TITUS
Svan Prose Texts IV (Lashkh)
Part No. 42
Previous part

Text: 42 
Page of edition: 57 
Line of edition: 11 
XLII. ვოთარ გალფხა̄ნ


Line of edition: 12       ვოთარ გალფხა̄ნშა ვარგ ლჷმა̄რ; ლჷმზიგე̄ლი ჩო̄ლურს; ლახვბა
Line of edition: 13    ხაყე̄ნა თენგიზ ი გიგო; მინე მუს მურზაყან ხა̄ჲშხე̄ნა. ალჲარ
Line of edition: 14    ლჷმა̄რხ ჩო̄ლია ფუსნარ. ვოთარ ლჷმა̄რ მაჩე̄ნე მიჩა ლახვბა̄ჲსა. ეჯი,
Line of edition: 15    ხელმწიფობ ერ ემჴედ კავკასიაჲთე ი ვარგალე გვარი ლითხე̄ლი ერ
Line of edition: 16    ლჷმა̄რ, ეჩქა დეპუტატდ ოთლჷშნახ. ვოთარს დე ლი̄ჲრენი ე̄სა ხახლენი
Line of edition: 17    ი დე ლაირი ლიჭვდა̄ნე (//ლიჭვდა̄ნე ლაირიშ), მარა ეში̄ ძღჷდ
Line of edition: 18    ლჷჩინ ლჷმა̄რ.

Line of edition: 19       ეშხვინ ალ ვოთარ ემჴედ ლეჟა̄ ლა̄შხთე. სოფელ მაუ̄ლდს
Line of edition: 20    ლჷმზიგე̄ლიხ ზორთიშა. ზორთიშა ღვაჟარ ეჩთა̄ნ ლჷჴმაშ მეზგე
Line of edition: 21    ლჷმა̄რხ, ერე ხატსჲელნახშა̄ლ გალფხა̄ნარს. სგა ერ ემჴედ ვოთარ
Line of edition: 22    მაუ̄ლდთე̄ჲსა, სგა ლახჴე̄დვნე̄ნა ზორთიშა ჲეზვთე̄ჲსა; ქო̄ხტუ̄ლა
Line of edition: 23    ზორთიშა მა̄რე̄მიშდ ი ქა ერ ემჴედ ეჯი ვოთარიშთექა, ეჩქა ოსწანა
Line of edition: 24    ვოთარს დაშნაჲ ი ხოყი̄რა ზორთიშა მა̄რე̄მიშდ ი ჩოთქაჩა. ეჩქად მჷრ
Line of edition: 25    ხახჷ̄რე̄ნა ზორთიშე̄რეშდ ვოთარს ი ეჯღა ოთქაჩა ზორთიშა მა̄რე.

Page of edition: 58 
Line of edition: 1       ამეჟი ქა̄ლშჷ̄დე̄ლიხ ყო̄რქა ზორთიშე̄რალ ი ახჭემახ ვოთარს, მარა
Line of edition: 2    ვოთარ, ალახ მა̄რე ჩვადქაჩე, ჩვალუ̄ტვე̄ლი. შუკვჟი ლეკოსა̄ნდარე
Line of edition: 3    ჴან-უ̄ღვა ელმა̄ზნ ქა ლჷსკო̄რად ნახვწი შუკვისა ი ვოთარს ლა̄ტვ
Line of edition: 4    მა̄მ ხა̄რა, სგა ხაჲა̄ლნახ ზორთიშერალ, მარა ეჲჟი სკინაჲ ლჷმა̄რ,
Line of edition: 5    ერე სევჟი ერ ჭიშხარს ხატსინა, ქა ხასკნინა ლუვღვი̄ნა ჴანარს ი
Line of edition: 6    მე̄რმა სევჟი ხატსინა ჭიშხარს ი ამჟი ფიშირ ჴან-უ̄ღვაქა ერ ქო̄თსკინა̄ლა,
Line of edition: 7    სგე̄მჩედ ნამა̄ტვ ლალჴჷრღ ყაფოშა ბუჭუ̄შთეჲსა ლეკოსა̄ნდს.
Line of edition: 8    ზორთიშე̄რალ სგა ლახჭებდე̄ნახ ჴანარ ღოშგინ ი დეშ ლახჲე̄ნას
Line of edition: 9    სგა ვოთარს ი ჩვათჩედახ ამჟი. ძღჷდ ლამარგიშ ლჷმა̄რ ვოთარ.

Line of edition: 10       ალ ამბავ ხოშე̄ლეშხენ მასმა.


არდევან ონიანი. სასაში. მ. ქალდანი. 9. VIII. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.