TITUS
Svan Prose Texts I (Upper Bal)
Part No. 84
Previous part

Text: 91 
Page of edition: 160 
Line of edition: 29 
91. უ̂იჯ


Line of edition: 30       ლჷმზჷრე̄უ̂ ხი̄-ჲ ხეხუ̂-ჭა̈შ. სემი დი̄ნა̈̄ლ ხორიხ. ლითიე̄ლ ლი. მა̈გ
Line of edition: 31    აჩა̈დ ლათეჲთე ი ალჲა̈რი აჩა̈დხ. ჩიემ ა̈ნთე ლა̈დი თუ̂ით ლადღი
Line of edition: 32    და̈ბ, ალჲა̈რდი ა̈ნთეხ. ა̈გით' ა̄ნჴა̈დხ ი ხოჩა უ̂ოხშა̈მ ანმა̄რეხ. ჩუ̂ადყურდახ
Line of edition: 33    ი მე̄რმა ლადეღ ჟ'ანჷ̄გა̈ნხ ი იმა̄რა̈̄ლხ ლათეჲთე. ა̈დსგიდახ ქა,
Line of edition: 34    მინე დაბა̈რ მა̈გ ჟი ლჷთე ლიხ ი ჟი ლჷჲჴე. მე̄უ̂არ ათჩო̄ნდახ ი ა̈ნუ̂იღუ̂ნე
Line of edition: 35    ჴანა̈რ ი ანჭლი მჷღა̈უ̂ს. ეშხუ ჲეშდ სა̈უ̂ ა̈გით' ა̄ნჴიდ. ჩუ̄დ
Page of edition: 161  Line of edition: 1    ადყურდახ ბა̄ზი. მე̄რმა ლადეღ ანჷ̄გა̈ნხ, მჷღა̈უ̂ მა̈გ ა̈გის ხორი სგა
Line of edition: 2    ლჷნჭილ. ალა ჰა̈დურდ ხოშა ათხი̄დჷნ. ლა̈დი ლიკლა̈უ̂ი ა̈ნბინე, ჩუ̂ადკალუ̂ე
Line of edition: 3    ეშხუ კალუ̂ ი ჩოთსა̈დ ამჟი უბა̄ბად. მესმა ლადეღ ანჷ̄გა̈ნ,
Line of edition: 4    ლეკლა̈უ̂ი მა̈გ ქა ლჷკლაუ̂ე ესხუ̂ი̄დ, ლა̈̄ში მა̈გ მიჩა შედისგა ხორი
Line of edition: 5    ლუშხუ̂ინ, ლეგუ̂ეჰ მა̈გ ქა ლუგუ̂ეჰ ხოჩა̄მდ კიბდონა̈რისგა ხორი ფექუ̂შ.
Line of edition: 6    ძღჷდ ლჷხია̈დ ლიხ.

Line of edition: 7       ბა̄ზი ლა̈ხიადა̄ლს იჩოხ: ლა̈ძჰა ა̈ძიჰხ. ზურა̄ლ ჟ'აჩა̈დ გუბა̈ნდთე
Line of edition: 8    ლაფა̈ქდ ი კიბდო̈ნს ქა ხაცხიპ ხოშა უ̂იჯ. ამი̄ მაყალშუ̂ ჩუ̂ანშყა̈დ.
Line of edition: 9    ლე̄ბიჩუ ი დეშ აჩა̈დ გუბა̈ნდთე. სგა̄ჩა̈დ მიჩა ჭა̈შთე ი ქა ხა̈̄ქუ̂: "კიბდო̈ნს
Line of edition: 10    ესერ ხოშა უ̂იჯ ხაჭო̄ნა". ჟ'აჩა̈დ მიჩა ჭა̈შ.
Line of edition: 11       -- მა̈̄ღენ ესერ ღე̄რბეთ ამი̄ მუჩუ̂მე ლი, ქაუ̂ ესერ ა̈ხრაშუ̂ა̈̄ნ! მა̈̄ჲ
Line of edition: 12    ხეკუ̂დი, ეჯას ესერ ხა̈ჩო. -- ეჩქა უ̂იჯდ ხა̈̄ქუ̂:
Line of edition: 13       -- მიჩა გეზალ ქაუ̂ როქუ̂ ლახუ̂ე̄მ ხეხუ̂დ, ეჩქა ესერ ქა̈̄ხრა̈შუ̂ი.

Line of edition: 14       ჩუ̂აჩა̈დ, ხა̈̄ქუ̂ მიჩა გეზლი̄რს, ხოშა დი̄ნას: "ჯა როქუ̂ ხონჴრი მო?"
Line of edition: 15    ხოშა დი̄ნად უ̂არ ლა̈̄ქუ̂. ეჩქა მანე̄სგრა ხა̈̄ქუ̂. ეჯნემი -- ატკაზ. უ̂ეშგიმპილს
Line of edition: 16    ხოხუ̂რა დი̄ნას ხა̈̄ქუ̂:
Line of edition: 17       -- ჯა როქუ̂ ღჷრი მო? -- ჲაღო, მა̈გ როქუ̂ ჟ'ა̈ლჭკჟენიდ, ეჯას ეჯა
Line of edition: 18    მიცხა, ერე სგა̈ჲ ეში̄ ლჷჲა̈რ ხირდიდ, ი მი ქა ხონჴრი.

Line of edition: 19       ათბაჟჷნ მიჩა მუს ი ქა ლა̈ხყაჰა̈̄ნ. ჟ'ოთჴიდ მიჩა მუდ გუბა̈ნდთე
Line of edition: 20    უ̂იჯს, ქა ლახუ̂ე̄მ ხოხუ̂რა მიჩა გეზალ. უ̂იჯდ ჩუ̂ადმა̈ზრე ი ადჲე
Line of edition: 21    ხეხუ̂დ ალჲარე დი̄ნა.

Line of edition: 22       ესღრიხ შუკუ̂ჟი ი აშხუ̂ ა̈გის შუკუ̂ისგა ჩუ̂ადჩარუ̂ე უ̂იჯდ მიჩა ხეხუ̂
Line of edition: 23    ი ხა̈̄ქუ̂: "ე, მიშგუ ხეხუ̂, სი ჟ'ა̈მღე̄ლა̈უ̂ ამეჩუ; უ̂ოდე მი დო ონჴუ̂ე,
Line of edition: 24    ეჩქად ნო̄ს ოთჴერდე̄დ!" აჩა̈დ ალა̄, უ̂იჯ, ი ჩუ̂აჩა̈დ გიმი ჴურუჩუ ი
Line of edition: 25    ჟ'ანტა̈ხ მე̄რმა ა̈გიჟი, ათხე მა̄რე ლი. ქა̈̄ხლაკ მიჩა ხეხუ̂ს: -- ე, სი დი̄ნა,
Line of edition: 26    ლჷჩედდ!
Line of edition: 27       -- მი ღალ იმთ' ო̄დრი? მიშგუ ჭა̈შ უ̂იჯ ლი. ეჯა უ̂ოდ დო
Line of edition: 28    ა̈ნჴდენი, ეჩქად და̈̄ს ხონჴრი.
Line of edition: 29       -- ეზა̈რ ხი, მარე ეზერდ ჯე̄რა! ეჩქა უ̂იჯ ხუ̂ა̈სუ̂, მარე ათხე
Line of edition: 30    მა̄რე ხუ̂ი.

Line of edition: 31       ათხი̄დჷნ მე̄უ̂არ ი ესღრიხ ათხე ხოჩა გუჟი. ა̈თლაკხ ამეჩუ თეტე̄ნი
Line of edition: 32    ბოგს. ჭა̈შდ ხა̈̄ქუ̂ ხეხუ̂ს: "ამექა ქუ̂ინ ნო̄სა ა̈ხკჷდა, ადო ბოგ ჩუ
Line of edition: 33    რეღუ̂ნი, მა̈გ ჟი გუ̂ეჴლი". იმედ ხა̈̄ქუ̂: "დე̄მა ესერ". ესღრიხ აჯაღ ი
Line of edition: 34    უ̂იჯი ნაშხატუ̂ს ა̈თლაკხ ი ამეჩუ ხა̈̄ქუ̂ ჭა̈შდ: "ქუ̂ინ ესერ ნო̄საუ̂ ა̈ნკიდ
Line of edition: 35    ამექა ლა̄ზჟი!" ი დე̄ს' ა̈̄ნკიდ ქუ̂ინ ი ქა̄ჩა̈დხ შუ̂იდებიანდ. ადჰეხ ა̈გიდ
Line of edition: 36    ი ეჩქა მიჩა ჭა̈შდ ადშგურა̄ნე: "ათხე დედე ყო̄რა̈ლისგა ხა̈ლიჩას ა̈ჯჷრშინე;
Page of edition: 162  Line of edition: 1    ეჩეჟი ნო̄მ' ე̄სგა ჭჷშხა̈რ ი გიმჟი ხაგა̈მდა̈ს. ქორს უ̂ოქუ̂რე
Line of edition: 2    სკა̈მს ეჯგემნეხ; ეჩეჟი ნო̄მ' ე̄სგურდე̄დ, ზექი სკა̈მჟი ესგუ. ლა̄შგა̈̄ლთე
Line of edition: 3    უ̂ოქუ̂რა̈ სეგდას ა̈ჯჴიდეხ; ეჯა ნო̄მ' ა̄თხჲა, ზექი სეგდ' ა̄თხა̈ჲ. თჷრქა̈დს
Line of edition: 4    ლაჯუ̂ედნეხ, ეჯაჲ ნოს' ა̄თხჲა!"

Line of edition: 5       ალ' ა̄მნემ მა̈გ ამჟი̄ნ ადსურლე ი დე̄მგუ̂აშ ლა̈ხქად. ჩუ̂ა̈დგურგუნა̈̄ნხ,
Line of edition: 6    ქუ̂ერწილ აჩუ̂მინხ ი ხოჩა ლე̄თ ა̈დრჷჰეხ. ჩუ̂ადღანუ̂ე ი აშხუ̂ ზაუნღო
Line of edition: 7    ჭყინტგეზალ ხეთხა̈̄ნხ. სემი ზა̈ჲ ქა̄ჩა̈დ. ხოღელდა ჩიგარ ღოჟმა̄რე
Line of edition: 8    მიჩა ხეხუ̂ს: "ლამუართე ლი̄ზის როქუ̂ იშგუ̂მინნე" ი დე̄სა იშგუ̂მინ.
Line of edition: 9    ეჩქა ხა̈̄ქუ̂ მიჩა ჭა̈შდ:

Line of edition: 10       ისგუ̂ეჲს ხეხლი სი უჯა̈რცახა̈ნ ი ალჩედდ ისგუ̂ა ლამუარა̈ლთე
Line of edition: 11    ი ხოჩა გუ̂ი ლა̈ხდო̄ლახ ათხე.

Line of edition: 12       ეჯჲა̈რს ეჯჟი ჰაუ̂ ხუ̂ა̈ჟრინა̈̄ნ, უ̂იჯთექა დემ ამგენი̄სხ (\\ [უ̂იჯს
Line of edition: 13    დე̄მა] ამყა̈უ̂ნი̄სხ).
Line of edition: 14       -- ეჩი̄ სერდე ნო̄მა ჯა̄რ ი ლჷჩედდ!

Line of edition: 15       ა̈ნმა̄რა̈̄ნხ ი აჩა̈დხ. სგა ლახა̄გა̈̄ნხ მიჩა ლა̈მთილა̈რს ი ქა̈̄ნსგიდა
Line of edition: 16    დი̄ნა̈̄ დი, გეზალ ჩუ̂ათირ მიჩა ი ჩი̄ჟე -- მა̄მა. ხა̈̄ქუ̂ დი̄ნად:
Line of edition: 17       -- იმ ხოსგდი დედე, ალა ლი მიშგუ ჭა̈შ.
Line of edition: 18       -- ალა როქუ̂ იმხა̈ნ ი̄რა, მიჩა ჭა̈შ როქუ̂ უ̂იჯ ლჷმა̈̄რ?!
Line of edition: 19       -- ეჩქა უ̂იჯ ლა̈სუ̂, მარე ათხე მა̄რე ლი პა̈ტიოსა̈ნ.

Line of edition: 20       ა̈დხი̄დეხ მე̄უ̂არ უშხუ̂ა̄რე ლიწედ ი ქორთ' ა̄ჩა̈დხ. ქორს ლა̈ხიადა̄ლ
Line of edition: 21    ჩუ̂ემინხ ი აშხუ̂ თუ̂ეს დემთე აფიშუ̂დხ. ი ხოშა ლაუ̂დილას ათხე
Line of edition: 22    ხახა̈რბხ ჭა̈შ ამნა̈რ, ხოხუ̂რა უდილდ, ი აჭკუ̂ა̈რიხ ხოხუ̂რა უდლა̈
Line of edition: 23    ლიღლა̈ტის. ეშხუ ხედრა მინ ხონჴრიხ ხეხუ̂დ. ჟა̈ნმეჴრე ალა ხოხუ̂რა
Line of edition: 24    უდილდ ი ა̈დჷნჩქარე ა̈გითე ი საჩქუ̂ა̈რ ლახუ̂ე̄მხ მიჩა დიდ ი მუდ.
Line of edition: 25    აჩა̈დხ ა̈გითე ჯა̄-ჲ მიჩა ჭა̈შ ი გეზალ შუ̂იდებიანდ. ეჩე ხოჩა ლირდე-ლიზგე
Line of edition: 26    ა̈დჴიდხ.

Line of edition: 27       ჭირ ეჩეუ̂ ა̈გუ̂ცუ̂ი̄რა, ხინ ამეჩუ̄ნ, შაქა̈რი ამეჩუ. ნა̈ჲ ხოჩა ლირდეუ̂
Line of edition: 28    ა̈გუ̂ჴი̄და ი ლჷმზჷრე̄უ̂ ლიშდ მა̈გ საერთოდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.