TITUS
Svan Prose Texts III (Lentekh)
Part No. 232
Previous part

Text: 232 
Page of edition: 277 
Line of edition: 13 
CCXXXII. სჷმინ ჩხარა გეზალ


Line of edition: 14       აშ ჯამეზჷრას ღერთემ! არდახ ეშხუ ჲეხვ-ჭა̈შ, ეჯმინს ხეყადდახ
Line of edition: 15    სჷმიჩ (\ სუმინ\ სემინ) ჩხარა გეზალ, ეშხუ დენა. ეშხუ ჩხარა ლახვბა
Line of edition: 16    ლასვხ ბაპა̈რ მა̈გ, მერბე ჩხარა ლახვბა -- დიაკონა̈რ, მესემე ჩხარა --
Line of edition: 17    ვოსტატა̈რ. ეჯ მარას ჲეხვ ხეყადდა აჯაღ ღანავ. ათხვ აშხვ ლა̈დეღ
Line of edition: 18    ფიცა̈რი ლატაბალხო აჩადხ ვოსტატა̈რ. ეჯ ვოსტატა̈რდ ასომახალეხ
Line of edition: 19    მინე დი-ჲ მუს: მინე დაჩვირს ახოჴიდან ხეკხოწელ ლჷლა̈ბ სა̈დილ.
Line of edition: 20    დაჩვირ ხეკვეს ათაჭემან მიჩა ლაჯმილა̈ჲ ჩუ ლჷშიდ ნათა̈რს.
Line of edition: 21    ალ ნათა̈რს ლუმა̈ხორიელლი და̈ვ. დაჩვირ წელ ლჷლა̈ბშვ ლახადენა
Line of edition: 22    და̈ვს. და̈ვს წელ მიჩა ლჷლა̈ბდ ჩვათორტყვა. ეჯმინე დაჩვირ ჲეხვდ
Line of edition: 23    ათხოჲა.

Line of edition: 24       ლაჯმილა ვოსტატა̈რ ალმა̈ღელლიხ მინე დაჩვირს, დესა ერ
Line of edition: 25    ახაჴედახ, ა̈გხო ა̈მეჴედხ. ა̈გის ყარყა̈შ ახოწოდახ მინე დი-ჲ მუეშვ:
Line of edition: 26    "სა̈დლურ იმნა̈რ ლოქ ათოდაგარახ ი მინე დაჩვირ დო ლოქ ახოვუზახ
Line of edition: 27    წელ ლჷლა̈ბშვ". დი-ჲ მუ გუდ ა̈მეჴედხ მინე ნავბედვრის ი ლიგვა̈ნი
Line of edition: 28    ათობინახ. ეჯმინს (ჲდი-ჲ მუს) ხოჭვახ, ერე: "პირდა̈პირ, მინე
Line of edition: 29    დენა გეზალ და̈ვს ლოქ ხარ ლჷჲე. ლა̈თხელიხო ლეზი ლოქ ხარხ".

Line of edition: 30       ჩხარახედა ამ ლაჯმილას ასოყედნახ მინე კადალ ი ა̈მეჩედხ
Line of edition: 31    ჯოდია-ნანჯოდას მინე დაჩვრემიშ ი წელ ლჷლა̈ბიშ ლა̈თხელიდ. ადჴადხ
Line of edition: 32    ჩხარახედა ალ მარალ ეშხუ ძღჷდ მინდვერისკა, ეჩეჩუნ ასოწვენახ
Line of edition: 33    ყივნილ ვისკვ ხვა̈ჲ ლჷშენე. მინე კადალ ჩიჲს ახოფიშტვახ,
Line of edition: 34    კადალ ჩემიშ ჟი ლახასედახ, ვისკვ ეშხუ მა̈ჩ ახონკვარნახ. ალ
Line of edition: 35    დვრეს ქა ლალსკიდნელი და̈ვ ი ჩხარახედა ალ ლახვბა ჩვათორტყვა.

Line of edition: 36       ა̈გის ხა̈ღელნახ. დეს'ერ ა̈მეჴედხ ალ ლახვბა, დიაკონა̈რს ახობინახ
Line of edition: 37    ლიზი ლა̈თხელიხო ი მინე ლა̈ჲრალ შიდ ასოყედნახ. ალ
Page of edition: 278  Line of edition: 1    დიაკონა̈რს ლა̈ჲდი ამეჩუნ ლახაჴედვნახ. ალმინს ლა̈ჲდი ახოფიშტვახ
Line of edition: 2    მინე ლა̈ჲრალ ყივნილ ვისკვდ, ვისკვ მა̈ჩ ახოკვარნუნახ. ეჯმინე
Line of edition: 3    ლა̈ჲრალ მა̈გ ჟი ლახასედახ. ალ დრვეს ქა ლალსკიდნელი მინე დაჩვირ:
Line of edition: 4    "ჲა̈რ ლოქ ლიხ მინ? ეშხუ ნეპოლ ლოქ ერ არდეს. ეჯჟი
Line of edition: 5    ლოქი ხეჩომდახ მინს ი ამჟი". ლახვბას ხოქვახ: "ნეპოლა̈ლეშ მინს ლოქ
Line of edition: 6    მა̈დმა ხოხალხ, მინ ლოქ ხეთხელიხ დაჩვირს, წელ ლჷლა̈ბს ი ჩხარა
Line of edition: 7    ლახვბა ვოსტატა̈რს". დაჩვირ გუდ ა̈მეჴედ, ერე ალმინ ლჷმა̈რხ მიჩა
Line of edition: 8    ლაჯმილა. სკადა̈ჲე ქორხო, ჩვადაბეჟვნე ჩხარახედა გვალისა. ნებოზს
Line of edition: 9    და̈ვ ანჴად, ეშხუ ბარჯჟი ხაზჷდა ბიკ, მერბა ბარჯჟი -- ნათხუარე.
Line of edition: 10    და̈ვს ხოქვა მიჩა ჲეხვიშვდ, ერე "ქრისტიანა̈რე ქვინ ლოქ ხოჴან".
Line of edition: 11    დაჩვირს მა̈დმაბედიგვეშ ლახოტიხა, ლიგვა̈ნი ათობინა ი და̈ვს ქა
Line of edition: 12    ლახაკვეშა, მიჩა ლაჯმილა იმა̈ჲჩუნ ღენ ხა̈პეჟვნვნა. და̈ვს ეჯმინ
Line of edition: 13    ჩვათორტყვა მა̈გ ეში.

Line of edition: 14       ა̈გის ხა̈ღელნახ დიაკონა̈რს ი, დეს' ერ ა̈მეჴედხ, ბაპა̈რ ა̈მეჩედხ
Line of edition: 15    ეჯმინე ლა̈თხელიხოი ჯვარა̈ლ შიდ ასოყედნახ. ბაპა̈რს ლა̈ჲდი ლახაჴედვნახ
Line of edition: 16    ამ ყივნილმოყ ი ჩვათოთირახ მინე ლახვბა̈ჲ კადალ ი ლა̈ჲრალ.
Line of edition: 17    და̈ვს ჩვასოწვენა ბაპა̈რ ი ჩხარახედა ეჯმინი ჩვათორტყვა.

Line of edition: 18       ა̈გის ალმა̈ღელლიხ ბაპა̈რს. დეს' ერ ა̈მეჴედხ, დის ი მუს ეჯმინეშვდ
Line of edition: 19    ლაგვა̈ნ ხოჩომნახ ჩემიშვდ.

Line of edition: 20       ა̈მეჩედ დრო̈. ეჯ ჲეხვ-ჭა̈შს ახათენახ ხოჩა ჭყინტ. ეჯ ჭყინტ
Line of edition: 21    ლეთშვ ლჷმა̈ცხემლი კამილს ი ლა̈დეღშვ -- ირთხინს. ჭყინტს
Line of edition: 22    ახოსყევნუნა მჷშკიდიშედ ცხულა̈ჴემატ. ეჯ ჭყინტს ხალატენა ლიცხუტანა̈ლ
Line of edition: 23    ცხულა̈ჴემატიშ. აშხვ ლა̈დეღ მინე ა̈ზვისა ლიცე მჷესკალა̈ჲშვდ
Line of edition: 24    შედა̈რ ათოკუშურა. ეშხუ ზურალ ჟ'ახახირნა ი ლახოქირდავა:
Line of edition: 25    "ჯე ხოჩა ჭყინტ აღვე ლოქ ლი, სჷმინ ჩხარა ლახვბა, დაჩვირ
Line of edition: 26    ი წელ ლჷლა̈ბ და̈ვს ლოქ ხაყა ი ეჩეჩუნ ლოქ ხაწჷხ ლიცხვაპანა̈ლ
Line of edition: 27    ცხულა̈ჴემატიშ!" ჭყინტ ა̈გხო ა̈მეჴედ ლჷხრინად: "დედე, დია̈რ
Line of edition: 28    ლოქუ ახონა̈ყე!" ყველფხენქა მჷფარფალი დია̈რ ჟ'ახოკიდა ი მიჩა
Line of edition: 29    დიეშვდ ლუსვა̈რჟი ასოდა: "ქავ ხაქვ: იმე ლოქ ა̈რიხ მიჩა ლახვბა
Line of edition: 30    ი დაჩვირ?" დის ლიგვა̈ნი ათობინა: "მიჩა ცოდუ ლოქ ხა̈ცვ, ჲერვა̈ჲს
Line of edition: 31    ლოქ ჯე ათოფეთინს!" ი დი ჩია̈გვაშ ქა ლახაკვეშა.

Line of edition: 32       ჭყინტს ახოშკადუნა მჷშკიდიშვდ ხოჩა ცხულა̈ჴემატ ი ა̈მეჩედ
Line of edition: 33    ჯოდია-ნანჯოდად ლახვბა̈ჲშ ი დაჩვრემი ლა̈თხელიდ. ალ. ჭყინტ
Line of edition: 34    ა̈მეჴედ ეჯ ვისკვმოყ, იმა̈ჲჩუნ მიჩა ლახვბა ლჷმა̈ჴედენლიხ. ჭყინტს
Line of edition: 35    ახოფიშტვა ცხულა̈ჴემატ ი აშხვენჟი ვისკვეშვდ მა̈გ ჟ'ათოხლინწა ი
Line of edition: 36    მერბახენჩუ ჩვახოხლინწა. ამ დრო̈ს ქა ლალასკიდნელი მიჩა დაჩვირ:
Line of edition: 37    "ჲა̈რ ლოქ ლი ჯე? ჲა̈რს ლოქ ხეთხელი?" ჭყინტს ხოქვა: "ჯე ლოქ
Line of edition: 38    ხეთხელი სჷმინ ჩხარა ლახვბას, წელ ლჷლა̈ბს ი დაჩვირს". დაჩვირს
Line of edition: 39    ლიგვა̈ნი ახაცქეფა, სკათხოჲა ქორხო ი ახარახ გარგალა.
Page of edition: 279  Line of edition: 1    ჭყინტ ლახაჭვედნა დაჩვირს: "იმჟი ლოქ ხოჩა ეჯ და̈ვი ლიდაგა̈რი?
Line of edition: 2    დაჩვირს ხოქვა: "მიჩა ჭა̈შს მა̈დმაბედი გვეშ ლოქ ადგა̈რი. ეშხუ
Line of edition: 3    ლახვისა ლოქ ა̈რი ტა̈ხ, თხვიმისა სემი შტავალ ლოქ ა̈რი ი ეჯმინს
Line of edition: 4    ლოქ ჲრვა̈ჲ თხუმა̈რს ქათაქუცური, და̈ვ ლოქ შიშტ ჩუ იდაგა̈რი.
Line of edition: 5    ეჯ ტა̈ხს ლოქ ადაგა̈რი და̈ვი ნა̈სიანშვ ცხვი ლჷფრე". დაჩვირდ
Line of edition: 6    ლახოფულე ჯჷმილს ი ლა̈ცხენირდ ასასიპე. ნებოზს და̈ვ ანჴად,
Line of edition: 7    ანჴიდ ნათხვარე. სკასაგე ი ვახშა̈მი ლისყეჲ ა̈ნბინე. და̈ვდ ხა̈ქვ მიჩა
Line of edition: 8    ჲეხვს: "ქრისტია̈ნი ქვინ ლოქ ხოჴან". ჲვხვდ ხა̈ქვ: ქრისტია̈ნი
Line of edition: 9    ქვინ ლოქ მა̈დ ხეჴა̈ნივ, ჲერბეშტიიშკვიდ ქრისტია̈ნ ჴა̈დ (\ ჴა̈დს)
Line of edition: 10    ლოქ ხოზ". და̈ვ ჩვადაჯირა̈ვე ი ეჯ ლეთ ახადახ ლითრე. და̈ვს არა̈ყს
Line of edition: 11    ხათრა ი ჯე ლიცს ჷთრა. და̈ვ ჩვა̈დშტჷმან. და̈ვს ჟ'ახასჲერნუნდა,
Line of edition: 12    მიჩა ჲეხვდ ტა̈შტ ახოჴიდ. და̈ვდ ჟ'ანაგოშლე ტა̈შტ მიჩა ნა̈სიანშვ.
Line of edition: 13    ეჩანღო ჩუ ლახაგედდა.

Line of edition: 14       მერბა ძინა̈რს და̈ვ დოსკ ანგან. ლათხვარხო აჩად. ზურალდ
Line of edition: 15    ლახოფულე ლა̈ცხენირს ი ჯჷმილდ ასასიპე. ჯჷმილდ ქანაფჷრე
Line of edition: 16    ცხვი და̈ვი ნა̈სიანქა ი ალე ლა̈ჲდი აჩად ტა̈ხი ლათხვარხო. ეჩე
Line of edition: 17    ჭყინტდ ჟ'ახოდარა̈ჯე ტა̈ხს, ახაფიშტვ ხულა̈ჴემატ, ხა̈ჴიდ ი ჩვა̈დმერჩლე.
Line of edition: 18    და̈ვ შიშტ ლეგდ ადჴად, ქა̈ხეჭამ ჭყინტე ნაზვს. ჭყინტდ
Line of edition: 19    თე ახოჩიშ და̈ვს, ეშხუ შტავალს კინჩხ ათაქვიც. და̈ვდ ლიბოდა̈ვი
Line of edition: 20    ა̈დბინე: "ნომავ ადგა̈რი, მა ლოქ ხაკუ, ეჩის ლოქ ხეჩო. ეშხუ
Line of edition: 21    შტავალ ეშიჲ ქავ ლახვემ!" ჭყინტდ ხა̈ქვ: "ჟივ ანალუვა̈რე მა̈გ მიჩა
Line of edition: 22    ლახვბა, წელ ლჷლა̈ბ ი ეშხუ შტავალს ქა ლოქ ლახიდნე". და̈ვდ
Line of edition: 23    ჟ'ანშიდ დიაკონა̈რ. ბაპა̈რ. ვოსტატა̈რ მა̈გ ი წელ ლჷლა̈ბ. წელს
Line of edition: 24    ლიყული ათობინა მა̈ხიადშვ. ჭყინტს და̈ვიშერ მა̈დ ლახოვოდა
Line of edition: 25    შტავალ ი შტავალა̈შვდ კინჩხ ათოქვიცა. და̈ვ ჟ'ალუნჴველი ი ჩვალდაგა̈რ.
Line of edition: 26    ჭყინტს ჩვასობწკარა მიჩა ლახვბა, წელიშვდ დაჩვირ ლახოჭემნა,
Line of edition: 27    ლაღარალუშ ყორს ლახაგენახ მინე დი-ჲ მუს. დი-ჲ მუს ძღჷდ
Line of edition: 28    ათახიადახ, ჩუ ხოწიახ მა̈გ მეზობელა̈რ ი სემი ლეთილა̈დეღ ხარახ
Line of edition: 29    ქეიფ უქვიცად.

Line of edition: 30       ლათ ეჩე ხვარდხვეს, ლა̈დეღი ამეჩუნ ხვა̈რი. აშ ჯა̈მეზრახ
Line of edition: 31    ღერბეთდ!


Line of edition: 32 
ევგენ ქურასბედიანი. ხოფირი. მ. ქალდანი. 2.IX.1927 წ.



Next part


This text is part of the TITUS edition of Svan Prose Texts III (Lentekh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.