TITUS
Svan Prose Texts I (Upper Bal)
Part No. 77
Previous part

Text: 84 
Page of edition: 135 
Line of edition: 33 
84. ხითა̈ნგ ი ცხითა̈ნგ


Line of edition: 34       არდახ ეშხუ დი̄-ჲ გეზალ. გეზალ მეთხუ̂ია̈რ ლა̈სუ̂, ღჷრდა ჩიგარ
Line of edition: 35    ლა̈თხუ̂იართე. მიჩა დიდ ლელა̈ტდ ა̈დჷრდუნე და̈̄უ̂. ეჯნე̄მ ჩუ̂ადღანუ̂ე.
Line of edition: 36    ხეჭუ̂დია̄ლდა მიჩა გეზალ: -- იმნა̈რ ესერ ლი ლჷბე̄ლაშა̄ლ? -- ჰამა იმღა
Line of edition: 37    მო̄დ ესერ ი̄რა ლჷბე̄ლე, ჟ'ესერ ხა̄გ ნა̈თხუ̂იარე̄მი ლეღუ̂ს!

Page of edition: 136 
Line of edition: 1       აშხუ̂ინ აჩა̈დ ლა̈თხუ̂იართე. ეჩქა მიჩა დი ჩუ̂ა̈დღუ̂აჟ, ბეფშუ̂ სგა
Line of edition: 2    ლახჩიხნე ტჷტს. ეჯა ლახე ა̈გით' ა̄ნჴა̈დ, ლა̈ჲფხირკუ̂ა̄ლე ტჷტცახა̈ნ,
Line of edition: 3    ქა̄ნშყა̈დ ბეფშუ̂. ლახტუ̂ი̄ლ მიჩა დის: "მა̈ჲ ესერ ლი ალა?" მიჩა დიდ
Line of edition: 4    ხა̈̄ქუ̂: "ალა ღე̄რბათუ̂ ესერ ხოთხა მიჩა მუხუ̂ბად". ათხე ამნე̄მ ჩუ̂ა̈დჯჷრუ̂ე.
Line of edition: 5    ალ ბეფშუ̂ ჟი ანპირსდეხ. მა̈̄ნკუ̂ი̄ გეზალს ხეჟხა̈̄ნ ხითა̈ნგ,
Line of edition: 6    ალას ათჟა̈ხხ ცხითა̈ნგ.

Line of edition: 7       აშხუ̂ინ აჩა̈დ ლა̈თხუ̂იართე. ეჩქას სგა̄ნჴა̈დ ეჯ ზურა̄ლა̈ ლელა̈ტ,
Line of edition: 8    ხა̈̄ქუ̂: "ჩუ̄ ესერ ადგა̈რხ ალა, მიჩა ხოშა გეზალ, ადო ჟი ესერ დო̄სა
Line of edition: 9    ახბა̈ჟის!" ეჩქას ხოხუ̂რა̄მ ჭყინტჷლდდ ჟ'ა̈ნჰუნრე ალა მა̈გ. აჯაღ ასკიბხ:
Line of edition: 10    "ჯ'ე̄სერ ჩუ̄ ა̈თპა̈ჟ ყო̄რ სგა̈̄ნჩუ, ლახ' ე̄სერ ეჯა ა̈ნი̄ზინი, ეჩქა
Line of edition: 11    ფუცხუ ხაძგერ, ჩუ̄ ესერ ადგა̈რ!" ალა ხოხუ̂რა̄მ ბეფშუ̂დ ჟი ა̈ნჰუნრე,
Line of edition: 12    ქა̄ჩა̈დ ქა̈̄მთე, ხოღელდა მიჩა მუხუ̂ბა. და̈̄უ̂ გაცხა̈ჲდ ჩუ̂ა̈თპა̈ჟ ყო̄რ
Line of edition: 13    სგა̈̄ნჩუ, ფუცხუ̂ შჷნ ლა̈ჲყედნე. ანღრი ათხ' ეჯა ლა̈თხუ̂იარხა̈ნ. ქა̄ჩა̈დ
Line of edition: 14    ხოხუ̂რა ჭყინტ: იმუ̂ა̈̄ჲხა̈ნ ეჯა ხეპა̈ჟ, ეჩხა̈ნ ჯა ლა̈ხჭჷთხა̈̄ნ. სგა̄ნღრიხ
Line of edition: 15    ყო̄რა̈ლისგა ი და̈̄უ̂ს ხაკუ ეჩი̄ დაგრა, მარე ეჩქა მიჩა გეზალი́ ჩუ
Line of edition: 16    იდგარო̄ლ, ეჩასი ქა ხეხო̄ლ, სერ ეჯღა დეშ ადბადუ̂ე ლიყერ. სგა̄ნჴა̈დ
Line of edition: 17    დი, სგა̄თგეხ ლეღუ̂.

Line of edition: 18       ათხე მე̄რუ̂ა ლადეღ აჯაღ აჩა̈დ ლა̈თხუ̂იართე. ათხე სგა̄დ ანჴა̈დ
Line of edition: 19    და̈̄უ̂ ი აჯაღ სკიბეხ ეჩი̄ დაგრას. -- ჲაღო იმჟ' ესერ ხეჩუ̂ე̄ნი ეჩი̄
Line of edition: 20    დაგრა? -- ჲაღო, იმჟი ი აშხუ̂ ა̈გის ესერ ხა̈მთქუ̂ა ლიყუ̂ნა̈̄ლ-ლიუ̂ჟუნე.
Line of edition: 21    ეჩქას ესერ ჟი̄უ̂ ათსგურდა, ჩუ̄ ესერ ადყიმე.

Line of edition: 22       ჟ'ა̈ნჰუნრე ხოხუ̂რა̄მ ჭყინტდ ალა. ანჴა̈დ ეჯა ლა̈თხუ̂იარხა̈ნ, სგა̄ნჴა̈დ
Line of edition: 23    ქორთე, ჩუ̂ადტუფუ̄რე ნა̈თხუ̂იარა̈̄ლ ი სგა̄თგე ლეღუ̂. ათხე ხოხუ̂რა̄მ
Line of edition: 24    ჭყინტდ ლიგუ̂ნი ა̈დბინე: "მჷხა̈რ ესერ ეჯაჲ ხონჴრი ლა̈თხუ̂იართე".
Line of edition: 25    იგუ̂ა̈ნდა მეუ̂არ: "ჲაღო, ქ' ე̄სერ ა̈დჴერნი!" ჟ'ოხსყე ჯაბრა̈ლ. მე̄რუ̂ა
Line of edition: 26    ლადეღ ჲერქჷდა ქა̄ჩა̈დხ ლა̈თხუ̂იართე. ჟ'აჩა̈დხ აშხუ̂ ზუგთეჟი. ამჩუ
Line of edition: 27    ხოშა̄მ მუხუ̂ბა ჩუ̂ა̈თუ̄ჟდა. ანღრი მირ მე̄რა̄ლე გუა̈რდ. ალა ესნა̈რ და̈̄უ̂
Line of edition: 28    ლი: ხაკუ ამი̄ დაგრა. ამჩიქს ხოხუ̂რა̄მ ჭყინტდ ჟ'ა̈ნბა̈ჟ, ა̈ნბუ̄წე
Line of edition: 29    ცჴემა̈დ, სგა ხაჴიდ გუისგა, ჩუ̂აშყა̈დ ტუ̂იბთე ი ჩუ̂ადგან. ათხ' ა̄ლას
Line of edition: 30    ქიმ ოხშყა̈დ ი ჟი ხოჲა̈ხ ჰა̈ყბაჟი. ჟ'ანჲა̈ცხ ხოშა მიჩა მუხუ̂ბე: -- იმნა̈რ
Line of edition: 31    ესერ იგუ̂ნი? -- დე̄მნა̈რ. ცხუ̂ი ესერ ათშყედა ტუ̂იბთე, ეჯღა. -- მა̄მა ესერ
Line of edition: 32    ხოჭირ. ეჩის ესერ ჲეშდსი ჟი ოხუ̂ტა̈̄ბნე. ეჯღა ესერ ნო̄მისუ იგუ̂ნი! -- ეჯღ'
Line of edition: 33    ე̄სერ მა̄მ იგუ̂ნი, მარე ამჟი ესერ ლჷმა̈̄რ. -- ქო̄ხო̄მბუ̂ე იმუ̂ა̈̄ჲჟი
Line of edition: 34    მა̈̄ნკუ̂ინღო ლა̈სუ̂: "ჩია̈̄გ ესერ მიჩა დაგრა ხა̈კუ̂და მინე დის. ლა̈დი
Line of edition: 35    ესერ ალმა̈̄ზ და̈̄უ̂, მიჩა დაგრა ესერ ხა̈კუ̂და ი ჩუ ესერ ოთდაგრა მიჩ
Line of edition: 36    და̈̄უ̂, ეჯღ' ე̄სერ ახშყედა ქიმ". მა̈გ ქო̄ხო̄მბუ̂ე. ათხე ჟ'ანჷ̄გა̈̄ნხ ჩუ̂ადგა̈რხ
Line of edition: 37    ნა̈თხუ̂იარა̈̄ლ ი აჩა̈დხ ა̈გითე. სგა̄ჩა̈დხ ქორთე, ჩუ ადტუფუ̄რეხ,
Line of edition: 38    სგა̄თგეხ ლეღუ̂. ათხე ზურა̄ლ, მინე დი, ხოლა̄მ გუჟი ა̈რი. -- ხოწუ̂ახ
Page of edition: 137  Line of edition: 1    ესერ ჲა̈რ ლა̈დი? -- და̈̄რ ესერ ხოწუ̂ახ. -- "ხა̈̄ქუ̂ ხოშა̄მ მუხუ̂ბად. ეჩქა
Line of edition: 2    ხოხუ̂რა მუხუ̂ბად ხა̈̄ქუ̂: -- ადუ̂, ჩუ̂ ესერ ხოწუ̂ა, ჩუ̂ ესერ ოთდაგრახ.

Line of edition: 3       ანჴა̈დ ზურა̄ლ ი ლიგუ̂ნი ა̈დბინე. ეჩქა ხოშა̄მ მუხუ̂ბად ხა̈̄ქუ̂: "ემ'
Line of edition: 4    ე̄სერ გაცხა̈ჲდ ჟი ხერგებო̄ლდე̄დს, ეჩქ' ე̄სერ ქა̄უ̂ ოხჴი̄ჩა მიჩა ნა̈თხუ̂იარა̄ლე
Line of edition: 5    ლეღუ̂, ადო ესერ -- ნო̄მა". ეჩქა მიჩა დი შიშდ ჩუ̂აბა̈ჭკუ̂.

Line of edition: 6       ათხ' ა̄ლჲა̈რდ ლიჩი̄ჟა̈̄ლ ა̈ნჷნდუნეხ. აჩა̈დხ ლა̈ჩი̄ჟა̈ლთე, ჩუ ყუ̂ელენხ:
Line of edition: 7    ეშხუ აშხუ̂ შუკუ̂ს ღჷრდა, მე̄რუ̂ე მე̄რუ̂ა შუკუ̂ს ღჷრდა. "ჲაღო,
Line of edition: 8    ამჟი ესერ ნო̄მა̄უ̂ ა̈დყულუ̄რა̈̄ნხ, ნიშა̈ნ ესერუ ლახუ̂ე̄მხ უშხუ̂ა̄რ: ლახ
Line of edition: 9    ესერ მიჩ ჩუ მა ა̈თყერნი, ეჩქა ზისხშუ̂ [ესერ] ა̈ხგუ̂ეშლი შიყუ̂ილ ლაბრა̄ლჟი.
Line of edition: 10    ხოშა მუხუ̂ბე ესერ ლახ ა̈დდაგრი, ეჩქა მიჩ, ხოხუ̂რა̄მ მუხუ̂ბა,
Line of edition: 11    ლჷჯოშუ ესერ ახგუ̂ეშლე̄ნა შიყუ̂ილ!" აჩა̈დხ. ამ ლე̄თ ხოშა̄მ მუხუ̂ბად
Line of edition: 12    ნა̈თხუ̂იარე ადგა̈რ, აჩა̈დ ი ღუმირ ჩუქუ̂ა̄ნ ლემესგ ა̈ნი̄შუ̂ე, ლეღუ̂ს
Line of edition: 13    იტყბა. ალ დრო̈უ̂ს ჩუქუ̂ა̄ნჟი ქა̈ჯდ ლახტუ̂ი̄ლ: -- მჷცხი მა̄რ, მჷცხი მა̄რ!
Line of edition: 14       -- ჟი̄უ̂ ესერ ანჴა̈დ, ჩ[უ̄]უ̂ ესერ ა̈დტებდა̈̄ნ!
Line of edition: 15       -- მიჩა წეუ̂ა̈რ-მეძბარა̈ლდ ესერ ხაყლუ̄ნი.
Line of edition: 16       -- ჟი̄უ̂ ესერ მ' ა̄ხბიშე, ღო ესერ ჩუ ათბემნე.

Line of edition: 17       ჟ'ახბიშე ჭი̄მა, ჩუ̂ათბე ამნოშ წეუ̂ა̈რ-მეძბარა̈ლ.
Line of edition: 18       -- მჷცხ' ე̄სერ ხა̄რ, მჷცხი ხა̄რ!
Line of edition: 19       -- ჟი̄უ̂ ესერ ანჴა̈დ! -- აჯაღ ლახტუ̂ი̄ლ.
Line of edition: 20       -- ჟ'ე̄სერ დე̄მის. მიჩა ხმა̈ლ-ხანჯა̈რდ ესერ ხაყლუ̄ნი.
Line of edition: 21       -- ჟი̄უ̂ ესერ მ' ა̄ხბიშე, ღო ესერ ჩუ̂ათბემნე.

Line of edition: 22       ჟ'ახბიშე ში̄რო̄ლ, ჩუ̂ათბე ში̄რო̄ლშუ̂. ჟ'ანჴა̈დ ამჩიქს ი ტჷტს ი
Line of edition: 23    შიხს იფთუ̂ი. -- იმ ესერ იჩო, ლეღუ̂ ესერუ ლალე̄მ!
Line of edition: 24       -- ლეღუ̂სი ესერ ჩუ ლა̈ჲზუ̂ებნე, მიჩი ესერ ჩუ ლა̈ჲზუ̂ებნე!

Line of edition: 25       ამჩიქს სგა̄ხფხიჭე ი ხებჷრგიე̄ლ ი ალა̄, ხითა̈ნგ, ისა̄მწარა̈̄ლ:
Line of edition: 26       -- ოხ, ხოლა ესერ მიჩა წეუ̂ა̈რ-მეძბარა̈ლ!
Line of edition: 27       -- მიჩა წეუ̂ა̈რ-მეძბარა̈ლს ესერ მიჩა ჭი̄მო̄ლ ხა̈̄ბხ.

Line of edition: 28       ეჩქა აჯაღ ლახტუ̂ი̄ლ მიჩა ხმა̈ლ-ხანჯა̈რს. "ეჯჲა̈რს ესერ მიჩა ში̄რო̄ლ
Line of edition: 29    ხა̄გხ". ამჩიქს ჩუ ა̈ნდე ხითა̈ნგ ი ჩუ̂ადურტყუ̂ე.

Line of edition: 30       მე̄რუ̂ა ლადეღ მიჩა მუხუ̂ბე იბრა̄ლ ი შიყუ̂ილ ლჷჯოშ ა̈ხგუ̂ეშლა̈̄ნ.
Line of edition: 31    ხოლა̄მ გუჟი ა̈დჷრდა. სგა̄ჩა̈დ, ჟ'ა̈ნკიდ მიჩა ხმა̈ლ-ხანჯა̈რ, აჩა̈დ ლათხა̈̄ლთე.
Line of edition: 32    ესღრი, ესღრი, სგა ლა̈ხჴა̈დჷ̄ნა̈̄ნ ალ ღუმირ ჩუქუ̂ა̄ნთეჲსგა.
Line of edition: 33    ამჩუ ჟ'ა̈თლაკ ნა̈ლმა̈სგუ̂ს. ამ ლე̄თ ამჩუ ჩუ̂ადჷ̄გა̈̄ნ. ჩუ̂ა̈დბურა̈̄ნ. ამჩიქს
Line of edition: 34    ჩუქუ̂ა̄ნჟი ლახსჷმდა: "მჷცხი მა̄რ, მჷცხი მა̄რ!" ეჯ ქა̈ჯ ხატუ̂ი̄ლდ' ე̄,
Line of edition: 35    ხედუ̂ა̈̄ჲდ მიჩა მუხუ̂ბე ადურტყუ̂ე: -- ჟი̄უ̂ ესერ ანჴა̈დ, ჟი̄უ̂ ესერ ა̈ნტებდა̈̄ნ!
Line of edition: 36       -- მიჩა წეუ̂ა̈რ-მეძბარა̈ლდ ესერ ხაყლუ̄ნი.
Line of edition: 37       -- ჟი̄უ̂ ესერ მ' ა̄ხბიშე, ღო ესერ ჩუ̂აბემ.

Page of edition: 138 
Line of edition: 1       ჟ'ახბიშე ჭი̄მო̄ლ, ანჴა̈დ ი ლიბემი მჷქაფდ ჟ'ანწუ̄წე ლემასგუ̂ისგა,
Line of edition: 2    ჩუ ლახტუ̂ი̄ლ: -- ჟი̄უ̂ ესერ ანჴა̈დ, ჩუ̂ ესერ ოთბა წეუ̂ა̈რ-მეძბარა̈ლ.
Line of edition: 3       -- ჟი ესერ, მარე მიჩა ხმა̈ლ-ხანჯა̈ლდ ესერ ხაყლუ̄ნი.
Line of edition: 4       -- ჟი̄უ̂ ესერ მ' ა̄ხბიშე, ღო ესერ ათბემნე.

Line of edition: 5       ჟ'ახბიშე ში̄რო̄ლ, ჩუ̂ათბე ხმა̈ლ-ხანჯა̈ლ. ამნე̄მ გაცხა̈ჲდ ჩუ მა̄მა
Line of edition: 6    ათბე, ში̄რო̄ლ ქა̄დკუ̂ა̈რ ეჩხე̄ ტუ̂იბთე.
Line of edition: 7       -- ჟი̄უ̂ ესერ ანჴა̈დ, ჩუ̂ ესერ ოთბა̄ლა მა̄გ.

Line of edition: 8       ჟ'ანჴა̈დ, ჩუ ესსგურდა, ტჷტს ი შიხს იფთუ̂ი.
Line of edition: 9       -- სი მა̈ჲ ჯა̄რ ალა, ტჷტ ი შიხ? წუ̂ა̈დ ლა̄ხა̈მ!
Line of edition: 10       -- ალასი ჩუ ლოხზუ̂ებნე ი სი[ი] ჩუ ლა̈ჯზუ̂ებნე!

Line of edition: 11       სგა̄ხფხიჭე ლაბჷრგია̈ლს. უ̂ოდემ ჩიქად ჩუ იდა̈̄სგდა, ეჩქად წეუ̂ა̈რ-მეძბარა̈ლს
Line of edition: 12    ლახტუ̂ი̄ლ, ქა̄ნსკინეხ წეუ̂ა̈რ-მეძბარა̈ლდ ი ჩუ ადგჷლჷ̄რეხ.
Line of edition: 13    ეჩქა ჩუ̂აბიჴუ̂ ისგდ ი ქა̈̄ნი̄ყე მიჩა მუხუ̂ბე.
Line of edition: 14       -- ოხ, მა̈ჲ ესერ ხოუ̂ჟა!

Line of edition: 15       ლიუ̂ჟ' ე̄სერ მო̄შ, ქა̈ჯი ჴადუ̂ისგა ესერ ლჷმა̈რდ. აჲ, ხეწა̈დუ
Line of edition: 16    ესერ ალ ქა̈ჯს, მიჩ ესერ ჩოთდაგრა.

Line of edition: 17       მე̄უ̂არ ათხი̄დჷნხ უშხუ̂ა̄რე ლიწედ ი ა̈გითე ატა̈ხხ ხოჩა̄მ გუჟი.

Line of edition: 18       ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.