TITUS
Svan Prose Texts I (Upper Bal)
Part No. 78
Previous part

Text: 85 
Page of edition: 138 
Line of edition: 19 
85. მამა-მურზა


Line of edition: 20       ჲორუ ლა̈მყა̈̄რუ̂ აჩა̈დხ ლათეჲთე. ბოფშა̈რ ჰაკუ̂ა̈ნისგა ხოყუ̂რახ.
Line of edition: 21    ქა̄დჲეხ ამჟი ლათეჲთე. ანჴა̈დ მოუ̂არ სკარხალ ი დი̄ნა̈̄ლ ა̈გითე ანჴა̈დხ,
Line of edition: 22    ჰაკუ̂ნა̈რ ჩუ̂აცუ̂ირხ დაბუ̈სგა. ანჴა̈დ ამელექუ̂ა თხე̄რე: "ლჷკჩეუ̂
Line of edition: 23    ლი მიშგუ ლირდე, მი ჲეშდჲერუ თხე̄რე̄მი ბეგა̈რ მაგა̈დ ი ეჯჲა̈რს
Line of edition: 24    ოთჴიდე ალ ბოფშა̈რს". ადჲე ჯუ̂ე̄დიათე, ჩუ̂ესგე იცხ ჩუქუ̂ა̄ნ ი ჯ' ა̄ჩა̈დ
Line of edition: 25    თხე̄რა̄ლე ლა̈ჴდათე. ანჲა̈ცხ დიუ̂ო̄ლ, მე̄რმეჲ ჟ'ანჲა̈ცხუ̂ნე: "ესგჷ̄ნცა̈̄ლ,
Line of edition: 26    ჭყინტჷ̄ლდ, ნო̄თაუ̂ ჟ'ა̈ხფუშუ̂დი̄რ!" ლა̈ჲძგუ̄მბა̄ლე ჭყინტჷ̄ლდდ, ჟ'ა̈ნფუშდუ̄რე.
Line of edition: 27    ჟ'ანჷ̄გა̈̄ნ, მიჩა დაჩუ̂ირ ჟ'ა̈ნგენე. ჭყინტჷ̄ლდს ხა̈̄ქუ̂ მიჩა დაჩუ̂ირდ: -- სი
Line of edition: 28    მა̈ჲ ჯი̄რი ლათხუმრა̈̄შ? -- მი ჭიშდუ̂რულ.

Line of edition: 29       ეჩქა ხა̈̄ქუ̂ინ ჭყინტჷ̄ლდდ მიჩა დაჩუ̂ირს: -- სი მა̈ჲ ჯი̄რი? -- მი მი̄რი
Line of edition: 30    თჷრქდი̄ლ.

Line of edition: 31       ჟ'ესჭკურუ̄ლეხ თჷრქდი̄ლშუ̂ სახლა̈თილა̈რ, ჰაკუ̂ნა̈რ გურნალშუ̂ ჟ'ანგუ̂ეშლეხ.
Line of edition: 32    მინ ჟ'აჩა̈დხ იცხთეჟი. ანჴა̈დხ თხე̄რა̈̄ლ ჲეშდჲორუ, ახურგუ̂ი̄ნეხ
Line of edition: 33    გურნა̈ლს: "ალ თხე̄რად ნა̈ჲ ჩუ̂ა̈გუ̂ღორუ̂ე, ხოლა̄მდ ალჴჷდად!"
Line of edition: 34    ეჯჟი აჴიდხ, ერე ფა̈თუ̂ დე̄სა ლახცუ̂ირხ. ჩუ̂ადკუ̂ა̈რხ ამჟი იცხ ჩუქუ̂ა̄ნ.
Line of edition: 35    ალჲა̈რ, ჯჷმილ-დაჩუ̂ირ, იზბიხ ჭიშდუ̂რულს, უშხუ̂ა̄რ ხაყლეხ: "მა̈დილ
Line of edition: 36    ჯე̄რა, ჩუ ნო̄სა ა̈გუ̂შყეს ამი̄ მერსუ̂ილდ, ადო თხე̄რა ხოჲხენი, ეჩქა
Line of edition: 37    ჟი̄სე̄ლუ̂ი!" დი̄ნას ჩოთშყა̈დ უნბილდ მერსუ̂ილდ, თხე̄რას ხოჲა̈ხ ლესგჟი
Page of edition: 139  Line of edition: 1    ი ფა̈თუ̂ ქო̄ხჴა̈დ. თხე̄რად ხა̈̄ქუ̂ინ: "მა̈დილ ჯე̄რახ, ჲერუ̂ა̈̄ჲ ღენ
Line of edition: 2    ხა̈რიდ ჟიქა̄ნ, ეშხუ̂ი̄ლ აჯაღ ჩუ̄დ ა̈მკუ̂ა̈რდ!" ჩუ̄დ ოხკუ̂ა̈რხ ეშხუ̂ი̄ლ.
Line of edition: 3    ათხე ჰა̈დურდ ჟ'ა̈ნჴოჩუ̂ა̈̄ნ თხე̄რე. ათხე ხა̈̄ქუ̂ინ ჯჷმილ-დაჩუ̂ირს: -- ჩუ̂ანჴა̈დდ
Line of edition: 4    ათხე, მა̈̄ჲ ჰაჯ ჯეკუ̂ეხ, ეჯა მა̈̄ქუ̂ინდ ი ეჯას ჯა̈ჩო! -- ჩუ ღალ ნა̈ჲ
Line of edition: 5    დეშ ჯემუნდიდ, ადო ეჩქას ჩუ ნიზბი. -- ნო̄მა ჯაყლუ̄ნიხ, დე̄სა იმის ჯა̈ჩო.

Line of edition: 6       ჩუ̂ანჴა̈დხ ჭყინტ ი დი̄ნა, თხე̄რად ხა̈̄ქუ̂ინ: "ჟი ლამსგურდად შიყჟი,
Line of edition: 7    აჯი̄ნე, იმთუ̂ა̈̄ჲთე ჯეკუ̂დიხ!" ჟი ლახსგურდახ ჯჷმილ-დაჩუ̂ირ, ადჲე
Line of edition: 8    ხოჩა̄მ მინდუ̂ერთეჲსგა, ხა̈̄ქუ̂ინ თხე̄რად: -- ამეჩუ̄ნ ჯაკუხ მო ლიზგა̈̄ლ?
Line of edition: 9    -- ამეჩუ̄ნ სოფლი ნა̈ფდია მა̄მა ლი. იმუ̂ა̈̄ჲ სოფლი ნა̈ფდია ი̄რა, ეჩეჩუ̄ნ
Line of edition: 10    ხუ̂იზგა̈̄ლდ.

Line of edition: 11       აჩა̈დ აჯაღ ჯუ̂ე̄დიათე. ხოჩა მინდუ̂ერ ლი კე̄სრი სგუ̂ებინ. -- ამეჩუ̄ნ
Line of edition: 12    ჯაკუხ მო ლიზგა̈̄ლ? -- ამეჩუ̄ნ ადუ.

Line of edition: 13       თხე̄რა ხუღუ̂ა ლაშე̄რილ, ესკაჩე ლაშე̄რ, ხოჩა ლუმურყუ̂ა̈მ ქორ
Line of edition: 14    ადგე -- ხოჩა ლარდა. ჯჷმილ-დაჩუ̂ირ ჟ'ანპრისდე თხე̄რად: ჯჷმილს ათჟა̈ხ
Line of edition: 15    მამა-მურზა, დაჩუ̂ირს ათჟა̈ხ დედე-დედფა̈ლ. ადმა̈ზრე თხე̄რად,
Line of edition: 16    აჩა̈დ ეჯჟი. ჯჷმილს ა̈ხფას მეთხუ̂ია̈რ. ა̈ნსგიდახ მე̄რმა ლადეღ კე̄სრი
Line of edition: 17    უ̂ა̈ზრა̈ლ, სგა̄ტა̈ხხ ი ხა̈̄ქუ̂ინხ კე̄სა̈რს: "საბრა, მა̈ჲკა̈ლი ლუმურყუ̂ა̈მ
Line of edition: 18    ქორ ერე̄ს ოთგა გუშგუ̂ე ქა̄მენ!" ალას კე̄სა̈რ ჩუ დე̄მა იჯრა̈უ̂და,
Line of edition: 19    უ̂ოდ ეჯა ქა დო ა̈ნსგიდა. ეზა̈რდ ლახბაჟჷნ მიჩა ქა̄მენ ქორა̈ ლიგემ.
Line of edition: 20    აჩა̈დ ლა̈თხუ̂იართე მამა-მურზა. ალა ერ ლა̈თხუ̂იარს არდა, ანჴა̈დ
Line of edition: 21    კე̄სა̈რ დედე-დედფა̈ლთე, მეუ̂არ ლახლატჷნხ უშხუ̂ა̄რე თხუ̂იმ. მამა-მურზას
Line of edition: 22    ერ ნა̈ბოზს ა̈გითე ლიჴდა̈̄ლ ხა̄დ, ეჩქა გარ იყლუ̄რა̄ლხ კე̄სა̈რ ი
Line of edition: 23    დედე-დედფა̈ლ. მამა-მურზა ერ ა̈გით' ა̄ნჴა̈დ, ეჩქა დედე-დედფა̈ლდ
Line of edition: 24    თხუ̂იმ ლეგდ ა̈დჷრდუნე. -- მა̈ჲ როქ ი̄რა ამი̄ მაშედ? -- კე̄სა̈რდ როქ
Line of edition: 25    მა̈̄ქუ̂ინ, ერე ფა̈რშმა̈გი წინწილ როქ მა̄რ ხოჩა.

Line of edition: 26       აჩა̈დ ეჯა, მამა-მურზა, ეშხუ გუდრა ფა̈ტუ̂ ლა̄ე. ეჯა წირს არდა,
Line of edition: 27    ფა̈რშმა̈გ. ხა̈იდჷნდახ წინწლა̈რს. ეშხუ გუდრა ფა̈ტუ̂ ოთშიდ ი ჩუ
Line of edition: 28    ლალე̄მხ. მამა-მურზა ჩუ̂ა̈თპა̈ჟ. ანჴა̈დ ფა̈რშმა̈გ ი ხა̈̄ქუ̂ინ მიჩა გეზლი̄რს:
Line of edition: 29    მა̈̄ჲ დო̄ს ჯა̄რახ, დე̄ს მირ ხიგუ̂ნიდ! -- საბრა დედე, ეჯკა̈ლიბ
Line of edition: 30    მა̈დლიერ მირ ანჴა̈დ, ერე ეშხუ გუდრა ფა̈ტუ̂ ენშიდ". ეჩქა ხა̈̄ქუ̂ინ
Line of edition: 31    ფა̈რშმა̈გდ: "მა̈ჲღენუ̂ა̈̄ჲ ხა̈რი ამკა̈ლი ამეჩუ̄ნ, მა̈̄ჲ ჰაჯ ჯეკუ̂ეს, ეჯა
Line of edition: 32    მე̄ქარ, ეჯას ჯა̈ჩო!" ქა̄ნჴა̈დ ეჩქა მამა-მურზა, ხაშგუ̂მინ ეშხუ მადრე̄ნე
Line of edition: 33    წინწლიდ: "წჷ̄ლ ესერ ნო̄საუ̂ ახკიდუ̂ნე, ადო ესერ ეჩქა ჩუ̂ადა̄უ̂შე
Line of edition: 34    ი მა̄მა ხაჰუ̂დი". ამნემ ჟ'ა̈ნკიდ წინწილ, სგე̄სდე გუდრათე, წჷ̄ლ
Line of edition: 35    დე̄სა ახკიდუ̂ნე. ანღრი ლაჭმუშ ა̈გითე. სგა ლა̈ჰი̄დ უ̂ეშგინისგა ფა̈რშმა̈გ,
Line of edition: 36    ღალე ლოხკიჩ: "ისგუ̂ა მაწჷხ ლადეღ ალა ათქუთინ ი მაშედ
Line of edition: 37    ჯე̄რი მი!" ა̈გით' ა̄ნჴა̈დ მამა-მურზა, ეზა̈რდ ხებჟა̈̄ნხ, ერ მო̄მ ა̈დდა̄უ̂შა̈̄ნ.
Line of edition: 38    ხარშოდ ოხუ̂სყე ფა̈რშმა̈გი წინწილ. აჩა̈დ აჯაღ მე̄რმა ლადეღ
Page of edition: 140  Line of edition: 1    ლა̈თხუ̂იართე მამა-მურზა: -- ათხ' ე̄სერ მა̈ჲუ ოხუ̂გონუ̂ეხ? -- ათხ' ე̄სერ
Line of edition: 2    უ̂ა̈რილ ხა̈მთეუ̂ ადზჷზეხ: ნო̄თაუ̂ ეჩ' ე̄ში̄ ჩუ̂ა̈დდა̄უ̂შა̈̄ნ.

Line of edition: 3       აჩა̈დ უ̂ა̈რილ ხა̈მთე, ეშხუ გუდრა როგუ̂ ლა̄ჲე ი ეჯა ქა̈̄მ არდა
Line of edition: 4    ი ჩოთშიდ გოჭა̈რს: მეუ̂არ ხა̈იდჷნდახ. ჩუ̂ა̈თპა̈ჟ მამა-მურზა. სგა̄ჩა̈დ
Line of edition: 5    ქორთე უ̂ა̈რილ ხა̈მ, ხა̈̄ქუ̂ინ მიჩა გეზლი̄რს: -- მა̈̄ჲ დო̄ს ჯა̄რახ, მა̄მა
Line of edition: 6    მირ ჯა̈იდხ! -- ანჴა̈დ ესერ ეჯჟინ მა̈დლიერ, ერე ეშხუ გუდრა ლეზუ̂ებ
Line of edition: 7    ენშიდ, ჟ'ესუ̂ბიზა̈̄ნდ ეჯას". ხა̈̄ქუ̂ინ ეჩქა უ̂ა̈რილ ხა̈მდ: "მა̈ჲღენუ̂ა̈ჲ ამკა̈ლიბ
Line of edition: 8    ფუსდ ხა̈რი, მა̈̄ჲ ჰაჯ ჯეკუ̂ეს, ეჯა მაშგუ̂ემნ ი ეჯას
Line of edition: 9    ჯაჰუ̂დი!" ქა̄ნჴა̈დ ეჩქა მამა-მურზა, ხაშგუ̂მინ მიჩა მადრე̄ნე გეზალ:
Line of edition: 10    -- მიშგუ დაჩუ̂ირ ლეგდ ა̈რი, ისგუ̂ა გეზალთე ა̈მთო̄ნეხ: "ალა ესერ
Line of edition: 11    ხოჩა ხა̄რ". -- ჭყჷ̄ლ ესერ ნო̄საუ̂ ახკიდუ̂ნე, ადო ესერ მა̄მა ხაჰუ̂დი.

Line of edition: 12       ჟ'ა̈ნკიდ გუ̂ეჭ ი ჭყჷ̄ლ დე̄სა ახკიდუ̂ნე, სგე̄სდე გუდრათე, ახღუ̂ა
Line of edition: 13    ამჟი ა̈გითე. უ̂ეშგინ ახღუ̂იჭ უ̂ა̈რილ ხა̈მ: "ჟ'ა̈მღე̄ლა̈უ̂, მამა-მურზა,
Line of edition: 14    მაჭკჷ̄რა მირ ეშხუ ამბა̈უ̂, -- სგა ლა̈ჰი̄დ უ̂ა̈რილ ხა̈მ, ქა ლოხკიჩ ეშხუ
Line of edition: 15    ფა̈თუ̂: -- ისგუ̂ა მაწჷხ ლადეღჟინ ი გაჭირუ̂ებაჟი ალა ათქუთინ, ღო
Line of edition: 16    ლა̈ჯშედნი იმუ̂ა̄ლა". ადჲე ამნემ გუ̂ეჭ, ჟ'ოხო̄ზნანე, ჩუ ხა̄მნე მიჩა
Line of edition: 17    დაჩუ̂ირს: "ათხე ესერ მა̄მა ა̈რია ხოჩილდ?"

Line of edition: 18       აჩა̈დ აჯაღ მე̄რმა ლადეღ ლა̈თხუ̂იართე მამა-მურზა. ანჴა̈დ კე̄სა̈რ,
Line of edition: 19    აჯაღ ხა̈̄ქუ̂ინ დედე-დედფა̈ლს: -- ჲაღო ესერ, მა̈ჲუ ოხგონუ̂ეხ? -- ლა̈ჩუ̂ფუ̈რი
Line of edition: 20    ლჷჯე̄მი ლიჴდე. ეჩე ესერ ეში̄ ნო̄თაუ̂ ე ჩუ̂ა̈დდა̄უ̂შა̈̄ნ!" ანჴა̈დ ა̈გითე
Line of edition: 21    მამა-მურზა, ხა̈̄ქუ̂ინ ეჩქა მიჩა დაჩუ̂ირდ: -- მიშგუ ჯჷმილ, მი ეჯა როქ
Line of edition: 22    მაჴჩუ̂ეუ̂ი [ე], ფუ̈რ ლა̈ჩუ̂ა̈ ლჷჯე. -- ჲაღო, ეჯას ა̈გით' ა̈̄ჯჴიდე.

Line of edition: 23       აჩა̈დ ეჩხაუ̂, ეშხუ გუდრა ჯიმ ლა̈ჲყედნე, მე̄რმე ულტუ̂ა ხაბნა̈̄
Line of edition: 24    გუ̂ა̈რე. აჩა̈დ ამჟინ ლა̈ჩუ̂-ფუ̈რთე, ჟა̈თლაკ ამი̄ ლეთრა ლიცს, ჟ'ათლა̈ჯ
Line of edition: 25    ულტუ̂ა ხაბნა̈̄ გუ̂ა̈რე, ეშხუ გუდრა ჯიმ ათშიდ. ალა ჯუ̂ე̄დიას
Line of edition: 26    ა̈რი. ჩუ̂ა̈თპა̈ჟ მამა-მურზა. ლა̈ჩუ̂-ფუ̈რ ანჴა̈დ ჯუ̂ე̄დიახა̈ნ, ქა̄ჩა̈დ მიჩა
Line of edition: 27    ლეთრა ლიცთე ი იფთუ̂ი ჯიმს მეუ̂არ. ჟი ლა̈ჲფეთუ̂ მა̈გ, ახფჷნდა
Line of edition: 28    ლიცდ, იტყუ̂ლიფა̈̄ლ ი იჭმურიე̄ლ: "მა̈ჲღენუ̂ა̈̄ჲ ფუსდ ხა̈რი ამეჩუ̄ნ,
Line of edition: 29    ლიც ჟი ა̈მიფშუ̂დ, მა̈̄ჲ ჰაჯ ჯეკუ̂დი, ეჯას ჯა̈ჩო!" ხა̈̄ქუ̂ინ ეჩქა მამა-მურზად
Line of edition: 30    ლაპა̈ჟხა̈ნქა: -- ისგუ ლჷჯე ქა ლა̄მო! -- ლჷჯას დეშ ჯაჰუ̂დი! -- ხა̈̄ქუ̂ინ
Line of edition: 31    ლა̈ჩუ̂-ფუ̈რდ. -- ჲაღო, ლიცი მა̄მა ჯე̄რა! -- ხა̈̄ქუ̂ინ მამა-მურზად.
Line of edition: 32    -- დღუ̄ლ-დღუ̄ლ ნო̄სა ახკიდუ̂ნა, ადო იშდუ̂არშუ̂ ჯჷხპე!

Line of edition: 33       ეჩქა ჟ'ოხფიშუ̂დ ლიც მამა-მურზად ლა̈ჩუ̂-ფუ̈რს. ეჯნემ ლითრე
Line of edition: 34    ლა̈ჲბინე ი მამა-მურზად -- ლი̄შგი. დღუ̄ლ-დღუ̄ლ დე̄სა ლახსიმნე. ათხ'
Line of edition: 35    ა̄ნღრი ა̈გითე მამა-მურზა, ა̈ხღუ̂ა̈ჭ უ̂ეშგინ ლა̈ჩუ̂-ფუ̈რ: "მამა-მურზა,
Line of edition: 36    ჟი ლა̈მღე̄ლა̈უ̂!" ჟი ლა̈ჲღე̄ლუ̂ე მამა-მურზად. ხა̈̄ქუ̂ინ ეჩქა ფუ̈რ ლა̈ჩუ̂დ,
Line of edition: 37    ქა ლოხკიჩ ძუა: "ისგუ̂ა მაწჷხ ლადეღჟი ალა ათქუთინ, ლა̈ჯშედნი
Line of edition: 38    იმუ̂ა̄ლა". აჩა̈დ ამჟინ ა̈გითე, სგო̄თჴიდ ამჟი მიჩა დაჩუ̂ირს, ჟ'ოხფუ̈̄ნე
Page of edition: 141  Line of edition: 1    ი ჩუ ლახა̈̄შ. -- ათხ' ე̄სერ ეში̄ მა̄მა ა̈რია ხოჩილდ? -- ათხე ესერ ჰა̈დურდ
Line of edition: 2    ხოდრა̈მდ ა̈რი!

Line of edition: 3       აჩა̈დ მე̄რმა ლადეღ ლა̈თხუ̂იართე მამა-მურზა. ჟ'ანჷ̄გა̈̄ნ დედე-დედფა̈ლ,
Line of edition: 4    დია̈რ კიბდო̈ნთეჲსგა ოთკუ̂ა̈რ, კიბდო̈ნს ეჩხა̈ნ-ამხა̈ნ ყა̈რლა̈რ
Line of edition: 5    ესგენე: "მამა-მურზა ესერ ლახ დია̈რს ხეჰე̄წუ̂ალუ̂ნი, ეჩქ' ე̄სერ
Line of edition: 6    სგაუ̂ ოთჯილკეხ, ღო ესერ ძუღუ̂ათე[უ̂] ადკუ̂ა̈რხ!" ანჴა̈დ ნა̈ბოზს ა̈გითე,
Line of edition: 7    ხა̈̄ქუ̂ინ მიჩა დაჩუ̂ირს: -- დია̈რ ესერ იმე ხორი? -- დია̈რ კიბდო̈ნისგა
Line of edition: 8    ჯირი. -- მიჩა დაჩუ̂ირდ ხა̈̄ქუ̂ინ. ხეჰე̄წუ̂ა̈ლ კიბდო̈ნთეჲსგა დია̈რს მამა-მურზა,
Line of edition: 9    სგო̄თჯილკეხ ყა̈რლა̈რდ კიბდო̈ნთეჲსგა, ჟ'ესლოსმეხ ლაფრია̈ლ
Line of edition: 10    კიბდო̈ნს ი სგა̄დკუ̂ა̈რხ ძუღუ̂ათე. ადქუთუ̂ნე ლა̈ჩუ̂-ფუ̈რი ძუა, უ̂ა̈რილ
Line of edition: 11    ხა̈მი ძაგუ̂ ი ფა̈რშმა̈გი ღალე, მა̈გ ამეჩუ̄ნ ესფა̈შუ̂დხ. ათხე ლა̈̄ქუ̂ინ
Line of edition: 12    ლა̈ჩუ̂-ფუ̈რდ: "მა̈ჲ ჲა̈ს ჯა̈მჲედახ?" ეჩქა ლა̈̄ქუ̂ინ ფა̈რშმა̈გდ: "მი მა̈მჲედა
Line of edition: 13    ეჯა, ერე ლახე მიშგუ̂ა ლჷშნაუ̂ა ღალიდს ლოხჭემნე, ხოჩილდ
Line of edition: 14    ლო̄ტხე". ეჩქა ლა̈̄ქუ̂ინ უ̂ა̈რილ ხა̈მდ: "მი მა̈მჲედ' ე̄ჯა, ერე ძუღუ̂ახა̈ნქა
Line of edition: 15    ქო̄ხუ̂ტიხე". ფუ̈რ ლა̈ჩუ̂დ ხა̈̄ქუ̂ინ: "მი ხუ̂ა̈ჴდე იშდუ̂ა̈რს ი ჩოთგჷლჷ̄რი"
Line of edition: 16    ი ჩუ ჩო̈მინხ ალჲა̈რდ ამჟინ ი ხოჩე̄ლი ლა̄ტიხხ ი ეჯჲა̈რ
Line of edition: 17    ა̈გი-ა̈გითე აჩა̈დხ. ანღრი ა̈გითე მამა-მურზა, ახა̄სდ მჷხმჷ̄რის: -- ჲაღო,
Line of edition: 18    ისგუ ლერქუ̂ა̈ლ მი ლა̄მაქუ̂, მიშგუ ლერქუ̂ა̈ლ ს' ა̈თიქუ̂! -- დეშ ჯა̈შგდე
Line of edition: 19    სი! ხამა̈რს ბოგქა ჩუჩუ̂ა̈რჟი ხაკუხ ლიყჰა̈̄ლ"... ადსკჷრე მამა-მურზად
Line of edition: 20    ჯიჰრა̈̄ შამფუ̈რ. ესღჷრდახ ბოგქა, ლიჭყი̄ლიე̄ლ ა̈დბინეხ: ლიყჰა̈̄ლ
Line of edition: 21    ხეკუ̂ა̈დხ. ჲერს ლჷდგა̈რს შიდა ბოგ ეჩხა̈ნთე, ჲერს ლჷჲა̈რს. ეშხუ
Line of edition: 22    მაჩე̄ნე ტა̈ხ ბოგა̈ ყა̈რუ̂ილს ოთკუ̂ა̈რ. ა̈გით' ა̄ნჴიდ ხამა̈რ, ლახმი̄რი
Line of edition: 23    ყო̄რისგა[ი̄] ამჟი ხაყერ. ეჩქა ლა̈̄ქუ̂ინხ ქორშა̈ლდ: "იმჟი ლა̈უ̂დიე̄რა̄ლუშ
Line of edition: 24    ანღრი მჷხმჷ̄რი?!" სგა̄ჩა̈დ ქორთე. მერბიე̄ლს ხა̈̄ქუ̂ინ: დია̈რ ლა̄მო!"
Line of edition: 25    ამნემ ლაუ̂ში ძგიდ ლახუ̂ე̄მ. ეჯა გუ̂ამა̈რისგა ხაჴიდ ი ხოჩა ლაუ̂ა̈შ
Line of edition: 26    ჟ'ა̈ნკიდ. ეჩქა წჷდა̈ჲთე აჩა̈დ: "ჰარა̈ყ ლა̄მაშ!" კათხ ისგთეჟი დეშ
Line of edition: 27    ლახუ̂ე̄მ. ეჯა გუ̂ამა̈რისგა ხაჴიდ, კათხ გუ̂ეში ა̈ნგუ̂ეშ. ეჩქა ზარუ̂ილთე
Line of edition: 28    აჩა̈დ, "ლეღუ̂ ლა̄მო!" ხა̈̄ქუ̂ინ. ჯიჯუ̂ ლახუ̂ე̄მ. ეჯა გა̈ნთე ადკუ̂ა̈რ, ხოჩა
Line of edition: 29    ლაგა̈ფ ა̈ნკიდ ი ჩუ ლალე̄მ ალა. ეჩქა ა̈ნკიდ მამა-მურზად ცჴემა̈დ:
Line of edition: 30    "ჲერუ̂ა̈̄ჲ ესერ მოშ ალას ჟი იბუ̄ცეხ!" ხეკუ̂ჰენიხ მა̈გ, ისგთეჟი
Line of edition: 31    დეშ იბუ̄ცეხ. ეჩქა ხა̈̄ქუ̂ინ მჷხმჷ̄რიდ: -- ეშხუ̂ი̄ლ მი ლამე̄მდ! -- სი იმ
Line of edition: 32    ლაჯუ̂ედნედ, ტიშა̈̄რ მჷხმჷ̄რის, მამა-მურზა̈̄ ცჴემა̈დს? -- ქა ღენ ლამე̄მდ,
Line of edition: 33    ლოხკუ̂იჰ!. ლახ დოშ ა̈ხუ̂ბი̄წუ̂ნე, ღო ეჯღა მა̈ჲ ი̄რა?

Line of edition: 34       ქა ლახუ̂ე̄მხ მჷხმჷ̄რის ი ჟ'ა̈ნბუ̄წე. ხა̈̄ქუ̂ინ ეჩქა გაცხა̈ჲდ მჷხმჷ̄რის:
Line of edition: 35    -- ფუ̈რს, ჰა ჴა̈ნს?
Line of edition: 36       -- ჴა̈ნს, ფუ̈რს ჩიგარ ლაჰას ლა̈რიდ.

Page of edition: 142 
Line of edition: 1       ჟ'ანჭკიჟ მა̈გ, კე̄სა̈რ ი მიჩა ნაყა̈რ, ჩუ̂ესსა̈დ საკე̄სრო მამა-მურზას
Line of edition: 2    ი ეჯა ჩეი̄ ყო̄რჟი ჩუ̂ადჰინე̄, მიჩა დაჩუ̂ირ. მამა-მურზად ხოჩა ლირდე-ლიზგე
Line of edition: 3    ა̈დჴიდ.
Line of edition: 4       -- ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.