TITUS
Svan Prose Texts IV (Lashkh)
Part No. 39
Previous part

Text: 39 
Page of edition: 52 
Line of edition: 13 
XXXIX. სანხუბ ლახილ


Line of edition: 14       ბარი ხილთა̄ნ ჯვინელ დროჲჟი ლა̄შხისა დე̄ს ა̄რდა. ნა̄რგილ
Line of edition: 15    დალა̄რა̄ჲსა ლჷ̄გა̄ნხ ცხეკი უსკვარ ი იცხარ, ჲებარ ი ბარყვნალ, მარა
Line of edition: 16    ალ ლეხილა ეჯკალიბ ნეცნო̄ლარ ი უგემ ლიხ, ერე სგა̄ვჲა ბარი

Line of edition: 17       ხილო̄რას ეშ დე̄სა ხაჯეშხ. ლა̄შხისა̄ჲ ლეხილა ჯვინელ დროჲჟი მაგ
Line of edition: 18    ნაქა̄მ ცხეკი ლეხილა̄ მაჯო̄ნ გარ ლასხ. ქილჲავ, ატამ, ყურძენ,
Line of edition: 19    ბროწოულ ი ამკალიბ სათუთ ლეხილა ლა̄შხე გიმჟი დე̄მე ა̄რდა. სურუ
Line of edition: 20    კჷ̄თხიქა ლი ლა̄შხ ი მჷცხიე̄რუ̄ ბედშვ დეშ იმარგ ლა̄შხე გიმჟი სათუთ
Line of edition: 21    ლეხილა. მა̄ი ჩუ არიხ ხილარ, ალჲრს ღალ მე̄ვარ ლჷგონ ხა̄ზდახ.
Line of edition: 22    ეშხვს გარ და̄ს ხამბახ. ჩუ ერ ი̄თა̄ლხ ლახვბა, ლახილ ჩიგარ სანხუბდ
Line of edition: 23    სედნი ი ხილარე ლიშდა̄ლე პილთე ჟი ინზო̄რო̄ლხ მაგ მეხვბარალ

Line of edition: 24       ი მუგვიდ ი̄თეხ ხილს მუხვბე̄მი შელდჟი. ალ წეს ივანდჷ̄რან ამჟი
Line of edition: 25    ლჷმა̄რ ლა̄შხისა. ხა̄ლ ერე მეთხვიარა ი̄თეხ ნათხვიარას მეხთვიარი შელდჟი,
Line of edition: 26    ეჲჟი ი̄თი ხილ სანხუბისა მჷნა̄თი მუხვბე̄მი შელდჟი. ჲერხი
Line of edition: 27    სანხუბ ხილარჷნქა აშ ლეჴნი გიმარსი̄ ხვაჲს ცურახ სანხუბი
Line of edition: 28    ლეჴმარიდ. ეშხუ ზაჲ ეშხუ მჷნა̄თი იჴმარი სანხუბ გიმს ი მე̄რმა ზაჲ --
Line of edition: 29    მე̄რმე მჷნა̄თი ი ამკალიბდ ქა იხრესი თელდ სანხუბ ი ღოშგინპილს
Line of edition: 30    მახანუდ იბნეხ ლიხრესეს. ალე ხეკვეს ლე̄სეს ჯვინელდჷ̄რან მესდე
Line of edition: 31    წეს ლა̄შხისა.

Line of edition: 32       ლახილს ნაჲ ცხეკი მაშენს ხვატუ̄ლიდ ი შომასი̄ ხილარს ჟი
Line of edition: 33    ხენაშხ ი გზარვ ხელკი, ამშა პატრონ სანხუბს ქა და̄რ ე̄სა ხეჭვდჲელ;
Line of edition: 34    ახფიშვდეხ ტარხანს, ჲედ ჟი ღჷრიხ ხილართეჟი, იზბიხ ხა̄ლ მოშ
Page of edition: 53  Line of edition: 1    ხა̄ჲმედახ ი ღჷრიხ აშამი უჴი̄დად. ხილ ცხეკი მაშენ ლოქ ლი ი მაჲ
Line of edition: 2    ლი̄შამჲელ ლოქ ხაკუჩ. სერთხი̄ ჲებარს, მინეშ ი̄რი ა̄ იშგნაშ, ჩი̄ს
Line of edition: 3    ჩვადოგავიხ ი ეჲჟი ცურეხ. ძვირდ გარ ა̄რდა ლეხილა შვანისა,
Line of edition: 4    ამხენქა ხოშა̄ვდ ხალატხ ხილი ლიზობ ი ჩუ ლიმჲეს და̄რ ხამბე
Line of edition: 5    ლეხილს. ხა̄ლ ქა ხოჴდენი თელდ კოტო̄ლ თხუმუ̄ლარ, ჲედ ერ
Line of edition: 6    მუღვაჲხენქა მახე მეჴდე გარ ლი, შიშდ ეჩანეშ იბნეხ ხილრე ლიშდუნეს
Line of edition: 7    ი ლიზობს. ამჟი ური, გოხ ხილარს იზბჷდახ ჩუ ლიმჲა̄ლნუნ. ხილ ერ
Line of edition: 8    სგა ჴედნი, ხონი̄ ერე მაჴედ ნამშავ ახჴედე̄ნხ, ეჲჟი ხაბჟახ. ალე
Line of edition: 9    მაჴედი კვედობა ტარ ლი თელდ შვანისა ი ამღა ხენტვე̄ბდახ ლეხილას.

Line of edition: 10       ჲერხიაგის ქა̄ჲრაყიხ ხილს. ჩვაყლიხ მე̄ვარ, სგა შჷდეხ კეცთე
Line of edition: 11    ჲედ ხორგთე, ჩუ ქურეხ მე̄ვარ ი, ლა̄ჲრაყა̄შს ერ ლახთერხ, ეჩქას
Line of edition: 12    ქა̄ჲრაყიხ. ხეფსი მე̄ვარ შა̄რდი არაყ, მარა ხილი არაყდ ეში̄ მე̄ვარ
Line of edition: 13    ლჷგონ ხო̄ზხ ი მე̄ვარ მუჭხვიდ ითრეხ. აშ უსკვი არაყ ხაბჟახ მაჩე̄ნე
Line of edition: 14    ხილი არაყისა.

Line of edition: 15       ხუღვახ აჯაღ სანხუბდ მესდე ყა̄ლდი გიმარ, იმე̄ჲ ერე განჭვუნქა
Line of edition: 16    დე̄სამა ჴედნი ი ლეგანჭვა გიმარს ძღჷდ ლუგვნიანდ ხეგდურჲელხ.
Line of edition: 17    განჭვს, ჩუ ერ იმჲი, იხვრიხ ი ლე̄ჲრაყიდ აგნეხ. განჭვი არაყთა̄ნ
Line of edition: 18    დე̄მშა არაყ ხაბჟახ. ქარიან მა̄რასი̄ ლოქ ხოჩა ხა̄რ განჭვი არაყ.
Line of edition: 19    მაშე̄ნა̄მ ა̄ჲრაყიხ განჭვი არყალს ლენტხას ი ჭუბე̄რისა. განჭვი მაჴედი
Line of edition: 20    გუ̄ნღა თელდ მაჩე̄ნა ლეღმუ̄რას აშხჷდახ. ლეღმუ̄რი ნამშიხჟი
Line of edition: 21    ლოქ ლეგანჭვა იფშირი ი ამშა გუ̄ნღა აშხჷდახ ლჷთიშ ლჷნაკ
Line of edition: 22    ლეღმუ̄რას. ლა̄თა̄ლჟი ლახვბა ხედ მუხვბასი̄ ხახვჲესხ ლჷხილ ჷიმს,
Line of edition: 23    ხაყლუ̄ნიხ, "არგებს ლოქ ეჯი ლჷხილ გიმს თელდ ჟესზიგე̄ნდეს".
Line of edition: 24    მარა ხილი ნა̄თის ეში̄ დეშ ხოქრავი მერმა მუხვბას, ლა̄თა̄ლჟი ალ
Line of edition: 25    ამბავს ხილრე ბედჟი ჩუ ლისკბე̄ჲ მა̄მ ხაწჷხ, ერე "გიმ ლოქ სი ჯახვენა
Line of edition: 26    ი ხილი ნა̄თი დო̄სა ლოქ ემქარვა". ამშა ლისკბე და̄ს ხაწჷხ.
Line of edition: 27    იმე̄ჲ ხილარ ჩუ ე̄მე ლჷ̄გხ, ეჯი ეშხვმიშ გარ დე̄შა ლი. ჩი̄ს ხოხალ,
Line of edition: 28    ერე ლეხილ სანხუბიშ ლი. გიმიშ ი უსკვარე პატრონს მა̄დხვაჲს გარ
Line of edition: 29    ხო̄თდახ ხილს. აშ ალ ლჷხილ ჲეზვ ი უსკვარი̄ ამშა ჟახაჟი არიხ,
Line of edition: 30    მარა ნა̄თი კოჭო̄ლუ̄ლ გარ ხეხვი სანხუბხენქა.


არდევან ონიანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.