TITUS
Svan Prose Texts III (Lentekh)
Part No. 234
Previous part

Text: 234 
Page of edition: 282 
Line of edition: 1 
CCXXXIV. ჲეხვ-ჭა̈შ


Line of edition: 2       აჲსამეზრახ ღერბეთდ! ლემა̈რდელიხ ეშხო ჲეხვ-ჭა̈შ. ხა̈ყენახ
Line of edition: 3    ჲერბი გეზალ: ჭყინტ ი დენა. დედე-ჲ მამას ხოქვახ უშხვა̈რეშვდ,
Line of edition: 4    ერე ჩუ ლოქ ადაზიახ ჭყინტ. დენაგეზალ ათოუზახ ბეღვლხო, ერე
Line of edition: 5    გაკ ლოქ ანჴიდ სუფეშვდ. მამა გა̈ჩს ლჷმა̈შერლი. დენას ერ გაკ
Line of edition: 6    ჟ'ახოკიდა. ქა̈მეჴედ შტუგვ ი ხოქვა ეჩა̈შვდ: "ქა ლოქ ლახვემ ეშხო
Line of edition: 7    გაკ ი ქა ლოქ ხექნე, იმნა̈რ ლოქ ხაწჷხხ გაკ მიჩა დი-ჲ მუს". გაცხა̈დ,
Line of edition: 8    ქა ლახოოდა ეშხო გაკ ი შტუგვს ხოქვა, ერე "მიჩა ჯუმილს ჩუ
Line of edition: 9    ლოქ ა̈ზენიხ". დაჩვირდ ქა ხა̈ქვ ჯუმილს, ჟი ლა̈ჲსკურე ბარჯჟი ი
Line of edition: 10    ჩა̈დიტვანხ ა̈გინენქა. ჯუმილს ლიც ახაფჷნდა ი ადჴად ეშხო ღელამოყ.
Line of edition: 11    ლაიშ ლიც ჯუმილდ ი რა̈შვდ ასსიპდა. დაჩვირს ხა̈ქვ, ერე
Line of edition: 12    "ამოხოქა მიჩ ლოქ ხაქოცენა, ათხე მიჩ ლოქ ლახასკურდეს ი ჯე
Line of edition: 13    ლოქ ადა̈ესკ". ა̈სბინეხ ლიზი ი სკადჴადხ ეშხო ხენწიფეჲშხო. ხენწიფდ
Line of edition: 14    დენა მიჩა ჭყინტე ჲვხვდ ა̈სცვირ, რა̈შვ -- მიჩა ლალასკურალდ.

Line of edition: 15       ეშხო ლა̈დეღ ხენწიფდ მიჩა ჭყინტ ადაუზე უკვდავება̈ჲ ლიცე
Line of edition: 16    ლა̈ჴდად მიჩა დიეშვდ. ალ დენა ეჯაკა̈ლი ხოჩა ლას, ერე ხოჩილ
Line of edition: 17    მა̈დ არდა ეჯმინე ა̈რემა̈რეჲსკა. ალ ზურალა̈ ხოჩაობ ხამჯარაუნდახ
Line of edition: 18    მოსამსახურე ზურელა̈ლს. ჭყინტი აჩად ა̈გხენქა ი ალ ზურალ
Line of edition: 19    (თელეღჷრა) სკადაკვა̈რხ ჭახოჲსა. ალე ჟ'ა̈ნგა̈ჲღვბე რა̈შვდ, ქა̈თეჴვასკ
Line of edition: 20    ხენწიფს ი ადჴად ეჯ ჭამოყ. სკა ლა̈ჲსკიდდა ჭახოჲსა ი მიჩა
Line of edition: 21    დაჩვირს ხა̈ქვ: "იმნოვშ ლოქ ანჴჷდის ჟი". ალ ლირაგა̈დი ჟ'ა̈ნგა̈ჲღებე
Line of edition: 22    მიჩა მუმეთილდ. ალმინე ლირაგა̈დი ჟ'ა̈ნიმნა̈რე ხენწიფი გეზალდ.
Line of edition: 23    ადჴად ჭამოყ, ლა̈ჲსკიდდა ი მიჩა ჲეხვ ჭაჲსკა ა̈რი. სკადაკვა̈რ
Line of edition: 24    თა̈კვ ი ჟ'ა̈ნყეე ჭახენჟი. მიჩა ჭა̈შდ ეჯ მოსამსახურე ზურელა̈ლ
Line of edition: 25    ჩვადაჭებდე. მინდ ხოჩა ლირდე ა̈დჴიდხ. რა̈შვს ხოჩამდ ხოზნა̈ნდახ.
Line of edition: 26    ამჟი გააგრძელეს ლირდე.


Line of edition: 27 
მიხეილ ლიპარტელიანი. ხოფირი. მ. ქალდანი. 27.X.1962 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.