TITUS
Svan Prose Texts I (Upper Bal)
Part No. 80
Previous part

Text: 87 
Page of edition: 150 
Line of edition: 14 
87. ხელწიფი ჩი̄ჟე


Line of edition: 15       ლჷმზჷრე̄უ̂ ხიშდ ი ხელწიფ.

Line of edition: 16       ალა ხელწიფ ლი, მომსახუ̂რა ხაყა ხუ̂ა̈ჲ. აშხუ̂ ლადეღ ადჲეხ მე̄რუ̂ა
Line of edition: 17    უ̂ოთა̈ხთე. ამეჩუ̄ნ ასტღუნეხ ი ხო̄ზნა̈ნიხ. ამ დრო̈უ̂ს სგა ლა̈ხბა̄ქა̈̄ნხ.
Line of edition: 18    ალა ადჲეხ ღერთა̈ლდ. ეჩუნღონ ქა̄დ ანტა̈ხ, ხო̄მბუ̂ი მიჩა ხეხუ̂ს:
Line of edition: 19    "ჯ'ე̄სერ ღერთა̈ლს ოთხუ̂ჲახ ლა̈დი. ხო̄ქუ̂ახ ესერ, ერე მინს ესერ
Line of edition: 20    ეშხუ დი̄ნაგეზალ ხორიხ, ეჯ' ე̄სერ ი̄რა ეჩი̄ ხუ̂ხუ̂, ქორს მერდე ზურა̄ლ
Line of edition: 21    ხორი, ეჯა ღანაუ̂ ესერ ლი, ჭყინტს ესერ ათუ̂ე, ბიჭს, ეჩი̄
Line of edition: 22    ხეხუ̂ ესერ ი̄რა". ათხ' ა̄ლა ა̈დსა̈სტკე ხელწიფი ხეხუ̂დ: "ჰამ' ე̄სერ,
Line of edition: 23    ერე მინე გეზალს ქორს მერდე̄მი გეზლა̈ ხეხუ̂დ დო ლახჰო̈დნეხ?
Line of edition: 24    ამი̄ მე̄ქუ̂ი̄სგ ჩუ̂ადწერა̄ლე.

Line of edition: 25       აჩა̈დ ხა̈ნ. ა̈ნმეჴრეხ, ერე გაცხა̈ჲდ ალ ზურა̄ლ ღანაუ̂ ლი. "ათხე
Line of edition: 26    ოხგონუ̂ეხუ მა ალას!" ლახპა̈რუ̂ნეხ ი ათბა̈რჲეხ უ̂აზრა̈ლს ჯუ̂ე̄დია
Line of edition: 27    ცხეკთე ი "ეჩე [ჩუ̄უ̂ ესერ] ადგა̈რხ ეჯკა̈ლიბ ა̈დგილს, ერე მა̄რე დო̄რ
Line of edition: 28    ა̈თლა̈კს!"

Line of edition: 29       ადჲეხ გაცხა̈ჲდ ალჲა̈რდ, სამ ლადღი ლე̄ზნა ადჲეხ, ეჩე ჩუ̂ადგა̈რხ.
Line of edition: 30    ჩუ̂აცუ̂ირხ ლჷდგა̈რ ცხეკისგა. ა̈რ' ამეჩუ ლჷდგა̈რ. ოხჴა̈დ დრო̈უ̂ ბეფშუ̂ს,
Line of edition: 31    ქა̄ნჴა̈დ-ი ზურა̄ლს ისგჷნჟი ნათელ ა̈ხწა̈დ ი ლისუ̂ ოხო̄გა̈ნ
Line of edition: 32    ი იზბი ბეფშუ̂. ისგჷნჩუნ ღუ̂ამლა̈რ ი ჭო̄რა̈ლ იზბიხ. ამ დრო̈უ̂ს ბეფშუ̂
Line of edition: 33    ეჩაუ̂ ანჴა̈დ, ერე ღუ̂ამლა̈რს ტოტშუ̂ ხაუ̂ჩი.

Line of edition: 34       ათხ' ა̈̄რი ეშხუ მეხუ̂ტე მა̄რე, დიდა̈რ ლი, მეთხუ̂ია̈რ ლი, ეჯჟი̄ნ,
Line of edition: 35    ერე ლადეღისგა ნა̈თხუ̂იარ ჩიგარ ახღუ̂ა. აჩა̈დ აშხუ̂ ლადეღ ლა̈თხუ̂იართე.
Line of edition: 36    დე̄სა ადგა̈რ. ატა̈ხ მე̄რუ̂ა ლადეღ, დესა̄დ ადგა̈რ. მე̄უ̂არ ხამბა̈ჟ
Page of edition: 151  Line of edition: 1    ი ხასკუ̂რელ. "ათხ' ე̄სერ ღჷრი, უ̂ოდ ესერ დო ადდაგრი, ეჩქად
Line of edition: 2    ესერ ა̈გითე მა̄მ ტეხნი".

Line of edition: 3       აჩა̈დ ი სამ ლა̈დღი ლე̄ზნა აჩა̈დ. ამჩუ ჟ'ა̈თლაკ ალას. ჟ'ა̈ნკიდ
Line of edition: 4    ბეფშუ̂ ი მე̄უ̂არ ათხი̄დჷნ. ახღუ̂' ა̈̄გითე, სგა̄ნჴიდ ა̈გითე. მე̄უ̂არ ხა̈ხია̈დხ.
Line of edition: 5    ეჩი̄თა̄ნ ამსუ̂ა̄ლდ ხეფსი, ერე ლადეღშუ̂ იცხემ კამინს, ლე̄თშუ̂ --
Line of edition: 6    ჩარექს. ამ დრო̈უ̂ს ანჴა̈დ ხელწიფ მუშგუ̂რიდ, ეზერ ლახბაჟჷნ ალ
Line of edition: 7    ჭყინტ, ლა̈ხჭუ̂ედდა:
Line of edition: 8       -- იშა გეზალ ლი ალ ჭყინტ?
Line of edition: 9       -- ალ' ე̄სერ მიჩა. ამჟი-ამჟი ქო̄ხო̄მბუ̂ე: ჯუ̂ე̄დია ცხეკს ესერ
Line of edition: 10    ახგუ̂ება ალ ბეფშუ̂ ამ-ი-ამ ა̈დგილს. ეჩხაუ̂ ესერ ხო̄ზი სამ ლადღი
Line of edition: 11    ლე̄ზნა.

Line of edition: 12       ათხე ადჭკუ̄რე ხელწიფდ: "ალ' ე̄სერ ეჯა ლი, იმუ̂ა̄ლე!. ხა̈მჲედა
Line of edition: 13    ესერ მა, ჰაუ̂ე მიჩა ხეხუ̂ს ლა̈ირ ოთჴჷდეს ბა̄ზი რიჰდ?" ამნემ იმედ
Line of edition: 14    ხა̈̄ქუ̂: "მა̈ჲ ესერ ი̄რა მიზეზ?" ჩოთირ ხელწიფდ ლა̈ირ, ჟ'ოთგენე
Line of edition: 15    ლა̈ირჟი მიჩა ხეხუ̂ს, ერე "ალ ლა̈ირ ჰალ ჟ'ანჴჷდას, შიშტ ეჯ მინუტისგა
Line of edition: 16    სგაუ̂ ა̈ხჭუ̂ა̄დხ მომსახუ̂რა ალ ჭყინტს ი ლა̈კირთე̄სგა სგაუ̂ ადკუ̂ა̈რხ,
Line of edition: 17    ეჯჟი̄ნ ერე დო იშუ̂ ა̈ნმეჴრე̄ნს, დო ჯიჯუ̂!" სგე̄სდე ალ ჭყინტდ
Line of edition: 18    ალ ლა̈ირ ჯიბთე̄სგა, ანჷ̄გა̈ნ ი აჩა̈დ ხელწიფი ხეხუ̂თე. გუ̂იანდ ოთქა̈ხ ი
Line of edition: 19    ხელწიფი ხეხუ̂ ლუყუ̂ნე ლა̈სუ̂, დეშ ანჲა̈ცხუ̂ნე ჟი, ჩუ̂ადყურდა ბალკონჟი.

Line of edition: 20       ისგლე̄თ ი̄რო̄ლ ი ჩუ̂აუ̂ჟე ალა. ამ დრო̈უ̂ს ესწჷხჷნდა ქა̄მაუ̂ ლი̄ზი
Line of edition: 21    ეჯჲარე გეზალს -- დი̄ნას. ქა̄ნჴა̈დ ი ჟ'ათა̄გა̈ნ ბალკონჟი ჭყინტს. ეჩქას
Line of edition: 22    სგა̄ტა̈ხ ი ლამფა ანტუ̂არე, ქა̄ნჴიდ ჟ'ა̈ნწუ̂ე̄ნე, მე̄უ̂არ ლახლატჷნდა,
Line of edition: 23    ჩუ̂ესგურდა ამი̄ცახა̈ნ ი ჴალა̈რ ქა ლოხდე ი ხეყჰა̈̄ლ. მარე ალა
Line of edition: 24    მე̄უ̂არ იუ̂ჟე ი დე̄მის იბჟენი. ამ დრო̈უ̂ს ოხწუ̂ე̄ნე ჯიბა̈რ, ა̈ხგუ̂ა̈ბ ამეისგა
Line of edition: 25    მიჩა მუე̄ ლა̈ირ. ჟ'ა̈ნკიდ ალა ი ჩუ̂ადტყჷცჷ̄რე, ა̈დჭოდა̄ნე ქა.
Line of edition: 26    ამეჟი ხა̄გ ალ ჭყინტი ღალა̈ტ. სგა̄დჲე ალა ი ჩუ̂ა̈შიხ ბუხუ̂არისგა.
Line of edition: 27    ჩუ̂ესგურდა სტოლჟი, ჩუ̂ა̈ირ ლა̈ირ, ამჟი̄ნ ერე უ̂ითამ მიჩა მუე̄ ნა̈ირ
Line of edition: 28    [ლი]: "ჲაღო, ჰამს ჰალ ჩუ̂ა̈დრჷჰე̄ნს, შიშტ მიჩა სა̈ხჷლწიფისგა მა̈̄ჲ
Line of edition: 29    ხა̈ლხ ჩუ̂არდე̄დს, ალა [ესერუ] ჩუ̂ა̈დნა̈ზუ̂რეხ, ჲეშდჲარუ̂ ბაპშუ̂ ჩ[უ̄]უ̂ ადგურგუ̂ნეხ
Line of edition: 30    ი ხოჩა ქუ̂ერწილუ აჩუ̂მინხ".

Line of edition: 31       ჩუ̂ა̈დრჷჰა̈̄ნ ი ქა ლახუ̂ე̄მ ალ ჭყინტდ ხელწიფი ხეხუ̂ს ალ ლა̈ირ.
Line of edition: 32    ა̈დჭოდა̄ნე ხელწიფი ხეხუ̂დ: მე̄უ̂არ ათსაკუ̂რა̈ლჷნ, მარე ხელწიფი
Line of edition: 33    ლი̄ქუ̂ს დეშ აჟუ̂მე. ჩუ̂ა̈დზუ̂ერ მა̈გ ი ჲეშდჲერუ ბაპ ანჴიდ, ჩუ̂ადგურგუ̂ნე,
Line of edition: 34    ხოჩა ქუ̂ერწილ აჩუ̂მინ.

Line of edition: 35       ამ დრო̈უ̂ს ხელწიფი ანჴა̈დ, მიჩა ხეხუ̂ ქა ლა̈ხზაზ ჭიშგა̈რთექა.
Line of edition: 36       -- მა̈ჲ ამბა̈უ̂ ესერ ლჷმა̈̄რ, ერე მინე დი̄ნაგეზალ ამჟი უცნობელ
Line of edition: 37    ჭყინტდ დო ლოხოდა? გუ̂ა̈რიშუ̂ილობ ესერ მა̄დ ხოხა.
Line of edition: 38       -- ჰამ' ე̄სერ?! -- ხელწიფდ ხა̈̄ქუ̂.

Page of edition: 152 
Line of edition: 1       -- ჰამ' ე̄სერ-ი ამჟი-ამჟი: ლა̈ირ ესერ ოხუ̂ი́რა მიჩ მიჩა̈შდ. სერ
Line of edition: 2    ესერ მიჩ დეშ ოხჟომა მიჩა ლი̄ქუ̂ ი ჩუ̂ ესერ ოთგურგუ̂ნა ი ქუ̂ერწილ
Line of edition: 3    ესერი́ ჩოთჩუ̂ემნა. სერ მა̄მა ხა̄დხ ლაჩუ̂მა იმშა.

Line of edition: 4       ხოჩა ლირდე-ლიზგე ა̈დჴიდხ ი ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.