ:
Line of edition: 17       -- იმნა̈რ ა̈ჭი̄რუნი ალა̄, კე̄სა̈რ, მიჩა გეზლი̄რს? მიჩ ერ აშხუ̂ მინდუ̂ერისგა
Line of edition: 18    ჩეი̄ ქორ ხო̄გ ი ეჩეისგა რა̈შ ხო̄ბ, ეჩი̄ შდჷმისგ' ე̄რ შდაუ̂ლა̈̄დ
Line of edition: 19    ა̈რი, ეჯა ლი მიჩა თე̄რლე ჟაგა̈რ ი ჯა აშ ცუ̂იდდ ა̈ჭი̄რე მიჩა
Line of edition: 20    გეზლი̄რს.

Line of edition: 21       ალ გა̈რგლა ჟი ა̈ნჰურნე ხოხუ̂რა̄მ გეზალდ კე̄სრიშ ი აფხნეგი̄
Line of edition: 22    და̈̄რ ლა̄ჲჴერნე, ეჯჟი̄ნ აჩა̈დ ჯა გარ აფხნეგურ. ესღრი, ესღრი ი
Line of edition: 23    აშხუ̂ ა̈გის მინდუ̂ერისგა ჟი ა̈თლაკ ჩეი̄ ქორს. ალ ქორს ერ სგა ლა̈ხფედილა̈̄ნ,
Line of edition: 24    რა̈შდ ქუ̂ინ იყერ ი ეჯჟი̄ნ ჩუ̂აჴიდ იშდუ̂ა̈რშუ̂ ალა̄, ჩეი̄
Line of edition: 25    ქორ, ეჯჟი̄ნ, ერე ჩუ̂ადქჷნთრინე ეშ. სგა̄ჩა̈დ ალა̄, კე̄სრი გეზალ, ი
Line of edition: 26    ჟი ლახსგურდა.
Line of edition: 27       -- სი ჭყინტჷლდ, ჩუ̂ამექხ, ადო ჟიბაუ̂ ჯა̈ხპე. -- ჩუქუ̂ა̄ნ ლა̈ჯტეხნი.
Line of edition: 28       -- ლეჟა̄უ̂ ჯა̈ხპე. -- ლექუ̂ა̈̄ნ ლა̈ჯტეხნი. -- ლექუ̂ა̄უ̂ ჯა̈ხპე. -- ლეჟა̈̄ნ
Line of edition: 29    ლა̈ჯტეხნი.

Line of edition: 30       ჩი̄თე ადკუ̂ა̈რ ი ჩი̄ხა̈ნ ლა̈ხტა̈ხ. "ლჷკჩეუ̂ ლი მიშგუ ლირდე, იმუ̂ა̈̄ჲ
Line of edition: 31    მიშგუ̂ა ფუსდ კე̄სა̈რს ისგუ̂ათა̄ნ გეზალ ჩუ ხორი მიშგუ̂ა მჷჴმა̈რიდ!
Line of edition: 32    ჲაღო, ათხე მიშგუ̂ა შდჷმისგა შდაუ̂ლა̈̄დ ა̈რი, ეჯა ქა̈̄ხიკ ი ისგუ̂ა ბაბას
Line of edition: 33    ოთოჴ ი ეჩი̄ თე̄რლე ჟაგა̈რ ალა ლი." ა̄მნე̄მ ქა̈̄ნკიდ რა̈ში
Line of edition: 34    შდჷმხენქა შდაუ̂ალ, ადჲე ა̈გითე ი ლახჭემ თე̄რა̈ლქა კე̄სა̈რს ი შიშდ
Line of edition: 35    ქა ა̈ხფხჷრჷ̄ლა̈̄ნხ თე̄რა̈ლ. ალ კე̄სა̈რ ლეგდ ა̈დჷრდა ი ლაქუ̄ნაუ̂ა̄ლჟი̄ნ
Line of edition: 36    ადშგურა̄ნე მიჩა გეზლი̄რ: "მიჩა ლჷდგა̈რუნღო̄ნ ესერ მიჩა საფლა̈უ̂
Page of edition: 164  Line of edition: 1    ჟი̄უ̂ ა̈ნყა̈რუ̂ლეხ სამ ლე̄თ". ჩუ̂ადგან ალა̄, კე̄სა̈რ, ი ჩუ̂აშდიღუ̂ხ. ეჯ
Line of edition: 2    ლე̄თ ხა̈̄ქუ̂ინ მიჩა ლახუ̂ბას კე̄სრი ხოხუ̂რა̄მ გეზალდ:
Line of edition: 3       -- მიშგუ ლახუ̂ბა, გუ̂იშგუ̂ეჲ მუდ მა̈̄ჲ ოგუ̂შგურა̄ნე ლიჩოდ მა
Line of edition: 4    ეჩას?
Line of edition: 5       -- სი ჰე ჯაკუჩ, ჟი ა̈ხყა̈რუ̈ლ ი ნა̈ჲ მა̄მა ხუ̂ა̈ყრულედ, ნაჲ ნიშგუ̂ეჲ
Line of edition: 6    ლა̈ხხუ̂აცახა̈ნ ლიყუ̂ნა̈̄ლ ნიცხა. -- ხა̈̄ქუ̂ინხ ხოშა̄მ ლახუ̂ბად.
Line of edition: 7       -- ო̄, ჲაღო, მი მიშგუ̂ა მა̈ხუ̂იაჟი̄ნი̄ მემჭირი ლიყრულე, მა̈̄ღენუ̂ა̈̄ჲ
Line of edition: 8    ბა̄ზი მა ოდერ ლა̈ყრულათე.

Line of edition: 9       ალჲა̈რ მა̈გ ლაყუ̂რა̈̄ლთე აჩა̈დხ ი ხოხუ̂რა მუხუ̂ბე უქბოშ მიჩა მუე̄
Line of edition: 10    საფლა̈უ̂ ლა̈ყრულათე აჩა̈დ. ისგლა̄თუ̂ ა̈რი ალა საფლა̈უ̂ჟი̄ნ, ხა̈ყრულე
Line of edition: 11    ი ისგლე̄თი ონაქა ანჴა̈დ საფლა̈უ̂თეჟი̄ნ თუ̂ეთნე რა̈შ ი ეჯჟი̄ნ
Line of edition: 12    ჩუ̂ა̈დგუ̂ა̈̄ნე, ერე გიმს ი მეგა̈მს -- ჩი̄ს ქიმ ოხწურე. ლიგუ̂ა̈̄ნე ერ ქა
Line of edition: 13    ადსურლე რა̈შდ, ეჩქა ჟი ლა̈ხკუ̂ა̈ფხ ალა̄, კე̄სრი გეზალ.
Line of edition: 14       -- სი ჭყინტჷლდ, ჩუ̂ამექხ, ადო ჟიბაუ̂ ჯა̈ხპე. -- ჩუქუ̂ა̄ნ ლა̈ჯტეხნი.
Line of edition: 15       -- ჩუბაუ̂ ჯა̈ხპე. -- ჟიქა̄ნ ლა̈ჯტეხნი.
Line of edition: 16       -- ლეჟა̄უ̂ ჯა̈ხპე. -- ლექუ̂ა̈̄ნ ლა̈ჯტეხნი.

Line of edition: 17       ლექუ̂ა̄უ̂ ჯა̈ხპე -- ლეჟა̈̄ნ ლა̈ჯტეხნი.

Line of edition: 18       ჩი̄თე ადკუ̂ა̈რ ი ჩი̄ხენ ლა̈ხტა̈ხ. ო̄, ლჷკჩე̄უ̂ ლი მიშგუ ლირდე,
Line of edition: 19    იმუ̂ა̈̄ჲ მიშგუ̂ა ფუსდ კე̄სა̈რს ამთა̄ნ გეზალ ჩოთესდ, ერე მიშგუ̂ა
Line of edition: 20    მჷჴმა̈რიდ ჩუ ჯაყა. ათხე ძუო̄ლ ამაშგბ ქა ი, შომუ̂ა̈̄ჲ მა ეჯწჷხჷნდე̄დს,
Line of edition: 21    ეჩქა ქა̄ღერ თუ̂ეთნა̄მ ზუგუ̂თექა, ძუა ჟი ახტუ̂ი̄ს ი მიშგუ ჟახე ლე̄ქა:
Line of edition: 22    ე, რა̈შ, სი[ი] მეწდ ი ისგუ ნამნაყუნი̄ მაწუ̂ე̄ნ!" ამნე̄მ ქა̄ხშგიბ ძუა ი
Line of edition: 23    ჩუ̂ა̈დშხუ̂ინ.

Line of edition: 24       მე̄რმა ლე̄თ ჩუ ჰა̄ლ ა̈დბურა̈̄ნ, აჯაღ ხა̈̄ქუ̂ინ მიჩა ლახუ̂ბას: -- მიშგუ
Line of edition: 25    ლახუ̂ბა, ბა̄ზი და̈̄რ ლჷღრიდა გუ̂იშგუ̂ეჲ მუე̄ საფლა̈უ̂ ლა̈ყრულათე?
Line of edition: 26       -- ნა̈ჲ და̈̄რ, ლი̄რე, ლი̄ზი, ნა̈ჲ ნიშგუ̂ეჲ ლა̈ხხუ̂აცახა̈ნ ლიყუ̂ნა̈̄ლ ნიცხა,
Line of edition: 27    ადო საფლა̈უ̂ ლა̈ყრულათე დე̄მის ღურიდ.
Line of edition: 28       -- ო̄, ჲაღო, მი მიშგუ̂ა მა̈ხუ̂იაჟი̄ნი̄ მემჭირი, მა̈̄ღენუ̂ა̈̄ჲ ბა̄ზი მა
Line of edition: 29    ოდერ.

Line of edition: 30       მა̈გ ლაყუ̂რა̈̄ლთე აჩა̈დხ ი ხოხუ̂რა მუხუ̂ბე უქბოშ საფლა̈უ̂ ლა̈ყრულათე̄დ
Line of edition: 31    აჩა̈დ. ისგლა̄თუ̂ ა̈ყრულა ი ისგლე̄თჟი̄ნ ანჴა̈დ საფლა̄უ̂თეჟი̄ნ
Line of edition: 32    წჷრნი რა̈შ ი ეჯჟი ჩუ̂ა̈დგუ̂ა̈̄ნე კე̄სა̈რ, ეჯჟი̄ნ, ერე ბაჩს ი მეგა̈მს
Line of edition: 33    -- ჩი̄ს ქიმ ოხწურე. ქა ჰა̄ლ ლაჲსურლე ლიგუ̂ა̈̄ნე, შიშდ ჟი ლა̈ხკუ̂ა̈ფხ
Line of edition: 34    ალა̄, კე̄სრი გეზალ. ალ რა̈შდი̄ ეჯჟი̄ნ ხაყერ-ე́, იმუ̂ა̈̄ჲჟი̄ნ თუ̂ეთნე
Line of edition: 35    რა̈შდ ხაყერ, მარე ჩი̄ხენ ლა̈ხტა̈ხ "ო̄, ლჷკჩე̄უ̂ ლი მიშგუ ლირდე,
Line of edition: 36    იმუ̂ა̈̄ჲ მიშგუ̂ა ფუსდ კე̄სა̈რს ამთა̄ნ გეზალ ჩოთესდ, ერე მიშგუ̂ა მჷჴმა̈რიდ [ჩუ] ჯაყა.
Line of edition: 37    ათხე ძუო̄ლ ამაშგბ ი, შომუ̂ა̈̄ჲ ლადეღ თჷმი ჯა̄დე̄დს,
Line of edition: 38    ეჯ ლადეღ ქა̄ღერ წჷრნი ზუგუ̂თექა, ჟ'ახტუ̂ი̄ს ალა̄, ძუა, ი მიშგუ
Page of edition: 165  Line of edition: 1    ჟახე ახჷრშუ̂ნ: წჷრნი რა̈შ, სი[ი] მეწდ ი ისგუ ნამნაყუნი̄ მაწუ̂ენ!" ამნე̄მ
Line of edition: 2    ქა̄ხკიჩ ძუა ი ჩუ̂ა̈დშხუ̂ინ.

Line of edition: 3       მე̄სმა ლე̄თ აჯაღ ხა̈̄ქუ̂ინ მიჩა ლახუ̂ბას:
Line of edition: 4       -- ბა̄ზიი და̈̄რ ლჷღრიდა, მიშგუ ლახუ̂ბა ლა̈ყრულათე?
Line of edition: 5       -- და̈̄რ ნა̈ჲ. -- ხა̈̄ქუ̂ინხ მიჩა ხოშა̄მ ლახუ̂ბად. ალა̄, ხოხუ̂რა მუხუ̂ბე,
Line of edition: 6    ქა̄დ აჩა̈დ ლა̈ყრულათე. ისგლა̄თუ̂ ა̈ყრულა ი ისგლე̄თჟი̄ნ ანჴა̈დ მეშხე
Line of edition: 7    რა̈შ ი ეჯჟი̄ნ ჩუ̂ა̈დგუ̂ა̈̄ნე, ეჯჟი̄ნ, ერე ბა̈ჩს ი მეგა̈მს -- ჩი̄ს ქიმ ახკუ̂არუ̂ნე.
Line of edition: 8    ლიგუ̂ა̈̄ნე ქა̄დსურლე რა̈შდ, ეჩქა ჟი̄დ ლა̈ხკუ̂ა̈ფხ კე̄სრი გეზალ.
Line of edition: 9       -- სი ჭყინტჷლდ, ჩუ̂ამექხ, ადო ჟიბაუ̂ ჯა̈ხპე. -- ჩუქუ̂ა̄ნ ლა̈ჯტეხნი.
Line of edition: 10       -- ჩუბაუ̂ ჯა̈ხპე. -- ჟიქა̄ნ ლა̈ჯტეხნი.
Line of edition: 11       -- ლეჟა̄უ̂ ჯა̈ხპე. -- ლექუ̂ა̈̄ნ ლა̈ჯტეხნი.
Line of edition: 12       -- ლექუ̂ა̄უ̂ ჯა̈ხპე. -- ლეჟა̈̄ნ ლა̈ჯტეხნი.

Line of edition: 13       ჩი̄თე ადკუ̂ა̈რ ი ჩი̄ხენ ლა̈ხტა̈ხ. "ა̄, ლჷკჩე̄უ̂ ლი მიშგუ ბედ, იმუ̂ა̈̄ჲ
Line of edition: 14    მიშგუ̂ა მახუ̂შის ამთა̄ნ გეზალ ჩოთესდ, ერე მიშგუ̂ა მჷჴმა̈რიდ ჩუ
Line of edition: 15    ჯაყა. ათხე ძუო̄ლ ამაკჩ ი, შომუ̂ა̈̄ჲ ე̄სამა ეჯწჷხჷნდე̄დს, ეჩქა ქა̄ღე
Line of edition: 16    მეშხა̄მ ზუგუ̂თექა, ჟ'ახტუ̂ი̄ს ძუო̄ლ ი მიშგუ ჟახე ახჷრშუ̂ნ". ამნე̄მ ქა̄ხკიჩ
Line of edition: 17    ძუა ი ჩუ̂ა̈დშხუ̂ინ.

Line of edition: 18       აშხუ̂ ლე̄თ ესუ̂ა̈დ: "ათხე̄უ̂ ესერ ჲა̈რდ ესგენე მიჟს უწდუნა ი გიმს
Line of edition: 19    უთლუნა კე̄სრი ნანუ̄ლცახა̈ნ!" ანჷგა̈̄ნ ალა ი აჩა̈დ ჩეი̄ ქორთე ი რა̈შს
Line of edition: 20    ქა ხაშგუ̂მინ კე̄სრი ნანუ̄ლა̈შთე ლიი. "ე̄, ჲაღო, ჟი ლამსგუ ი მადრა̈ჴ
Line of edition: 21    მაჴ ეჯჟი̄ნ, ერე სემი შუ̂ელტ ჩაფჷლ ამკუ̂არუ̂ნა". ალა ჟი ლახსგურდა
Line of edition: 22    რა̈შს ი ხაჴიდ მადრა̈ჴ ი სემი შუ̂ელტ ჩაფჷლ ათკუ̂არუ̂ნე. ლა̄პა̈რ
Line of edition: 23    ალა̄, რა̈შ, ი კე̄სრი ნანუ̄ლცახა̈ნ ესგენე ალ ჭყინტ. ალჲა̈რს
Line of edition: 24    უშხუ̂ა̄რე თხუ̂იმ ლახლატჷნდახ. ლირჰა̄ლუ̂ ჩუ̂არდა ი ლირჰა̄ლე დუ̂რეუ̂ქა
Line of edition: 25    ა̈გითე̄დ ანტა̈ხ.

Line of edition: 26       აჩა̈დ ხა̈ნ ი ალ კე̄სრი ნანუ̄ლს ლიღნაუ̂ ა̈ხთენა̈̄ნ. კე̄სრი უ̂ა̈ზრა̈ლდ
Line of edition: 27    ხა̈̄ქუ̂ინხ კე̄სა̈რს:
Line of edition: 28       -- ე̄, კე̄სა̈რ, სი ნო̄უ̂ ანდაგრა, სი ნო̄უ̂ ანცუე̄ნა, ისგუ ნანუ̄ლ
Line of edition: 29    ღანაუ̂ ლი! -- ალა კე̄სა̈რდ ა̈დუ̂ა̈შგდე:
Line of edition: 30       -- მიჩა ნანუ̄ლს ესერ მა̈ჲ ადღანუ̂ი̄ს, შომუ̂ა̈̄ჲ ესერ ეჩას დე დეც
Line of edition: 31    ხოწუ̂ა ი დე გიმ?! ჲა̈რ ესერ ადბა̈დუ̂ი̄ს ეჩხა̄უ̂თე̄სგა ლი̄ზის?

Line of edition: 32       ალ უ̂ა̈ზრა̈ლს თხუმა̈რ ქა̄თჭკუ̂ერ. აჩა̈დ ხა̈ნ ი კე̄სრი გეზალ ნანუ̄ლ
Line of edition: 33    ჩუ̂ა̈დღუ̂აჟ ი ჭყინტ ა̈ხთენა̈̄ნ. კე̄სრი უ̂ა̈ზრა̈ლ ქა̄დ აჩა̈დხ კე̄სა̈რთე
Line of edition: 34    ი ხა̈̄ქუ̂ინხ: -- კე̄სა̈რ, სი ნო̄უ̂ ანდაგრა, სი ნო̄უ̂ ანცუე̄ნა, ისგუ დი̄ნა
Line of edition: 35    ჩუ ლუღუ̂ა̈ჟ ლი ი ჭყინტ ხორი!

Line of edition: 36       ალ ამბა̈უ̂დ კე̄სა̈რ ლეგ გუჟი̄ნ ადურდუნე ი ძღჷდ ათჷნბაჟჷნ ეჩი̄შთე̄სგა
Line of edition: 37    იშგნა̈ მა̄რე̄მი ლი̄ზი. ადზჷზე მა̄რა̈̄ლ მეთერთე: "ჲაღო, ჲა̈რუ
Line of edition: 38    ესერ ლესუ̂ მიჩა გეზლა̈ მჷღნა̈უ̂ი?" მეთერდ ხა̈̄ქუ̂ინ, ერე "მიჩა საბძანებელისგა
Page of edition: 166  Line of edition: 1    ჩუ̄უ̂ ესერ ა̈დზუ̂ერ მა̈გ მჷჩა̈̄ჟი ი მინდუ̂ერისგა ანზუ ადჴალე
Line of edition: 2    ი ეჩეჟი̄ნ ოქუ̂რა̈ კათხუ ესერ ათჴალე ი ერუ̂ა̈̄ჲ მა̄რე ჩიე ჩიქდ
Line of edition: 3    ეჩხა̄უ̂თექა ქო̄თჩიშ ლჷჩა̈̄ჟ ი ეჯ კათხს ჟი ა̈ნკედნე, ეჯ' ე̄სერ ი̄რა
Line of edition: 4    კე̄სრი ნანუ̄ლა̈ მჷღნა̈უ̂ი".

Line of edition: 5       აშხუ̂ ლადეღ კე̄სა̈რდ ჩუ̂ა̈დზუ̂ერ მა̈გ ლჷჩა̈̄ჟ ი მინდუ̂ერისგა ჩუ̂ათჴალე
Line of edition: 6    ანზშუ̂ ოქუ̂რა̈ კათხ. ადუ̂ო̄შთხუნეხ ჩიემ ქა ჩა̄ჟა̈რ, მარე ჩიე
Line of edition: 7    ჩიქდ ლა̈ხშგა̈ბ ერე̄ ეშხუ ლჷჩა̈̄ჟ ი ჟ'ესფხიჭე ოქუ̂რა̈ კათხს ი იმთე
Line of edition: 8    დო აჩა̈დ, თე და̈̄რდ მოშ ლახრეკ.

Line of edition: 9       ალ მეთერს თე̄რა̈ლ ოხხჷპჷ̄რე კე̄სა̈რდ ი მე̄რმა მეთერთე აჩა̈დხ
Line of edition: 10    ლა̈ჭუ̂დია̄ლდ. მე̄რმა მეთერდ ხა̈̄ქუ̂ინ: "ჩუ̄უ̂ ესერ ა̈დზუ̂ერ მჷჩა̈̄ჟი მა̄რე
Line of edition: 11    მა̈გ ი მინდუ̂ერისგა ანზჟი̄ნ ოქუ̂რა̈ თა̈ს ჟი̄უ̂ ესჴალე ი ჲერუ̂ა̈̄ჲ ესერ
Line of edition: 12    ეჯ თა̈სს ჩინ მა̈̄ნკუ̂ი ჟ'ესფხიჭნე, ეჯა ესერ ი̄რი კე̄სრი დი̄ნა̈̄ მჷღნა̈უ̂ი".
Line of edition: 13    კე̄სა̈რდ ჩუ̄დ ა̈დზუ̂ერ მა̈გ მჷჩა̈̄ჟი მა̄რე ი მინდუ̂ერისგა ანზჟი̄ნ ოქუ̂რა̈
Line of edition: 14    თა̈ს ჟ'ესჴალე. კე̄სრი გეზალ ქა̄დ აჩა̈დ ჩეი̄ ქორთე ი ჟი ლახსგურდა
Line of edition: 15    მიჩა რა̈შს. ადუ̂ო̄შთხუნეხ ქა ჩიემ ჩა̄ჟა̈რ ი ჩიე ჩიქდ ლა̈ხშგა̈ბ მჷრა̈̄მხენ
Line of edition: 16    კე̄სრი გეზალ მიჩა რა̈შშუ̂, ჟ'ესფხიჭე ოქუ̂რა̈ თა̈სს ი იმთე დო
Line of edition: 17    აჩა̈დ, და̈̄რდ მა ა̈ნმეჴრე.

Line of edition: 18       კე̄სა̈რდ ალ მეთერს თე̄რა̈ლ [ქა̄დ] ოხხჷპჷ̄რე ი მე̄სმა̄მ მეთერთე
Line of edition: 19    ადზჷზე მა̄რა̈̄ლ. ალ მეთერდ უ̂არ ხა̈̄ქუ̂ინ: "აჯაღ ესერ ჯა დე̄მის
Line of edition: 20    იხპჷ̄რე ქა თე̄რა̈ლს. ხუნკუ̂ი̄ მეთერს ესერ ტკიცდ ხო̄ქუ̂ახ, მარ'
Line of edition: 21    ე̄სერ მინს დეშ ლოხოდახ გუ̂ი, ათხე ესერ ჯაი ლახე ტკიცდ ხა̈̄ქუ̂ნინე
Line of edition: 22    ი ჩუ დო̄მის ოთჯჷრუ̂იხ, ეჩქა ესერ თე̄რა̈ლს ქა ხოხპჷ̄რეხ მიჩ ი ეჯღა
Line of edition: 23    ესერ დე̄მგუ̂აშ ხაყლე". კე̄სრი ლჷზზა მა̄რა̈̄ლდ ქა ხა̈̄ქუ̂ინხ ალა მა̈გ კე̄სა̈რს,
Line of edition: 24    მა̈̄ჲ მეთერდ ხა̈̄ქუ̂ინ ალ მა̄რა̈̄ლს. კე̄სა̈რდ აჯაღ ქა̄დ ადზჷზე
Line of edition: 25    მა̄რა̈̄ლ მეთერთე ი პირობ ესდუ̂ეხ ამჟი̄ნ, ერე "მიჩ ესერ დე̄მგუ̂აშ
Line of edition: 26    ხა̈ჩოხ". მეთერდ ხა̈̄ქუ̂ინ, ერე "ჲაღუ̂ ე̄სერ კე̄სა̈რდ ჩუ̄უ̂ ა̈დზუ̂ერ მა̈გ
Line of edition: 27    ღუ̂ა̈ჟმა̄რე, მიჩა საბზანებელისგა ერუ̂ა̈̄ჲ არდე̄დს, ჩუ̄უ̂ ესერ ადსგურე
Line of edition: 28    მა̈გ, ბეფშუ̂ ესერ ჟი̄უ̂ ლა̈ჲჭჷთხეხ, უ̂ისგუ̂ ესერ ტუ̂ეტისგა̄უ̂ ლახუ̂ე̄მხ ი
Line of edition: 29    აშხუ̂ პილხენისგა̄უ̂ ა̈ხჭა̈მხ ი, ერუ̂ა̈̄ჲს ესერ ბეფშუ̂ უ̂ისგუ̂ს ქა ლახუ̂ედნე
Line of edition: 30    ი "მამა"ს ქა ხა̈̄ქუ̂ნინე, ეჯა ესერ ი̄რი კე̄სრი დი̄ნა̈̄ მჷღნა̈უ̂ი". კე̄სა̈რდ
Line of edition: 31    შიშდ ჩუ̂ა̈დზუ̂ერ მა̈გ, მიჩა საბზანებელისგა ერუ̂ა̈̄ჲ ღუ̂ა̈ჟმა̄რე ჩუ̂არდა,
Line of edition: 32    ჩუ̂ადსგურე მა̈გ ი ბეფშუ̂ ჟი ლა̈ჲჭჷთხეხ, უ̂ისგუ̂ ტუ̂ეტისგა ლახუ̂ე̄მხ.
Line of edition: 33    ა̈ხჭა̈მხ აშხუ̂ პილხენისგა ი ქა̈̄ნცხიპხ გირკიდ, მარე ბეფშუ̂დ და̈̄ს ლახუ̂ე̄მ
Line of edition: 34    უ̂ისგუ̂ ი დე "მამა" ჲა̈ს ხა̈̄ქუ̂ინ.
Line of edition: 35       -- ა̈სდენ ესერ ჲა̈რ ა̈გის ქა უჴა̈დუ̂? -- ლა̈ჲბინეხ ლიჭუ̂დიე̄ლ. ლა̈̄ქუ̂ინხ
Line of edition: 36    ერე̄დ, ერე "კე̄სრი ხოხუ̂რა გეზალ ესერ ა̈მსედ ა̈გის". ეჩი̄ ლახუ̂ბად
Line of edition: 37    ლა̈̄ქუ̂ინხ: "ეჩას ესერ ა̈გის დემნა̈რდ ხაყა ი ალ კე̄სრი გეზალ
Line of edition: 38    ნანუ̄ლა̈შთე ლიჴედს ესერ იმ ადბა̈დუ̂ი̄ს?" ალჲა̈რს მა̄მა ლა̈ხჭუ̂ედდახ,
Page of edition: 167  Line of edition: 1    ეჯჟი̄ნ ქა̄ნჴიდხ ეჯ კე̄სრი გეზალ ი ჩუ̂ადსგურეხ, ბეფშუ̂ ჟი̄დ ლა̈ჲჭჷთხეხ
Line of edition: 2    ი პილხენისგა̄დ ა̈ხჭა̈მხ. ალ კე̄სრი გეზალმჷყ ერ ანჰეხ, ალ
Line of edition: 3    ბეფშუ̂დ უ̂ისგუ̂ სგო̄თკუ̂ა̈რ კალთა̈ჲთე̄სგა ი "მამა" ხა̈̄ქუ̂ინ. ხა̈ლხდ
Line of edition: 4    ლისყუ̂ა̈დუ̂ირ ა̈დბინეხ: "ჲას ესერ მირ ოთღანუ̂ა კე̄სრი ნანუ̄ლ?!"
Line of edition: 5    კე̄სა̈რ სგა ლოხგუდირდა ალ ჭყინტს ი ქორთე ადჲე. "ე̄, ჲაღო,
Line of edition: 6    ათხე სი მიშგუ̂აუ̂დ ნაჭუ̂ლაშ ჯა̈რ ლეჰუ̂დი ი ხეკუ̂ეს ერე მიშგუ ციბ
Line of edition: 7    ოქუ̂რა̈ ლუმიჭუ̂ ჴანშუ̂ ჟი ა̈მგუ̂ეშლა ი ეჩქა მიშგუ დი̄ნა ისგუ მე̄რა".

Line of edition: 8       ალ ჭყინტ აჩა̈დ თუ̂ეთნა̄მ ზუგუ̂თექა ი თუ̂ეთნა̄მ რა̈ში ძუა ჟი ანტუ̄სე

Line of edition: 9       ი თუ̂ეთნა̄მ რა̈ში ჟახე ანჷრშუ̂ენ: "თუ̂ეთნე რა̈შ, სი[ი] მეწდ ი ისგუ
Line of edition: 10    ნამნაყუნი̄ მაწუ̂ე̄ნ!" თუ̂ეთნე რა̈შ შიშდ ქა ლა̈ხშგა̈ბ ამხა̄უ̂თექა
Line of edition: 11    ი ლა̈ხჭუ̂ედდა: -- მა̄ჲ ეჯწჷხჷნ, სი ჭყინტჷლდ?
Line of edition: 12       -- ჰამა მა̈ჲ, კე̄სრი ნანუ̄ლ ლა̈მღანუ̂ა̈̄ნ ი ნაჭუ̂ლაშდ მიჩა ციბ
Line of edition: 13    გუ̂ეშის ოქუ̂რა̈ ლუმიჭუ̂ ჴანა̈რს მეშგუ̂ემ.
Line of edition: 14       -- ჲაღო, ათხე მი წურა̈̄ლ ღაბო̄ლს ლაჯუ̂ედნე, სოფელ ლექუ̂ა
Line of edition: 15    ხუ̂ა̈ჲ ჯე̄ცუნიხ, მარე სი ამღა ნომა აფეშ, სგა̄თხა̈ჲ, ჩუ̂ესაბ ციბისგა
Line of edition: 16    ეჯჟი̄ნ, ერე ქა ნო̄ს ლახგჷრგლა.

Line of edition: 17       ამნე̄მ სგა ლა̈ჲჭუ̂ე̄ნ ალ წურა̈̄ლ ღაბო̄ლ ი ესღრი სოფელ ლექუ̂ა.
Line of edition: 18    სოფლა̈რდ ლი̄ცუ̂ ლოხბინეხ: "ალა ხე̄რაჲა კე̄სრი ნაჭუ̂ლაშ, ალა ხე̄რია?
Line of edition: 19    მახან კინჩხს ესერ ათხე ხა̈ქუ̂ცე კე̄სა̈რს". ამნე̄მ შდიმ და̈̄ს ლახდია̄ნე,
Line of edition: 20    აჩა̈დ კესრი ლა̈ზგამჷყ ი ჩუ̂ადბე ღაბნა ციბისგა ი ჯა სგა̄ჩა̈დ

Line of edition: 21       კე̄სა̈რიშთე: "კე̄სა̈რ, ხეწდ ღენა, ჲაღო, მიშგუ̂ა ნა̈ჴიდუ̂ს!" ქა̄ჩა̈დ კე̄სა̈რ
Line of edition: 22    ი ციბ გუ̂ეში ესხუ̂ი̄დდა ოქუ̂რა̈ ლჷმიჭუ̂ ჴანა̈რშუ̂ ი ეზერდ ლახბაჟჷნდა.
Line of edition: 23    სგა̄ჩა̈დ ქორთე ი აჯაღჷდ ხა̈̄ქუ̂ინ მიჩა ლეჩჟჷ̄რის:

Line of edition: 24       ჲაღო, ათხე მიშგუ ციბ ხეკუ̂ეს ერე ჟი ა̈მგუ̂ეშლა გიცა̈რშუ̂ ი
Line of edition: 25    ბარჯ ი ბარჯ ჩი̄ს უშხუ̂ა̄რ ხობჯგე̄ნხ. -- ალა ქა̄დ აჩა̈დ წჷრნი ზუგუ̂თექა
Line of edition: 26    ი ჟი ანტუ̄სე წჷრნი რა̈ში ძუა ი ეჩი̄ ჟახეი̄ ანჷრშუ̂ენ: "წჷრნი
Line of edition: 27    რა̈შ, სიი მეწდ ი ისგუ ნამნაყუნი̄ მაწუ̂ე̄ნ!" წჷრნი რა̈შ შიშდ ქა̄ნჴა̈დ
Line of edition: 28    ამხა̄უ̂თექა ი ლა̈ხჭუ̂ედდა: -- მა̈ჲ ეჯწჷხჷნ, სი ჭყინტჷლდ?
Line of edition: 29       -- ჰამა მა̈ჲ, კე̄სრი ნანუ̄ლ ლა̈მღანუ̂ა̈̄ნ ი ნაჭუ̂ლაშდ მეშგუ̂ემ მიჩა
Line of edition: 30    ციბ გუ̂ეშის გიცა̈რშუ̂ ი ბარჯ ი ბარჯ ხეკუ̂ეს ერე ჩი̄ს უშხუ̂ა̄რ ხობჯგე̄ნს.
Line of edition: 31       -- ჲაღო, ათხე მი ჟინღჷლდს ლაჯუ̂ედნე ი სოფელ ლექუ̂ა მა̈გ
Line of edition: 32    ჯე̄ცუნიხ, მარე ეჯღა სი ნომა აფეშ.

Line of edition: 33       ამნე̄მდ სგა ლა̈ჲჭუ̂ე̄ნ ალ ჟინღჷლდ ი სოფელ ლექუ̂ა ჩიემ ლი̄ცუ̂
Line of edition: 34    ლოხბინეხ, მარე ამნე̄მ შდიმ და̈̄ს ლახდიანე, სგა̄დჲე კესრი ციბთე̄სგა,
Line of edition: 35    ჩუ̂ათბე ი ჯა სგა̄ჩა̈დ კე̄სა̈რიშთე. ქა̄ნჴა̈დ კე̄სა̈რ ი მიჩა ციბ გუ̂ეში
Line of edition: 36    ესხუ̂ი̄დდა გიცა̈რშუ̂ ი ბარჯ ი ბარჯ ჩი̄ს უშხუ̂ა̄რ ხობჯგა̈̄ნხ. ეზა̈რდ
Line of edition: 37    ლახბაჟჷნდა კე̄სა̈რს.

Page of edition: 168 
Line of edition: 1       -- ათხე მიშგუ ციბ ხეკუ̂ეს ერე ჟი ა̈მგუ̂ეშლა მეშხა̄მ ჰილშუ̂. -- ხა̈̄ქუ̂ინ
Line of edition: 2    კე̄სა̈რდ.

Line of edition: 3       ალა ქა̄დ აჩა̈დ მეშხა̄მ ზუგუ̂თექა ი ჟ'ანტუ̄სე მეშხა̄მ რა̈ში ძუა.
Line of edition: 4    მეშხე რა̈შ შიშდ ქა̄ნჴა̈დ ეჩხა̄უ̂თექა ი ლა̈ხჭუ̂ედდა: -- მა̈ჲ ეჯწჷხჷნ, სი
Line of edition: 5    ჭყინტჷლდ?
Line of edition: 6       -- ჰამა მა̈ჲ, კე̄სრი ნანუ̄ლ ლა̈მღანუ̂ა̈̄ნ ი ნაჭუ̂ლაშდ მეშგუ̂ემ მიჩა
Line of edition: 7    ციბ გუ̂ეში ჰილუ̂ს.
Line of edition: 8       -- ჲაღო, ათხე მი წურა̈̄ლ სა̄ბლი̄დს ლაჯუ̂ედნე ი სოფელ ლექუ̂ა
Line of edition: 9    მა̈გ ჯე̄ცუნიხ, მარე ეჯღა სი ნო̄მა აფეშ.

Line of edition: 10       ამნე̄მ სგა ლა̈ჲჭუ̂ე̄ნ ალ სა̄ბლი̄დ ი ადჲე. სოფელ ლექუ̂ა მა̈გ ალას
Line of edition: 11    ხე̄ცუ̂და, მარე ამნემ შდიმ და̈̄ს ლახდიანე, სგა̄დჲე კე̄სრი ციბთე̄სგა,
Line of edition: 12    ჩუ̂ათბე ი ჯა სგა̄ჩა̈დ კე̄სა̈რიშთე. კე̄სა̈რდ ა̈ნწუ̂ე̄ნე მიჩა ციბ ი ჰილშუ̂
Line of edition: 13    გუ̂ეში ესხუ̂ი̄დდა ი ეზა̈რდ ლახბაჟჷნდა.
Line of edition: 14       -- ათხე, ჲაღო, ეჯჲა̈რი̄ ქა̈̄მიჴ-ე́, ოქუ̂რა̈ კათხ ი თა̈ს! -- ამნე̄მ ალჲა̈რი̄
Line of edition: 15    ქო̄ხჴიდ.
Line of edition: 16       -- ო̄, მე̄ცუ̂დახ მა̈გ ისგუ̂ა თხუ̂იმს, მარე ლა̄ცუ̂ მა̄მა ლჷმა̈̄რე̄[ლ]ხი,
Line of edition: 17    ჩუ ჯაყე̄ნა მიშგუ̂ა ჩი̄ჟად! -- ხა̈̄ქუ̂ინ კე̄სა̈რდ. ამნე̄მ მიჩა ქონა̈ბ ჩუ̂აყუ̂ილ
Line of edition: 18    ისგდ ი ხჷნსგა მიჩა ჩი̄ჟას ი მიჩა დი̄ნას ლახუ̂ე̄მ



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.