TITUS
Svan Prose Texts I (Upper Bal)
Part No. 76
Previous part

Text: 83 
Page of edition: 134 
Line of edition: 13 
83. ანა


Line of edition: 14       ლჷმზჷრე̄უ̂ ხიშდ ი ანა. ანას ხორდა ჩხარა გეზალ. ალჲა̈რს ხორიხ
Line of edition: 15    ეშხუ დაჩუ̂ირ. ალჲა̈რ აჩა̈დხ ლაქჩათე. -- ჲაღო, სა̈დილ ესერ მინე
Line of edition: 16    დაჩუ̂ირდუ ოთჴიდ. -- იმჟი̄ნ ესერ ა̈თხო̄ლა ცხეკთეჲსგა მინე დაჩუ̂ირ?
Line of edition: 17    -- იმჟი̄ნ ესერ-ი ჩუ̄უ̂ ალა̈̄ბხ ჰუ̂ილ, ჟ[ი̄უ̂] ახცუ̂ეხ სა̈დილ, ამჷნეშ ესერ
Line of edition: 18    ადსკო̄რიხ ნათა̈რს ი მინე ლამშიამჷყუ ა̈თჭა̈მ ალას.

Line of edition: 19       ახგენე̄ნა ალას და̈̄უ̂ ი ნათა̈რს მიჩა ქორთე ოთსიპე. ა̈თჭა̈მ ალას
Line of edition: 20    ი სგა ლა̈ხჴა̈დჷ̄ნ და̈̄უ̂ა̈ ყო̄რთეჟი. ამნე̄მ ჩოხკიდ სა̈დილ, ჩუ̂ადყლჷ̄პე,
Line of edition: 21    დი̄ნა მიჩა ხეხუ̂დ ესყედნე. ლახუ̂ბა ანჴა̈დხ ა̈გითე, ხა̈̄ქუ̂ინხ მინე დის:
Line of edition: 22    -- იმღ' ე̄სერ მო̄მა ოხზჷზახ სა̈დილ? -- ეჯ' ე̄სერ მინს დო̄სგ ოხზჷზახ.
Line of edition: 23    აჩა̈დხ ლათხე̄ლთე მა̈გ, ა̈თჭა̈მხ ამი̄ ნა̄ზუ̂ს, სგა ლა̈ხჴა̈დჷნხ და̈̄უ̂ა̈ ა̈ზუ̂თეჲსგა.
Line of edition: 24    მინე დაჩუ̂ირ ყო̄რჟი ესხუ̂ი̄დხ ი იცხე̄ნიე̄ლ: -- იმ ღე̄რბათუ̂
Line of edition: 25    ესერ ოხჴი̄დახ მინ ამხაუ̂? მიჩა ჭა̈შ ესერ მინს ქუ̂ინს დე̄მის ხა̈ცუ̂რე.

Line of edition: 26       ნა̈ბოზს ანჴა̈დ და̈̄უ̂, აშუ̂ხა̈ნჩუ ბიკ ხა̈̄ცუ̂ ი მე̄რმახა̈ნჩუ -- ღუ̂აშ.
Line of edition: 27    -- ფუ!. მა̈ჲ-უნყუ̂ს ამსუ̂ა̄ლდა̈ ქუ̂ინ მაჴან? -- ფისრა̈ჲ სი, მიშგუ̂ან ხოშა
Line of edition: 28    ამსუ̂ა̄ლდა̈ ქუ̂ინ მა̈ჲ ი̄რა?! -- ისგუ ქუ̂ინ-უნყუ̂ს მა̄მა ლი. -- ჲაღო, ისგუ
Line of edition: 29    ლა̈სმუნა ანჴა̈დხ ი ეჯჲარე ქუ̂ინ ლი. -- ჲაღო̄ნყუ̂ს ქა̄ხია̈̄ლ!

Line of edition: 30       ამნე̄მ მიჩა ლაჯმილა ქო̄ხჴიდ.
Line of edition: 31       -- სგა̈ჲ-უნყუ̂ს ლანჴედად შუ̂იდებდ! ჲაღო̄ნყუ̂ს ათხე ბიკ ჯიცხახ
Line of edition: 32    ლებინყო̄რად, ჰა ღუ̂აშ ლეტფუ̄რად? -- ნა̈ჲ ბიკ, ხიად!

Line of edition: 33       ამნე̄მ ღუ̂აშ ჩუ̂ადტუფუ̄რე, სგა̄თგე ლეღუ̂. ეჯჲა̈რდ ბიკს ეშხუ
Line of edition: 34    პაწკე̄რ დეშ ოხკუ̂ა̈რხ. ამნე̄მ ჩუ̂ესბინყო̄რე ალა ი ჟ'ოხუ̂ჩიდ ლემესგჟი.
Line of edition: 35    ათხე უ̂ოხშმობ ახა̄დხ. იშუ̂ს ჯა იზბი ი ჯიჯუ̂ს ალჲა̈რს ხა̄მნე. ათხე
Line of edition: 36    ლიყუ̂ნა̈̄ლ ახა̄დხ. ჩუ̂ადყუ̂ინეხ ალჲა̈რ ლა̈დიარა̈ლისგა. მერმა
Page of edition: 135  Line of edition: 1    ლადეღ ანჷგა̈̄ნ და̈̄უ̂, ქა̄ჩა̈დ ლა̈დიარა̈ლთე ი ალჲა̈რ მა̈გ ჟ'ა̈ნქუნცა̄ლე
Line of edition: 2    ი ჩუ ლალე̄მ. ჯა ლა̈თხუ̂იართე აჩა̈დ.

Line of edition: 3       ა̈გის მინე დი ხოღლიხ ალჲა̈რს, მარე ალჲა̈რ დე̄მხა̈ნ ანტა̈ხხ. ანა
Line of edition: 4    ღანაუ̂ ლა̈სუ̂, ჩუ̂ა̈დღუ̂აჟ ი ჭყინტ ა̈ხთენა̈̄ნ. აჩა̈დ ხა̈ნ ი ალას ეჯკა̈ლი
Line of edition: 5    მახეღუ̂ა̈ჟ ა̈ხფას, ერე ჩი̄მი მენწირ. მიჩა დის ახნაყუ̂ნე ქუთ, ჟ'ა̈ნბიჴუ̂:
Line of edition: 6    "დედე, ლისუ̂ მა̄მინ!" ქა ლოხხელ ლუსუ̂ა̈რ. ეშხუ აშუ̂ხა̈ნ ლახტკიბ ი
Line of edition: 7    მე̄რმე -- მე̄რმახა̈ნ. ამნე̄მ ლიკი̄ლი ა̈დბინე: -- დედე̄შ, იმნა̈რ მა̈შხი ლუსუ̂ა̈რს?
Line of edition: 8    -- ქა დო მა̈̄ქუ̂ნი, მი ლახუ̂ბა მირდახ, ჰა მა̄დე, ეჩქად მა̄მა ჯა̈ყუ̂ლე.

Line of edition: 9       ამნე̄მ ქო̄ხო̄მბუ̂ე მა̈გ, იმუ̂ა̈̄ჲჟი ლა̈სუ̂. აჩა̈დ ლათხე̄ლთე ი სგა ლა̈ხჴა̈დჷ̄ნ
Line of edition: 10    და̈̄უ̂ა̈ ყო̄რთეჟი. ამეჩუ მიჩა დაჩუ̂ირ იცხე̄ნიე̄ლ: -- იმხა̈ნ ესერ
Line of edition: 11    ა̈მჴედე̄ლი? -- ამჟი-ამჟი ესერ, მიჩ ესერ ათკიჰე̄ნა ჩხარა ლახუ̂ბა ი
Line of edition: 12    ეშხუ დაჩუ̂ირ. -- ჩხარა ლახუ̂ბა̈̄შ ესერ დე̄სამა ხოხალ ი დაჩუ̂ირ ესერ
Line of edition: 13    ჯა ლი. ჲაღო, მინჴერ ა̈გითე!

Line of edition: 14       მა̄დ ოთჴერდა. -- ათხე ესერ მიჩა ჭა̈ში ა̈ნჴდენი ლა̈თხუ̂იარხა̈ნ ი
Line of edition: 15    ეჩუნღო ესერ ადრიხ.

Line of edition: 16       ნა̈ბოზს ანჴა̈დ და̈̄უ̂, აშუ̂ხა̈ნჩუ ბიკ ხა̈̄ცუ̂ ი მე̄რმახა̈ნჩუ -- ღუ̂აშ. და̈̄უ̂დ
Line of edition: 17    ხა̈̄ქუ̂ინ: -- ბიკ-უნყუ̂ს ჯიცხა ლებინყო̄რად, ჰა ღუ̂აშ ლეტფუ̄რად? -- მიჩ
Line of edition: 18    ესერ ღუ̂აშ.

Line of edition: 19       ხაფხეჭ ამნე̄მ სგა, ჩუ̂ადტუფუ̄რე ღუ̂აშ, სგა̄თგე ლეღუ̂. ეჩუნღო
Line of edition: 20    ხაფხეჭ ბიკს ი ჩუ̂ადბინყო̄რე ი ჟი ხაჴიდ ლემესგჟი. ათხე ახა̄დხ უ̂ოხშმობ.
Line of edition: 21    ალა იშუ̂ს ჯა იზბი ი მიჩა დაჩუ̂ირ, ჯიჯუ̂ა̈რს ჩი̄ს და̈̄უ̂ს ხატყცი
Line of edition: 22    გუ̂ამა̈რისგა.
Line of edition: 23       -- ათხე-უნყუ̂ს ლიბჷრგიე̄ლ ოგუ̂ა̈̄ცეს!
Line of edition: 24       -- ჰა̈დურდ ესერ ეზერ!

Line of edition: 25       ხაფხეჭხ უშხუ̂ა̄რ, იბჷრგიე̄ლხ ი ჩუ̂ა̈ნდე და̈̄უ̂. ათხე ხა̈ქუ̂ცე თხუ̂იმს.
Line of edition: 26    და̈̄უ̂დ ხა̈̄ქუ̂ინ: -- ჩუ̄ნყუ̂ს ნო̄მა ამდაგრა ი, მა̈̄ჲ-უნყუ̂ს ჯეკუ̂ეს, ეჩას ჯა̈ჩო.
Line of edition: 27    -- ჲაღო, ჩხარა მიშგუ ლახუ̂ბა ჟი ლა̈მგენ, იმუ̂ა̈̄ჲჟი̄ნ ეჩქად ლა̈სუ̂ხ,
Line of edition: 28    ეჩჟი, ი ეჩქა დე̄მის ჯადგა̈რი. -- ჲაღო̄ნყუ̂ს მი პლატკულს ლაჯუ̂ედნე,
Line of edition: 29    ეჯა̄ნყუ̂ს ლამჭა̈̄მიე̄ლ მი ჴადუ̂ქა ი ხოჩე̄ლი̄ ლა̈ჯტეხნი.

Line of edition: 30       ამნე̄მ ლახჭა̈მიე̄ლე გაცხა̈ჲდ პლატკულ ი მიჩა ჩხარა ლახუ̂ბა მა̈გ
Line of edition: 31    ჟი ლა̈ჲსე̄ლუ̂ა̈̄ნხ. ალჲა̈რდ და̈̄უ̂ ჩუ̂ადგა̈რხ ი ა̈გითე ანჴა̈დხ.

Line of edition: 32       ა̈გის ხოჩა ლირდე-ლიზგე ა̈დჴიდხ ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.