TITUS
Svan Prose Texts IV (Lashkh)
Part No. 37
Previous part

Text: 37 
Page of edition: 44 
Line of edition: 24 
XXXVII. ლილშკიდაშ ი ბერჟი მჷშკიდ


Line of edition: 25       მჷშკიდ ძღჷდ ლუგვნიან ლას შვანისა ვოდ ათხე̄ დროჲნუნ.
Line of edition: 26    მჷშკიდს ლახ ჩვადგარნა ჲერვა̄ლე, ჲერუ ნაზჷმ წორ ლას ლჷწსე
Line of edition: 27    ეჩა ნადგარუ̄ლ ი ქა ლეჴდე ხე̄რო̄ლ უ̄ქვ-მა̄ქვდ. თვით სოფელს თვით
Line of edition: 28    მჷშკიდ ხეყე̄და ჩჲა̄გ ი ჩი მეზგას მჷშაჲ მა̄რე̄მი შელდჟი თვით
Line of edition: 29    ფოხალ ნამშავ ხა̄და ქა ლეჴდე მჷშკიდთე ზაისა ეშვინ ი ალ მჷშკიდთე
Line of edition: 30    ლეჴდე ნამშავი ბეგარს კალფორ ხე̄ჲშხა̄ნ ი ათხეჲ ამჟი ხატუ̄ლიხ.
Line of edition: 31    თეთრი მჷშკიდთე კალფორს დე̄მ იჴდახ ი იმვა̄ჲ ანშკა̄დნა, ეჩა ფას

Page of edition: 45 
Line of edition: 1       ლას ქა ლეჴდე. ვოქრს მა̄ ხა̄ზდა ეჲზუმ ლჷგონ, მა̄ჲზუმვა̄ჲ თეთრს
Line of edition: 2    ი თეთრშვ ნაშკა̄დ ავჯო̄რას.

Line of edition: 3       კალფორს ერ იჴდახ მჷშკიდთე მეზგე̄მი შელდჟი მაგ ი მჷშაჲ
Line of edition: 4    მა̄რე̄მი შელდჟი თვით ფოხალ ნამშავს (ჲედ ქერს, ჲედ მანა̄შს, ჲედ
Line of edition: 5    ღედერს ი ჲედ სიმინდს), ამშა მჷქაფ მჷშკიდს ხა̄და ლეშკა̄დი მახა
Line of edition: 6    ბერჟიშ ჲედ ბერგ, ჲედ წა̄ლდ, ჲედ კა̄დე ი ჲედ მჷკრა, მარა ბერეჟ
Line of edition: 7    ხეკვეს მჷშკიდიშვდ ოხჴი̄და̄ნხ მინეშ, ოდო მჷშკიდ მიჩა ბერეჟშვ დე̄მ
Line of edition: 8    ხოშკა̄დდა კალფორი ანგრიშისა. ნაშდექი ლიშკა̄დი ლა̄ჲდი̄ კალფორი
Line of edition: 9    ინგრიშისა ლას. ალჲარჷ̄ნქა მა̄ჲ ესწჷხო̄ლ მეზგას (ჲედ ჴანარე
Line of edition: 10    ლიშკა̄დი ი ჲედ ჩა̄ჟიშ), ამშა ფას მო̄შ ხეკვეს ლოხვოდა̄ნ მჷშკიდიშვდ,
Line of edition: 11    ოდო აშ დე̄მ ხოშკა̄დდა. ალჲარე ლაშკა̄და̄ლჟი ხეკვეს ხარჯ ოთჴი̄და̄ნ
Line of edition: 12    მჷშკიდიშვდ ლაშკდაშთე ლორი ლეღვ მჷჯაბ, ლჷჩი̄დ დიარ ეშხუ ი

Line of edition: 13       ჲედ ჲერუ ი ლეთრე არაყ ეშხუ ბოთლ ი ჯეჲ ხეკვეს ქა ლახწე̄ნა̄ნ
Line of edition: 14    მჷშკიდს მჷბე̄ლად, ვოდ ქა დო ადგა̄თვნა ნაჴიდ ლელშკიდარს ჩი̄ს.
Line of edition: 15    ალე ამჟი ლას წეს.

Line of edition: 16       ამჷნქა ხასყუნახ აჯაღ მჷშკიდს კა̄დე̄მი ლიპირავის, ბერგი
Line of edition: 17    ლილდე̄სგეს ი მერჩილი აგვი ლისყის. ბერჟო̄ლას მჷჴდე ოთჴიდა.

Line of edition: 18       ბერჟი მჷშკიდს ერ ძღჷდ ლჷგონ ხადე̄ნა ეჩქად, ალე თერა
Line of edition: 19    ეჩხენქა, ერე მჷშკიდი ლინდროვი̄ნეს ლოქ მა̄ ხაყა ი ბაპა ლინდროვინეს
Line of edition: 20    ლოქ. მჷშკიდ ლოქ ჟი დე̄მ ანშკა̄დნე ლემწჷხ გვეშს ი ბაპ ლოქ
Line of edition: 21    ჩუ დე̄მ აჯშდუხვნე ი ამღა ლოქ მა̄ ხაყა ბაპაშ ი მჷშკიდი ლინდროვი̄ნეს
Line of edition: 22    ი ალჲარ ლოქ ხეკვეს ჩიგარ აშმა̄რ ხეყე̄დეს სოფელისა მერდას ი
Line of edition: 23    მეზგას ჩის.

Line of edition: 24       ბერჟი მჷშკდარ ათხე̄ჲ ვო̄ბა აგის არიხ შვანისა ი სოფლი კოლექტივს
Line of edition: 25    ხოშკა̄და̄ლიხ სამწჷხ ავჯო̄რას, მარა კალფორს და̄რ ხა̄ვდი ათხე
Line of edition: 26    დროჲჟი ი კალფორულაჲ ხა̄რ ლეშკა̄და̄ლი ჩი̄მიშდ, მარა ბერჟო̄ლა̄
Line of edition: 27    ლიშკა̄და̄ლი და̄ს ხაწჷწ ათხე. ჩა̄რს ი ჴანარს ე̄სა ადშკა̄დნეხ, ოდო
Line of edition: 28    მჷკრე̄ლე ლიშკა̄დი და̄ს ხაწჷგ. მჷკრე̄ლე მჷქაფ ი ლუშნუ ღენწუშარე

Line of edition: 29       მჷქაფ ხოჩა გუთნარ ოხჴიდ ათხე̄ თივრობდ ი მჷშკიდს ლჷგონ
Line of edition: 30    ეხქი̄ფა̄ნ მე̄ვარ, მარა მჷშკდარ ეში̄ არიხ სოფლარისა ჩჲა̄გ.

Line of edition: 31       ლაშკდაშე̄ლარ ხო̄გხ ზექიშ ი ბე̄ლარს მჷშკდარ ასყა̄ლიხ მინევშ.
Line of edition: 32    ქველბარ ხაცვირხ ივა̄შიშ -- მინე კაკა-პაპა̄ ნაცვირ ი აშკა̄და̄ლიხ
Line of edition: 33    ეჯჲარჟი. ეშხუ წეს ხეზნა̄ნხ მჷ̄შკდარს ეჩქად: თამფა ცა̄ ძინარს, მე̄ვარ
Line of edition: 34    დო̄სგ, გვეშ ერ მო̄მ ხეჭკჷ̄რე̄ნდეხ ლაშკდაშარისა, ეში̄ ჩუ ღჷრიხ ი

Line of edition: 35       ურს ხატსიხ ბერჟი ქველბჟი სუმინ. ამის ეჯღა ხაშდბახ, ერე ამირანდ
Line of edition: 36    ლოქ დო̄სა ენფუშდის. ჟი ლოქ ერ ენფუშდის ამირანდ, ეჩქა
Line of edition: 37    მჷშკდარს ლოქ ხე̄ჲმახვ ი ჩი̄ს ლოქ ჟანკდე, მარა თამფა ცა̄ ძინარს
Page of edition: 46  Line of edition: 1    ქველბჟი ური ჟი ლიყერ სუმინ მახან ლოქ ხაცყე ნუ ეჯ ბერჟი
Line of edition: 2    კეტს, ხედიჟი̄ნი̄ ლოქ ამირან ხა̄ბ ი დეშ ლოქ იფშვდე ჟი ამირან. ალ

Line of edition: 3       არაკ ჩი̄ს ხანწმჷ̄ნ მშკიდს ჯვინელ დროისა. ამირან ლოქ ხა̄ბ
Line of edition: 4    კავკასიონი უხვა̄ნჟი. ბერჟი კეტ (\ წამ) ლოქ ხაციყ ი ეჩეჟი ჩუ ლოქ ხა̄ბ
Line of edition: 5    ამირან. ცხულა̄ ჴემეტ ი მიჩა ხმალ ლესგხენ ლოქ ხო̄ზ ამირანს,
Line of edition: 6    მარა ში̄მი ქა ლაჲა̄ლ მა̄ ლოქ ხა̄რ ი დეშ ლოქ იკედ, ოდო ეჩქა
Line of edition: 7    შიშდ ლოქ ჟენფიშვდე. მჷჴნი̄რ ნეპო̄ლი̄ლ, ჯო̄დი დუჲკვედ, ჟი ლოქ
Line of edition: 8    ხევნი ბერჟი კეტს თხუმჟი ი აქთუნე ლოქ ზაიშ ი ზაი ნე̄სგა, მარა ნუ ლოქ
Line of edition: 9    ვოდ იკა̄ფო̄ლდეს ამირანი ლაბემ ბერჟი კეტ, ეჩქად თამფა ცა̄ ძინარს
Line of edition: 10    მჷშკდარ ლოქ ერ ხატსიხ ლაშკდაში ბერჟი ქველბჟი ბერჟი ურს,
Line of edition: 11    ეჩქა ლოქ მახან ჩუ ხეცყენი ამირანი მჷბემ ბერჟი კეტ ი ამღა ლოქ

Line of edition: 12       დეშ იფშვდე თხუმს ჩუ ლჷბე ამირან. ამირანიშ ი ხჷშკდარე ლი̄ჲმახე
Line of edition: 13    დო̄სგანღო ისმი ხალხისა ი ციგინისა̄ჲ სგა ხეჩდა ალ ამბავ.

Line of edition: 14       აშკა̄დდახ ბერჟი მჷშკდარ ლარბჲელ კა̄მი ლადე̄ს ვო̄შთხვ
Line of edition: 15    ლჷჭიშხ კერჲე̄ლს, მარა ეჲჟი ხოჩა ლუშდბუნა კერჲაჲს აშკა̄დდახ, ერე
Line of edition: 16    ლიწედს მა̄მ ხოჩა̄ნ. ბატკი ლატყბა̄რდი̄ ხოსყჷდახ ი ლარბჲელდ
Line of edition: 17    ცხაჲ მაჩე̄ნე ლას. კერჲაჲს კალფორისა დე̄მ აშკა̄დდახ, ამშა ფას მო̄შ
Line of edition: 18    ლას ქა ლეჴდე მჷშკიდიშთე. ჲერხი კერჲაჲ ხოჩა̄მდ ლუშდბუნე მა̄მ
Line of edition: 19    ლას ეშჲეში̄, მარა ჲერხი ხოჩა̄მდ ლუშდბუნე ლას ი ხვაჲ აგის
Line of edition: 20    ათხეჲ ხო̄გხ კერჲე̄ლ ი ირბჲელხ კერჲაჲჟი. ვერჲაჲცახან ასტამ ლას
Line of edition: 21    ქა უყვი̄ლა დიარალე ლაჭა̄ლდ ი ასტამს კელს ლჷწრიხას ხოსყჷდახ
Line of edition: 22    ნამსგვენე̄მი გუ̄ნღა. ასტამ ჲერ ხოშა ლი ი ჲერ ხოხრა. ასტამურ
Line of edition: 23    კერჲაჲჟი ლირბჲელ მა̄დ იჩმი̄ნი. ასტამ ჲადურდ ჩი̄ს ხუღვა
Line of edition: 24    კერჲაჲცახან. კერჲაჲ ი ასტამ მეზგას ჩი̄ს შიდ ხუღვა. ხა̄ლ ლეზობურ
Line of edition: 25    მა̄რას მო̄ ხაყა, კერჲაურ ი ასტამურ მეზგა̄ს მა̄ ხაყა (სერთხი̄ ჯვინელ
Line of edition: 26    დროჲჟი).

Line of edition: 27       მჷშკდარ აშკა̄დდახ ლაყულფაჟი ლარკინა ლამტჷარა̄ლს ბერჟიშს.
Line of edition: 28    ეჩეჟი მუგვალი ლაშდა ხა̄რ ი ჟი ერ ხებდინი მუგვალს, ეჩქა ეშ დღაჩე
Line of edition: 29    მაგ დარბაზ ი̄რია̄ მაჩუ̄ბ, მარა ლამტვარა̄ლ ეჩქადა დროჲჟი ხაწხჷ̄ნდახ,
Line of edition: 30    ნაფთ ი ლამფა ი ელექტრონ ერ დო̄სა ითხო̄ლდა, ოდო ათხე̄
Line of edition: 31    დროჲჟი ლამტვარა̄ლს ლჷგონ ეხქი̄ფა̄ნხ ი ეჯჲარე მჷქაფ ლამფე̄ლ
Line of edition: 32    ხოტვრახ ჩი̄ს ქორალისა ი მუგვალი კვამ ქე̄თქადა̄ნხ, მაგ ე̄რ
Line of edition: 33    ლუჭყურტუნე ლას მუგვალი კვამხენ. ეშ კჷ̄რახ მეშხად ნაკვამ ქორა
Line of edition: 34    ჭვედვარ ი იშგენ ლა̄ჲდი̄ მაგ დარბაზისა̄შ ი მაჩუ̄ბისა̄ ავჯო̄რა.

Line of edition: 35       ლაყულფაჟიუდ ხორაკ ცხვადი ლარკინა ნა̄ჭე ცხვენჩუ ი ეჩისი̄
Line of edition: 36    მჷშკდარ აშკა̄დდახ ბერჟიშს. ნა̄ჭაურაჲ ქორს მა̄ ხეყე̄და ი ხა̄ლ
Line of edition: 37    კერჲაჲს დოშერ ხოსდენო̄ლ, ეჲჟი ლაყულფას ნა̄ჭას დეშ ხოსდენო̄ლხ

Page of edition: 47 
Line of edition: 1       ი ჲადურდ ჩი̄მი ქორისა ხორაკ ლაყულფამჷყ ხოშა ჯო̄დინა̄ჭე.
Line of edition: 2    ნა̄ჭე გვარჲან ლუგვნიან ლას ი ალა̄ლა ლეშკა̄დი მა̄ ლას.

Line of edition: 3       ბერჟი მჷშკდართე ლაშკა̄და̄ლიჟი ხა̄ლ ერე ხარჯ ხა̄დახ ლეჴდე,
Line of edition: 4    ეჲჟი ლეჴდე ხა̄დახ შინ. მინე შიხვშ მჷშკდარ და̄ს ხოშკა̄დდახ

Line of edition: 5       ლელშკიდაშის. ღჷ̄რდახ სოფლი ხალს ცხეკთე, ჩვაკი̄ლცხახ შიხია̄ქ
Line of edition: 6    მეგმარს, ჩვაშხჷდახ შიხს ი ნებოზს ბოშა კა̄რის, გოშის შიხვშ, ხოჴდახ
Line of edition: 7    ლაშკდაშთე მჷშკიდს.

Line of edition: 8       ჩა̄ჟრე ნალარსი̄ მჷშკდარს ხაშკა̄და̄ლვნახ, მარა ფას ხა̄დახ ქა
Line of edition: 9    ლეჴდე, მა̄ჲ ლჷწეს ლას ჩა̄ჟი ნაშკა̄დუ̄რ. ათხე̄ხი̄ნა დროჲჟი ჩა̄ჟრე
Line of edition: 10    პატრონუდი̄ ჟენბინეხ მინევშ, მჷშკიდურაჲ, ჩა̄ჟრე ლიშკა̄და̄ლი, ნალარ
Line of edition: 11    ლახ შიდ ხეღვე̄ნო̄ლხ. ჲერხი აგის ჴანარსი̄ მინევშ აშკა̄დდახ
Line of edition: 12    ჲერხი̄ლუ, ლახ ნალარ ხეღვე̄ნო̄ლხ, მარა ჩა̄ჟრეშ (\ ჩა̄რეშ) ი
Line of edition: 13    ჴანარე ლიშკა̄და̄ლი შვანისა ათხე̄ხი გარ ალბანე̄ლი, ოდო
Line of edition: 14    ეჩქადა დროჲჟი ჲადურდ და̄რ ლჷმშკა̄დინხ დე ჩა̄ჟარს ი
Line of edition: 15    ჴანარს ლა̄ჲდი̄ ჲადურდ და̄რ, ვოდ ათხანუნ.

Line of edition: 16       ბერჟი მჷშკდარს ლაშკდაშარ ჲედ ლანე̄სგი̄რ აგის ხო̄გხ სოფლიშ
Line of edition: 17    ი ჲედ სოფლი ვოკერს ი მონყავ ხალხ ხვაჲდინ იხვრჲელიხ ლაშკდაშმჷყ.
Line of edition: 18    ინყავხ ი ხვაჲ მე̄რმა-მე̄რმა შუმი ამბვარს ი̄მბვა̄ლხ. ხოფშირა
Line of edition: 19    ხალს ბერჟი მჷშკდარს ხასიპხ, ეჯღა ერე ლამშივა̄რალ ჩი̄ს ხაწჷხ ი
Line of edition: 20    მაგ ათჲა̄ლ, ერე მჷსყე ხუღვე̄ნდეს ალო̄ დროჲჟი̄ნაშდ.

Line of edition: 21       ლიშკა̄და̄ლი ხოშა ნაღალდ ლუნთისა ხაზნახ, ეჯღა ერე ხოშა
Line of edition: 22    მაჟებ ლი ეჩქა ენშკა̄დნეხ სამწჷხ ლამშივა̄რალს ი მჷწხიერუჟი ქა დე̄მ
Line of edition: 23    ეხქადიხ ლიმშაჲეს.

Line of edition: 24       ლაშკდაშნჷყ ლაშე̄რა̄ლ ჩალხი̄ ხო̄გხ ი ლიშე̄რე ჲესვა̄ჲ ხაწჷხ
Line of edition: 25    ნახო̄რა̄შ, ჴედნიხ ი აშე̄რეხ ამეჩუ. გეჩ მუშვან მა̄რე̄მი ქა უყვი̄ლა
Line of edition: 26    ლერსგვენ მეჴერ ლი ი ჩი̄ს ქა ხა̄ბხ ლევორჩხდ. გეჩარს ლა̄ჲდი̄
Line of edition: 27    ბერჟი მჷშკდარ ხოშკა̄დიხ. შიხს ი მუჭვია̄ქს ლას ოხჴიდეხ, ლიშკა̄დის
Line of edition: 28    დე̄მ ხამდუნე მიჩა მჷკჷლფორის სოფლი მჷშკიდ.

Line of edition: 29       მჷშკდარ აშკა̄დდახ მუჯვრე̄ლს ი ხვაჲ ნავარ იჩმი̄ნო̄ლ სოფელისა
Line of edition: 30    ალო მუჯვრე̄ლშვ, მარა მუჯვრაულაჲ ეში̄ და̄რ იგნო̄ლ. შუკვს ლა̄ზჟი
Line of edition: 31    ბარჯჟი იდე̄სდახ ი ეშ ესღრჷ̄დახ ლუმჯურდ მახეღვაჟარ. მუჯვრას
Line of edition: 32    ჩი̄ნარ ჟი იჴმარიხ, ლაყა̄რჲელდ, ლება̄ჯგად, ლჷცდავა შუკვარე
Line of edition: 33    ლაჩხრიკად კვარმობჟი ი ლათხვიართე ლა̄ჲდი̄ თელდ ლერსგვენ

Line of edition: 34       მეჴერ ლა მუჯვრა მეთხვიარ მა̄რე̄მიშდ ხოლა კოჯარქა, ლაცჷნგჷრქა
Line of edition: 35    ი ლჷცხეკქა ლა̄ზ-ლამჩედჟი. მუშვან მა̄რე̄მიშ ამჟი სამწჷხ მუჯვრე̄ლს
Line of edition: 36    ჩი̄ს ბერჟი მჷშკდარ აშკა̄დდახ.

Page of edition: 48 
Line of edition: 1       მჷშკიდ მიჩა ხელობს ხათრუდა მინა გეზალს. სემი ზაჲ ხეყე̄და
Line of edition: 2    შაგირდდ მიჩაცახან. ღოშგინპილს, მუ ერ ნუ იდგარო̄ლ, გეზალ
Line of edition: 3    სედნო̄ლ მჷშკიდდ ი გვარდი̄ მჷშკიდშე̄რს ხატუ̄ლდახ სოფელისა.
Line of edition: 4    გეზად ე მო̄ ხეყე̄ნო̄ლ მჷშკიდს, ეჩქა იშგნა გეზალს ადჲესხა შაგირდდ
Line of edition: 5    ი ეჩის ხათრუდ ლიშკიდს, მარა ეჯ ლეთვრი მჷშკიდია̄ქ შაგირდს ი
Line of edition: 6    მინა ქორა მა̄რას გამდელ მჷშკიდიშდ ქა ლევდი ხა̄დახ ნაგამდელუ̄რ
Line of edition: 7    ი ეჩანღო ი̄რო̄ლ შაგირდ გაცხაჲდ მჷშკიდდ ლჷთი̄რ ი ეჩა̄შთე
Line of edition: 8    იჴდჷნო̄ლხ კალფორს. კალფორობ ვოდ ათხე დროჲდ ლას, მარა ათხე
Line of edition: 9    სერ და̄რ იჴდე ჲადურდ ი დე მჷშკდარ ე̄ს ხეშგოხ.


არდევან ონიანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.