TITUS
Svan Prose Texts I (Upper Bal)
Part No. 83
Previous part

Text: 90 
Page of edition: 159 
Line of edition: 1 
90. ქოსა მულგუჰე̄რი


Line of edition: 2       ლა̈სუ̂ ეშხუ მეჩი მა̄რე, ჭყინტგეზალ ხორდა, ხეხუ̂ -- ლჷგზელ. ჩუ̂ადშგურა̄ნე
Line of edition: 3    ლაქუ̄ნაუ̂ა̄ლჟი მიჩა გეზალ, ერე "ქოსა მულგუჰე̄რის ნო̄სა[უ̂]
Line of edition: 4    ხემუნდი!" ჩუ̂ადგან ეჯა ი სერ ქუნე გუ̂ეშ ათყერ: სამ ლე̄თ ი ლადეღს
Line of edition: 5    თელ სოფელ ჩუ ლუზუ̂ერ ხა̄დ. მე̄შთხე ლადეღ აჩა̈დ მა̈გ.
Line of edition: 6    ეჩქა ხაშგუ̂მინ მიჩა ხეხუ̂ს ლეზუ̂ებ. მიჩა ხეხუ̂დ ხა̈̄ქუ̂ინ, ერე "მინი ლოქ
Line of edition: 7    ჟი ჭკეჟნიხ მა̈იდშუ̂, მარე დე̄სა ლოქ ა̈რი ლეზუ̂ებ! ეჩქა ლოქ, ჲაღო,
Line of edition: 8    ლექუ̂ე̄რთეუ̂ ადჲე".

Line of edition: 9       აჩა̈დ ლექუ̂ე̄რთე. ათა̄სდ აშხუ̂ მულგუჰე̄რის, ლახტუ̈̄ლ. ქა̈̄ნსგიდა
Line of edition: 10    ქოსა მულგუჰერი. ამნემ ანბა̈უ̂ მა̄მგუ̂ეშ ხა̈̄ქუ̂ინ, შიშდ ესთხეპ ი აჩა̈დ
Line of edition: 11    მე̄რმა მულგუჰე̄რითე. ეჯა ხატუ̈̄ლდა: "მა̈ჲ ლოქ ხაკუჩ? მე̄რმა მულგუჰე̄რის
Line of edition: 12    ლახტუ̂ი̄ლ აჯაღ. ეჯა ქა̈̄ნსგიდა, ეჯაჲ ქოსა მულგუ̂ეჰე̄რი ლა̈სუ̂
Line of edition: 13    აჯაღ. აჯაღ ეჯას დე̄სამა ხა̈̄ქუ̂ინ ი ჟი̄დ ესჭუ̂ე̄ნ. ეჯა უ̂ეშგინისგა ხატუ̂ი̄ლდა
Line of edition: 14    აჯაღ: "მა̈ჲ ლოქ ხაკუჩ, მა̈ჲ ხაკუჩ?" აჩა̈დ აჯაღ ალა მესმა
Line of edition: 15    მულგუ̂ეჰე̄რითე. ალას სგა̄დ ლახტუ̂ი̄ლ. ალა ქა̈̄ნსგიდა. ალაჲ ქოსა
Line of edition: 16    მულგუ̂ეჰე̄რი ლი. სერ ათხე ბა̈ქ ოხჴა̈დ ი ალა ლეჩუ̂მე ხა̄რ. სგა̄ჩა̈დ-ი́:
Line of edition: 17    "ლეგუ̂ეჰ ლოქ ხუღუ̂ა, ქაუ̂ ლოქ ოხგუ̂ეჰ!" ი ალ ქოსა მულგუ̂ეჰე̄რიდ
Line of edition: 18    ალას სგო̄სდე შიშდ, მიჩა ლელქუ̂ია̈რ ქო̄ხკიდ. ათხე ქოსა მულგუ̂ეჰე̄რი
Line of edition: 19    ჟი ხაჰუ̂დი ჰა̈ყბას, ეჯა, ჭყინტ, ჩუხი ხაჰუ̂დი.

Line of edition: 20       ერ ირჰა̈̄ლ, ა̈გითე ხეხუ̂მიშ ი გეზლი̄რეშ ლეზუ̂ები ლიჴდეს ხამურჯი.
Line of edition: 21    ათხე ალას, ჭყინტს, ხა̈იდ მეუ̂არ. ეჩქა ქოსა მულგუ̂ეჰე̄რიდ ხა̈̄ქუ̂ინ:
Line of edition: 22    "ქაუ̂ ლოქ ანნაყეხ ეშხუ დია̈რ, ნა̈ჩდუნ ლოქ ჯა ირა, ნა̈ტფუნ
Line of edition: 23    ჯაუ̂ ლა̈სუ̂". ქოსა მულგუ̂ეჰე̄რიდ ჟ'ანჩუ̂მინ ნა̈ჩდუნ, ჭყინტ ნა̈ტფუნა̈
Line of edition: 24    ლაბურდენს ლახა̄დ. ქოსა მულგუ̂ეჰე̄რი ლიცს ა̈გუ̂შე. ალა̄, ჭყინტ, ხაყლე:
Line of edition: 25    "ხოშე̄ლ[უ] ლოქ ესგუ̂ეშ!" ქოსა მულგუ̂ეჰე̄რი ეშ გარ ხოწქუ̂ე. უ̂ეშგიმპილს
Line of edition: 26    სგე̄სგუ̂ეშ გუ̂ეში სეგდა. ალას ჯა̈რ ჟ'ა̈ხგუ̂ეშლა̈̄ნ ლიცდ. მა̈ჲ
Line of edition: 27    ჩუ̂ემინას ათხე. ხა̈შდე ღალ მიჩა ფექს, ჟ'ა̈ხკუ̂ა̈დ მა̈გ ალა̄, მა̈̄ჲ ხუღუ̂ა̈̄ნ
Line of edition: 28    ლეგუ̂ეჰ. უ̂ეშგიმპილს ქა̄ნნაყეხ დია̈რ ხოშა ლესკა̈რ. ალა სგა
Line of edition: 29    ლახდეხ ლაჭეჲს. ათხე ქოსა მულგუ̂ეჰე̄რიდ ხა̈̄ქუ̂ინ:
Line of edition: 30       -- ათხე ლოქ ჯუ̂ინელ ჰარკა̈ლ[უ] ლოქ ანა̄მბუ̂ეხ, მინე ხოშა̄ლე
Line of edition: 31    ნაუ̂ზერია̈ლ. -- ჭყინტდ ხა̈̄ქუ̂ინ:
Line of edition: 32       -- მა̈ჲ ლოქ ხა̈̄ქუ̂ას, მიჩ ლოქ დე̄სამა ხასმა. მიჯნემ[უ] ანა̄მბუ̂ე. --
Line of edition: 33    ქოსა მულგუ̂ეჰე̄რიდ ლა̈̄ქუ̂ინ:
Line of edition: 34       -- ხედუ̂ა̈̄ჲდ ლოქ ხოჩა ჰარკა̈ლ ლა̈̄ქუ̂ას, ეჯას ხა̈̄ცეს ალ ლესკა̈რ. -- ქოსა
Line of edition: 35    მულგუ̂ეჰე̄რიდ ლა̈̄ქუ̂ინ მიჩა მუე̄ ნაუ̂ზერი:

Page of edition: 160 
Line of edition: 1       მიჩა მუს ლოქ ხარდე̄ნა ეშდჲორუ ბა̈ტ. ეშდჲარუ̂ინ ლოქ
Line of edition: 2    ლჷმტიხინ თანა̈ღს ლალა̈̄ბდ ლადეღისგა. აშხუ̂ ლადეღ აშხუ̂ ბა̈ტს
Line of edition: 3    ლესგი ქიპ ახშყედა. ა̈მჴედე̄ლი მიჩა მუ ლოქ ი შდჷხინდი ჩელტი
Line of edition: 4    ლესგ ლოხგა. უსგუ̂ა ლი̄ზი ხოჩმა̈̄სგუ̂ნა ეჯნოშ. ალა ესერ ლჷმა̈̄რ
Line of edition: 5    მიჩა ხოშა. -- ქოსა მულგუ̂ეჰე̄რიდ ლა̈̄ქუ̂ინ. ათხე ჭყინტდ ლა̈̄ქუ̂ინ:
Line of edition: 6       -- მიჩი ესერ ხუ̂ა̈ჲ მა̄მ ხასმა მიჩა ხოშა̄ლე ნაუ̂ზერი. მიჩა მუს
Line of edition: 7    ხა̈გნე̄ნა სემ აშირ ღუ̂ებ. სემ აშირ ღუ̂ები ბუზუ̄ლს აშხუ̂ ჰამს ლჷმშჷლდნინ,
Line of edition: 8    მე̄რმა -- ნა̈ბოზს. აშხუ̂ ჰამს ეშხუ ბუზუ̄ლ ქა ხაკლიე̄ნა. ა̈მჩედე̄ლი
Line of edition: 9    ლათხა̈̄ლთე. აშხუ̂ ა̈გის ჟ'ათლაკა ბაპს: ლაჴა̈ნს კა̈მბეშცახა̈ნ
Line of edition: 10    უღუ̂ა ხა̈გნე̄ნა. ა̈მჴედე̄ლი, უღუ̂ა ჩოხკი̄და, ბაპდ ჯაჭა̈რქა ჟ'ესყუჩუ̄რა,
Line of edition: 11    მჷბე̄რგად ბერგა̈ლ თხუმჟი ესფუთქუ̄რა, ეჯ ბუზუ̄ლ ა̈გითე ოხჴი̄და.
Line of edition: 12    ბუზუ̄ლს კინჩხ ჩუ̂ათდა̄უ̂შე̄ნა. სერ ჩი̄ ალას ხა̈ჭუ̂დიე̄ლა: "მა̈ჲ ლოქ
Line of edition: 13    ხე̄რა ხოჩა?" აშხუ̂ მა̄რა ლოხუ̂თო̄ნა: "გაკ[უ] ლოქ ა̈შიხ, ეჯაუ̂ ათშიდ.
Line of edition: 14    ეჯა ლოქ ლახე̄რა ხოჩა". გაცხა̈ჲდ ეჯა ხოჩუ̂მინა ი ოთში̄და. მე̄რმა
Line of edition: 15    ლადეღ ეჯზუმ გაკ ჟ'ა̈მჴედე̄ლი ბუზუ̄ლა̈ კინჩხჟი, ერე უმოწყალოდ
Line of edition: 16    ძღჷდ ლჷმა̈̄რ. ეჯა აშხუ̂ ლადეღ ქა ლჷმშა̈ნუ̂ინ, ჩუ ლჷმჰო̄ლინ ი ჩუ
Line of edition: 17    ლჷმშიდუ̂ინ. ჩოხში̄და. ეჩქა ჩუ̂ა̈მჴედე̄ლი გაკხა̈ნჩუ, ჩუ̂ალყუ̂ინე̄ლი ჴაბ-ჴაბა̈̄ლ
Line of edition: 18    გაკ ჩუქუ̂ა̄ნ. ლოხსინჯუ̂ა გაკდ, ჲორუ გაკჷლდ გარ ხა̈ცუ̂რა. ეჯ
Line of edition: 19    ჲარუ̂ გაკჟი ჲორუ ღუ̂ამალ ესგენე̄ნახ. ა̈მჴედე̄ლი სერ მიჩა მუ, ოხფი̄შუ̂და
Line of edition: 20    უ̂ერი კიცხ. ეჯ ჲორუ გაკ ი ღუ̂ამლა̈რ ჩოხში̄და, ჟიქა̄ნ ეჯკა̈ლი
Line of edition: 21    მინდო̈რდ ჩუ̂ელსიპე̄ლი გაკჟი უ̂ერი კიცხ, ერე ქუ̂ეყანაზუმ ლჷმა̈̄რ.
Line of edition: 22    მიჩა მუ ეჯას, ლეჴნის, ქა ლჷმჴანუ̂ინ. აშხუ̂ ლადეღ ლეთის ჟი
Line of edition: 23    ლჷმთა̈უ̂ინ, ქა ლჷმკალუ̂ინ, უ̂ეჴს აშხუ̂თე ლჷმდა̄სგუ̂ინ, ითქს -- მე̄რმათე.
Line of edition: 24    ლეჭმა ჩუ ლჷმჭა̈მინ ი ლეფცხის ლჷმფაცხუ̂ინ, აშხუ̂ ა̈გითე ჟი
Line of edition: 25    ლჷმმოჭმინ.

Line of edition: 26       ალა ლოქ ხუღუ̂ა მიჩ ლე̄ქუ̂ი̄სგ ი ალა ლჷმა̈̄რ მიჩა ხოშა ი ჟ'ოხსკინა
Line of edition: 27    ჭყინტი ჰარა̈კს ი დია̈რი ჭყინტს ხა̄დ ი ლექუ̂ე̄რი̄. ქოსა მულგუ̂ეჰე̄რი
Line of edition: 28    ქა̄ნკუ̂ა̈რ ლექუ̂ე̄რხა̈ნქა პაღუ̂ირშუ̂.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.