TITUS
Svan Prose Texts I (Upper Bal)
Part No. 82
Previous part

Text: 89 
Page of edition: 156 
Line of edition: 12 
89. კობო


Line of edition: 13       ალა კობო ლი. ჩიგარ დაჴა̈რ ხაყა ლალდა̈ღს, სემი გარ ხაყა. აშხუ̂
Line of edition: 14    ლე̄თ ქა̈̄მ ოთსა̈დ. მე̄რუ̂ა ლადეღ ჰამს დო̄სდ ანჷგა̈̄ნ, ესღრი დაჴრე
Line of edition: 15    ლათხე̄ლთე. სგა ლახხუ̂ი̄დდა და̈შდუ̂.
Line of edition: 16       -- და̈შდუ̂, მიშგუ დაჴა̈რ ჯიწუ̂' ე̄სა? -- დე̄სა -- ჩუ̂ა̈თნაბნა̈ნ! -- ენჩაჲ-ბენჩა̄უ
Line of edition: 17    მეჴცი! -- ჩუ̂ესკლიჭ ჲაღო! -- ესკლიჭე ი დე̄სა ხაცხტა.

Line of edition: 18       ესღრი. ამეჩუ თხე̄რე ლახხუ̂ი̄დ. -- თხე̄რე, მიშგუ დაჴა̈რ ჯიწუ̂'ე̄სა?
Line of edition: 19    -- დე̄სა. -- ჩუ̂ა̈თნაბნა̈ნ! -- ენჩაჲ-ბენჩა̄უ მეჴცი! -- ესკლიჭ! -- ესკლიჭე ი
Line of edition: 20    დე̄სამა ხაცხტა.

Line of edition: 21       ესღრი. მა̄ლ ლახხუ̂ი̄დ. -- მა̄ლ, მიშგუ დაჴა̈რ ჯიწუ̂' ე̄სა? -- დე̄სა.
Line of edition: 22    -- ჩუ̂ა̈თნაბნა̈ნ, ჲაღო! -- ენჩაჲ-ბენჩა̄უ მეჴცი! -- ესკლიჭ, ჲაღო! -- ესკლიჭე
Line of edition: 23    ი სგა ხაცხტა წირღუ̂. სგუ̂ებინ მა̄ლ, უ̂ეშგინ კობო. სგო̄თჩა̈დ ბოგა̈
Line of edition: 24    კურდამ ჩუქუ̂ა̄ნთე. ანჴიდ ხოლა ჰაუ̂ა: "მა̄ლუგ ჟ'ა̈ნწახუ̂ი". ეჩქას ხა̈̄ქუ̂
Line of edition: 25    მა̄ლდ: "კობო, ქა̈̄მიხნ: სემი ეჯჲა̈რ ლა̈სუ̂ხ, უსგუ̂ა̄მ ქა̄ჯტიხე" ქა̄ნფიშუ̂დ
Line of edition: 26    მა̄ლ ი უსგუ̂ა დაჴჷლ ქა̄თტიხ.

Line of edition: 27       ალა მიჩა მეზუ̂ბელა̈რს ათშო̄ნდახ. "ჲაღო, სგა̈ჲი̄ ჩუ̂აცუ̂ირდ ისგუ̂ეჲ
Line of edition: 28    დაჴა̈̄რ ქა̈̄მ, ეჩქას სგა̈ჲი́ აშხუ̂ისგა ჲარუ̂ ჯეჰუ̂დინიხ". ანჴა̈დხ ალჲა̈რ
Line of edition: 29    ი ჩუ̂აცუ̂ირხ ქა̈̄მ მინე დაჴა̈რ. ეჯა ჩოთცჷლჷ̄რეხ თხე̄რა̈̄ლდ. დე̄სამა
Line of edition: 30    მოშ ა̈ნდიჴხ ქა.
Line of edition: 31       -- მა̈ჲ ესერ ოლგონუ̂ად კობოს?
Line of edition: 32       -- მა̈დილ ჯე̄რახ, ეშხუ ზექრო̄ლ მი̄გ, ეჯა ნო̄ს' ა̈̄მშიხად. ეჩჷნქა
Line of edition: 33    მა̈̄ჲ ჯეკუ̂ეხ, ეჯა მაყერდ!

Line of edition: 34       ანჴა̈დხ ალჲა̈რ ი ზექრა ჩოთშიხხ. იგუ̂ნი კობო ეშხუ გუდრა შიხ
Line of edition: 35    ჟ'ა̈ნკიდ, ამეისგა ჟიქა̄ნქა სემი აბზჷლა̈რ ესდე, ჟ'ა̈ნცუ̂ე ალა ი ესღრი
Page of edition: 157  Line of edition: 1    სგა̄ჩა̈დ კე̄სა̈რშე̄რთე. ბა̄ზი ამეჩუ ადჷგა̈̄ნ. მა̈გ ჩუ̂ადყურდახ ი ალა
Line of edition: 2    ჩაფლა̈რს იკა̄რზა̈̄ლი.
Line of edition: 3       -- კობო, ჩუ̂ათყუ, სი მა̄რე!
Line of edition: 4       -- ო, მი მჷხა̈რ ჯუ̂ე̄დია შუკუ̂ს მე̄ზი ხუ̂ი, ლეღუ̂ჭა̈რი მუღუ̂ა ი ეჩი̄
Line of edition: 5    ნაუ̂ჰო̈დი დე̄მჟი მა̄რ.

Line of edition: 6       კე̄სა̈რშე̄რ ჩუ̂ა̈თუ̄ჟდახ. ეჩქა ანჴა̈დ კობო ი გუდრა ქა̄ნჴიდ, შიხ
Line of edition: 7    ლემასგუ̂თ' ა̄შიდ, ეშხუ აბა̈ზ სგა̈̄ ყო̄რჟი ესდე, მერუ̂ე ნე̄სგა̈̄ ყო̄რჟი
Line of edition: 8    ესდე, მესმე ქა̄მე ყო̄რჟი ესდე, სგა̄ჩა̈დ ი ჩუ̂ადყურდა. მე̄რუ̂ა ლადეღ
Line of edition: 9    გუდრა ხაშგუ̂მინ კე̄სა̈რშე̄რ: "ჲაღო, გუდრა ქა̈̄მჴიდდ, გუ̂ია̈ნ მა̄რ სერ!"

Line of edition: 10       ოხჴიდხ ქა გუდრა. ალა ჰა̈რი ლი. კობოდ ლიტფუ̄რა̈̄ლ ა̈დბინე.
Line of edition: 11    ილჭა̈̄ლ ლა̈დი̄ ლადეღ: "მიჩ ესერ ალა უ̂ერცხლი თეთრდ გუ̂ეში ხა̄რა,
Line of edition: 12    მა̈ჲ ესერ ოთყერახ, დედეს მინეშ! ესთხალდ, არგებს ე ა̈გუ̂გუ̂ებს
Line of edition: 13    იმე! ხეთხე̄ლიხ ი ალჲა̈რ ჟ'ა̈ხგუ̂ა̈ბხ, სემი აბზა̈რ. ეჩქა კე̄სა̈რდ ლა̈̄ქუ̂:
Line of edition: 14    -- ო, ალას გაცხა̈ჲდ თეთრ მჷრე̄ს ხუღუ̂ა̈̄ნ გუდრაისგა. სი მა̄რე, ნომ
Line of edition: 15    ხილჭა̈̄ლ, თხუ̂იმ ნომ' ა̄დგრი, ღო ჟ'ა̈ჯგუ̂ეშლი მი გუდრას უ̂ერცხლი
Line of edition: 16    თეთრდ? "ქა̄ნჴა̈დ კე̄სა̈რ ი ჟ'ოხგოშლე გუდრა თეთრდ. ალა კობოს
Line of edition: 17    ხა̈ხია̈დ ი ა̈გით' ა̄ნჴიდ. ამეჩუ̄ნ მეზუ̂ბელა̈რს ათხარბჷნდახ:
Line of edition: 18       -- კობოს ესერ შიხღა თეთრ ოხცა̄და!
Line of edition: 19       -- სგა̈ჲ მა̄რუ, მა̈ჲ ჯახა̈რბხ? ამჟი ჩუ̂ა̈შიხდ სგა̈ჲი́ ისგუ̂ეჲ ზექრა̈̄ლ,
Line of edition: 20    ჟ'ა̈ხცუ̂ედ თუ̂ით გუდრა შიხ, ღო სგა̈ჲი́ ჟ'ა̈ხცა̈̄დნედ თეთრს.
Line of edition: 21    ა̈შიხხ ჩუ მინე ზექრა̈̄ლ, ა̈ნცუ̂ეხ თუ̂ით გუდრა შიხ, ხა̈ჭმინა̄ლნეხ
Line of edition: 22    მეზგა̈̄ლს, ხატუ̄ლიხ ჩი̄ს: შიხღა თეთრ ლა̈მცა̈̄დდ!" ალჲა̈რ ლაყა̈რს
Line of edition: 23    ხეღუ̂ჭენიხ ქა: "ლჷსო̄ყე ესერ ლიხ ჰა: შიხღა თეთრს ჲარ
Line of edition: 24    ლოხუ̂ცა̈̄დნე?!"

Line of edition: 25       სგა̄ნტა̈ხხ ა̈გითე. ამჩუ კობოს ხენდრო̈უ̂ხ. "სგა̈ჲ მა̄რო̄ლ, მა̈̄ჲ
Line of edition: 26    ჯინდე̄დხ, ეჯა მაყერდ: ხეხუ̂ მირი, ეჯა ნო̄სა ა̈მდაგრად!" ეჩქა ლა̈̄ქუ̂ხ,
Line of edition: 27    ერე "ალას ესერ მაშე̄ნე ხეხუ̂ მჷრე̄ს ხატკლებ ი ჩუ̄ ოთდაგა̈რხ!"
Line of edition: 28    მართლა ჩოთდაგა̈რხ. უ̂ოდ-ი-უ̂ოდ იგუ̂ნი კობო, ეჩქას ლა̈ჲცუ̂ე ლჷდგა̈რ
Line of edition: 29    ი ესღუ̂ა. უ̂ო̄შთხუ̂ ლა̈დღი ლე̄ზნა ქა̄დჲე. ეჩეჩუ̄ნ, კე̄სა̈რშა ქა̄მენ,
Line of edition: 30    ბოგჟი̄ნ ყაურჯენ ლოხგე ი ჩუ̂ესგენე ბოგჟი, ჯა სგა̄ჩა̈დ კე̄სა̈რშერთე.
Line of edition: 31       -- ხოჩაუ̂ ლადეღ ჯა̄რხ კე̄სა̈რშე̄რ!
Line of edition: 32       -- ხოჩაუ̂ ჯა̄რ კობოს! მა̈ჲ ჯაკუ, კობო?
Line of edition: 33       -- მა̈ჲ მაკუ [ი] ჯუ̂ე̄დია შუკუ̂ს ონღუ̂რი, ხეხუ̂ მინჴრი, ჟ'ა̈ხფა̈შ.

Line of edition: 34       კე̄სა̈რდ ხა̈̄ქუ̂, ერე
Line of edition: 35       -- იმ' ე̄სერ ხორ' აღო? -- ბოგჟი̄ნ ესერ ხოღლი. -- ჩუ̂ადერდ, აღო,
Line of edition: 36    ჟ'ახტუ̂ი̄ლდ!

Line of edition: 37       ჩუ̂აჩა̈დხ ნანულუ̂ა̈რ, ხაყლეხ ჟი ლიჴედს, მარე ალა ჰერს დე̄სა
Line of edition: 38    ხა̈ტხე. ჟ'ანჴა̈დხ ი ხა̈̄ქუ̂ხ:

Page of edition: 158 
Line of edition: 1       -- მა̄დ ესერ ა̈მჴედე̄ლი. -- ეჯ' ე̄სერ ამჟი მა̄მ ჴედნი, მინეშუ მა̈ზიგ
Line of edition: 2    ლახჴედა, სგაუ̂ ესერ ოხგუდირდახ მეჴა̈რს "ჟი როქ აღე" ი ქაუ̂
Line of edition: 3    ოხბჷდხ.

Line of edition: 4       ჩუ̄დ ატა̈ხხ სემი ნანულუ̂ა̈რ, ხაყლეხ ჟი ლიჴედს. ალა ქუ̂ინს დე̄ს'
Line of edition: 5    იკედ. სგო̄ხგუდირდახ მეჴა̈რს ი ალა ჟი ა̈ნუნჴუ̂ა̈̄ნ, სგა̄შყა̈დ ჭალა̈ჲთე.
Line of edition: 6    ჟი ანჴა̈დხ ნანულუ̂ა̈რ: "ეჩას ესერ ჭალა̈ჲთე ოთსკინა". კობოდ ლილჭა̈̄ლ
Line of edition: 7    ა̈დბინე: "უჲ, მიშგუ̂ი ცოდ, ჰამა ა̈მკუ̂ა̈რდ ჭალა̈ჲთეჲსგა ხეხუ̂?"
Line of edition: 8    იტფუ̄რა̈̄ლ ი ილჭა̈̄ლ. ამი̄ ლა̈ლჭა̄ლჟი კე̄სა̈რ ჟ'ა̈ნწახუ̂ა̈̄ნ: "მა̈დილ ჯე̄რა
Line of edition: 9    ი ლირდე მა̈ყრ, ხეხუ̂ს მი ლაჯუ̂ედნე: ქა̄ჯთიშუ̂ნი სამ ნანულუ̂ა̈რისგა!"
Line of edition: 10    ქა̈̄ნთიშ ამნემ მაჰუ̂რე̄ნე ნანულ ი ა̈გითე ანჴა̈დ.

Line of edition: 11       ალა მეხუ̂ბარა̈ლსჷდ ათშო̄ნდახ: -- კობოს ესერ ლჷდგა̈რღა ლჷჲა̈რ
Line of edition: 12    ოხუ̂ცა̄და!
Line of edition: 13       -- სგა̈ჲ მა̄რუ, მა̈ჲ ჯახა̈რბხ ალა: სგა̈ჲი ჩუ̂ადგა̈რდ ლა̈ხხუ̂ა, ჟი
Line of edition: 14    ა̈ხცუ̂ედ ი ხა̈ჭმინა̄ლნად სოფლა̈რისგა, ღო სგა̈ჲი́ ქა ლა̈ჯცა̈̄დნეხ ერუ̂ა̄ლე
Line of edition: 15    ლა̈ხხუ̂ას.

Line of edition: 16       ალჲა̈რდ ჩუ ადგა̈რხ მინე ლა̈ხხუ̂ა, ა̈ნცუ̂ეხ ჟი ი ხაზელა̄ლნეხ, იტუ̂ი̄ლიე̄ლხ,
Line of edition: 17    ერე "ლჷდგა̈რღა ლჷჲა̈რ ლა̈ნცა̈̄დდ!" ალჲა̈რს ხოშგბენიხ
Line of edition: 18    ქა ფაუ̂არშუ̂, მა̈გ ალჲა̈რს ხატყციხ: "ლჷდგა̈რღა ესერ ლჷჲა̈რს ჲა̈რ
Line of edition: 19    ლოხუ̂ცა̈̄დნე?! ლჷსო̄ყა̄ლე ესერ მჷრე̄ს ლიხ!" დე̄მე მოშ ა̈ნცა̈̄დხ.

Line of edition: 20       ა̈გით' ა̄ნტა̈ხხ ი აჭკუ̂ა̈რიხ. მა̈ჲ ოხუ̂გონუ̂ახ კობოს? კობოდ ხა̈̄ქუ̂,
Line of edition: 21    ერე "მა̈̄ჲ ჯინდე̄დხ, ეჯა მაყერდ აშხუ̂ გუ̂ეშჷნქა: კიბდო̈ნ ნო̄სა ა̈მტა̄ბად
Line of edition: 22    ხოშა, ეჩხაუ̂ ნო̄სა ამგენად ი ხოშა̄მ კოჯჟი ჩუ ნო̄ს' ე̄მგად ეჯნოშ".
Line of edition: 23    მართლა ჟ'ოხტა̄ბეხ ხოშა კიბდო̈ნ ი კობო სგა̄დგენეხ ეჩხაუ̂თეჲსგა,
Line of edition: 24    ქა̄დჲეხ ი ხოშა̄მ კოჯა̈ თხუმ ჩუ̂ესგეხ. ამეისგა იტუ̈̄ლიე̄ლ
Line of edition: 25    ალა (ჩუქუ̂ა̄ნ მეჯუ̂გა ა̈რიხ კუმშიშ): "ქუთდ ი ჭიშდუ̂ა̈რდ გუ̂ეში მა̄რ
Line of edition: 26    მა̈გ". ალა ხასჷმდახ მეჯუ̂გას, ჟ'აჩა̈დხ ი კობო ქა̄ნჴა̈დ ამხა̈ნქა: "ჲაღო,
Line of edition: 27    სგა̄ჩა̈დდ ამხაუ̂თეჲსგა, მა̈გუ̂ა̈ჲ ბედუ ჯა̈̄ცხ!"

Line of edition: 28       სგა̄ჩა̈დხ მეჯუ̂გა ამხაუ̂თეჲსგა. ხაფხეჭ კობოდ ი კიბდო̈ნ-ი მეჯუ̂გა
Line of edition: 29    უშხუდ ქა̄დკუ̂ა̈რ კოჯქა. ჯო̈გ მიჩ ესსა̈დ. ლა̈ჲრეკლე სგო̈ბინ ი ა̈გით'
Line of edition: 30    ა̄ნჴიდ. ალა მეზუ̂ბელა̈რსჷდ ათხარბჷნდახ. "მა̈ჲ ჯახა̈რბხ ამჟი? ათხე
Line of edition: 31    მ' ა̈ჯტა̈̄ბი კიბდო̈ნს ი სგა̄ჯგენი ეჩხაუ̂თეჲსგა სგა̈ჲ ჩი̄ს, ეჩქას სგა̈ჲი́
Line of edition: 32    ამზუმ კუმა̈შს ა̈ნჴდედ!"

Line of edition: 33       ჟ'ოხტა̄ბე კიბდო̈ნ, სგა̄დგენე მა̈გ ეჩხაუ̂თეჲსგა, ქა̄დჲე ი ხოშა̄მ
Line of edition: 34    კოჯჟი ჩუ̂ესგე. ათრა̄გუ̂ნე ხუ̂ა̈ჲ მა̄მა, ეჩქა ლოხუ̂ჯილკე ქა ი ქა̄დკუ̂ა̈რ
Line of edition: 35    კოჯქა.

Line of edition: 36       უ̂ოდ ალა̄-ჲ-ალა ჟი დო̄სა ა̈ლსგიდნად, ეჩქად ნო̄სამაუ̂ ლოგუ̂ზიგა
Line of edition: 37    ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.