TITUS
Svan Prose Texts IV (Lashkh)
Part No. 38
Previous part

Text: 38 
Page of edition: 48 
Line of edition: 10 
XXXVIII. ქორი ლიგემ


Line of edition: 11       ქორა ლიგემზუმ ლეგარჯ გვეშ დე̄სამა ხაბჟახ ათხე ი ეჩქადი̄
Line of edition: 12    ი შომა̄ჲ მეზგე ჩუ ლი̄თა̄ლს ხამურჯი, ეჩქა სგობნა̄ვ ამა̄რეხ ქორა
Line of edition: 13    ნალგმა̄ლუნ კეთილს. ლალგმა̄ლჟი ხვაჲ კეთილ იხჷრჯავი ი სგობნა̄ვ
Line of edition: 14    ხეღვე̄ნიხ ნალგმა̄ლუნ კეთილ, ეჲჟი ქორ მა̄დ იგი ი ამღა ლი,
Line of edition: 15    ერე კეთილ ხეკვეს ლჷმა̄რე ხუღვე̄ნდეს სგობნა̄ვ მელგმა̄ლ მეზგას.

Line of edition: 16       ლა̄თა̄ლჟი ქორ ხეხვი ჩიგარ ხოხრა მუხვბას ი დი ი მუ ხეკვეს
Line of edition: 17    ხოხრა მუხვბაცახან ასეხ. ალე წესდ ხო̄ზხ ივანდჷ̄რან ი ათხე̄ჲ ამჟი
Line of edition: 18    ლი. ხოშა ლახვბა იკუ̄ნთეხ ლი̄თა̄ლს ი სვა ხა̄რხ ჩიქ უ̄თა̄ლა
Line of edition: 19    ქორხენქა მახა ქორა ლიგები ლიმა̄რა̄ლს, მარა ჲესაჲეს ჩუ ი̄თიხ ი ხოშა
Line of edition: 20    მუხვბე ზექრას იგემ ი ვო̄ბა ხანს სედნი ზექრა̄ჲსა მეზგა̄ლდ, ვოდ
Line of edition: 21    დო იმბეცვე ზექრახენქა მახა ქორა ლიგებს. ვოდ ლილგმა̄ლს
Line of edition: 22    ლეხე̄რო̄ლდეხ, ეჩქად ჩინმანკვი ხოჩა ჲერდგულ ჴელვანარე ლითხე̄ლის
Line of edition: 23    იბნეხ (ქა̄მე ჴელვანიშ ი სგა̄მეშიშ). ქა̄მე ჴელვანდ სგა̄მე ჴელვან დეშ
Line of edition: 24    იმარგ. ქა̄მე ჴელვან ხეკვეს გაცხაჲდ ხოჩა ჴელვან ლე̄სეს, ხვაჲ ქორ
Line of edition: 25    ხოგე̄ნდეს ი ჩუ ლჷთი̄რ ხეკვეს ლე̄სეს გაცხაჲდ ხოჩა ჴელვანდ ი ქორა
Line of edition: 26    ნაგმუ̄რ ქირაი̄ ხოშა ხეხვი. ეშხუ ხოჩა ჴან ლას წეს ნაჴელვანუ̄რდ
Line of edition: 27    ქა̄მე ჴელვანიშ. სგა̄მე ჴელვანდ მაგ ჟი იმარგ ხოჩა ქა̄მე ჴელვანცახან
Line of edition: 28    ი ჲესიჲეს მელგმა̄ლ ჲერვა̄ჲ ლი, ეჯი იგნი სგა̄მე ჴელვანდ, ჩუე ხეჟბი̄

Line of edition: 29       კელდ, დო̄რი სგა̄მე ჴელვინი̄ ჟი ლექრაე ხე̄რი, მარა ნაჴელვანუ̄რდ
Line of edition: 30    ქა̄მე ჴელვანზუმ მა̄ ხევდი სგა̄მე ჴელვანს.

Line of edition: 31       ქორა მელგმა̄ლ მეზგე ჩინ მანკვი ბეჩს ახვრჲელე რიყისა ი
Line of edition: 32    ჴოჯარდ იგებ. აშირ ი ჲერვეშდ ჴოჯ ხეკვეს ენხურჲელე̄ნდეს. ბეჩი ჴოჯ
Line of edition: 33    მა̄რე̄მი ნანკლათხაზუმ ხეკვეს ლე̄სეს ი ეჩქა აშირ ი ჲერვეშდ ჴოჯ ქა
Line of edition: 34    ლა ლუშნუ ქორა ნაგმუნდ. ბეჩს ახვრჲელეხ ლუფხვისა ი ჲედ
Page of edition: 49  Line of edition: 1    მუჟ ღორ ი ქრისდე̄ში უჭმისა. მუს ხა̄ლ ჴედნი, ეჩქას იწვანიხ ნადარს
Line of edition: 2    ლჷჴანდ ი ლჷსევჩევდ ი იბნეხ რიყხენ ჴოჯარე ლიმა̄ჯის. ეშხუ ჴოჯს
Line of edition: 3    ხეკვეს ჲეშდჲრუ სევჩევ ეხფასე̄ნდეს ი ალე ხეკვეს ანჴჷდის ეშხუ
Line of edition: 4    ლადეღ ნაღდ ლჷწანა ლჷჴან მა̄რად. ალ ნადს მჷბჩი ნადს
Line of edition: 5    ხატუ̄ლიხ ი ჩუ ლეხჷრჯე მასძელს ხა̄რ, მარა სამარხვ იმა̄რი
Line of edition: 6    ნადიშდ (დიარ, ნა̄ყუნ სამარხვ ი არაყ). არაყს ლელე̄თად ხათრეხ
Line of edition: 7    ხვაჲს ნადარს. ნადდ ხოშა ნაღალდ მეხვბარალ ხაწახ მოლგმა̄ლას.
Line of edition: 8    აშ მესვფელ მა̄რე წეს ლი, ერე მოლგმა̄ლ მეზგაშე̄რ მაგ ქა ლახწა̄დეხ.
Line of edition: 9    აქ მა̄რე̄ლ ი ეზრიე̄დუ ცხაჲ მაგ ქა ხაწახ ნადდ, ქა ხა̄ლ
Line of edition: 10    ხაბჟი̄ნნეხ.

Line of edition: 11       ლიბჩი̄ ნადობ ერ ქა ისრულო, ეჩანღო იბნი ლილკირა̄ლი ნადობ.
Line of edition: 12    კირს ჲეს ცხეკისა აშხიხ, იმე̄ჲ ლელკირ ბეჩ ითხი ი ჲეს ეშხად
Line of edition: 13    ჴჷდეხ აგითე ი აგის აშხიხ, მარა ხვაჲზექ ხეკვეს ენმა̄რე̄ნდეს ლელკირდ.
Line of edition: 14    ჩხარა ლე̄თ ი ლადეღ ხო̄შვეხ ლემესს ლაკირს (სპონტიო̄ ბეჩი
Line of edition: 15    ლაკირს). სბონდიკ ბეჩი ლაკირ ხოჩულ ლეშხი ხაბჟახ ი მეშხა ბეჩი
Line of edition: 16    ლაკირ ხოდრა ლეშხი ლოქ ლი. ლალკირა̄ლჟი აჯაღუდ გალდამს იწვანიხ
Line of edition: 17    ბოთლი მა̄რას მინე ლჷჴან-ლჷსევჩევდ ი აჯაღუდ ხარჯობ ხაწჷხ
Line of edition: 18    მოლგმა̄ლ მეზგას. ლაკირს ლეშხიდ ჴელვანარ იგემხ (ლელგმა̄ლ ქორა
Line of edition: 19    ჴელვანარ ჲერვა̄ჲ ი̄რიხ), ოდო აშ მოცალ მა̄რე̄ლე ლჷგა ლაკირს
Line of edition: 20    მა̄ ხაყა. ლილკირა̄ლი̄ ლუნთისა ხეკვეს ჩომნახ. მუსჟი ხოშა აში
Line of edition: 21    ლეთრინე ხა̄რხ ჴანარს გოში სევ-ჩევ.

Line of edition: 22       ქორს ხვაჲ ავეჯ ხაწჷხ: დი̄რალ, ირკალ, აღარ ი ნა̄ნშგუნ კა̄რალ.
Line of edition: 23    დი̄რალე ლიჴდეს ეშხუ მოლგმა̄ლ მეზგე გარ დეშ იჩო. დი̄რალ ძღჷდ
Line of edition: 24    გვამი ლეჴდე ლიხ ი ნადურაჲ მა̄დ იჩმი̄ნი ი ამღა ლი, ერე ნადარ ხა̄რხ
Line of edition: 25    ლეწვანი დი̄რალე ლაჭკორჟი ი აგითე ლაჴდაჟი ი ქა იწვანიხ ხოჩა
Line of edition: 26    ლჷთიშ ბჷდრაჲ ჴანარ ჲესვა̄ჲ ხეყე̄ნი ი ეშხუ დი̄რს ჲერუ-სემი
Line of edition: 27    უ̄ღვას ხობემხ ყე̄ვარდ ი ეჲჟი ჴჷდეხ აგითე, მარა მე̄ვარ ლეკვებ ლიხ
Line of edition: 28    ლადირა̄ლჟი ხა̄ლ ჴანარ, ეშ მინე მოჭემ მა̄რე. ირკალს, აღარს ი
Line of edition: 29    იშგენ ქორა მასალაჲს მოლგმა̄ლ მეზგე ჴჷდე ნადარულაჲ, სალაჲს
Line of edition: 30    ლა̄ჲდი̄ მოლგმა̄ლ მეზგე ამა̄რე ი სგა იმა̄ჯი გალდამი უწვანად.

Line of edition: 31       ნუ ერ ილფხვი, ლაკირ ერ ჩუ იშხი, ეჩქა ჴედნიხ ჴელვანარ ი
Line of edition: 32    ჟი იბნეხ ქორა ხუნი ლიქვცეს ი იბნეხ ხუნი ლიდე̄სს, მარა ხუნს
Line of edition: 33    ქუცეხ ხოჩა დოშდულჟიგარ, თეთრი აბზიანარს სგა ხო̄ნხენიხ ხუნისა.
Line of edition: 34    ეჯურ მა̄ ლოქ ხაყა ი ჟი იბნი ეჩანღო ლილგმა̄ლ. ჲერუ ჴელვანს
Line of edition: 35    სგა ხაჭიმხ ჲერუ მჷხლიკი მა̄რე̄ლ ი ხალიკს ი თჷქს ხომა̄ჯიხ ჴელვანარს
Line of edition: 36    ი ლჷწკატა ბეჩარსი̄. თჷქი მჷგნე მჷხლიკიარ ლიხ ი კირ ხა̄ლ
Line of edition: 37    მოშ ხოშულ ხეჩჷდი თიქს, ღო ეჯი ხოცხახ. ხობგა ჭვედვარ ხეფსიხ.

Page of edition: 50 
Line of edition: 1       ეჩქადა დროჲჟი ეჯკალიბ თჷქი ლიგნე ხახლე̄ნახ, ერე ათხე̄ დროჲჟი
Line of edition: 2    დეშ იგნი ეჩთა̄ნ თჷქ. ჯვინელ ნალგმა̄ლ მუ̄რყვმა̄ლ ი ქორალ იმე̄ჲ
Line of edition: 3    ცვირხ ათხე, ჩუ ლჷბრეჟაშა̄ლ ლიხ ჭვედვარ, ერე ნაფიცხუ̄ლს
Line of edition: 4    დეშერ ხაგლე ეჩქადა დროჲჟი̄ნა თჷქს.

Line of edition: 5       ჟი ერ ინკლათხი ჭვედვარე ლიგემ, ეჩანღო ხოსყა̄ლიხ ფალანგარს
Line of edition: 6    ი ეჩხენჟი ილგმა̄ლხ ჴელვანარ ი ფალანგართეჟი ხოჴდეხ
Line of edition: 7    მჷხლიკიარ ბეჩს ი თჷქს.

Line of edition: 8       ლალგმა̄ლჟი ჴელვანარს მე̄ვარ პატივ ხა̄რხ. ვოხდრისულ სადილ-
Line of edition: 9    ვახშამს დე̄მ ხა̄მნეხ. ხოშა ნაღალდ ლორს ხოჯბიხ ი კოჭ-კოჭო̄ლ
Line of edition: 10    არაყე̄ლსი̄ ხათრეხ, მარა ლადეღვშ ხოხრა̄მ ითრეხ ჴელვანარ ი
Line of edition: 11    ლევახშამდ -- ხოშულე̄ლს. ლემაიდსი̄ ჩიგარ ხა̄მნეხ ჴელვანარს ი აშ
Line of edition: 12    მოწედ მა̄რე ჲერვა̄ჲ ანჴდენი ლალგმა̄ლთეჟი, წეს ლი, ერე ხა̄მნახ ი
Line of edition: 13    არაყი ლა̄ხა̄შიხ.

Line of edition: 14       მაჩუ̄ბი ლიგემ ერ ქა იგა̄თვი, ეჩქა ჩვადი̄რა̄ლიხ მაჩუ̂ბს. ფიშირ
Line of edition: 15    მა̄რას იწვანიხ დი̄რალე ლადე̄სჟი ი დარბზი დი̄რალს ხადე̄სხ ი ეჩანღო
Line of edition: 16    ჭერს ხაშდეხ ი ხოჩილ ლასიპ ხა̄რხ ჴელვანარე ლამურჯთე მჷწკატა̄ლას,
Line of edition: 17    მჷხლიკა̄ლას ი მჷთქა̄ლას ჩი̄ს. ქორა ლიგებს ჲერუ-სემი
Line of edition: 18    თოჲს ხამკვედეხ ი მიშე̄ნე ლეგარჯ გვეშ ალე ხაბჟახ ჩი ლემშაჲ გვეშისა.
Line of edition: 19    მოლგმა̄ლ მეზგაშე̄რ ეზრიე̄დუ ი მეხვბარალ ნაკვჲა̄ლუნვარს ხოჴდეხ,
Line of edition: 20    ჴელვანარე ლე̄მნას თაშა̄რ დიარალს, ლორი ლეღვი ლაგფარს
Line of edition: 21    მჷჯაბს ი ეშხუ ბოთლ არაყს. ალე წესდ ხო̄ზხ ივანდჷ̄რან.

Line of edition: 22       ქორა ლიგემ ერ ქა იზგჷრი თელდ, ეჩქა აჯაღ ნადირს იწვანიხ ი
Line of edition: 23    ლჷყა̄რს ჩვადი̄რა̄ლიხ, ჩვა̄ჲრეკიხ, ჩვა̄ჲღეხ ი ჩვა̄ნშგიხ კავშ. ალო
Line of edition: 24    ლადეღ მაგ ამშაჲეხ ჴელვანარ ი ნადარ. ლი̄ნშგი ჩი̄ს ჩუ ხოხალ ი ალ
Line of edition: 25    ლადეღს ხატუ̄ლიხ ლიძგჷრა̄ლს ი ძღჷდ ლეხჲადე ლადეღ ლი ალ
Line of edition: 26    ლადეღ მოლგმა̄ლ მეზგე̄მიშდ. ალ ლე̄თ მაგ ლჷწჲე ხაყა მოლგმა̄ლს ი
Line of edition: 27    მაგ ხოჴდე ნაწვარს (ჲერხი ბატკარს ჴჷდეხ ნაწვარდ ი სტამა̄ნარშვ
Line of edition: 28    არაყს) ი ძოჷდ კაბანიაჲ იჩმი̄ნი. მანკვი ჴელვანარს ამზჷრიხ ალ ლე̄თ.
Line of edition: 29    ნე̄სგა მაჩუ̄ბისა ლემესს ა̄შვეხ ი ტაბლარსი̄ ანყა̄ლდახ ი ჟი ხამზჷრდახ
Line of edition: 30    ალ ლე̄თ, ერე ქორა ლიძგჷრე ხეღრისა̄ნდახ ალემაჷ ნაჭირჟი.
Line of edition: 31    ნალგმა̄ლ მეზგე კეთილხენ ქა მეშთხაშა̄ლ ლი ალემაგ ნახჷრჯ ი ჩი̄ს
Line of edition: 32    ხოჟრიხ ი ხო̄მზჷრიხ ლიძგრა̄ლ ლე̄თს. ლიძგრა̄ლ ლე̄თჲა ლევახშამ
Line of edition: 33    ტაბაგს ეჩქად ჟი ხოჯგრჷდახ ლჷდგარუს ი ჲესვა̄ჲ ბობშ ხეყე̄ნო̄ლ
Line of edition: 34    ლეპრისდად, ბობშსი̄ ჟაპრისდახ ამლე̄თ ი ეჩანღო ალ მოლგმა̄ლ მეზგე
Line of edition: 35    სგა ღჷ̄რდა ქორთე ი იბნა ლიზგა̄ლს მახა ქორისა. მე̄რმა ზაისა ეჯ
Line of edition: 36    ჴელვანარ ჟაცმენდახ ქორს ი კირშვ ჟაფიფქავდახ, ამჟი ერე ეშ
Line of edition: 37    ყჷ̄ჩდა ქორ თვეთვნად. ამკალიბდ ლჷგე ქორალ ათას ზაჲს გეჭნო̄ლხ

Page of edition: 51 
Line of edition: 1       ი ათხე̄ჲ ვო̄ბა აგის ლჷ̄გხ ათას ლჷზაჲ ქორალ, მარა ათხე̄ დროჲჟი
Line of edition: 2    მახა ფორმი ქორალე ლიგემ ენბინა̄ნ ი კვამა̄რ მაჩუ̄ბარე მჷქაფ ლუ-
Line of edition: 3    ბუხვარ ქორალს იგმა̄ლიხ ი სენჲარე მჷქაფ ლასგიდ აკოშკე̄ლს ხოს-
Line of edition: 4    ყა̄ლიხ ი ნე̄სგა ლალმესგ ლაყულფა̄ ლისყის ქა ლეხყაჩხ.

Line of edition: 5       ათხე ჯვინელ ლუშნუ მუ̄რყვმალე ი ლჷდჷრბაზ ქორალე მჷქაფ
Line of edition: 6    ხვაჲ აგის აგა̄ლიხ მახა ფორმი ბეჩი ქორალს. ხვაჲ აგის ცვირხ
Line of edition: 7    ათხე̄ჲ ჯვინელ ვოხუშდ ი უსგვა ლჷდჷრბაზ მუ̄რყვმალ შვანჲა ჴელვანარე
Line of edition: 8    ნაგემ, ერე ათხე̄ დროისა მა̄რე ლა̄ნშგიდი̄ დეშ აბდავი ალ

Line of edition: 9       მუ̄რყვმალთეჟი ჟი ლი̄ზის ი ჩუ ლი̄ნშგის. ჯვინელ ქორად ბჷგი
Line of edition: 10    ლჷთჷქ მჷრ ლჷმა̄რხ. ყჷლეხ ჲერხი მეჩიარ ათხე, ერე თჷქი ლაგნაჟი
Line of edition: 11    მანა̄ში ფექს ლოქ ხანჩჷდნახ ი ეჯღა ლოქ ხაფსო̄ლნა ამჟი ბჷგი
Line of edition: 12    თჷქ ი ეჯღა ლოქ ლიხ ამჟი ბჷგი ჯვინელ მუ̄რყვმალ ი ქორალ, მარა
Line of edition: 13    ტკიც ლა, ა̄ მო̄დე, ამშა და̄სმა ხოხალ.

Line of edition: 14       ლალგმა̄ლჟი ჴელვანარ ჟი ლეგემ ბეჩს ნაჷებჟი ჟი დე̄მ ხაგემხ
Line of edition: 15    ი დე ეჩქად ხაგმინახ ქა უწკატად. ძინარს, ვოდ ლილგმა̄ლს ჟი იბნჷდეხ,
Line of edition: 16    ეჩქად ეჯ ლადღი ლეგემ ბეჩს ჩი̄ს ქა̄წკატიხ ი ქა ლჷწკატა,
Line of edition: 17    ხოჩა კუთხ ბეჩარს ჟი ხომა̄ჯიხ მჷხლიკა̄ლა ნაგებთეჟი ჴელვანარს ი
Line of edition: 18    ეჯჟი ილგმა̄ლხ. ხალიკს ხვაჲს დე̄მ ხეჩოხ ი თჷქს იჴმარიხ ხოჩა
Line of edition: 19    ლჷკირს ი ბჷგი ჭვედვარ ხეფსიხ.

Line of edition: 20       ჴელვანს ხვაჲდინ აწიხ (შომასი̄ ქორწლობ ჲედ იშგენ ღჷნმაღჷნ
Line of edition: 21    ხა̄რხ) ი ეჲჟი ლუგვნიანდ ხაყახ, ერე იმჟი̄ წამ მინე ლამვას
Line of edition: 22    ხეფრება̄ლხ ი ხო̄ზნანიხ. კელდ ე̄სამა ხენთლებიხ ხოჩე̄რება (ლეზვბო̄რა
Line of edition: 23    ი ჲედ ლეთრო̄ლა მა̄ლე), ამის ქა დე̄მ ხაქდენიხ ჴელვანარს ი
Line of edition: 24    ჩვაწი̄ხ მოწოსიანდ ამკალიბობჟი ჩიგარ.

Line of edition: 25       ათხე̄ დროჲჟი ხვაჲ ჴელვან არა შვანისა. ქორალს ერ აგა̄ლიხ
Line of edition: 26    ლჷდჷრბაზს, ეჯკალიბ შდულვარს ხოსყიხ ნამსგვენე̄მი გუ̄ნღა, ერე
Line of edition: 27    ეჯჲარე ლისგდის დე̄სამა ხოჩა. ეჩქადა დროჲჟი ამჟი ხასყინახ შდულვარს
Line of edition: 28    მუ̄რყვმალს ი ლჷდჷრბაზ ქორალს. ეჯკალიბ ხოჩა კამარაჲს
Line of edition: 29    ხასყინახ ი ათხე ჴელვანარი̄ ხოსყიხ ქორალს ყო̄რმაყო̄რს, სენჲარს,
Line of edition: 30    ლაჯჲერა̄შალს ი ლაფკანა̄რალს, ერე მა̄მა ხოჩა ეჯჲარე ქა
Line of edition: 31    ლიწედს. და̄ს ე̄მუ ხაშყიდ, მუ̄რყვამ, ჯვინელ ნაგებ, ი ჲედ ქორ ჩუ ე̄მე
Line of edition: 32    ემრეღვე̄ლას ი ჲედ ჟალკა̄ფე̄ლას ი აშ ლჷ̄გხ ლუკვმუნე ი ლუჭყურტუნე
Line of edition: 33    ჯვინელ დროჲჟი̄ნა ნალგმა̄ლარ ათას ლჷზაჲ კირი̄ლა - ბეჩე̄ლა
Line of edition: 34    უფი̄ცხად, ოდო ლირეღვს ცხაჲ ჲარ ლახბლა̄ჯნე, ეჯკალიბ ბჷგი
Line of edition: 35    ნალგმა̄ლარ ლიხ შვანჲა ჴელვანარეშ ეჩქადაშ ი ათხე̄ დროჲა
Line of edition: 36    ნაგემ. ქორალ ხოფშირა აგის კა̄რალშვ ლიხ ლჷ̄ნშგ ი იმე̄ჲ კა მო̄დ
Line of edition: 37    ითხო̄ლ, ეჩე -- ყა̄რშვ. კი ხვაჲ აგის ითხი ჩჲა̄გ შვანისა ი ეჯნოვშ
Page of edition: 52  Line of edition: 1    ლჷ̄ნშგ ქორ ივალადეღ გიჭ ი ათხეჲ ვო̄ბა აგის ლჷ̄გხ ათას ლჷზაჲ
Line of edition: 2    მუ̄რყვმალ კავშ ლჷ̄ნშგა̄ლე. დი̄რალდ ი იშგენ ქორა მასალაჲდ
Line of edition: 3    ხოცხა̄ნდახ ჲედ ჯი̄რა̄ მეგმიშ ი ჲედ ცა̄ჲრა̄შ. ალჲარ ხვაჲ ხანს გეჭნიხ,
Line of edition: 4    დაგვ დე̄მ ხოჴდენიხ ი ჩვარიხ ამჟი ლჷკჷრპე̄ტე ივალადეღ -- სერთხი̄
Line of edition: 5    ჯი̄რა̄ მეგმიშარ. ღუმუ̄რლა̄ მეგმი ავეჯ ათხე̄ხი გარ ენბინა̄ნ ლამფაპოლდ,
Line of edition: 6    ოდო ეჩქად და̄რ ე̄მნარდ იჴმარდახ ი ათხე̄ჲ ხამჭირხ ეჩა
Line of edition: 7    ლიჴმარი, მე̄ვარ მჷწჷხ მო̄ ხე̄რიხ ეშჲეში̄. ლუშნუ მუ̄რყვმალ ი
Line of edition: 8    ლჷდჷრბაზ ქორალ ლჷშტიმ ლიხ ი ჲერუ შტიმჟი ლჷ̄ნშგა̄ლე ლიხ.
Line of edition: 9    შტიმრა̄ლჟი დი̄რალ ლიხ ქა ლჷდე. ამგვარ მა̄ჲ ხოშა მუს ერ ანჴეს, სგა
Line of edition: 10    ლიკვეშდ ეში̄ მა̄ ხა̄რ ლემყალ, ჲეჟი ბჷგი დი̄რალ ხო̄ზხ. ლჷდჷრბაზ
Line of edition: 11    ქორალ ი მუ̄რყვმალ ლა̄ჲდი̄ მაგ ლუმხურ ლიხ. მურგვალდ ნაგებ
Line of edition: 12    მუ̄რყვმალ შვანისა დე̄მე თერახ.


არდევან ონიანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.