TITUS
Svan Prose Texts I (Upper Bal)
Part No. 79
Previous part

Text: 86 
Page of edition: 142 
Line of edition: 5 
86. სემი ლაუ̂დილა


Line of edition: 6       ლა̈სუ̂ ეშხუ მეჩი მა̄რე, სემი დი̄ნა̈̄ლ ხორდა. ხოშხებდახ მინე მუს
Line of edition: 7    კაბს. ეჩქა მინე მუ ლჷცთე ადზჷზეხ. ეჯნემ ლიც ოხჴიდ [ი] სემი
Line of edition: 8    უსგუ̂ა̈რ. ქა ლახუ̂ე̄მ ხოშა̄მ უდილს ლიც, ეჩჷნღო ნე̄სგა̈̄ უდილს, უ̂ეშგიმპილს
Line of edition: 9    ხოხუ̂რა̄მ უდილს ი ალას უ̂ისგუ̂ ოთკუ̂ა̈რ თუ̈ნგთე ი სგა̈̄თჩჷ̄დ
Line of edition: 10    ლიც ლათრაჟი. ხეწა̈დხ ხოშა ლაუ̂დილა ი ლიც ქო̄თღეხ ხოხუ̂რა̄მ
Line of edition: 11    უდილს ი [უ̂ისგუ̂] ჩუ ლალე̄მხ. ეჩქა მინე მუდ თუ̂ით უ̂ისგუ̂ ქა ლახუ̂ე̄მ.
Line of edition: 12    ეჩქა სგა ხაფხეჭხ მინე მუს: "ალ უ̂ისგუ̂ს ესერ ლემბიზდ დო̄მ
Line of edition: 13    ოხჴიდეხ, კაბსი̄ ჩუ ჯიშხიდ ი სი[ი] ჩუ ჯადგა̈რიდ!"

Line of edition: 14       ანჷ̄გა̈̄ნ მინე მუ ი აჩა̈დ ეჯ უ̂ისგუ̂თე. ჩუ̂ადბჷრჯე (ჩუ̂აჩუ̂მინ) ხოშა
Line of edition: 15    (უ̂)ორმო ი ჟიქა̄ნქა ჩხირა̈ლ ათბო̄გე, ეჩეჟი ნაბა̈დ ადჷრშე, ჩუ̂ანსჷსნე
Line of edition: 16    უ̂ისგუ̂ ი ეჩეჟი ჟ'ესდე, მა̈ზუმუ̂ა̈̄ჲ ათსკჷ̄დ ი ეჩქა ა̈გით' ა̄ნჴა̈დ, ხა̈̄ქუ̂
Line of edition: 17    მიჩა გეზლი̄რს: "უ̂ისგუ̂ ესერ ხუ̂ა̈ჲ ოხუ̂ში̄და ი ქაუ̂ ესერ ოთჴერდახ"
Line of edition: 18    ი ქა ლახთო̄ნე უ̂ისგუ̂, იმუ̂ა̈̄ჲ ხორდა ლუხურიე̄ლე. ქა̈̄დჭო̈მნეხ დი̄ნა̈̄ლდ
Line of edition: 19    ი ჟ'ადსკინა̄ლეხ ნაბა̈დთეჟი ი ჩოთძგუ̂ა̈ბხ ი ჩუ̂აშჷ̄დხ უ̂ორმოთე. ალ
Line of edition: 20    ღუ̂ა̈ჟმა̄რე ა̈გით' ა̄ჩა̈დ. ალჲა̈რ, დი̄ნა̈̄ლ, ი̄თა̈̄ლიხ უ̂ისგუ̂ს ი იზბიხ ალას.
Line of edition: 21    ხოხუ̂რა უდილ მიჩა ნა̈̄თის ჩიგარ ჩუ იშხუ̂ნი, ხოშა ლაუ̂დილა ჩუ იზბიხ.
Line of edition: 22    ჩოთშდა̈ხხ ათხე. ლა̈̄ქუ̂ხ ხოშა ლაუ̂დილად: "უშხუ̂ა̄რე ძუ̂ერუ
Line of edition: 23    [ესერ] ლალე̄მხ, ჲესუ̂ა̈̄ჲ მუჭხუ̂ი ლეღუ̂ გუ̂ე̄რა, ეჯას ჩუ ლა̈ლზუ̂ებნედ".
Line of edition: 24    აკუ̂იჰხ ხოშა̄მ უდლა̈ ლეღუ̂, მჷხიმ ლა̈სუ̂, ეჩქა ნე̄სგა̈̄ უდლა̈ ლეღუ̂,
Line of edition: 25    მე̄უ̂არ მუჭხუ̂ი ლა̈სუ̂. ეჩქა ალას ლოხმა̈რჯუ̂ი̄ნეხ ლიზუ̂ებ ი ეჯნემ ატკაზ
Line of edition: 26    ლა̈̄ქუ̂: "მიჩ ესერ ჩუ ხოშხუ̂ნა მიჩა ნა̈̄თი უ̂ისგუ̂ ი ეჩქად ესერ ნომისუ
Line of edition: 27    იზბიხ მიჩა ლეღუ̂ს" ი ქო̄ხჴიდ მიჩა ნა̈̄თი აშხუ̂ ნაგზა ქო̄თჟოღუ̂ნე
Line of edition: 28    ეჯა. ეჩუნღო აჯაღჷდ ლახზჷრზეხ ლიზუ̂ებ ი ეჩქა ლა̈̄ქუ̂ ხოხუ̂რა̄მ
Line of edition: 29    უდილდ: "მიჩ ესერ ნომა ი იშგენ ესერუ მა ა̈ნგონუ̂ეხ: ჩიქე [ესერ]
Line of edition: 30    ლიგუ̂ნი̄უ̂ ა̈დბინეხ ეჯკა̈ლიბ, ერე გიმ-მეგა̈მ მა̈გ იგუ̂ა̈ნდე̄დს, ეჩუნღო
Line of edition: 31    ეჯკა̈ლიბ ლი̄ცუ̂ნა̈̄ლუ ა̈დბინეხ, ერე ჰა̈დურდ მა̈გ ი̄ცუ̂ნა̄ლდე̄დს, უ̂ეშგიმპილს
Line of edition: 32    ესერ ეჯკა̈ლიბ ლიღრა̈̄ლუ ა̈დბინეხ, ერე ქუ̂ეყანაჟი მა̈გ იღრა̄ლდე̄დს
Line of edition: 33    ი ჩი̄ ხესმო̄ლდე̄დს". ი გაცხა̈ჲდ ალას ოთჯჷრუ̂ეხ. მა̈̄ნკუ̂ი
Line of edition: 34    ლიგუ̂ნი ა̈დბინეხ ეჯკა̈ლიბ, ერე გიმ-მეგა̈მს ჩი̄ ქიმ ოხუ̂ე̄ზდა, ეჩუნღო
Line of edition: 35    ლი̄ცუ̂ნა̈̄ლ ა̈დბინეხ ეჯკა̈ლიბ, ერე გიმ-მეგა̈მ ი̄ცუ̂ნა̄ლ, უ̂ეშგიმპილს
Line of edition: 36    ლიღრა̈̄ლ ა̈დბინეხ, ქუ̂ეყანას ხესმო̄ლდა ი ქუ̂ეყანა იღრა̄ლ.

Page of edition: 143 
Line of edition: 1       ალ დრო̈უ̂ჟი კე̄სრი გეზალ-ი მიჩა აფხნეგა̈რ ანღჷდახ ამი ნა̈ფდია ლექუ̂ა
Line of edition: 2    ი ქა ხასჷმდა ლიღრა̈̄ლ ეჩას ი ა̈ხჭა̈მ ჰერს ი ჟ'ა̈თლაკ ალჲა̈რს,
Line of edition: 3    ჟ'ა̈ნი̄ყა̄ლეხ უ̂ორმოხა̈ნჟი ი ლა̈ხჭუ̂ედდა ხოშა̄მ უდილს: -- მიჩ
Line of edition: 4    ესერ მა̈ჲ ხა̈მჲედა? -- მიჩ ესერ მა̈ჲ ხა̈მჲედა-ი́ აშხუ̂ ქათლა̈ წინწილს
Line of edition: 5    ლახ (ჲ)ა̈რ ლამჰო̈დნე, კე̄სა̈რს-ი მიჩა ჯა̈რი-მა̄რა ეჯნოშ ჩუ ხუ̂ახჷრჯე.
Line of edition: 6    -- ალა მე̄უ̂არ ეზერ ლეჲმედე ჯა̈მჲედა.

Line of edition: 7       ეჩქა მე̄რმა ლა̈ხჭუ̂ედდა: -- მიჩ ესერ მა̈ჲ ხა̈მჲედა? -- მი მა̈ჲ მა̈მჲედა
Line of edition: 8    ი აშხუ̂ ბამბი კალს ლახ (ჲ)ა̈რ ლამედნე ( ლამჰო̈დნე), კე̄სა̈რს ი
Line of edition: 9    მიჩა ჯა̈რს ლა̈გნას ი ლაყუ̂რას ჩია̈̄გ ჟი ხუ̂ა̈რქუ̂ი ეჯნოშ". ალაი̄ ეზერდ
Line of edition: 10    ლახბაჟჷნ. უ̂ეშგიმპილს ხოხუ̂რა̄მ უდილს ლა̈ხჭუ̂ედდა: "მიჩ ესერ მა̈ჲ
Line of edition: 11    ხა̈მჲედა?" ეჯნემ ატკაზ ხა̈̄ქუ̂: "მა̄მაგუ̂ეშ ესერ". აჯაღჷდ ხეჭუ̂დია̄ლ:
Line of edition: 12    -- ეში̄ ესერ მა̈ჲ ხა̈მჲედა? -- ჩუ ესერ მა̄მაგუ̂ეშ ხა̈მჲედა. ღერბათხა̈ნქა
Line of edition: 13    ესერ ხუღუ̂ა ეშხუ ჭყინტ, ისგჷნჟი უ̂ოქუ̂რ, ისგჷნჩუბაუ̂ უ̂ერცხლ,
Line of edition: 14    ი მე̄რმე -- დი̄ნა ეჯკა̈ლიბ, მზითუნახა̈უ̂ ირახ ესერ ეჯჲა̈რ ი ალა მუღუ̂ა
Line of edition: 15    ღერბათხა̈ნქა". ეჩქა კე̄სრი გეზალდ ხა̈̄ქუ̂: "ჲაღო, ჯ' ე̄სერ ხაკუ
Line of edition: 16    ხეხუ̂დ" ი სგა ლოხუ̂გუდირდახ უშხუ̂ა̄რ ი ესღრიხ ა̈გითე ლჷხია̈დ ი
Line of edition: 17    ალჲა̈რი სგა ლა̈ჲჴერნეხ მომსახუ̂რად, მიჩა ლაუ̂დილა, ი აჩა̈დხ ა̈გითე.
Line of edition: 18    ა̈გის ქუ̂ერწილ აჩუ̂მინხ ეზა̈რ.

Line of edition: 19       ათხე ალა ჩუ̂ადღანუ̂ე შიშდ ი ჯა ლა̈თხუ̂იართე იმა̄რა̈̄ლ ი მიჩა
Line of edition: 20    მუს აშგუ̂რა̄ნე: "მიჩა ხეხუ̂ს ესერ მა̈̄ჲ ქა ხო̄ქუ̂ა ამკა̈ლიბ ბოფშა̈რ
Line of edition: 21    ჰესა ა̈ხთენე̄ნს, ეჩქ' ე̄სერ მუგუ̂სუ ათბა̈რჲეხ ლა̈ირ მიჩა̈შთე, ამკა̈ლიბ
Line of edition: 22    ჰე დო̄სა, ეჩქა -- ჭუ̂ე̄რს ი ეჯასუ ესერ ათბა̈რჲეხ, მა̈̄ჲ ესერ ამბა̈უ̂ ლესუ̂
Line of edition: 23    ა̈გის, ლჷცხჷრდ სგაუ̂ ოთირ!" ი აჩა̈დ ლა̈თხუ̂იართე.

Line of edition: 24       ი მიჩა ხეხუ̂ს შომუ̂ა̈̄ჲ დრო̈უ̂ ოხჴა̈დ ლიღუ̂ჟა̄ლეშ, ალ დრო̈უ̂ჟინ ჯუა
Line of edition: 25    იზა̄ლ(და) ი ციცუ̂ი იზა̄ლ(და). ეშხუ ჯუა̈̄ ფა̈კუ̂ნა ი მე̄რმე ციცუ̂ი კიტაუ̂
Line of edition: 26    ქა̄ნჴიდხ მიჩა ლაუ̂დილად. ალ ზურა̄ლდი̄ ეშხუ ჭყინტ ანთენე,
Line of edition: 27    ისგჷნჟინ უ̂ოქუ̂რ ი ისგჷნჩუ უ̂ერცხლ, ი მე̄რმე დი̄ნა ამკა̈ლიბ, იმუ̂ა̈̄ჲჟი
Line of edition: 28    მა̈̄ნკუ̂ი ნა̈̄ქუ̂ი̄სგუ̂ ხუღუ̂ა̈̄ნ. ალჲა̈რ ქო̄თქუ̂ითხ მიჩა ლაუ̂დილად ი ფა̈კუ̂ნა
Line of edition: 29    ი კიტაუ̂ სგა ლოხგენეხ. ათხე ალ ზურალა̈̄რდ ხა̈̄ქუ̂ხ ეჩი მიმთილს:
Line of edition: 30    "ალას ესერ-ა, მინე თელღჷრას, ფა̈კუ̂ნა ი კიტაუ̂ ოხთაუ̂ა" ი ანჴა̈დ ალ
Line of edition: 31    მა̄რე, ლა̈ჲრ ადირ ი ჭუ̂ე̄რს ათბა̈რჲე მიჩა გეზალთე. მიჩა გეზალდ
Line of edition: 32    პასუ̈ხ ლახტიხ: "ამბა̈უ̂ გაცხა̈ჲდ ესერ ამჟი ჰე ლი, ეჩქა სამ შუკუ̂
Line of edition: 33    ლაჭარჟი ჩუ̄[უ̂] ესერ ათბეხ მიჩა ხეხუ̂ ი ლეჟა ი ლექუ̂ა მე̄ზი მა̈გუ ხატბჷნა
Line of edition: 34    ი ეშხუ ფაკა̈ნ ლიც ი ეშხუ კუ̂ა̈̄ში ჩიგარ ჩუ̄[უ̂] ესერ ხო̄ზდა (\\ ხო̄ზდა̈ნდა)
Line of edition: 35    სგუ̂ებინჩუ ი ამი ნაკაზანია ალა̄[უ̂] ხაყერხ მიჩა ხეხუ̂ს". ი ალას
Line of edition: 36    გაცხა̈ჲდ ამჟი ხაყერხ: ჩუ̂ათბეხ სამ შუკუ̂ ლაჭარჟი ი ლეჟა-ჲ ლექუ̂ა
Line of edition: 37    მე̄ზი მა̈გ ხატბჷნე ი იშდუ̂ს ხა̈ძგრიხ. ათხე ამი ბოფშა̈რ მიჩა ლაუ̂დილად
Line of edition: 38    ლახმი̄რთე აშიდხ: "ჩუ ესერ ლა̈ჲზუ̂ებნეხ ხამა̈რ". მე̄რმა ლადეღ
Page of edition: 144  Line of edition: 1    ა̈ნწუ̂ე̄ნეხ ლახმი̄რ ი ბოფშა̈რ ნაცხა̈მ ლიხ. "ჲაღო ესერ, მა̈ჲუ ხაყერხ
Line of edition: 2    ი ლამჷნგართე[უ̂] აშიდხ ი ღო ესერ ჴანა̈რ ჩუ̂ადცჷლი̄რნეხ".
Line of edition: 3    მე̄რმა ლადეღ ა̈ნწუ̂ე̄ნეხ ი ბოფშა̈რ ნაცხა̈მ ლიხ. ათხე აჯაღ ლაჩა̄ჟი̄რთე
Line of edition: 4    აშიდხ: "ყუ̂ა̈რუ̂ლა̈რ [ესერ] იშდშუ̂ (\\ უ̂იშდშუ̂) ჩუ̂ადბუჭკუ̄რიხ",
Line of edition: 5    მარე ჭაგა̈რდ ლისუ̂ ხა̄მნეხ ი ყუ̂ა̈რუ̂ლა̈რდ შჷყ ლეჟა ა̈დშდირა̄ლუ̂ნეხ
Line of edition: 6    ი მე̄რმა ლადეღ ეზერ ნაცხა̈მ ლა̈სუ̂ხ. "ჲაღო როქუ̂, მა̈ჲუ ხაყერხ ი
Line of edition: 7    მუთაქა̈̄ ბიდთე[უ̂] ადგენეხ ი ეჩქა ჭალა̈ჲთე[უ̂] ადკუ̂ა̈რხ ი ღუ̂ ესერ
Line of edition: 8    ჩუ̂ა̈დყიმიხ". სგა̄დგენეხ მუთაქა̈̄ ბიდთე-ი ჭალა̈ჲთ' ა̄დკუ̂ა̈რხ. ჭალა̈ჲდ
Line of edition: 9    ლექუ̂' ა̄დჲე ი ამეჩუ მულგუჰე̄რის გოდერ ხო̄გდა ლექუ̂ე̄რი ლჷლჰენჟი

Line of edition: 10       ი ა̈ნწუ̂ე̄ნე ჰამს გოდერ ი ჟ'ა̈ხბა̈გუ̂ გო̈ში (\\ გუ̂ეში). მულგუჰე̄რის ხოხალდა
Line of edition: 11    კალხმა̈რ ი ათხი̄დჷნდა. ქა̈̄ნთირნე ქა̄მენჩუ ი მუთაქა̈̄ ბიდ
Line of edition: 12    ლა̈სუ̂ ლჷშხებ ი ეჩქანღო ჟ'ა̈ნკიდ ი ათყალუ̈̄ნდა, მარე ეში̄ ჩუ̂ატყიც
Line of edition: 13    მუთაქა̈̄ ბიდ ი ქა̈̄ნი̄ყა̄ლე ჲერუ ბოფშა̈რ: ეშხუ ჭყინტ ი მე̄რმე დი̄ნა
Line of edition: 14    ი ათჩო̄ნდა მე̄უ̂არ. ჟი ლა̈ჲჭჷთხე ჲერქჷდა ი ჟ'ადჲე ქორთე ი ხოშაი
Line of edition: 15    მიჩა ხეხუ̂ს ათჩო̄ნდა ალჲარე ლიი ი ჟ'ა̈ნჷრდა̄ლეხ ალჲა̈რ.

Line of edition: 16       ალჲა̈რს ეზერ ბოფშა̈რ ა̈ხფასხ: ეზერ ჭაბუ̈გ ლი ი ეზერ დი̄ნა.
Line of edition: 17    ქუ̂ეყანაჟი ალჲა̈რთა̄ნ და̈̄რ არდა. ჟ' ერ ა̈ნცხე ჭაბუ̈გდ, ეჩქა იშგუ̂მინ
Line of edition: 18    მო̄შ ლიზგა̈̄ლ ი მულგუჰე̄რიდ ნა̈ბ ლახუ̂ე̄მ. მეთხუ̂ია̈რ ლი ეზა̈რ. ლა̈თხუ̂იართე
Line of edition: 19    ლახ ღჷრი, ხოცხა-ი́ ლჷჲარდ ჴიდე ა̈გითე ი ხოცხა-ი́
Line of edition: 20    ლჷდგარდ ჴიდე. იმუ̂ა̈̄ჲ მიჩა მუ ა̈რი ლა̈თხუ̂იარს, ეჩხაუ̂ ღჷრი ი ეჩას
Line of edition: 21    დე̄მის ხა̈მბე, ლჷჲარდ ჴიდე მიჩ' ა̈̄გითე. ლახსაკუ̂რა̈ლჷნ მე̄უ̂არ მიჩა მუს:
Line of edition: 22    "ათხად როქუ̂ და̈̄ს ხოჩუ̂მინა ალა ი დე როქუ̂ ხოწუ̂ა ჲა̈ს, ათხე გარ
Line of edition: 23    ერე ა̈ნთენა̈̄ნ ამკა̈ლიბ ჭაბუ̈გ!" ი მეუ̂არ ხაუ̂შგედ კე̄სრი გეზალს ამჟი
Line of edition: 24    ლინწირ.

Line of edition: 25       შომუ̂ა̈̄ჲ ალა ლა̈თხუ̂იარს ა̈რი, ეჩქა ანჴა̈დხ ამი დაჩუ̂ირთეჲსგა
Line of edition: 26    მინე გიგა̄ლა̈რ ი ეჯჲა̈რდ ჩუ̂აფა̈შუ̂დხ მე̄უ̂არ: "ხიადუ̄ლა̈რ მინ, მა̈ჲ
Line of edition: 27    როქუ̂ ეზერ ლიხ! ჲეშდჲარუ̂ აგუნდი თანა̈ღ ეჩხა̈ნჩუ უ̂ოქუ̂რე უ̂ისგუ̂
Line of edition: 28    ხო̄გხ და̈̄უ̂ა̈რს. ეჩას როქუ̂ ლახ ამაუ̂ ა̈ნჴდედ, ეჩქა ჰა̈დურდ ისგუ̂ეჲთა̄ნ
Line of edition: 29    ჲა̈რ ირდი!" ალას, დი̄ნას, გონა̈ბ ახა̄დ მიჩ ჯჷმლა̈შ ი კი̄ლ ა̈ნკიდ ი
Line of edition: 30    მიჩა გიგა̄ლა̈რს კაჩუშ ნასა̈̄ნ ათფიშუ̂დნე. ათყალუ̈̄ნდახ ეჯჲა̈რს ი
Line of edition: 31    აჩა̈დხ. ალას ქჷმრა̈ლ ოხუ̂შჷ̄დ ი ჰა̈ყბაჟი ქჷთხჷ̄ლა̈რ ახა̄გა̈ნ. ალ
Line of edition: 32    დრო̈უ̂ჟი მიჩა ჯჷმილ ანჴა̈დ ლა̈თხუ̂იარხა̈ნ ი შიშდ გუ̂ი ლახუ̂ე̄მ, ჰა̈ყბაჟი
Line of edition: 33    ნაგუ̂ა̈̄ნუ̂ა̈̄რ ლა̈სუ̂ ი ლა̈ხჭუ̂ედდა: -- მა̈ჲ როქუ̂ ხა̈ყრა? -- მა̄მაგუ̂ეშ
Line of edition: 34    როქუ̂, მიჩა გონა̈ბ ახა̄რა. -- ქაუ̂ როქუ̂ ხა̈̄ქუ̂, ათხად როქუ̂ დე̄სა ხა̈ყრა
Line of edition: 35    ალა! -- ჲაღო როქ, ზურალა̈̄რ ა̈მჴედხ ლა̈დი ი ეჯჲა̈რს როქუ̂ ხო̄ქუ̂ახ:
Line of edition: 36    "ჲეშდჲარუ̂ თანა̈ღ ეჩხა̈ნჩუ უ̂ოქუ̂რა̈ უ̂ისგუ̂ ხო̄გხ და̈̄უ̂ა̈რს, ეჯას
Line of edition: 37    როქ ამაუ̂ ლახ ა̈ნჴდე, ეჩქა როქუ̂ გუშგუ̂ეჲთა̄ნ ჲა̈რ ირდი! -- ეჩხაუ̂

Line of edition: 38       როქუ̂ შიშდ ოდრი ი აშხუ̂ საათისგა ამაუ̂ ა̈ნჴუ̂დე.

Page of edition: 145 
Line of edition: 1       ანჷ̄გა̈ნ ი აჩა̈დ ი აშხუ̂ საათისგა შიშდ ეჩეჩუნ არდა [= ესფადგა̈̄ნ],
Line of edition: 2    ჟ'ა̈ნშგიბ უ̂ისგუ̂ ი ახღუ̂ა. ალ დრო̈უ̂ს ახბა̈ჟ ხოშა̄მ წჷრნი და̈̄უ̂დ:
Line of edition: 3    "(ჲ)ერუ̂ა̈̄ჲ ღენ მიშგუ̂ა უ̂ისგუ̂ი მჷჲე̄სგი ხი, იშუ̂ს-ი́ ჯიჯუ̂ს ჩი̄ ა̈ფთქუ̂ე!"
Line of edition: 4    ამნემ შდიმ მა̄მა ლახდია̄ნე ი და̈̄უ̂ ამეჩუ ანჴა̈დ ფე̄დიას. უ̂ოდემ ჩიქად
Line of edition: 5    ჯა ბოგს ჩუ̂არტყუ̂ეჲდა, ეჩქად ამნემ ეჩჟი ა̈თუ ძალა ქა ხაჴიდ,
Line of edition: 6    ერე აშხუ̂ მინუტისგა შიშდ ჟ'ანტყაბე ი ჩუ აჭკუ̂ერ. ეშხუ ღა̈რ ჯიჯუ̂დ
Line of edition: 7    (\\ ჯიჯუ̂შუ̂) ანგუ̂ეშლე, მე̄რმე -- იშუ̂დ (\\ იშშუ̂ -- ლეღუ̂დ) ი უ̂ისგუ̂ ა̈გით'
Line of edition: 8    ა̄ნჴიდ ი ყო̄რჟი ჩუ̂ათლა̈ჯ. მე̄უ̂არ ათხი̄დჷნ მიჩა დაჩუ̂ირს.

Line of edition: 9       მე̄რმა ლადეღ ჭაბუ̈გ ლა̈თხუ̂იართე აჩა̈დ ი მიჩა გიგა̄ლა̈რ აჯაღ
Line of edition: 10    ანტა̈ხხ. "უ̂ოჲ ხიადუ̄ლა̈რ როქუ̂, სგა̈ჲ უ̂ისგუ̂ როქუ̂ი ამეჩუ ა̈ჯლაჯახ!
Line of edition: 11    ამი̄ცახა̈ნ სა̈რკ როქუ̂ არდა ეჩასი ლახ ამეჩუ ა̈ნჴდედ, ეჩქა ჰა̈დურდ
Line of edition: 12    ისგუ̂ეჲთა̄ნ და̈̄რ ირდი!" ნა̈ბოზს ალჲა̈რ აჩა̈დხ ი მიჩა ჯჷმილ ანჴა̈დ.
Line of edition: 13    ეჩქა მიჩა დაჩუ̂ირდ ხა̈̄ქუ̂: -- ამი̄ცახა̈ნ ესერ სა̈რკ ლჷმჷრდე̄ლი. ეჩას
Line of edition: 14    ესერი ლახ ამეჩუ ა̈ლჴდედ, ეჩქ' ე̄სერ ჰა̈დურდ გუშგუ̂ეჲდ ხოჩა და̈̄რ
Line of edition: 15    ირდი! -- მა̈ჲ ესერ გარჯ ხე̄რა ეჩი ლიჴდე!

Line of edition: 16       ანჷ̄გა̈ნ ი აჩა̈დ ი აშხუ̂ საათისგა ეჩაუ̂ აჩა̈დ ი ჟ'ა̈ნკიდ სა̈რკ. ალ
Line of edition: 17    დრო̈უ̂ს მეშხა და̈̄უ̂დ ახბა̈ჟ ი შიშდ ჰერ ესდე: -- ჲა̈ს ესერ ესღუ̂ა მიჩა
Line of edition: 18    სა̈რკ? -- სი პილწია̈ნ, ჩუ̂აქუც, ადო მეშხა ლადეღს ეჯგენი! -- ჭაბუ̈გდ
Line of edition: 19    ხა̈̄ქუ̂ ალა ი ალ და̈̄უ̂დ ა̈დუ̂ა̈შგდე ი ქა̈̄ხზორ ჭაბუ̈გს, მარე ჭაბუ̈გდ
Line of edition: 20    ჰა̈დურდ მა̄მგუ̂ეშ ათრა̄გუ̂ნე ი ჩუ̂ადგა̈რ-ი́ ჩუ̂აჭკუ̂ერ. ეშხუ ტუ̂იბ ზისხდ
Line of edition: 21    (\\ ზისხშუ̂) ა̈დგუ̂ეშლა̈̄ნ, მე̄რმე -- ჯიჯუ̂დ (\\ ჯიჯუ̂შუ̂), მესმე -- ლეღუ̂დ
Line of edition: 22    (\\ ლეღუ̂შუ̂) ი ა̈გით' ა̄ნჴიდ სა̈რკ, ჩუ̂ესგე ლაჴუ̂რაჟი.

Line of edition: 23       მე̄რმა ლადეღ ჭაბუ̈გ ლა̈თხუ̂იართ' ა̄ჩა̈დ ი მიჩა გიგა̄ლა̈რ ანტა̈ხხჷდ:
Line of edition: 24    "ხიადუ̄ლა̈რ როქუ̂, სგა̈ჲ ალა როქუ̂ი ა̈ჯჴი̄დახ! ათხე როქუ̂ ჰა̈დურდ
Line of edition: 25    და̈̄რ ირა ისგუ̂ეჲთა̄ნ: ათხ'ე̄შხუ დი̄ნა მეფე ქექაუ̂აზ კე̄სა̈რს ხორი
Line of edition: 26    გიმეშ-ი́ დეცე უთა̈ლუ მურყუ̂ამისგა. ეჩას ლახე ხეხუ̂დ ა̈ნჴიდე ისგუ
Line of edition: 27    ჯჷმილ, ეჩქა როქუ̂ ჰა̈დურდ ქუ̂ეყანაჟი ისგუ̂ეჲ ტუ̂ელ ჲა̈რ ირდი ღო!"
Line of edition: 28    ა̈ნკიდჷდ კი̄ლ ამნემ ი მიჩა გიგა̄ლა̈რს კაჩუშ ნასა̈̄ნ ათფიშუ̂დნე ი ადა̄ტუნე
Line of edition: 29    მინე ა̈გითე. ნა̈ბოზს მიჩა ჯჷმილ ანჴა̈დ ი ჟი ლახთირ მიჩა
Line of edition: 30    დაჩუ̂ირს, [ერე] ლჷწხუ̂აუ̂ე ლა̈სუ̂, ი ლა̈ხჭუ̂ედდა: -- იმღა როქუ̂ ლი
Line of edition: 31    ლჷწხუ̂აუ̂ე? -- დე̄მღა როქუ̂, ისგუ გონა̈ბ როქუ̂ ამა̄დ. -- დე̄სა, ქა როქუ̂
Line of edition: 32    მე̄ქა! -- ჲაღო როქუ̂ იმღა-ი́ ჲერუ კახბა ზურალა̈̄რ ანჴა̈დხ ი ეჯჲა̈რდ
Line of edition: 33    მა̈̄ქუ̂ხ, ერე "ქაუ̂ ესერ ა̈თჩი̄ჟა̈ნ. მეფე ქექაუ̂აზ კე̄სრი გეზალ მზითუნახა̈უ̂
Line of edition: 34    როქ ა̈რი გიმეშ ი დეცე უთა̈ლუ მურყუ̂ამისგა, ეჩას ესერ ლახე
Line of edition: 35    ხეხუ̂დ ა̈ხჴიდე, ეჩქა ესერ ჰა̈დურდ გუშგუ̂ეჲთა̄ნ ჲა̈რ ირდი დეც ჩუქუ̂ა̄ნ!
Line of edition: 36    -- ჲაღო, ეჩხაუ̂ ოდრინე, მარე ჩუ და̈̄ს მა ხომჴერა, იმე დო ლი ი
Line of edition: 37    იმე დო. სემი ზა̈ჲ, სემი თუ̂ე, სემი ნაგზი ლახე ქა̄ჩეს ი მ' ა̈გითე
Line of edition: 38    დო̄ს ონტეხ, ეჩქა წჷრნი მეშხად ჩუ̂ათღაფუ̈̄რ გუ̂იშგუ̂ეჲ უ̂ოთა̈ხ ი
Page of edition: 146  Line of edition: 1    გუშგუ̂ეჲ უ̂ისგუ̂ ი სა̈რკ, ი ეჯა ლახე ქა̄ჩეს, ეჩანღო ანღელს მა̄მა ხუ̂ი
Line of edition: 2    ა̈გითე.

Line of edition: 3       ანჷ̄გა̈ნ-ი́ აჩა̈დ. ლა̈ხჴა̈დჷ̄ნ აშხუ̂ საკე̄სართე ი ამეჩუ ლჷცჟი ჩუ სგურ
Line of edition: 4    კე̄სრი გეზალ ი იგუ̂ნი. -- იმღა როქუ̂ ხიგუ̂ნი? -- იმღა-ი́ მი კე̄სრი გეზალ
Line of edition: 5    ხუ̂ი, ალამა̈გ ჯა̈რ სგა ლახშდიხ მიშგუ̂ა მუდ გოლარშუ̂ა̈პს ი ლა̈დი მი
Line of edition: 6    ხუ̂ი ეჩი ლეზუ̂ებ, ადო ეჩურ ლიცს დემ ხა̈მბე. -- ჲაღო ჩუ̂ესგუ ი ნომა
Line of edition: 7    ჯაყლუ̄ნი, ეჩას მი ჩუ ლოხუ̂შიდ.

Line of edition: 8       ჩუ̂ესგურდა ჭაბუ̈გ ი თხუ̂იმ ღულა̈̄რჟი ესდე კე̄სრი გეზალს. ამ
Line of edition: 9    დრო̈უ̂ს ჩუ̂ა̈თუ̄ჟდა. ამჩიქ' ა̄ნღჷრდა გუ̂ელჲა̈რშა̈პ ი დი̄ნად ლიკი̄ლი
Line of edition: 10    ა̈დბინე ი ჟ'ანჲა̈ცხუ̂ნე. ჟი ლა̄პა̈რ ჭაბუ̈გ ი ესდე ხოშა კი̄ლ. გუ̂ელჲა̈რშა̈პ
Line of edition: 11    ციცუ̂დ ესსიპე ი ადჯჷჯგნე ი ხა̈̄ქუ̂ დი̄ნას: -- ლა̈̄რტყუ ესერ
Line of edition: 12    ლახბე ყიაქა ი ჟიუ̂ ა̈დჭე̄ნე მიჩა მუთე". დი̄ნად ხა̈̄ქუ̂: -- მიჩ ესერ ხაყლუ̄ნი
Line of edition: 13    ი დეშ ესერ ხაბემ. -- ნომა როქ ჯაყლუ̄ნი!" ი სგა̄თბე დი̄ნად
Line of edition: 14    ლა̈̄რტყ ციცუ̂ს ყიაქა ი ჟ'ადჲეხ კე̄სა̈რთე. კე̄სა̈რს ხასკუ̂რა̈ლჷნ. ქო̄ხო̄მბუ̂ე
Line of edition: 15    მიჩა გეზალდ ი ეზერდ ლახბაჟჷნ ი ლახჭარჟე მიჩა მჷქაფ კე̄სა̈რდ
Line of edition: 16    ლისგუ̂რე. ეჯა ჭაბუ̈გდ მა̄დ ჩუ̂ემინ. -- ჲაღო როქუ̂, მა̈ჲ ხაკუ?
Line of edition: 17       -- მა̈ჲ-ი́ ამკა̈ლიბ დი̄ნას როქუ̂ ხუ̂ეთხე̄ლი მი ი ეჩი მუთუ̂რი მაწჷხ.
Line of edition: 18    ჰ'ა̈̄ს მა ხემჴერი ეჯ დი̄ნა̈̄შ -- ჲაღო, მი როქუ̂ მა̄მაგუ̂ეშ მიმჴერა ი მჷხა̈რ
Line of edition: 19    როქუ̂ ეშდჲარუ̂ ჴანა̈რს ალძიჰნედ ი ჩი̄ ქა ლა̈წჰინედ. ჰე̄სა მეპე̄რ ჩუ
Line of edition: 20    ირდი ი ჲედე უ̂ო̄შთხუ̂ ჭჷშხშუ̂ მეზელა̈̄ლ, ჲედე ამსუ̂ა̄ლდ ქუ̂ეყანაჟი,
Line of edition: 21    ჩი̄ ქა ლა̈წჰინედ ი ჩი̄ ქა ლა̈ლჭუ̂ედნიდ.

Line of edition: 22       მე̄რმა ლადეღ გაცხა̈ჲდ ჲეშდჲორუ ჴანა̈რ ა̈ძიჰ ი ქუ̂ეყანაჟი ქუ̂ინლჷმგნე
Line of edition: 23    მა̈̄ჲ ჩუ̂არდა, მა̈გ ქა̈̄წჰეხ ი ა̈ხჭა̈მხ აშხუ̂ პილხა̈ნ მე̄რმა პილდ,
Line of edition: 24    ჩი̄ ქა ლა̈ხჭუ̂ედდახ, მარე ალას ჲერუ̂ა̈̄ჲ ხაკუ, ეჯა და̈̄ს ხოცხჷნდახ.
Line of edition: 25    უ̂ეშგიმპილს მუბუ̈რჟი მეჩი ლუყუ̂ჩუ̄რე შდეკრა̈ჲ ანჴა̈დ ი ეჯას ლა̈ხჭუ̂ედდახ.
Line of edition: 26    ჟ'ოხულხინეხ მე̄უ̂არ, ეჩქა შდეკრა̈ჲდ ხა̈̄ქუ̂, [ერე]: "ეჯა როქუ̂
Line of edition: 27    მიჩ ჩუ ხოცჷხ, მარე მიშგუ̂ა დიდ ქა̈̄მკუ̂იშ, ეჩუნღო მა̈გ ა̈მი̄ზინა, მარე
Line of edition: 28    ჩუ ა̈თუ̂მეჩა̈ნ ი ლა̈დი გარ ოღუ̂ერ ამაუ̂, ეჩჟი ჯუ̂ე̄დიას ლი". ეჩქა
Line of edition: 29    ჭაბუ̈გდ ხა̈̄ქუ̂: "სამ ზაუ̂ია̈ ლე̄ზნა სამ საათისგა ღური ი ეჩხაუ̂ გუ̂იანდ
Line of edition: 30    იმნა̈რ ა̈გუ̂ქეხნი? -- ჲაღო, ისგუ̂ა ხაზა̈ინს ხოჩა რა̈შ ხორი, ეჯას ლახ
Line of edition: 31    ლაჯდია̈̄ნი, ეჩქა ხუნკუ̂ი ლჷღრიდ", ი ხაშგუ̂მინ მიჩა ხაზა̈ინს რა̈შ ი
Line of edition: 32    ქა ლახუ̂ე̄მ. ჟ'ანჰჷნგრე, ლახსგურდახ ჭაბუ̈გუ̂-ი́ შდეკრა̈ჲ ჲერქჷდა ი
Line of edition: 33    აჩა̈დხ, აჩა̈დხ ი ადჰეხ მეფე კე̄სა̈რმჷყ. ეჩეჩუნ ძუღუ̂ას ეჩხა̈ნთე მეფე ქექაუ̂აზ
Line of edition: 34    კე̄სა̈რ იზგე ი ამხა̈ნთე მჷშკიდ ი ძუღუ̂ა̈̄ პილჟი გიმეშ ი დეცე უთა̈ლუ̂
Line of edition: 35    მურყუ̂ამ ლჷგ. ჭაბუ̈გ სგა̄ჩა̈დ მჷშკიდთე ი რა̈შ სგა ლახბა̈რჲე ი მიჩა
Line of edition: 36    იარა̈ღ, ჰჷნგირ ი ქა̄ხჭუ̂ედიე̄ლე: -- იმჟი როქუ̂ იჩოხ მეფე ქექაუ̂აზ კე̄სრი გეზლი̄რ?
Line of edition: 37    -- ჰამს როქუ̂ მუგუ̂ა̈რდ ისპიხ ი ჩუ პერნიხ ძუღუ̂ათეჩუ ი ჩუ
Page of edition: 147  Line of edition: 1    ისტღუნა̈̄ლხ ი გუ̂იანდქა როქუ̂ ჟი პერნიხ ი ჟი ღჷრიხ მურყუ̂ამთე.
Line of edition: 2    ეჯას როქუ̂ ოთდარა̈ჯ სი!

Line of edition: 3       მე̄რმა ჰამს ჩოთდარჯე ჭაბუ̈გდ ი ქა̄ნპა̈რხ სემი ნანუ̄ლუ̂ა̈რ ი ძუღუ̂ა̈̄
Line of edition: 4    პილჟი ჩუ̂ა̈დსტუღუ̂ნა̈̄ნხ ი ლერქუ̂ა̈ლ ქახიდ ესდეხ ი ჭაბუ̈გუ̂დ ხოხუ̂რა̄მ
Line of edition: 5    უდილს ლერქუ̂ა̈ლ ქო̄თქუ̂ით ეჩქა. ირქუ̂ა̈̄ლხ ი ხოხუ̂რა̄მ უდილს ლერქუ̂ა̈ლ
Line of edition: 6    მა̄მა ა̈ხგუ̂ა̈ბ ი ხოშა ლაუ̂დილა ჟ'აპა̈რხ მურყუ̂ამთე ი ხოხუ̂რა ჩუ̂ასა̈დ:
Line of edition: 7    "ესუ̂ა̈̄ჲ როქუ̂ მიჩა ლერქუ̂ა̈ლ ოთქუ̂ითა, ქაუ̂ როქუ̂ ლახტიხ,
Line of edition: 8    მა̈̄ჲ როქუ̂ ჰაჯ ხეკუ̂ეს, ეჩას ხა̈ჩო," ი ქა̄ნჴა̈დ ჭაბუ̈გ ი ლერქუ̂ა̈ლ
Line of edition: 9    ქო̄ხჴიდ, მარე ეჯკა̈ლიბდ ქა ლახლატჷნხ უშხუ̂ა̄რე თხუ̂იმ, ერე ჩუ
Line of edition: 10    დეშ იყლუ̄რა̈̄ლხ. "ჲაღო როქუ̂, მიჩ ჯა ხაკუ ხეხუ̂დ". ეჩქა დი̄ნად
Line of edition: 11    ხა̈̄ქუ̂: "მი როქუ̂ი ისგუ̂ანქა ჭა̈შდ და̈̄რ მაკუ ი ხაშგუ̂ემ მიშგუ̂ა ბაბუა̈ჲს,
Line of edition: 12    მეფე კე̄სა̈რს, მიშგუ თხუ̂იმ ი, მა̈̄ჲ ჯა̈̄ქუ̂ას, ეჯა მი ქა̈̄მი̄მბა̈უ̂!" ი ქა̄ჩა̈დ
Line of edition: 13    ჭაბუ̈გ ი ხაშგუ̂მინ მეფე კე̄სა̈რს დი̄ნა. "ჲაღო როქუ̂, ძუღუ̂აისგა
Line of edition: 14    ეჩხა̈ნ-ამხა̈ნ ლაჴუ̂მა̈რს ჩუ [ჰე მოშ] ხჷგემ ი თუ̂ით ზარას ჟი ხოწბინე,
Line of edition: 15    ეჩქა ქა ჯაჰუ̂დი მიშგუ̂ა ნიბა̈̄შინს ხეხუ̂დ". ალა მე̄უ̂არ ძნელ ლახბაჟჷნ
Line of edition: 16    ი ქა̄ჩა̈დ მიჩა ხეხუ̂თე. ეჯნემ პლატუკ ოხქუ̂იჭე მურყუ̂მა̈ შდურქა ი
Line of edition: 17    ჟ'ა̈დი̄ყე: -- მა̈ჲ როქუ̂ ხო̄ქუ̂ა? -- მა̈ჲ-ი́ ძუღუ̂აისგა ეჩხა̈ნ-ამხა̈ნ ლაჴუ̂მა̈რს
Line of edition: 18    ესერ ჰე მოშ ხუგემ ი თუ̂ით ზარას ჟი ხორკინე, ეჩქ' ე̄სერ ქა მაჰუ̂დიხ
Line of edition: 19    ისგუ̂ა თხუმ (\\ თხუ̂იმს). -- ჲაღო ესერ, ნომაუ̂ გონა̈ბ ხა̄რ: ეჯას ესერ
Line of edition: 20    მიჩა პლატუკ იჩო. ჩუ̄უ̂ ადჲე ბა̄ზი ძუღუ̂ათეჩუ ი სგ[ა̄უ̂] ადქუ̂იჭე ძუღუ̂ათე
Line of edition: 21    ი, იმუ̂ა̈̄ჲჟი ხეკუ̂ეს, ეჯა ქაუ̂ ხა̈̄ქუ̂, ეჩქ' ე̄სერ ეჯჟი იჩო.

Line of edition: 22       ქა ლახუ̂ე̄მ პლატუკ ი ჩუ̂ადჲე, სგა̄დქუ̂იჭე ძუღუ̂ათე ი ხა̈̄ქუ̂: "ეჯკა̈ლიბ
Line of edition: 23    ლაჴუ̂მა̈რ ჩუ̂ათჷგ ამეისგა, თუ̂ით ზარა ჟი ლო̄ხორკ, ერე მიზეზ
Line of edition: 24    ნომა ხუღუ̂ე̄ნს!" ალა პლატუკდ ამჟი ჩუ̂ემინ ი ეჩხა̈ნ-ამხა̈ნ ჩუ̂ადზჷნგლაგე
Line of edition: 25    ი კე̄სა̈რს ეზერდ ლახბაჟჷნ.

Line of edition: 26       მე̄რმა ლადეღ ხოჩა̄მ გუჟი ლა̈ხწუ̂ე̄ნა̈̄ნ ჭაბუ̈გ, მარე კე̄სა̈რდ ხა̈̄ქუ̂:
Line of edition: 27    -- ცუ̂იდდ ესერ იხე̄ნა̈̄ლ, ამჷნღო ესერ დე̄მის ხაჰუ̂დი. -- ჲაღო ესერ,
Line of edition: 28    მა̈ჲ ხაკუ? -- ჲაღო ესერ მა̈ჲ-ი́ მეშხა ყუ̂ა̈რილს ა̈ჯჴიდე ლენჭყიდ, ეჯას
Line of edition: 29    ლახ ჩუ̂ა̈მჷნჭყინე, ეჩქა ქა ჯაჰუ̂დი.

Line of edition: 30       ბა̄ზი ხოჩა̄მ გუჟი აჩა̈დ მიჩა ლეხხუ̄რითე. ლა̈ხჭუ̂ედდა: -- მა̈ჲ როქუ̂
Line of edition: 31    ხო̄ქუ̂ა ბა̄ზი? -- მა̈ჲ-ი́ მჷხა̈რ ესერ მეშხა ყუ̂ა̈რილს ლამედნე ლენჭყიდ
Line of edition: 32    ი ეჯას ესერ ე მოშ ჩუ ხუ̂ანჭყი, ეჩქ' ე̄სერ ქა მაჰუ̂დი. -- ო, ათხე
Line of edition: 33    ხოშა გუ̂ეშ ლოხკაცა. მეშხა ყუ̂ა̈რილდ ჯა ისპი ი ჟი კუ̂ეფხნი დეცმჷყ,
Line of edition: 34    თხუ̂იმს (\\ თხუმ) ქა ჯახჯჷნა̈̄უ̂ნე ი ჩუშა̈̄ლიდ უყუმბუ̄ლ ტეხნი ი ეჩქა
Line of edition: 35    ძუღუ̂ათე სგა ჯაკუ̂ა̄ნე ი ჰე დოშ ჯა̈მჲედა ჟი ლიგეჭ, ეჩქა ნო̄მის
Line of edition: 36    ხესგუ̂რი. -- ეჯ' ე̄სერ ჩუ ხა̈მჲედა. -- ჲაღო, ეჯჟი ბერჟა̈ ლოდა̈რ ი
Line of edition: 37    ჰა̈̄ღუ̂ირ ახშკა̄დუ̂ინ მჷშკიდს ი მა̈გ ბერჟა̈შ გარ ჩუ̂ემნ! -- ჩუ̂ადშგურა̄ნე

Page of edition: 148 
Line of edition: 1       მიჩა ხეხუ̂დ ი მე̄რმა ლადეღ ჩუ̂ანჴა̈დ ჭაბუ̈გ ი ყო̄რჟი ლჷბე ესხუ̂ი̄დ
Line of edition: 2    მეშხე ყუ̂ა̈რილ. ამნე̄მ ქა̄ნჴიდ მჷშკიდხა̈ნ მა̈გ მახე ნაშკა̄დუ̂ ბა̈რგ ი
Line of edition: 3    ჟ'ათგე ყუ̂ა̈რილს მიჩა ჰჷნგირ ი ტოტისგა ბერჟა̈ მადრა̈ჴ ლა̄ჲე ი
Line of edition: 4    ჟ'ახსგურდა, ხაჴიდ ი ხაჴიდ მადრა̈ჴ. ანკუ̂ა̈ფხ ჟი ყუ̂ა̈რილ, ესღრი, ესღრი,
Line of edition: 5    ესღრი დეცმჷყ, თხუ̂იმ ჟ'ათხჷჯნა̈̄უ̂ნე, ეჩქა ჩოხჭუ̂ე̄ნ: მა̈ჲ თხუ̂იმს იჩო
Line of edition: 6    ჩუბაუ̂, მა̈ჲ ტა̈ნს, მარე ჭაბუ̈გ ჩუ დეშ ანკუ̂ა̈რ, ძუღუ̂ათე ჯა მა̄დ აშყა̈დ
Line of edition: 7    ი ჩუ̂ესჷ̄გა̈ნ კადა̈რისგა მა̈ფშა̈̄რ. ათხე ხატყცი ჭაბუ̈გ ი ხაზელა̄ლუ̂ნე
Line of edition: 8    გარ, ბა̈̄ჴი ლიცა̈̄დი მა̄მა ხა̈მჲედა ი სგა̄თბა̈რჲე ქორთე ლადგა̈რს
Line of edition: 9    ლჷგნე ჩა̈̄ჟ. ეჩქა ხაშგუ̂მინ: -- ათხ' ე̄სერ ხაჰუ̂დი მო სერ? -- დე̄მ
Line of edition: 10    ესერ. -- ჲაღო ესერ, მა̈ჲ ხაკუ? -- ჰა̈დურდ მა̄მ' ე̄სერ! კელდ (=ეში̄)
Line of edition: 11    ესერ დე̄მ ხაჰუ̂დი.

Line of edition: 12       ანჷ̄გა̈ნ ჭაბუ̈გ ი ჟ'აჩა̈დ მიჩა ლეხხუ̄რითე ი ქა ხა̈̄ქუ̂ ამჟი: -- უ̂არ
Line of edition: 13    ესერ ხო̄ქუ̂ახ მიჩა თხუმეშ (\\ თხუ̂იმიშ). ჲაღო როქუ̂, მა̈ჲუ ჩო̈მინხ?
Line of edition: 14    -- ლაშე̄რ, ეშხუ ჰაყა̈რ ლიც ი ეშხუ ლაცხნი̄რ ლა̄ლჲად-ი́ ალჩედ.

Line of edition: 15       შუნ ლა̄ჲეხ ეშხუ ჰაყა̈რ ლიც ი ლაშე̄რ, ლაცხნი̄რ, ლახსგურდახ
Line of edition: 16    მიჩა რა̈შს, ალჲა̈რ შჷნ ხუღუ̂ახ [ი ესღრიხ]. ჲარუ̂ ლადეღუნღო მეფე
Line of edition: 17    კე̄სა̈რდ ა̈ნბა̈ჟ ალჲარე ლი̄ზი, ა̈ხღუ̂ა̈ჭ უ̂ეშგინ, ხეფდი̄ლა̈̄ლხ ი ეჩქ' ა̄დკუ̂ა̈რხ
Line of edition: 18    უ̂ეშგმაუ̂ ჰაყა̈რ ი ეჯკა̈ლიბ ძუღუ̂ა ჩუ̂ადჷ̄გა̈ნ, [ერე] ამექა კე̄სა̈რ
Line of edition: 19    ქა დეშ ანჴა̈დ ი უ̂ეშგდ ატა̈ხ ი ა̈გის ხორდა უყროუ̂ა ტა̈ხ ი ჟი
Line of edition: 20    ლახსგურდა ალას. ეჩჟი ჲენასდ ქე̄სყა, ერე ფინდიხშა̈ლ ი ძუღუ̂აქა
Line of edition: 21    ქა̄დჲე ი ხეჰა̈̄ლ-ღეთ, ლაჲსინჯუ̂ეხ უ̂ეშგმაუ̂ ი ახღუ̂იჭხ ი ადკუ̂ა̈რხ
Line of edition: 22    ლაცხნი̄რ. ეჯკა̈ლიბ ლეღუ̂მი̄რდ ჩუ̂ესსიპდა, ერე შდუგუ̂ დეშ ხეგუ̂წენი.
Line of edition: 23    ა̈ხუ̂რიჭი ტა̈ხ ი ქა̄შდიხ ალ ლემგემ ი ხეჰა̈̄ლჷდ, ადკუ̂ა̈რხ ალჲა̈რდ
Line of edition: 24    ლაშე̄რ ი ხოშა̄მ კოჯდ ესსიპდა ი ლახა̄გა̈ნხ ალას მეფე ქექაუ̂აზ კე̄სა̈რ
Line of edition: 25    ი მიჩა ტა̈ხ, ა̈ხუ̂რიჭიხ, მარე ქილა̈რ ქა̈̄თყუჩუ̄რა̈̄ნ ი უ̂ეშგდ ესჭუ̂ე̄ნხ.
Line of edition: 26    ალჲა̈რ სგა̄ნჴა̈დხ საკე̄სართეჲსგა ი კე̄სა̈რდ მე̄უ̂არ ა̈დჷლხინე.
Line of edition: 27    ეჯნემ საჩქუ̂ა̈რ ლახუ̂ე̄მ ი ა̈გით' ა̄ნჴა̈დ. სგა ლახა̄გა̈ნ ყო̄რს მიჩა დაჩუ̂ირს
Line of edition: 28    ი მიჩა ხეხუ̂ი შჷნ ხაყა ი ქა მეჩდე ლა̈სუ̂ სემი ზა̈ჲ, სემი თუ̂ე,
Line of edition: 29    სემი ნაგზი ი სემი ლადეღ ი ლაღფია̈რ ლჷმა̄რად ხორდა მიჩა დაჩუ̂ირს
Line of edition: 30    ი ჩუ ლჷღა̈ფ მა̄მა ხა̄დ. ათხი̄დჷნხ მე̄უ̂არ უშხუ̂ა̄რე ლიწედ. ეჩქა
Line of edition: 31    მიჩა ხეხუ̂ ა̈დსგიდა სა̈რკქა ი მინე დის ქა ხეწა̈დ: სამ შუკუ̂ ლაჭარჟი
Line of edition: 32    ჩუ ხა̈̄ბდა ი ეშხუ ფაკა̈ნ ლიც ი ეშხუ კუ̂ა̈̄ში ხორდა სგუ̂ებინჩუ ი
Line of edition: 33    ლეჟა-ი́ ლექუ̂ა მე̄ზი მა̈გ ხატბჷნა ი ეჩქა ხა̈̄ქუ̂ მიჩა ხეხუ̂დ, "ალ' ე̄სერ
Line of edition: 34    მინე დი ლი ი მჷხა̈რ ესერ ეჯჲა̈რს ხემშგუ̂ა̈რხ".

Line of edition: 35       ა̈დრჷჰა̈̄ნ მე̄რმა ჰამს, ანჰჷნგრეხ ჩა̄ჟა̈რ ი აჩა̈დხ. ქა̈̄თლაკხ მინე დის
Line of edition: 36    ი ქა ლა̈ხყაჰა̈̄ნხ ი საჩქუ̂ა̈რი ესცუ̂ირხ ი აჩა̈დხ მინე მუთე, სგა ლა̈ხმუშგუ̂არხ
Line of edition: 37    (\\ სგა ლა̈ხმუშგუ̂რა̈̄ნხ) მინეშს ი ალჲა̈რდ მე̄უ̂არ ა̈დხი̄დეხ, მარე
Line of edition: 38    კე̄სა̈რ ლა̈ხჭუ̂ედდა: -- ჩი̄ ესერ სგა ხოტბჷნა ალ ზურა̄ლდ ი მინ

Page of edition: 149 
Line of edition: 1       ესერ იმნა̈რ ლჷმა̈̄რხ ამჟი, ერე საჩქუ̂ა̈რ დო ლოჰხოდახ? -- ალას ესერ
Line of edition: 2    ამჟი გარ მა̄დ ხაკუჩ, მარე მინს ესერ მამ ხაღუ̂ე̄ნახ". ი ალჲა̈რ სგა
Line of edition: 3    ლახა̄დხ ხა̈რჯი ლამა̄რას ი ჟ'ანმა̄რეხ სა̈დილ. ჩუ̂ესგურდახ ლა̈დიარა̄ლდ,
Line of edition: 4    ეჩქა ლა̈̄ქუ̂ ჭაბუ̈გდ: -- იმნა̈რ ესერ ხა̈̄ბ ალ ზურა̄ლ სამ შუკუ̂
Line of edition: 5    ლაჭარჟი? ალა ხუ̂ა̈ჲ ნა̈ჭირ ი̄რა ი ხოშაი ნა̈ჭირ ნა̈ჲ ხუ̂იშდ.

Line of edition: 6       ეჩქა ლაუ̂ა̈შდ ლა̈̄ქუ̂: -- ნა̈ჲ ლეგჷრგა̈ლი ჩი̄ ხუ̂ა̈ჲ გუღუ̂ა, მარე მჷცხრე
Line of edition: 7    და̈̄რ გუ̂აყა. მიშგუ̂აზუმ ნა̈ჭირ ჰა̈დურდ და̈̄რ ლი. ლუფხუ̂ს ქა მაკუ̂ა̄ნედ
Line of edition: 8    ტალა̈ხთექა ი ქუ̂ეყანა̈̄ ქუ̂ინლჷმგენე ჟი მა̄გ, ეში̄ ხუ̂იცხემ; ეჩქანღო
Line of edition: 9    ნაშდა̈ქშუ̂ ჟი მაჭკუ̂რედ, ეში̄ ხუ̂იცხემ; ეჩქა ქამაკლა̈უ̂იდ, ეჩქაჲ ხუ̂იცხემ;
Line of edition: 10    ღო ქა მაბა̄ბედ, ეჩქაჲ ხუ̂იცხემ; ღო ლექუ̂ე̄რთე მა̈იდ, ქა მაგუ̂ეჰდ,
Line of edition: 11    ეჩქაჲ ხუ̂იცხემ; საფუა̈რთე მა̈გნედ, ქა მანყედ ა̈თუ ლემესგქა,
Line of edition: 12    ეჩქაჲ ხუ̂იცხემ; უ̂ოდე ხოლა ზურა̄ლ ცხა̄რა̈ლს დო მაშდკჷნე, ეჩქად ჩიგარ
Line of edition: 13    ხუ̂იცხემ ი ეჩქა ჩუ მიქუ̂ცენი ლიცხემ.
Line of edition: 14       -- ჲაღო, მი ლა̈̄ქუ̂ნი, -- ჭაბუ̈გუ̂დ ლა̈̄ქუ̂: -- ნა̈ჲ ნიშგუ̂ეჲ დის ქა̈̄ხუ̂თენა̈̄ნდ,
Line of edition: 15    ეჩქა ლახმი̄რთე ანშიდხ. ეჩეისგა ნეზუ̂ა̈რდ ლისუ̂ ნა̄მნეხ,

Line of edition: 16       ტახა̈რდ შჷყჟი ენშდირა̄ლნეხ; ეჩუნღო ლამჷნგართ' ა̄ნშიდხ, ეჩქა ფურა̈ლდ
Line of edition: 17    ლისუ̂ ნა̄მნეხ ი ჴანა̈რდ მუჭუ̂ა̈რჟი ანშდირა̄ლნეხ; ეჩქანღო ლაჩა̄ჟი̄რთ'
Line of edition: 18    ა̄ნშიდხ, ჭაგა̈რდ ლისუ̂ ნა̄მნეხ, ყუ̂ა̈რუ̂ლა̈რდ შჷყჟი ენშდირა̄ლნეხ. ალა
Line of edition: 19    მა̈გ ძიძა̈ჲ ნეყა̈̄დ, ჩი̄ხა̈ნქა ნაცხა̈მ ონჴუ̂ა̈დდ. ეჩჷნღო მუთაქათ' ა̄ნგენეხ,
Line of edition: 20    ღო ჭალა̈ჲთ' ა̄ნკუ̂ა̈რხ; ეჩე მულგუჰე̄რის გოდერ ხო̄გდა ი კალხმარე
Line of edition: 21    მჷქაფდ ნა̈ჲ ა̈თურმა̈̄ნდ ი მულგუჰე̄რიდ ჟ'ა̈ნჷრდა̄ლე. ეჩქა ნა̈ჲ მო̄შ
Line of edition: 22    ლიზგა̈̄ლ ხუ̂იშგუ̂მინდ ი ლითხუ̂ია̈რ ა̈თუ̂ბინ, ღურდას ცხეკთე. მიშგუ
Line of edition: 23    დაჩუ̂ირ ი მიშგუ მჷრდი მულგუჰე̄რი ი მიჩა ხეხუ̂ ნათხუ̂იარემი ლეღუ̂შუ̂
Line of edition: 24    ოთსე̄ლა̈უ̂. ეჩქა ლა̈თხუ̂იარს ხუ̂ეწდენდა̈ს ისგუ̂ა მაჯო̄ნ მა̄რა, მარე
Line of edition: 25    ეჩას ნა̈თხუ̂იარა̈̄ლს დე̄მის ხუ̂ა̈მბა̈ს ი ეჩქა ზურალა̈̄რ ლჷმჴა̈დუ̈ნხ მიშგუ̂ა
Line of edition: 26    დაჩუ̂ირთე, ჲურინ ჲეშდჲარუ̂ აგუნდი თანა̈ღ ეჩხა̈ნჩუ ანზჷზეხ ი აშხუ̂ინ,
Line of edition: 27    ჰა̈დურდ ქუ̂ეყანაჟი ჩუ და̈̄ს ხესმა̈̄ნ, ეჩხაუ̂ ლა̈მთო̄ნეხ ხეხუ̂ ლათხე̄ლთე:
Line of edition: 28    "ღო ესერ ჩუ̂ა̈თდა̈̄უ̂ში იმუ̂ა̄ლე" ი ლადი ამეჩუ ოღუ̂ერ. ათხე იშა
Line of edition: 29    გეზლი̄რ ხუ̂ი̄რად ნა̈ჲ, ეჩას ლოხჰუ̂ედნედ საჩქუ̂ა̈რს.

Line of edition: 30       ეჩქა ჟი ლა̄პა̈რ კე̄სა̈რ ი ესუ̂ქიქნე უ̂ა̈ზრა̈ლს: "ზურა̄ლ ესერ ჟიუ̂
Line of edition: 31    ანფიშუ̂დხ შუკუ̂ისგა ი ქორთე[უ̂] ანჴიდხ!" სგა̄ხჴიდუ̂ნე ქორთე. ლჷჯოშუ̂
Line of edition: 32    ჩუ̂აბრა̈̄ლიხ ი შა̈რი ბამბა̈ჲს სგა ხაჭუ̂ე̄ნიხ ი ხეფრება̈̄ლხ. ათხე მიჩა
Line of edition: 33    გიგა̄ლა̈რს ახტუ̂ი̄ლხ ი ალჲა̈რცახა̈ნ მიჩა ნა̈ჭირ ანა̄მბუ̂ე ალ მინე
Line of edition: 34    უდილდ: -- მინ ესერ ჩიქე მიჩა მუცახა̈ნ დე̄მ ლჷმგუ̂ა̄უ̂ინხ. ეჩუნღო მიჩა
Line of edition: 35    მუს ორმოთე ოთში̄და. ეჯ' ე̄სერ მინე ტა̈რ ხა̄რა. ეჩეისგ' ე̄სერ
Line of edition: 36    უ̂ისგუ̂ს მიჩა ნა̈̄თის ჯა ჩუ ლუმშხუნინ ი მინ ჩუ ლუმზუ̂ებხ. აშხუ̂ ლადეღ
Line of edition: 37    მიჩა̈შდი́ ლიზუ̂ებ ლოხზჷრზახ, მარე მიჩა ნა̈̄თი უ̂ისგუ̂ს ქო̄თქადა.
Line of edition: 38    ეჩანღო კე̄სრი გეზალ ა̈მჴედე̄ლი ი ეჩას ჟ'ოხო̄ყა̄ლა ი მინ ესერ ლჷმფა̈შუ̂დიე̄ლხ,
Page of edition: 150  Line of edition: 1    მა̈̄ჲ ჩუ მო̄მა ხა̈მჲედე̄ნახ, ი მიჩ მა̈̄ჲ ღერბათხა̈ნქა ხოჩა
Line of edition: 2    გეზლი̄რ ხაღუ̂ე̄ნა, ეჯჲა̈რ ქო̄თქუ̂ითახ, ღო მიჩა̈შდ ციცუ̂ ი ფა̈კუ̂ნა
Line of edition: 3    ლოხგე̄ნახ, მიჩა ჭა̈შთე ჭუ̂ე̄რდ ოთბა̈რჲახ ხოლა ლა̈ირ. ეჩანღო ეჩას
Line of edition: 4    ესერ შუკუ̂ისგა ჟ'ოთლაჯა ი ლეჟა-ლექუ̂ა მე̄ზი მა̈გ ლჷმძგა̈̄რინ ი ხატბინნა.
Line of edition: 5    უ̂ოშუ̂ა̈̄ჲდ ლე̄თ-ლადეღ ესერ მიჩ ხა̄რა ეჩეჩუ, უ̂ოშა იშდუ̂ ხა̈ძგრა,
Line of edition: 6    ამშელდ იშდუ̄ ხოყრახ მინეშდი ჩა̄ჟა̈რს. მი სა̈ხ ლამღუ̂ე̄ნე̄ნს,
Line of edition: 7    ეჩქა ჰა̈დურდ ნო̄სამაუ̂ ჯა̈ყრახ!

Line of edition: 8       ანჴიდხ ჲერუ ჲელტუ̂ა̈ჲ ჩა̄ჟა̈რ, ეშხუ აშხუ̂ ლახბეხ, მე̄რმე მე̄რმა
Line of edition: 9    ლახბეხ ი ლამჷჟს ადზჷზეხ ი ლამშგედს ანტა̈ხხ, მარე ალ ზურალა̈̄რს
Line of edition: 10    ჰაგუ̂ა̈ ჯიჯუ̂ა̈რ გარ ხაცუ̂ირხ, სერ მა̄მაგუ̂ეშ.

Line of edition: 11       ალჲა̈რ ლა̈ხიადა̄ლს ლახა̄დხ ი მა̈გ საკე̄სარ ჩუ̂ა̈დზუ̂ერხ, ლახ კე̄სა̈რდ
Line of edition: 12    მიჩა გეზლი̄რდ ჩუ̂ა̈დჯჷრუ̂ე. მე̄უ̂არ ხოჩა ლადეღ ხა̄რხ. ქუ̂ერწილ
Line of edition: 13    აჩუ̂მინხ. კე̄სა̈რდ გეზალ ასგურდა ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.