TITUS
Svan Prose Texts III (Lentekh)
Part No. 233
Previous part

Text: 233 
Page of edition: 279 
Line of edition: 33 
CCXXXIII. ხელწიფ


Line of edition: 34       აშ ჯა̈მზჷრას ღერთემ! არდა ეშხუ ხელწიფ. ეჯ ხელწიფს ხეყადდა
Line of edition: 35    ლეწვილალი სემი დენაგეზალ. ხელწიფდ აშხვ ლა̈დეღ ა̈ნჲერ თელდ
Line of edition: 36    სა̈ხელწიფი ხა̈ლხ. ხა̈ლხს ხა̈ქვ: "ჲერვა̈ჲ ლოქ მიჩა დენა̈ჲ მჷსკა̈დს
Line of edition: 37    ჟ'ა̈ნკედ მესემე ეტაჟაჟი, ჟი ლა̈ხეკვეფხენი ქა ლუვოშთხვნე ჩა̈ჟშვ, დენას
Page of edition: 280  Line of edition: 1    ქახაშკიბე, ეჯი ლოქ ირა მიჩა დენა̈ჲ ლეჭაშჷრი". ალმინდ ანახორიელეხ
Line of edition: 2    თელ ხა̈ლხ ი ახადახ ჩაჟა̈რე ჟი ლივოშთხვნე. სემი მარად,
Line of edition: 3    იმა̈ჲჟი ლას ლუქ ხელწიფხენქა, ეჯჟი ჩვემინხ ი მჷსკადა̈რ ქახაშკჷბჷრეხ
Line of edition: 4    ხელწიფი დენალს ი თვითან აჩადხ მინე-მინე ა̈გხო. ლახორ
Line of edition: 5    ჩვა̈დპინტან.

Line of edition: 6       მერბა ლა̈დეღ ხელწიფდ ეჯ სემი მარე ა̈ნჲერ ი მიჩა გეზელილ
Line of edition: 7    ქა ლახვემ ჲეხვდ ეჯ ჭყჷნტა̈რს. ხელწიფდ ხა̈ქვ მიჩა ლა̈ჩჟას: "ჲერვა̈ჲ
Line of edition: 8    ლოქ ადინე ლა̈თხვარხო, ახოჴიდე ჲერსკნი ჯეეგს, ეჯი ლოქ
Line of edition: 9    ხოშა ხელა̈ტი". ამ ლა̈ჩჟაჲსა კაჩხულდ ი ხოლა ხეჩჷდდა. ხელწიფხ
Line of edition: 10    ეჯი ბატა̈რე მჷლდაღდ ათოგენა. ალ ხოლა ჩიჟეს მავრენე დენა
Line of edition: 11    ათახვია ჲეხვდ. ხოშა ლავდილა ხა̈ნ ენენახ, ერე "მიჩა ჭა̈შ კაჩხვ ი
Line of edition: 12    ბატა̈რე მჷლდეღ ლოქ ლი". ალ ხოშა ლა̈ჩჟა მინე ჩაჟა̈რშვ ჟ'ახამარახ
Line of edition: 13    ლა̈თხვარხო. ბატა̈რე მჷლდეღ ჩიჟეს დემ ლჷმა̈რჴენლიხ. ეჯი
Line of edition: 14    სკათაჴჷრა ხელწიფს, ერე "ჯე ლა̈ჲდი ლა̈თხვარხო ქავ აფიშტვ".
Line of edition: 15    ხელწიფს ქათოფიშტვა ლა̈თხვარხო. ეი ლახასკურა მიჩა კაჩხვ ჩა̈ჟილდს
Line of edition: 16    ი ღოშკინ ქახა̈ჭემა მიჩა ლამოქშალას. მინდვერისა ბატა̈რე
Line of edition: 17    მჷლდეღს ქათოფიშტვა ჩა̈ჟ, ჟ'ასოკიდა თვეთვენე ძუა რა̈შვიშ ი
Line of edition: 18    შიშტ რა̈შვ ა̈მეჴედ. ალ მარე სკათაგვეწა ლერსკვენ შტიმხენ რა̈შვს,
Line of edition: 19    ლერთანხენ ქა̈მეჴედ ჲედურ ხოჩა თვეთვენად ლჷმარე. ბრა̈ქს ლახაქარავა
Line of edition: 20    ეჯ ა̈დგილხო. იმა̈ჲჩუნ ჲერსკნა̈ლ ლჷმა̈რდელიხ, ახორეკალა
Line of edition: 21    ჲერსკნი ჯვეგ სკვებინ ი სკა ლახახვია მიჩა ლამოქშალას. ლამოქშალას
Line of edition: 22    ღერბეთ ხახალახ. ლახობინახ ამნა̈რ ლიჴჷრა̈ლ: "მინე
Line of edition: 23    ღერბეთ, ალ ჯვგ ქავ ლახვემ!" ამემდ ხა̈ქვ, ერე: "ქავ ა̈დქუცურეხ"
Line of edition: 24    თვით კენჭა̈ლ, ქავ ლახვემხ მიჩ, ჯვეგ ა̈ჲეხუ". ეჯმინდ მა̈ხიადა̈რ
Line of edition: 25    ქა̈დქუცურეხ კენჭა̈ლ, ქა ლახვემხ ალ მარას. ალ მარად ლა̈ქლა̈ჲსკა
Line of edition: 26    ა̈სცჷ'ჷრე ი ალმინ ქაფიშტვ ლუჯოგდ. ჯე ღოშკინ ა̈ხეჭამ. მიჩა
Line of edition: 27    ლამოქშალად ლაღარალუშ ხელწიფი კალხოჲსა სკანა̈რეკალეხ ჲერსკნი
Line of edition: 28    ჯვეგ. ჯე კაჩხვ ჩა̈ჟშვ საწყა̈ლდ ღოშკინ ხეჭამ. ბატა̈რე მჷლდეღი
Line of edition: 29    ჲეხვდ ლიგვა̈ნი ა̈დბინე. მიჩა ლავდილას ხაჩონდახ ი ხა̈ხიადჷნხ
Line of edition: 30    მინე ლაჭაშა̈ჲ ლიმა̈რგ. მინე ხორვა უდილს გვის ხოხპახ.

Line of edition: 31       მერბა ლა̈დეღ ხელწიფ ჲერი მიჩა ლა̈ჩჟას ი ავზი აჯაღ ლათხვარხო
Line of edition: 32    ი ხომახალი ღვაშა̈ ჯვეგი ლიჴდეს. ხოშა ლა̈ჩჟა აჩადხ ლაღარალუშ.
Line of edition: 33    ღოშკინ კაჩხვ ჩა̈ჟშვ ხორვა ჩიჟე ა̈ხეჭამ. ალ მარად ჟ'ანკიდ
Line of edition: 34    მეშეხე რა̈შვი ძუა ნესკა მინდვერისა, ჩა̈ჟილდ ქაფიშტვ, ჯე
Line of edition: 35    სკა̈თეგვაწ რა̈შვი შტიმხოჲსა, მერბა შტიმხენქა ქა ლაჴად ხოჩა
Line of edition: 36    ლჷმარე. ჟი ლახასკურდა რა̈შვს, ბრა̈ქს ლა̈ხექარავან ეჯ ა̈დგილხო,
Line of edition: 37    იმა̈ჲჩუნ ერე (\ ერ) ღვაშა̈რე ჯვეგ არდა, ღვაშა̈ ჯვეგ სკვებინ
Line of edition: 38    ლახახვიე მიჩა ლამოქშალას, ლამოქშალას ათახიადჷნდახ:
Page of edition: 281 
Line of edition: 1       "ა, მინე ღერბეთ ლოქ ლახახვიახ, მინე გვეშ ხოჩამდ ლოქ ლი!"

Line of edition: 2       ალ მარად ხა̈ქვ: "აღვე ლოქ მინს ხაკუხ ალ ჯვეგ, ჟივ იყირხ
Line of edition: 3    მიშკვი რა̈შვი ნალა̈ლ შიყვი, ეჩქა ქა ლოქ ლახიდნე".

Line of edition: 4       ალმინდ მა̈ხიადა̈რ ჟი იყირხ რა̈შვი ნალა̈ლ შიყჟი ი ეჯჟი ანჩადხ
Line of edition: 5    ი ანა̈ჲეხ ლაღარალუშ ღვაშა̈ ჯვეგ. ალ მარე მიჩა კაჩხვ ჩა̈ჟს ჟი
Line of edition: 6    ლახსკურდა, რა̈შვ ქაფიშტვ მინდვერისკა, ქა̈ხეჭამ ღოშკიმ ი ამჟი
Line of edition: 7    ა̈ნჴადხ მიჩა მუმეთლა̈შხოჲსკა.

Line of edition: 8       მესემე ლა̈დეღ ხელწიფ ხომახალი მიჩა ლა̈ჩჟას ველილ ხა̈მი
Line of edition: 9    ჯვეგი ლიჴდეს:

Line of edition: 10       ჲერვა̈ჲ ლოქ ამის ჩუ იჩო. ეჩის ლოქ ხავდი მიჩა სა̈ხელწიფს
Line of edition: 11    თელდ.

Line of edition: 12       ხოშა ლა̈ჩჟა მა̈ხიადშვ მა̈დ ა̈რიხ: მინე ღერბეთ ლოქ აჯაღ ქა
Line of edition: 13    ლახიდნე ხამა̈რე ჯვეგს.

Line of edition: 14       ალე ჟი ლახასკურდა კაჩხვ ჩა̈ჟჟი, ხელწიფ დემ ფიშტვა: "ჯე
Line of edition: 15    ლოქ დემგვაშა̈ მჷსკეთელი, არდავ ა̈გის ი ბატა̈რსუ იოდეღდა!"

Line of edition: 16       ამემდ ეში მა̈დ ა̈დჯირა̈ვე, აჩად ლა̈თხვარხო. ეჩე, მინდვერისკა,
Line of edition: 17    ჟი ლა̈ჲკიდ წჷრა̈ნი რა̈შვი ძუა, სკა̈თეგვაწ რა̈შვი შტიმხოჲსა. მერბა
Line of edition: 18    შტიმხენქა ქა ლაჴად ხოჩა ლჷმარე. ბრა̈ქს ლა̈ხექარავან ეჯ
Line of edition: 19    ა̈დგილხო, იმა̈ჲჩუნ ველილ ხა̈მი ჯვეგ არდა. სკვებინ ლახახვიე მიჩა
Line of edition: 20    ლამოქშალას, მარე ათხე ეჯმინს მა̈დმა ლახვემ. მიჩემდ ნეგოზს ხოჩა
Line of edition: 21    ლჷმარე წჷრა̈ნი რა̈შვჟი სკა ლახოჴიდ ველილ ხა̈მი ჯვეგ; მიჩა
Line of edition: 22    ლამოქშალა ღვეშკინ ხა̈ჭემახ. ხელწიფს ათანაბაჟა:
Line of edition: 23       -- ჲა̈რ ლოქ ლი ალ მარე?

Line of edition: 24       ხოქვახ, ერე: -- ალე ლოქ ლი მიჩა ბატა̈რე მჷლდეღ ჩიჟე.

Line of edition: 25       ეჯ ლეთ ხოჩა ვახშა̈მ ახომარნუნა (\ ახომარნა), ჩუ ხოწია მა̈გ.
Line of edition: 26    ვახშა̈მი ლიბნალ ხორვა ჩიჟას ხოქვა: -- ხელწიფი ხოშა ლა̈ჩჟა, ქავ
Line of edition: 27    ანაწვენეხ მინე შიყა̈რ ხა̈ლხისა! ეშა ნალა̈ლ ლოქ ხატკიბდეხ.

Line of edition: 28       ეჯმინ შკურშვ ჩვალბაქელიხ. ეჩანღო ჟ'ახოკიდა ლა̈ქლა̈ჲხენჟი
Line of edition: 29    კენჭალა̈ლ, ეშხუ ეშხვემი ჲეხვიშვდ კალთა̈ხოჲსკა ათოკვარა: -- ალე
Line of edition: 30    ღოქ ლი მიჩა ჭა̈ში ნათხვარ. ათხე ალე ხაჟახჷნდავ. მერბე --
Line of edition: 31    მერბემიშვდ.

Line of edition: 32       ხელწფს ათახიადა ხორვა მიჩა ჩიჟემი ლიმა̈რგ, ჟ'ახოჴიდა მიჩა
Line of edition: 33    დენაგეზალ ლაბატარხენჟი ი ჩვათომეზრა ჲერქედემიშოდ მიჩა
Line of edition: 34    სა̈ხელწიფ.

Line of edition: 35       ხოშა ლა̈ჩჟა ი მინე ლა̈ჲეხვა მოსამსახვირდ ლახოოდა
Line of edition: 36    ეჯმინეშვდ.

Line of edition: 37       ლათ ეჩე ხვარდ, ლა̈დეღი ამეჩუნ ხვა̈რი.


Line of edition: 38 
ევგენ ქურასბედიანი. ხოფირი. ვ. თოფურია. 3.IX.1927 წ.



Page of edition: 282 
Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.