TITUS
Svan Prose Texts IV (Lashkh)
Part No. 32
Previous part

Text: 32 
Page of edition: 40 
Line of edition: 1 
XXXII. ლალქანა ი ქან


Line of edition: 2       სგურალე ლიჯშა̄ლი მე̄ვარ დო̄სგა დროჲხენისა ანღრი შვანისა,
Line of edition: 3    ეჯღა ქანს მე̄ვარ ლუგვნიანდ ხოგდურიხ ჩჲა̄გ. ლალქანად მაჩე̄ნე
Line of edition: 4    გიმ ხუღვა ლუცვი̄რ ჩი̄ს ქორი ლესგმჷყ, ჲეზვისა, ლარტამცახან ი
Line of edition: 5    მე̄ვარ ხო̄ზნანიხ ლალქანა̄ჲა̄ქ გიმი̄ლს. ქა ლუწვი̄ლა ასუშსი̄ სგა
Line of edition: 6    ხოგად ლალქანად. ჴედნი ქრისდე̄ში უჭმისა ჩი ზაჲ ლუწვი̄ლე ასუშ
Line of edition: 7    ი აჲეს ქანა ნა̄თის ქა ლჷტმჷ̄რას ვოდ ლუვარ ი̄რდი. ამშა ვარ და̄ს
Line of edition: 8    ხა̄ჲმედა ი ხა̄ლ ეჩქად, ათხეჲ ეჲჟი ოსღვახ ლა̄ჲსუშას მინე
Line of edition: 9    ლამვერალხენ ქანა ნა̄თი.

Line of edition: 10       ქანა გიმბაშიშს ანყა̄ლიხ ქჷნშა̄რალს ი ლითო̄დრი ლადეღ
Line of edition: 11    ლაზჲარება̄ლჟი ქჷნშა̄რალს ანყა̄ლდახ ათხად ლჷდგარუ ნაჯგრუნდ.
Line of edition: 12    ლაგვა̄ნა-ლაშთხვა̄ლჟი ლა̄ჲდი ქჷნშა̄რ დიარალურაჲ მა̄ ხოყე̄დახ.
Line of edition: 13    გიმბაში ზეთს აზთუნახ ი ათხე̄ჲ აზთუნეხ ი მე̄ვარ ლუგვნიან
Line of edition: 14    ხა̄რხ ზეთ. ლჷდგარუს ამჟი ხოშჷნდობიხ: "ზეთ ლჷჯგირდუ
Line of edition: 15    ლოქ ლახზაზენა". უჭმისა დე̄სამა ღჷნმაღჷნ იჩმი̄ნი, ერე ქჷნშა̄რალ
Line of edition: 16    მო̄დ ანნაყახ ი ზეთ ლა̄ჲდი̄ მო̄დ ანზეთვნახ. გიმბაშს ხოჩა ზეთ ხაზნა
Line of edition: 17    ი ვო̄ბაში̄ ხეფსი ი ამღა ხოგდურიხ ქანს ამჟი ლუგვნიანდ
Line of edition: 18    შვანისა. ნაწვარ ლახ ე̄მთე ხა̄რხ ლეჲეს ლჷდგარა პატრონთე ი ჲედ
Line of edition: 19    ნაკვჲა̄ლუნ ე̄სა ხა̄რხ ლეჲეს მახა ნასედ ზურა̄ლთე ი ჲედ აშ
Line of edition: 20    აქმა̄რათე, ეჩქა გიმბაშ ლახ შიდ ხუღვახ, ჩი̄თე ქა̄ბდავიხ ნაკვჲა̄ლუნი
Line of edition: 21    ლიჲესს ი ნაწვარიშსი̄.

Line of edition: 22       ლალქანას მახა ლუფხვს ალა̄შიხ ი მუჟღორთე ნაღალდ ჟი
Line of edition: 23    იკედხ, მარა ქანი ლაკედჟი ჲერუ რიგი ქანს ათშიხ: ჴერჴლას ი
Line of edition: 24    დედლას. ჴერჴლას ხოჩა თეკვარ ხეფსიხ, დედლა̄ ქანს ხეფსი ხოჩა ქიპარ.
Line of edition: 25    ჴერჴლა̄ ქანს თეკვარდ, მაჩხრანალდ ი ნე̄სკო̄რალდ აშტრანა̄ლიხ ი
Line of edition: 26    დედლა̄ ქანს ქიპარდ იჴმარიხ ი სგურალს აჯშა̄ლიხ. ჴერჴლა̄ ქანა
Line of edition: 27    მაჩხრანალს აშტრანა̄ლდახ ეჩქად ი ვონ ქალაქთე აჲესდახ ლევდიდ
Line of edition: 28    ქაფარშვ ი ჲედ ჩა̄ჟარშვ ი ეჩხენისა მაჩხრანალე ნაფასშვ იშგენ
Line of edition: 29    ბარგი̄ლარს ჴგდახ ვონ ქალაქხენ, მარა ათხე̄ დროჲჟი და̄რ აშტრანა̄ლი
Line of edition: 30    მაჩხრანალს ი და̄ს ოსღვა ლევდიდ ვონთე. მაჩხრანდ აშტრანდახ სემი
Line of edition: 31    თეკვს ეშხუდ, ჲედ სემი ნე̄სკო̄რს ი მე̄ვარ მენგრე ი მეგჭე ხეფსო̄ლ ი
Line of edition: 32    ვონს მჷრ ხაწხჷ̄ნხ ამკალიბ თეკვარ. მაბჟა, ჭემარე ლაჭო̄ნად
Line of edition: 33    ხაწხჷ̄ნხ მაჩხრანალ ი ჟიქა̄ნხენჩუ ჩუ ლაგვრანდ მულქვაჲთე ი ჩუ დე̄მ
Line of edition: 34    ქვეცნო̄ლ ამჟი მენგრე მაჩხრანისა ქა ლჷჭო̄ნე ჭემ ი ჩუ დე̄მ იპი̄ნტო̄ლ,
Line of edition: 35    მარა ათხე̄ დროჲჟი და̄რ იყდიხ ი დეთა̄ჲ ე̄ს ოსღვახ ლევდიდ
Line of edition: 36    ი დეთა̄ჲ ე̄რ ასყიხ მაჩხრანალს.

Page of edition: 41 
Line of edition: 1       ქანა სგურალეჲა̄ქ დედლა ქანს ჯიჯვი ნაკვიშუ̄ლშვ ჩვასნჷდახ
Line of edition: 2    ზურალე̄ლ ი ხოჩა წყჷლჲან ხეფსო̄ლ ქიპს. ლჷსან ქანა ქიპს იჴმარდახ

Line of edition: 3       ჩიმი ლაშხბჲელა̄ლდ. მე̄ვარ ბჷგი ლი ი ბჷგი ლეშხბი ერ ე̄სამა
Line of edition: 4    ხუღვახ, ლჷსან ქანა ქიპს იჴმარიხ. ქა̄ჲ აჯბჷდახ ქანა ქიპარს ი
Line of edition: 5    ხოჩა ფერს იყდა̄ნდა.

Line of edition: 6       თეკვარს აშტრანიხ სევა ნათლუნდ ლაჯვდიაშს ი ლატფიაშს ი

Line of edition: 7       ჴანარე ლეთხვმარა̄ლს ლა̄ჲდი̄, ჩაფლარე ლო̄ბრა̄ლს, ნევო̄ლარს
Line of edition: 8    ჩაფლარე ლაშხებდ ი ხვაჲს ამკალიბ იშგენ სამწგხე̄ლარს. თეკვარს
Line of edition: 9    თხუმვარისა რიკალს ხაბემხ ზექიშს ი ეჩქა ხოშა ბჷგიდ ხეთი̄ლი სევს
Line of edition: 10    თეკვ. მექვრა თეკვს ი ჯვინელს მა̄ ხაყა სევა ლათლჷ̄რად, შიშდ ჩუ

Line of edition: 11       ქვეცნი. ლალჴანიჟი ი ლინჭლიჟი ჩიგარ მახა თეკვარს იჴმარიხ.
Line of edition: 12    თეკვარს ჟი ინტა̄ლიხ ი ეშ ხოშხვნახ ლაზჷსკ აგის. ჟი უნტად
Line of edition: 13    თეკვარს დე̄მ იშხვნიხ.

Line of edition: 14       ლალქანას ერ ჟი იკედხ, ქანა ბიდირს ქა ლჷბე̄ნგვას ჩვაშხვნიხ
Line of edition: 15    ლუნთისა ხამარე ლექუ̄ნცად ი ლჷტმჷ̄რა ნაკვაჩხს ჩვაშხიხ ჲეზვისა.
Line of edition: 16    ქანა ბურდალს იჴმარიხ გვალისა ლენგვლი̄ ნაჭვბე̄რუნდ ლუნთისა.

Line of edition: 17       თეკვარს აშტრანა̄ლიხ ღვერეკვშ ჲერს ჲერუ ფად, ჲერს სემი
Line of edition: 18    ფად. ქანა ნაპირუ̄ლარს ასყა̄ლიხ ი თვით ჩიდს ხოჩდიხ ღვერეკვშ
Line of edition: 19    ლიშტრანჟი.

Line of edition: 20       ამჟი აშტრანა̄ლიხ ჯო̄დის ი მეკვშდა თეკვარს.


მარინე ონიანი. ჩიხარეში. მ. ქალდანი. 10. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.