TITUS
Svan Prose Texts I (Upper Bal)
Part No. 81
Previous part

Text: 88 
Page of edition: 152 
Line of edition: 5 
88. ბაპ ი სემი ლახუ̂ბა


Line of edition: 6       ალჲა̈რ ლიხ ღა̈რიბ, დე̄სამა ხუღუ̂ახ ქონა̈ბ, რჷდინ-გურნა-ჲ ძუჰე̄რანქა.
Line of edition: 7    ოხჴა̈დხ გარჯ ი ხოშა̄მ მუხუ̂ბე̄მ რა̈̄ქუ̂, ერე "ჯ' ე̄სერ ა̈ე̄სგი
Line of edition: 8    ძუჰე̄რას ლაჰო̈დთე, ჟ'ა̈ნკიდ ალა, ესღუ̂ა, ესღუ̂ა ი ამეჩუ ბაპ აჴნი.
Line of edition: 9       -- ხოჩაუ̂ ლადეღ ჯა̄რ ბაპს!
Line of edition: 10       -- ხოჩაუ̂ ჯა̄რ სიი! იმაუ̂ ესღრი, ჭყიტრა?
Line of edition: 11       -- ო, მი ეჯკა̈ლიბ უცხუ̂ ლეღუ̂ჭა̈რ მუღუ̂ა, ერე ეჯას ბა̄ზი ლაჰა̈̄სგმჷყ
Line of edition: 12    დომ ხუ̂ა̈ი, ეჩურ მა̄მ მეყა.
Line of edition: 13       -- ჲაღო, მა̈̄ჲ ღენ ლეღუ̂ჭა̈რი ჯუღუ̂ა, სი ღენ ლა̈დი მი ლა̈მმა̈რჯუ̂,
Line of edition: 14    ეჩქას ეჩის ქა აჯჰოდნი.

Line of edition: 15       ლა̈დი ჭყინტ ეჯას ხომურჯუ̂ი. ნა̈ბოზს ქორთე აჩა̈დხ. ეჩეჩუ ხა̈̄ქუ̂
Line of edition: 16    ბაპდ, ერე "ჲაღო ესერ, ჰარა̈კ-ჰურა̈კუ ახა̄დხ. ჯ' ე̄სერ ე მოშ ადუჟნი
Line of edition: 17    მიჩ, ეჩქ' ე̄სერ ჯა ლაჰო̈დნე მიჩა ლირდე-ლიზგე̄ ხჷნსგა̄მ; მიჯნემ
Line of edition: 18    ესერ [ჰე̄სა] ადუ̄ჟნას, ეჩქას ესერ მიჯნემუ ლახუ̂ე̄მ ძუჰე̄რა".

Line of edition: 19       ლოხუ̂ბინე ათხე ბაპდ ჰარა̈კ-ჰურა̈კ. ხო̄მბუ̂ი, ჰე̄სა იმე წირ ი ლოც
Line of edition: 20    ჩუ ხოჩუ̂მინა, აჯაღ ჰე̄სა ჩუ ხოჯგრა ი ლა̈პრისდა̄ლს იმე ხალკა. ალა
Line of edition: 21    მეუ̂არ ჯო̄დი ანჴა̈დ. მა̈ფშა̈̄რ ჭყინტს ჩუ̂ა̈თუ̄ჟდა ი მე̄რუ̂ა ლადეღ
Line of edition: 22    ძუჰე̄რა ქა̄ხკიდ. ეჯნემ ლიგუ̂ნი ა̈დბინე. აჩა̈დ მიჩა ქორთე.

Line of edition: 23       ეჩქა რა̈̄ქუ̂ მიჩა მანე̄სგრა მუხუ̂ბე̄მ: "ჲაღო ესერ, ჯა ადინე რჷდინს
Line of edition: 24    ლაჰო̈დთე, გომნი̄ ესერ ჯა ამჟი ხოლა̄მ ნაღუ̂ჭარს ა̈ნჴდე". ჟ'ა̈ნკიდ
Line of edition: 25    რჷდინ ი ესღუ̂ა. ამეჩუ ჩუ ესხუ̂ი̄დ ალ ბაპ.
Line of edition: 26       -- ხოჩაუ̂ ლადეღ ჯა̄რ ბაპს!
Line of edition: 27       -- ხოჩაუ̂ ჯა̄რ სიი! იმაუ̂ ესღრი?
Line of edition: 28       -- ჰამა იმაუ̂, ეჯკა̈ლიბ ლეჰუ̂დი მუღუ̂', ე̄რე ალას ბა̄ზი ქა დომ
Line of edition: 29    ჰო̈დი, ეჩურ მა̄მა მეყა.
Line of edition: 30       -- ჲაღო, ლა̈დი მი ლა̈მმა̈რჯუ̂ ი ეჯას ნა̈ბოზს ქა̄ჯჰოდნი.

Line of edition: 31       ლა̈დი ხომურჯუ̂ი ეჩას. ნა̈ბოზს ქორთე აჩა̈დხ. ხა̈̄ქუ̂ ბაპდ, ერე
Line of edition: 32    "ლიჰრაკა̈̄ლ ესერუ ახა̄დხ. მიჯნემ ესერ ჰა ადუ̄ჟნას, ეჩქას მიჯნემუ
Line of edition: 33    ლახუ̂ე̄მ რჷდინ; ჯ' ე̄სერ ჰა ადუ̄ჟნი, ჯა ლახუ̂ედი მიჩა ლირდე-ლიზგე̄
Line of edition: 34    ხჷნსგა̄მ". ბაპდ ხა̈̄ქუ̂, ერე "მა̄ნკუ̂ი ესერ ჯა ხო̄მბუ̂ი".

Line of edition: 35       ოხუ̂ბინე̄დ აჯად, ჰე̄სა იმე წირ ი ლოც ჩუ ხოჩუ̂მინა, ჩუ იმე ხოჯგრა,
Line of edition: 36    ჲედ ჩუ ჲა̈რ ხოშდღუ̂ა, ალა მა̈გ ქო̄ხო̄მბუ̂ე. ეჩქას ეჯას ჩუ̂ა̈თუ̄ჟდა.
Page of edition: 153  Line of edition: 1    მე̄რუ̂ა ლადეღ რჷდინ ქა̄დ ახკიდ. ეჯა ანჷგა̈̄ნ ი ესღრი ლაგუ̂ნუშ
Line of edition: 2    ა̈გითე.

Line of edition: 3       ეჩქა ხოხუ̂რა მუხუ̂ბე̄მ ლა̈̄ქუ̂, ერე "ჲაღო ესერ, ჯ' ა̄დინე გურო̄ლს
Line of edition: 4    ლაჰო̈დთე". ჟ'ა̈ნკიდ ამნემ ი ესღუ̂ა. ამჩუ ალ ბაპჷდ აჴნი.
Line of edition: 5       -- ხოჩაუ̂ ლადეღ ჯა̄რ ბაპს!
Line of edition: 6       -- ხოჩა მე̄რა, ქა ლახ ლა̈მწო̄ლა.
Line of edition: 7       -- ქა ლაწეჲდ მა̈ჲ მიჟიბ მი: ეჯკა̈ლიბ ლეჰუ̂დი მუღუ̂', ე̄რე ეჯას
Line of edition: 8    ნა̈ბოზდ ქა დომ ოჰუ̂დინე, ეჩურ მა̄მ მეყა.
Line of edition: 9       -- ეჩი̄ ღედ ნომა ჯა̄რ, ეჯას სურუთეჲ ეზა̈რდ აჯჰოდნი.

Line of edition: 10       ლა̈დი ბაპს ხომურჯუ̂ი. ნა̈ბოზს აჩა̈დ ბაპა̈ ქორთე. ხა̈̄ქუდ ბაპდ,
Line of edition: 11    ერე -- ჰარა̈კ-ჰურა̈კ ესერუ ახა̄დხ. -- ეზერ ესერ. ჲაღო ესერ, მა̈̄ნკუ̂ი
Line of edition: 12    ჯა ხო̄მბუ̂ი, -- ხა̈̄ქუ̂ ჭყინტდ: -- ჩუ ესერ ე მოშ ადუ̄ჟნას, მიჯნემუ ლახუ̂ე̄მ
Line of edition: 13    მიჩა ლირდე-ლიზგე̄ ხჷნსგა ი ძუჰე̄რა ი რჷდინი; ჰე ესერ დოშ
Line of edition: 14    ადუ̄ჟნი, ეჩქას ჯ' ე̄სერ ლაჰუ̂ედნე უ̂ოქუ̂რა̈ გურნას. -- ეზერ. -- ბაპ თანახმას
Line of edition: 15    ანჴა̈დ.

Line of edition: 16       ოხო̄მბუ̂ე ათხე ალ ჭყინტდ: -- მინს ესერ აშხუ̂ ჩიქქა ეჯთა̄ნ ლიზგე
Line of edition: 17    ხა̄რახ, ერე ფუ̈რი ჯუ̂ეგ ლახუ̂ს ხარდე̄ნახ, ლჷჯე ესერ ლახუ̂ხა̈ნ სუ̂ა̈დშუ̂
Line of edition: 18    ხა̄რახ ლჷკუ̂ა̈რ ყო̄რთეჟი̄ნ. ჩი̄ს ესერ ეჯა ესღუ̂ე̄ნა. აშხუნღო ესერ
Line of edition: 19    ჩუ̂ალწიჰე̄ლი. ა̈მჩედხ ესერ ეჩქა, იმშა ტა̈რუ ლა̈სუ̂. ამეჟი̄ნ ესერ ა̈მჴედლიხ
Line of edition: 20    ხოშა ღო̄ღია̈რ. ეჯჲა̈რს ესერ ჩოთწიჰახ. ხოშა მუხუ̂ბას ხო̄ქუ̂ა:
Line of edition: 21    "ალას ესერ ბერჟა̈ კა̄დაურ დეშ აქჩეხ". ოხუ̂შკა̄დახ ბერჟა̈ კა̄და. ჰა̈დურდ
Line of edition: 22    დე̄სამა მოშ ხოყრა ეჩას ღო̄ღია̈რდ. მანე̄სგრა მუხუ̂ბას ხო̄ქუ̂ა:
Line of edition: 23    "ჲაღო ესერ, ალსმი კა̄დაუ̂ ა̈ნსყეხ, ეჯ' ე̄სერ სგა̄თკა̈ცნე". ოხუ̂შკა̄დახ
Line of edition: 24    ალსმი კა̄და. ჰა̈დურდ ეჯას დეშ ოთკაცა. ეჩქა მიჩ ხო̄ქუ̂ა, ხოხუ̂რა
Line of edition: 25    მუხუ̂ბას: ჲაღო ესერ, ნაბდი კა̄დაუ̂ ა̈ნსყეხ, იგებს ესერ ე სგე̄სა ათკა̈ცის".
Line of edition: 26    ჟ'ოხუ̂სყახ ნაბდი კა̄და. ეჯგუ̂ა̈ჲდ სგო̄თკაცა, ერე ჰა̈დურდ
Line of edition: 27    მა̈გ ჩოთქაჩახ ღო̄ღია̈რ. ეჩუნღო აჯაღ ქა̄დ ა̈მჴედ ლჷჯე̄მი სარაგ.
Line of edition: 28    ეჩჷნქა თელ სოფელ ნიშგუ̂ეჲ მჷბგერი ლა̈სუ̂.

Line of edition: 29       ოხუ̂ზუ̂ერდ აშხუ̂ჟი̄ნ ფა̈ტუ̂, ესდუ̂ედ ეჯა ტუმარა̈ჲთე. ტუმარა̈ჲს
Line of edition: 30    მა̈გ ქო̄თჩა̈დ. ეჩუნღო ესდუ̂ედ კუ̂იდო̄ლთე. ეჩხა̈ნქა ჰა̈დურდ მა̈გ ქა̄ჩა̈დ.
Line of edition: 31    ეჩქა მი ლა̈მშყა̈დ, ხოხუ̂რა მუხუ̂ბა: "ჲაღო̄ჯ ჴა̈ჩუ̂თე ელდად,
Line of edition: 32    ეჯას-ჷჯ მა̄მა ოთჩედნი!, ესდუ̂ედ ჴა̈ჩუ̂თე ი ეშხუ კაკა̈ლი დე̄სა ოთჩა̈დ.
Line of edition: 33    ხოშა̄მ მუხუ̂ბე̄მ რა̈̄ქუ̂, ერე "ჲაღო ესერ, ალა ჟიუ̂ ახცუ̂ეხ, მინე
Line of edition: 34    ჯჷლჷყს ესერ ხოშა ჲელტუ̂ა̈ჲ ხეჩდა, ეჩას". ოხჴი̄დახ ხოშა ელტუ̂ა̈ჲ,
Line of edition: 35    ოხცუ̂ახ ჟი, შიშდ ჩუ̂ალჯუჭუ̄რე̄ლი. ეჩქას რა̈̄ქუ̂ ნე̄სგა̈̄ მუხუ̂ბე̄მ: "ჲაღო
Line of edition: 36    ესერ, ეჩე ტუ̈ბისგა ხოშა და̈შდუ̂ ა̈რი, ეჩასუ ახცუ̂ეხ, არგებს ესერ
Line of edition: 37    ეჯნემ ქა̄დიას". ოხჴი̄დახ ეჯ და̈შდუ̂, ოხცუ̂ახ ჟი, ჰა̈დურდ დეშ ოთხუ̂ჲა:
Line of edition: 38    შიშტ ჩუ̂ალჯუჭუ̄რე̄ლი. ეჩქა მი რუ̂ე̄ქა, ხოხუ̂რა მუხუ̂ბედ: "ჲაღო,
Page of edition: 154  Line of edition: 1    კუ̂ეცენისგა შყა̈ჟუ̂ ა̈რი. ეჯა ალჴჷდად, არგებს ე ეჯა ქა̄თწინდე̄დს". ანჴიდხ
Line of edition: 2    შყა̈ჟუ̂ ი ახცუ̂ეხ ჟი ლა̄ბა̈რ. ამჟი ქე̄სღუ̂ა მინდო̈რ ლექუ̂ა, ერე
Line of edition: 3    სგა უ̂ედდ ხუ̂ეჰად. ამ დრო̈უ̂ს ახზიგდა ჭიშხ, ჩუ̂ა̈თშია̈̄ნ, ლიკუ̂ჩხი ა̈დბინე.
Line of edition: 4    ეჩქას ქო̄ხთხირდ ჭიშხ. ეჩხა̈ნქა ქა̄ნსკინე ხოშა̄მ და̈შდუ̂დ. ეჯჟი
Line of edition: 5    ქა̈̄დჭომნე მინდო̈რ ლექუ̂ა, ერე ჰაკუ̂დუ̄ლს გარ ხუ̂ეწა̈დდ. შყა̈ჟუ̂ ჟი̄დ
Line of edition: 6    ა̈ნხოჩუ̂ა̈̄ნ, ლა̄ბა̈რ ეზერდ ა̈ნჲე ქორთე".

Line of edition: 7       ალა მა̈გ ქო̄ხო̄მბა̈უ̂. ბაპს ჩუ̂ა̈თუ̄ჟდა. მე̄რუ̂ა ლადეღ მიჩა ლირდე-ლიზგე̄
Line of edition: 8    ხჷნსგა ქო̄ხუ̂აკ. ეჩი̄ ჟიქა̄ნქა ძუჰე̄რა ი რჷდინ უ̂ოქუ̂რა̈შ. ათხე
Line of edition: 9    ემყა ხუ̂ა̈ჲ კუმა̈შ ი ბაპა̈ ლირდე-ლიზგე̄ ხჷნსგა. ამეჩუ̄ნ სგა ლამხუ̂ი̄დდა.
Line of edition: 10    მჷჩა̈̄ჟი. ეჯკა̈ლიბ ჩა̈̄ჟ ხაყა, ერე კინჩხ დეცქა ხუღუ̂ა ჰა̈დურდ. ხუ̂აშგუ̂ემ
Line of edition: 11    ეჯას ჩა̈̄ჟ:
Line of edition: 12       -- ჲაღო̄ჯ, მა̈დილ ჯე̄რა, ჩა̈̄ჟ ლამდია̈̄ნ, ადო ალამა̈გ კუმა̈შს დეშ
Line of edition: 13    ხუ̂იკკუ̂ეუ̂ი ჩა̄ჟურ.
Line of edition: 14       -- ჩა̈̄ჟ იმჟი ლაჯდია̄ნა, ეჩქა მი ლიჩა̈̄ჟი ჩუ მე̄შდნი!
Line of edition: 15       -- ეჩი̄ ღედ ნომა ჯა̄რ: ჰჷნგირს ჩოლკედნედ, ჟ'ელგემნედ ამჩუ ბიკჟი,
Line of edition: 16    მადრა̈ჴს ქა ლაჯუ̂ოდნე, სი ჟი ლა̈ხსგური, მადრა̈ჴს ხატყა̈ცდა̈ს ი
Line of edition: 17    "ა̈ჩუ"ს ხაყლა̈ს! ეჩქა ლიჩა̈̄ჟი მა̄მა ა̈ჯე̄შდჷნი. ღო მი ნა̈ბოზს ჩა̈̄ჟს
Line of edition: 18    ქა̄ჯტიხე, საჩუქუ̂ა̈რს ეჩჷნქა ა̈ჯზიზნე.
Line of edition: 19       -- ჲაღო, ისგუ მორდა̈ბ მა̄რ, ქა ლაჯდია̈̄ნი.

Line of edition: 20       ჟი ლახსგურდა ალა ჩა̈̄ჟს, ესყა კუმა̈შ ჲენასდ. ამეჩუ̄ნ ჩხარა ლახუ̂ბა
Line of edition: 21    აჴნიხ, ჩხარ უღუ̂ა ჴანა̈რ ხაყახ.
Line of edition: 22       -- ატ, დედეს ისგუ̂ეჲ, მა̄მ ხოსგდიდა, ისგუ̂ეჲ ჟიქა̄ნ ხოშა კოჯ
Line of edition: 23    ხეტყცა̈̄ლ? ჰარიქა ქა̈̄თჭო̈მნედ ჩიემ, ბარჯა̈ლ ლოხგედ სგა კოჯს!
Line of edition: 24    ეჩქად მი ჩხარა უღუ̂ა ჴანა̈რს ოთხუ̂ი̄ნე სოტა̈რ ლაქჩათე. სგა̈ჲ, უ̂ოდ
Line of edition: 25    მი დო ონჴუდა სოტა̈რ ი ჴანა̈რ, ეჩქად ბჷგიდ ლოხო̄გა̈ნდ, ადო
Line of edition: 26    ხეძგუ̂ბენი, ეჩქას და̈ბსი ჩუ ჯიდა̄უ̂შეხ ი სგა̈ჲ[ი] ჩუ ჯალწჷნეხ.

Line of edition: 27       ალჲა̈რ სგა ლოხო̄გა̈ნხ კოჯს. ამნემ ლა̈ჲრეკლე ჩხარა უღუ̂ა ჴანა̈რ,
Line of edition: 28    ესყა ი ესღრი ხოჩა გუჟი.

Line of edition: 29       ესღრი, ამეჩუ̄ნ ლჷდჷშნა̈ჲს ლახხუ̂ი̄დ. ალას ხა̈̄ბ ხოჩა დაშნა̈ჲ: მა̈ჲ
Line of edition: 30    ჟი̄კედ, მა̈ჲ სგა იდი. ხა̈̄ქუ̂ინ, ერე
Line of edition: 31       -- ხუ̂ა̈ჲ კუმა̈შ მაყა ი ხოლა ლელჩე მა̄რ ჲარა̈ღურ (\\ ჲარა̈ღულ).
Line of edition: 32    მა̈დილ ჯე̄რა, დაშნა̈ჲ ქა ლამდია̈̄ნ, მჷხა̈რ ამ დრო̈უ̂ს სგა̄ჯტიხე.
Line of edition: 33       -- მი დაშნა̈ჲურ მა̈ჲ მეყა: შიშტ ლიდჷშნა̈ჲ ჩუ მე̄შდნი.
Line of edition: 34       -- ეჩი̄ ღედ ნომა ჯა̄რ: ყა̈̄რი დაშნა̈ჲს ოხუ̂ტა̈̄ბნე, ეჯას ლაჯუ̂ედნე.
Line of edition: 35    მა̈ჲ ჟი ხიკდუნი, მა̈ჲ სგა ხიდუნი, ეჩქას ლიდჷშნა̈ჲ მა̄მა ა̈ჯე̄შდჷნი.

Line of edition: 36       ჟ'ა̈ნკიდ დაშნა̈ჲ, ქა ლახდია̄ნე. ოთო̄გა̈ნ შუკუ̂ს ი ესღრი. ამეჩუ̄ნ
Line of edition: 37    ათა̄სდ თეთრი მჷნგრიშა. ხა̈̄ქუ̂ ამის, ერე

Page of edition: 155 
Line of edition: 1       -- მა̈დილ ჯე̄რა, ეშხუ ფაყუ̂ თეთრ ამა̈შდბ!
Line of edition: 2       -- მი თეთრს დეშ ხუ̂ელი, ეჩქას ანგრიშ შიშტ ჩუ მე̄შდნი.
Line of edition: 3       -- ეჩი̄ ღედ სი ნომ ჯა̄რ (ჟ'ა̈ნხურიე̄ლე ეშხუ ფაყუ̂ ბაჩა̈რ, ჩუ̂ესდე
Line of edition: 4    სგუ̂ებინჩუ): თეთრი მჷქაფ ალას ხინგრიშა̈ს. ეჩქად მი სგა̄ჯტიხე აშხუ̂
Line of edition: 5    ფაყუ̂ თეთრს.

Line of edition: 6       ქა̈̄ხბი̄შდ თეთრს, ესღრი მიჩა ქორთე. სგა̄ჩა̈დ ი მიჩა ლახუ̂ბას
Line of edition: 7    მეუ̂არ ათჩო̄ნხ.

Line of edition: 8       ამ დრო̈უ̂ს ბაპი́ ახჭიმ. ახა̄სდ მჷჩა̈̄ჟის. ალას ჰჷნგირ ჟი ხო̄გ ხოშა̄მ
Line of edition: 9    ბიკდ, ჯა ჟი ხასგურ, ხაყლე "ა̈ჩუ"ს. მადრა̈ჴ სგა მეჴჩე ხა̄რ ბიკი
Line of edition: 10    ნა̈ყირ.
Line of edition: 11       -- იმ ხიჩო სი მა̄რე? -- ლა̈ხჭუ̂ედდა ბაპ.
Line of edition: 12       -- ჰამა იმ ხუ̂იჩო: ამა̄სდ [ეშხუ მა̄რე] ამელექუ̂ა, ხუ̂ა̈ჲ კუმა̈შ ხეყა̈̄დ,
Line of edition: 13    ჩა̈̄ჟ მაშგუ̂მინ ლა̈დია̄ნდ: "შიშტ ესერ სგა მა̈ტხე". სგა დე̄ს' ა̄მტიხ.
Line of edition: 14       -- ჸე, სი მა̄რე, ეჯნემ მიი ამჟი მაყერ: მიშგუ̂ა ლირდე-ლიზგე̄
Line of edition: 15    ხჷნსგა ქა̄მკიდ.

Line of edition: 16       უშხუ̂ა̄რ ლოხჴერდახ ი ანღრიხ. ამეჩუ̄ნ ახა̄სდხ ჩხარა ლახუ̂ბას.
Line of edition: 17    ალჲა̈რ მა̈გ სგა ხო̄გხ ხოშა̄მ კოჯს.
Line of edition: 18       -- იმ ხიჩოდ, სგა̈ჲ მა̄რო̄ლ?
Line of edition: 19       -- ჰამა იმ ხუ̂იჩოდ: ამელექუ̂' ა̄ნა̄სდ, ხუ̂ა̈ჲ ჯო̈გ ხეყა̈̄დ. ეჯნემ
Line of edition: 20    ნა̈̄ქუ̂, ერე "კოჯ ესერ ქა ხეძგუ̂ბენი, ნა̈ჲ ესერ ბარჯა̈ლუ ლოხუ̂გედ,
Line of edition: 21    ჯ' ე̄სერ ჩხარა უღუ̂ას სოტა̈რთე ადიე̄სგნე". ქა̄დჲე ჴანა̈რ, ქა დე̄მხა̈ნ
Line of edition: 22    ანტა̈ხ.
Line of edition: 23       -- ჸოჲტ, სი მა̄რე, ეჯნემ ნა̈ჲი́ ამჟი ა̈ნღორუ̂ე.

Line of edition: 24       ეშხუ მუხუ̂ბე ალჲა̈რხა̈ნქა სგა ლოხჴერდახ. ესჭიმხ ალ ჭყინტს.
Line of edition: 25    ათა̄სდხ მჷდჷშნა̈ჲს. ამეჩუ შჷნ ხუღუ̂ა ყა̈̄რი დაშნა̈ჲ, მა̈ჲ ჟი̄კედ, მა̈ჲ
Line of edition: 26    სგა იდი.
Line of edition: 27       -- იმ ხიჩო, სი მა̄რე, მა̈ჲ ჯა̄რ ყა̈̄რი დაშნა̈ჲ?
Line of edition: 28       -- ჰამა მა̈ჲ მე̄რა სგა̈ჲ მა̄რო̄ლ: ამელექუ̂ა ამა̄სდ, მაშგუ̂მინ დაშნა̈ჲ:
Line of edition: 29    "შიშტ ესერ სგა მა̈ტხე". დე̄მხა̈ნ ა̈მჴიდ.
Line of edition: 30       -- ჸო, სი მა̄რე, ეჯნემ ნა̈ჲ უ̂არესდი ა̈ნღორუ̂ე.

Line of edition: 31       ლოხჴერდახ მა̈გ უშხუ̂ა̈რ ი ესღრიხ. ათა̄სდხ ამეჩუ თეთრი
Line of edition: 32    მჷნგრიშა: ალას შჷნ ხუღუ̂ა ხუ̂ა̈ჲ ბაჩა̈რ, ინგრიშე.
Line of edition: 33       -- იმ ხიჩო, სი მა̄რე?
Line of edition: 34       -- ჰამა იმ ხუ̂იჩმუნი: თეთრ მუღუ̂ა̈̄დ ეშხუ ფაყუ̂, ამა̄სდ ერე̄ ამელექუ̂ა
Line of edition: 35    ი თეთრ ქა̄მღორუ̂ე. ხუ̂ა̈ჲ ხა̈ნ ლი, დე̄მხა̈ნ ა̈მჴიდ. მა̈ჲ მიხა,
Line of edition: 36    მა̈ჲ დო ჩუ̂ემინა?
Line of edition: 37       -- ო, სი მა̄რე, ეჯნემ ნა̈ჲი́ ამჟი ა̈ნღორუ̂ე. ლჷჩედდ მა̈გ, ნოთაუ̂
Line of edition: 38    ა̈ლთხედ იმე!

Page of edition: 156 
Line of edition: 1       ესღრიხ, ესღრიხ, ჟ'აჩა̈დხ ამი̄ ყო̄რთეჟი, სგა ლახტუ̂ი̄ლხ ალას.
Line of edition: 2    ქა̈̄ნსგიდა ალ ჭყინტ, სალა̈მ-ფერა̈ბ ხა̈̄ქუ̂: "მინაუ̂ა̈თ ხუ̂ი მი ისგუ̂ეჲცახა̈ნ,
Line of edition: 3    ეჯღა ერე, მა̈̄ჲ ქა ჯე̄ქა, ეჯა მა̄მა ოთსურილ!" სგო̄თჟოღ ქორთე,
Line of edition: 4    ბა̄ზი ხოჩა პა̈ტიუ̂ცემა ხაყერ: ჩუ̂ადშდჷმა̄ლე, ჩუ̂ადლოთუ̂ა̄ლე. მა̄მა ა̈ნმეჴრეხ,
Line of edition: 5    იმე დო ადყურდახ. ამის ლახუ̂ბა ლუშგურა̄ნე ხაყა: "ბა̄ზი
Line of edition: 6    ალჲა̈რს ჩუ ლოქდენიდ. ეჩჟი მოშ ა̈ლმა̈რგდ, მიშგუ ლახუ̂ბა, ერე ნა̈ჲ
Line of edition: 7    დო̄სამა გუ̂ეყერს. ალჲა̈რ ჩუ̂ალღალტად!"

Line of edition: 8       სკო̄დიდ ჩუ ლუუ̂ჟუნე ლა̈სუ̂ხ, ლა̈ხჭა̈მხ პილხა̈ნისგა, კინჩხა̈რ ჩი̄ს
Line of edition: 9    ქა̄თჭკუ̂ერხ, ჩუ̂ადბჷრჯეხ ქორს თხრილ, სგა̄შიდხ ამხაუ̂თეჲსგა. მა̄მგუ̂ეშ
Line of edition: 10    ა̈ნმეჴრა̈̄ნ ალ მა̄რა̄ლეშ, იმე დო ა̈დკიჰა̈̄ნხ ი იმე მო̄დე.

Line of edition: 11       ალჲა̈რდ ხოჩა ლირდე-ლიზგე ა̈დჴიდხ ი ლჷმზჷრე̄უ̂ ლიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.