TITUS
Svan Prose Texts IV (Lashkh)
Part No. 40
Previous part

Text: 40 
Page of edition: 53 
Line of edition: 31 
XL. ლერექვ


Line of edition: 32       ჯვინელდ ლერექვდ სგური არშულ-ფატან ხაღვე̄ნახ. ლალქანე̄ლ
Line of edition: 33    ჩი̄ს ხაღვე̄ნა მიჩა-მიჩა ჲეზვისა ი ლჷმლა̄შინხ ქანს მასარდ. ქანს
Line of edition: 34    ათხე̄ჲ ეჲჟი ალა̄შიხ, იმჟი̄ ერე ჯვინელდ, მარა ათხე სგურალს და̄რ
Line of edition: 35    აჯშა̄ლი. ჲესიჲეს პირსახოცია̄ქ სგურალს აჯშა̄ლიხ ათხე̄ჲ, მარა იქჲა̄ქ
Page of edition: 54  Line of edition: 1    გარ. ჯვინელდ აგის ნასყეჲ სგურალს ჩუ ლჷმღაფინხ წვანილდ.
Line of edition: 2    ლაღფენა̄რალ ათხე̄ჲ ხვაჲ ხოთრახ: გაკა ცილ, ბელყეჩი ცილ,

Line of edition: 3       გოწხირი ცილ ი იშგენ აჯაღ ხვაჲ ბალახ-ბულახო̄რა. ჲესჲეს ათხე̄ჲ
Line of edition: 4    ხვა̄ჲდინ აღფენა̄ლიხ ამკალიბარშვ.

Line of edition: 5       ზურალე̄ლ მაგ სგურიშ ი შალო̄რა̄ მჷსყი ლჷმა̄რხ, ლადეღვშ
Line of edition: 6    ლინშაჲე ი ლე̄თშვ ლილთე ხა̄ლ მოშ ყვიჩრე ლიტუ̄ლა̄ლნუნ, ეჩქა
Line of edition: 7    გარ ლჷმყვინო̄ლინხ ჩუ. ქანა თხუმვარ ხაღვე̄ნახ სგურალეჲა̄ქდ.
Line of edition: 8    დედლა ქანი ნაყვილუ̄ლარს ჩუ ლჷმსანინხ ჯიჯვი ლასნა̄რშვ. ლასნა̄რ
Line of edition: 9    მანჷრა ლესგი ქიპი ნაკვიშ ლი. ჩუ ლჷსნან ქანს ლჷმსყეინხ,
Line of edition: 10    ლჷმლეთინხ ჩე̄რიჟი ქიპარდ. ქანა ნაყვილ ქიპ ლალთაჟი ჴარჴისა
Line of edition: 11    ხოყდა̄ნახ ი ჴარჴვშ ნამძღირს აშტრანიხ ქიპარდ. უძღრად ხოჩა ქიპ
Line of edition: 12    დე̄მ იშტრანი. ლჷმმა̄რინხ ამკალიბდ ხვაჲ ქიპარს, ჭა ლჷმჯაბინხ

Line of edition: 13       ნაცჷრცხელისა ქანა ქიპარს, ერე ხოჩა მე̄ნშგვე ქიპ ახფასე̄ნ. ამჟი
Line of edition: 14    ლჷმა̄რად ხაღვე̄ნახ ლაჯშა̄რალ ი ლჷმჯიშინხ სჷურალს. სგურალეშს
Line of edition: 15    ლჷმშხებინხ ფატნიარს ი არშვლარს. ჲერხი ჩუ ლჷმღაფინხ არშვლარს
Line of edition: 16    წვანილ ფერიშდ. არშულქა̄მენ ჯვინელდ შარვლარ მა̄მ ხაღვე̄ნახ.
Line of edition: 17    არშვლარ ლჷმა̄რხ ეჲჟი ლჷშხებ, იმჟი̄ შარვლარ, მარა ჯიბჲარ
Line of edition: 18    მა̄მ ხაგმე̄ნა ეჩხენ-ამხენ, ათხე ერ ხო̄გხ ეჯჟი. ეჩხენ-ამხენ ეჩქად
Line of edition: 19    შიარე ლაქვჭენ ლჷმა̄რ ჩუ ლუცვი̄რ, ათხე ერ ჯიბჲარს ხოგემხ, ეჩეჩუ.
Line of edition: 20    ალჲარს ხა̄ჲშხე̄ნახ სასულარ. სასულართე̄ჲსა ლჷმყი̄ნხ სგა შიარს
Line of edition: 21    მჷცხიჟი ლატბიდად. ამღა ხაღვე̄ნახ ლუცვი̄რ შარვალისა სასულ.

Line of edition: 22       ფატანქა̄მენქა ვოსარს ლჷმქვემინხ შალიშს. ვოსრი ვერ ჲედ
Line of edition: 23    მეშხე ი ჲედ ქურუხვ. შალარს აგის ლჷმჯიშინხ ი ათხე̄ჲ ხვა̄ჲ აჯში.
Line of edition: 24    შალარს ისგეურა̄ლ (//ეჩხე̄ შვანარ) ერ ასყიხ, ეჩთანარს -- დე̄მე ლადი̄
Line of edition: 25    ლადეღჟი შვანისა. ვოსრი ჴვენჟა̄რ ეჲჟი მაშრი ლჷმა̄რხ, ერე ალაბ
Line of edition: 26    ღო̄თ ნამშარან. ვოსარს ლაქლაჲრ ხაგმე̄ნა. ლაქლაჲრთე̄ჲსა ლისგვრე̄
Line of edition: 27    ლადეღ ქილჲარ ხაღვე̄ნახ სგა ლჷსყე ი ლათხვიართე ლა̄ზჟი
Line of edition: 28    მასჷლი ქილჲარ ჟაგვშ ხა̄რახ გოში. მუგვალი ნაქვიცი̄ ლაქლაჲრისა

Line of edition: 29       ხაჩხინე̄ნახ მჷწჷხჟი ლემსგი ლა̄შვად. ზურალე̄ლს ხაქვმე̄ნახ ჯო̄დი
Line of edition: 30    ფატნიარ, ჭიშხარნუნ მეჲა̄ლ. ალე ლჷმა̄რ წვანილდ ლჷღაფ სგურიშ
Line of edition: 31    ი ლაქა̄მდ ლექვემ. სადაგდ ლექვემ სგური ფატან მა̄მ ლჷმა̄რ
Line of edition: 32    ლჷღაფ. ხვაჲს ფატანჷნქა სგა დე̄სამა ხაქვმე̄ნახ ლიჩმი̄ ლადღარჟი.
Line of edition: 33    ლელსგურე̄შად ლჷმქვემინხ კაბს ჯო̄დის ი მე̄ვარ ლუხუ̄პას სგობინღოშგინ.
Line of edition: 34    ლა̄რტყდ ლჷმთილინხ ლჷჩიჩხვ პირსახოცი მაჯო̄ნ სგურს.
Line of edition: 35    ლამა̄რდ ლჷმქვემინხ ლჷღაფ სგური კაბს, ჩუქვა̄ნქა ქა ხასვმინახ
Line of edition: 36    შდიხჷ̄ნდი კვედლი ტკიცს, კვიდო̄ლი თხუ̄მს ერ ხაჭიმ მურგვალ ტკიც
Line of edition: 37    გურუზდ, ეჯკალიბ შდიხჷ̄ნდი ტკიცს ი სგა ლუქვე კაბ ჩუ ლჷმარდ
Page of edition: 55  Line of edition: 1    ჩუქვა̄ნა ქა ლჷბე̄ლე ქორგაშა̄ლ. ამკალიპ კაბარს ლამა̄რდ
Line of edition: 2    გარ ლჷმქვემინხ. შომასი̄ ერე ბარდნორა̄ ლიჴდე ალბინე̄ლი, მანკვი
Line of edition: 3    ამრიკაჲ გარ ხაღვე̄ნახ ი წვანილდ ლჷღაფ ამრიკა̄ჲ კაბარს ლჷმშხებინხ.
Line of edition: 4    ამშა მაშყდვა̄რ მა̄რე̄ლ ათხე̄ჲ სიდხ ჲერხი.

Line of edition: 5       ჩაფლარღ ღვაჟარს ი ზურალე̄ლს ჩი̄ს ტუფი ჩაფლარ ხადე̄ნახ.
Line of edition: 6    ლამა̄რდ ი ლელსგურე̄შდ -- ლჷ̄ჲჭვე ი მეშხად ლჷღაფ ჩაფლარ, ლამე̄ვარდ
Line of edition: 7    -- უ̄ჲჭვა ჩაფლარ; ლათხვიართე ლა̄ზჟი ხოფშირა̄მინ ჯაბრალ
Line of edition: 8    ხადე̄ნახ. ხოჩულ ლამარგიშ ხა̄რახ ჯაბრალ ლათხვიარჟი. ზურალე̄ლ
Line of edition: 9    ლუნთისა ღუნიშ ჲედ ღოლჲა̄ქა ჩაფლარს ლჷმდე̄სინხ ლჷფათვდ
Line of edition: 10    ქა̄მენ. ჭიშხისა ჩაფლარე სგა̄მენ ნანხუნ ლჷმა̄რ წერექვ. ზურა̄ლ
Line of edition: 11    ჯოდდ მე̄ზი მა̄ ლი ი ღოლჲა̄ქა ჩაფლარ აგის ლარდაჟი ეში̄ ჩუ
Line of edition: 12    ხაგჭენო̄ლნახ. შარვალიშ ჲედ არშული ქა̄მენ ღვაჟარს ხადე̄ნახ
Line of edition: 13    ზეთჴარა̄ლ. ზეთჴარა̄ლ აშ ჯო̄დი ხახლე̄ნახ, ერე ღულა̄ჲ თხუმვარს ძღჷდჟი
Line of edition: 14    ხასრო̄ლნახ, თელდ მაჴვშდაგა̄რსი̄ ჩუ ხალფარნახ. ზეთჴარა̄ლ
Line of edition: 15    ხადე̄ნახ ლუხუ̄პად თხუმნეშ ვოკერნუნ. ჲერხის ზეთჴარა̄ლქა̄მენ
Line of edition: 16    ხადე̄ნახ, ღულა̄ჲ თხუმნეშ მაჴვშდაგა̄რნუნ, სამუხლარ. სამუხლარ
Line of edition: 17    ხაცხე̄ნახ მე̄რმა ფერიშ: წჷრნი ჲედ თვეთვნე. ზეთჴარა̄ლ ი სამუხლარ
Line of edition: 18    მაჷ ლჷმა̄რხ შალიშ. ზეთჴარდ ხოცხახ სგელ შალ, მუსისა დე̄მ
Line of edition: 19    იძღრი. ზურალე̄ლ ზეთჴარა̄ლე მჷქაფ ღულა̄ჲ თხუმნუნ წჷრნიდ ლჷღაფ
Line of edition: 20    სგური ლესკელიარს ლჷმდე̄სინხ. არშვლარ ხადე̄ნახ ჭიშხარნუნ
Line of edition: 21    მეჲა̄ლ ჯო̄დი ი ვოკერთე წჷრნიდ ლჷსპირე ქა̄მენქა. ათხე ბარდნი
Line of edition: 22    მეკჷეშდ არშულე̄ლარს იდე̄სხ.

Line of edition: 23       ღვაჟარ თხუმჟი ლჷმგემინხ კოჭო̄ლ ნაბდი ფაყო̄ლარს. ალ
Line of edition: 24    ფაყუ̄ლარს აგის ლჷმსყეინხ ი ეჯჟი კოტო̄ლუ̄ლარ ლჷ̄მა̄რხ, ერე თხუმე
Line of edition: 25    კეკეფო̄ლარს ვედშვ ხალფარნახ ი ქა ერ მო̄დ ახშყედა̄ნხ კეკეფაჲხენჩუ,
Line of edition: 26    სგა ხაბმინახ ქანა ქიპი ლჷშტრანე ზორანე̄ლს ი ზორანე̄ლს ჩუ
Line of edition: 27    ლჷმცხიპინხ კაპრაჲ ჩუქვან ი ფაყუ̄ლს ქა ლიშყედს დე̄მ ხამბინა. ალ
Line of edition: 28    ფაყუ̄ლს ხა̄ჲშხუნა კაკულ.

Line of edition: 29       ზურალე̄ლს ხალტე̄ნახ ურიბ ი აყბა̄რჟი ლჷჭო̄ნე ლჷმა̄რხ.
Line of edition: 30    თე̄რალჷნქა ი ლეფხვნანქა დე̄სამა ხათრო̄ნახ. ამკალიბდ ათხეჲ ხვა̄ჲდინ
Line of edition: 31    იჭო̄ნეხ ნიჩვარს ზურალე̄ლ ი ეჲჟი იზელა̄ლხ ჩი̄თე. გვიანდ ემჴედე̄ლი
Line of edition: 32    დარიჲე̄ლ ი ძღჷდ ხალტე̄ნახ ალე̄ჲ. ამშა გუნღა ზურალე̄ლ თეს
Line of edition: 33    ლჷმცხიკინხ. ურიბს ერ ლჷმფარინხ თხუმჟი, განქა მე̄რმა ურიბს
Line of edition: 34    ლჷმთილინხ.

Line of edition: 35       ღვაჟარ ავდრა̄ლობჟი, მჷცხიერუ̄ჲს", ბუქვობჟი ფაყვცახან
Line of edition: 36    ლჷმგემინხ ბაშლაყს. ბაშლაყარს ლჷმსყეინხ თვეთვნე ჲედ ქურუხვ
Line of edition: 37    ფერიშ შალიშს. ღვაჟმა̄რემი ლა̄რტყ მანგრა ტუფიშ ლჷმა̄რ. ხაგმინახ
Page of edition: 56  Line of edition: 1    ბალთაჲს ი ხარჯიკე̄ლარს ნამსგვენე̄მი გუ̄ნღა. ლა̄რტყხენჩუ ჩუ
Line of edition: 2    ხარკე̄ნახ ქესაჲშა̄ლ მჷსყე, სუმკო̄ლშა̄ლ კუთხ ტუფი კისაჲ. კისა̄ჲსა
Line of edition: 3    ხოსყახ კაჟ, კვეს ი აბედ. ჲერხის ლათხვიარჟი ვაზნაჲ ხაწბე̄ნა
Line of edition: 4    ლა̄რტყლექვა. ლა̄რტყჟი სგობინისა ხაწბე̄ნახ ხოჩა, ბჷგი ლუმუჭ მეშხე
Line of edition: 5    ხანჯრალ.

Line of edition: 6       ზურალე̄ლე ლა̄რტყალ ტყელ ლჷმა̄რხ. ჲერხის თეთრი ბალთა̄რ
Line of edition: 7    ხაგმე̄ნა ი ქა ლჷმლა̄რტყინხ ლამა̄რდ ლისგვრე ლადეღ, ჲედ
Line of edition: 8    ქორწილთე ლა̄ზჟი. თეთრი მჷსკდარ ხოცხახ ვოქრეშსი̄ ათხე ლა̄ჲდი̄.
Line of edition: 9    თეთრი ლეშტმარა̄ლ ხაბმე̄ნახ ი შტიმრა̄ლ ჩი̄ს ქა მეფტე ხა̄რახ
Line of edition: 10    ზურალე̄ლს. შტი̄მელარს კოჭო̄ლობნეშ ხოფტჷ̄რეხ დი̄ნო̄ლარს. ჯვინელდ
Line of edition: 11    სგობინჩუ, მუჭოდლექვა, ლჷმრიკინხ ჩაფრასტა̄ლს. ჩაფრასტა̄ლ
Line of edition: 12    თეთრიშ ლიხ ტყელდ ლჷშკა̄დე ი ლუშდბუნე თეთრი მჷშკდარეშ,
Line of edition: 13    ხედჲარი̄ ჯვინელდ ლჷმარდხ შვანისა. ჩაფრასტა̄ლ ძღჷდ ლუგვნიან
Line of edition: 14    ლიხ. ეშ ღი̄ვეხ თვეთვნად ზურა̄ლა მუჭოდჟი ჩაფრასტა̄ლ. ჩაფრასტა̄ლს
Line of edition: 15    მაგ დეშ ითხე̄ლი. ჩაფრასტა̄ლ ხოჩა მაღვე̄ნიან ზურალე̄ლს გარ
Line of edition: 16    ხუღვახ, ოდო ჩი̄ს მა̄დე. ეშხუ ხოჩა ფურდ ხაჯეშ ჩაფრასტა̄ლ. ჲესვა̄ჲ
Line of edition: 17    ჩუ ე̄სამა ხე̄ჲმედა̄ნ, უშხვა̄რე ლატო̄ქა̄ლისა ჩაფრასტა̄ლს იყდჷდახ
Line of edition: 18    ზურალე̄ლ.

Line of edition: 19       ნა̄რგილ თეთრი მჷშკდარ ჩაფრასტა̄ლჷნქა აშკა̄დიხ ი ლჷმშკა̄დინხ
Line of edition: 20    თეთრი ღირკლარს, ყვიჩს ი დედვს, სგობინჟი ჟიბეტანი ლაბნჷ̄რად. ღირკლარს
Line of edition: 21    ზურალე̄ლჷნქა ღვაჟარი̄ ისყიხ საგულლექვა.
Line of edition: 22    მე̄ვარ მუსგვჷნ ლიხ ი აშ ხელკავარს ღირკლარ ხოჩახ მასკვად.
Line of edition: 23    აშკა̄და̄ლიხ ჯვინელ აბზიანარხენქა ჲედ ჯვინელ მანთიანარს ერ
Line of edition: 24    ოთჴიდე̄ხი.

Line of edition: 25       ათხე̄ დროჲჟი, ბარდან ერ ანჴად, ეჩანღო, ბარდნი საგული
Line of edition: 26    ლიშხბა̄ლი ედბინეხ ი ვოსარ ჩუქვა̄ნ საგულს იქვემხ, მეკვშდა საგულე̄ლს
Line of edition: 27    ი ხოჯვდა ვოსარს.

Line of edition: 28       ზურალე̄ლ ლა̄ჲდი̄ ქე̄თყაჩხ თხუმქა ლაჩქი ლითლეს ი ხოჩა
Line of edition: 29    პირკალი ლაჩქარს იჭო̄ნეხ; ჩაფლარე მჷქაფ წუღზარა̄ლს ი ტუფლარს
Line of edition: 30    იდე̄სხ ი ჯო̄დი არშვლარე მჷქაფ მეკვეშდ არშულე̄ლარს იდე̄სხ მაშრის
Line of edition: 31    ი ლესკელიარს მა̄მ ხეჩოხ. ლესკელიარ ეშ ჲეში̄ ხეკვეს წჷრნი ლჷმა̄რელას.
Line of edition: 32    ამჟი ლას ზურალა წეს. ხაბარდა̄ კაბარე მჷქაფ ენბინეხ მახე
Line of edition: 33    სახი კაბრე ლიშხბი ი ლიყდი ი ნიჩვარს დე̄მ იჭო̄ნეხ ეჩქაღაშა̄ლ
Line of edition: 34    ურიბალშვ. ალე მაგ, მახე შუკვე̄რ ენსყა̄ნ, ეჩა ტარ ლი. ათხად
Line of edition: 35    ლერექვ მა̄დეჲ ნაჯიმური ხუტა ხალხს ი კუმაშს შვანისა ი ათხე მაგ
Line of edition: 36    ხოჩერება ყო̄რთეჟი ახა̄ზიხ ი ქე̄ნცა̄და̄ნ ხალხ; ხოხვრა მაგ ითვრი
Line of edition: 37    ი ხოშა მაგ ლჷთორ ლი.



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.