TITUS
Svan Prose Texts IV (Lashkh)
Part No. 43
Previous part

Text: 43 
Page of edition: 58 
Line of edition: 11 
XLIII. ციოყ გალფხა̄ნ


Line of edition: 12       გალფხა̄ნშა ციოყ ალმა̄ზ შგედხენ. ჩიხრეშთე ბოგ დე̄სა ხადე̄ნა
Line of edition: 13    შგედხენ. გუშგვე ხოშე̄მიშდ ლოხტუ̄ლა ეჩხენისა ციოყს:
Line of edition: 14       -- ქა̄ვ ანჴიდ ნიცქა ამხენთე.
Line of edition: 15       -- დეშ ლოქ იბე̄მბღვე მიჩ ნიცქა, ვარ ხო̄ქვა ალეს.

Line of edition: 16       ეჩქა ციოყს დედე ოხჷრშვენა ი ქო̄სხუნა̄ლა:
Line of edition: 17       -- ბა̄ზივშვ-ბა̄ზი ლოქ ანჴდენი ბოგს ქა, ლეჟა ლოქ ანტხენი
Line of edition: 18    მინეშთე ი ხოლა ლე̄თს ლოქ ხეჩო.

Line of edition: 19       ნიკოლოზ, გუშგვე ხოშა, ჩიქე ქა̄ხა̄ტვე̄ნა ამხა̄ვ, მარა ეჩანღო
Line of edition: 20    ოსფიქრა, ერე ციოყ მიჩ ლოქ ეში̄ ჩვადგარი, ბარემს ჯეჲ ლოქ
Line of edition: 21    ადგარნე ეჩის. ოხფი̄შვდა იფნაჲმჷყხენქა თოფ, ხოყი̄რა ფოყჟი,
Line of edition: 22    დაშნა̄ჲ მუჭს ახხვე̄ნა ი ჩუ დეშ ოთდაგრა. სერ ეჩუნღო სგა̄თხჷრე̄ნახ
Line of edition: 23    ეშხვა̄რ.

Line of edition: 24       ოთკვიახ ეშხვინ გალფხა̄ნარს გუშგვე ხოშე̄მი ლეჩხუმთე ლი̄ზი
Line of edition: 25    ი ჩოსდარჯახ თანაღჟი. ძინარს გუშგვე ხოშა (ნიკოლოზ) ცხეკი
Line of edition: 26    ქათალს ხაწდა ი ეჯნარ ოხფი̄შვდა თოფ. ჟოსწება ცარჲელ თოფ ი

Line of edition: 27       ემჩედ ეჲჯი. ამჟი ჩვასხვე̄ნახ ჯო̄დლა̄რა̄ჲსა გალფხა̄ნარ, სემი
Line of edition: 28    ლჷმა̄რხ ალჲარ, სგა̄ხცხეპახ გირგტანდ ი ჩუ ლირმის ლახკვეჲახ.
Line of edition: 29    ოსწა̄ნა ალეს თოფ ი მაჩე̄ნა მუხვბად, -- ლევან ხა̄ჲშხე̄ნა მაბჟა, --
Line of edition: 30    ეჯნარ ოსხელა:
Line of edition: 31       -- ალს ლოქ ჩვადგარი ი ეჩუნღო მა̄ჲ ლოქ ხეკვეხ, ეჯი̄ვ
Line of edition: 32    ჩომინხ.

Line of edition: 33       ეჩქა ციოყს ხო̄ქვა:
Line of edition: 34       -- ალე ლოქ ჟეღ ლი, მაჩე̄ნა̄მ ლოქ ჩვადგარი მინს ი სერ
Line of edition: 35    ლჷწორ ლოქ მა̄მა ჴედნიხ, ჩუვ აფიშვდხ.

Page of edition: 59 
Line of edition: 1       ჩოთფი̄შვდახ. ეშხუ დაბჟი ერ ქე̄მჩედე̄ლი, თოფს ლახა̄რა ეჩქა
Line of edition: 2    ლასყის. გალფხა̄ნარს ხო̄ქვახ:
Line of edition: 3       -- ალე ლოქ შგურ ხაყრახ, ერე უსყა თოფშვ ლოქ ოხყა̄ლვა
Line of edition: 4    სემი ღვაჟმა̄რე.

Line of edition: 5       ხანდროვნახ სერ ეჯჲარ ი გუშგვე ხოშა, ყო̄რქა დესსა
Line of edition: 6    ლჷმჴედო̄ლინ ეჯჲარე მაყალშვ.

Line of edition: 7       ეშხუ ლადეღ ციოყ ალმა̄ზ ახჷლშენხენ. გუშგვე ბებე თეთუ ხოჩა
Line of edition: 8    ზურა̄ლ ლას, ეჯი ჩვასხვიე̄ნა ციოყს ჲეზვისა, ჩოსჩოქვა:
Line of edition: 9       -- სგავ ხეწჲან ქორთე.
Line of edition: 10       -- ქორთე ლოქ იმჟი ანჩეს, მიჩა მჷდგარი ლოქ ქორს ხაყაჲ.
Line of edition: 11       -- ჲაღო დე̄ფანთეჟი̄ვ, ლოქ ეში̄ ჟანჩად.

Line of edition: 12       ჟოთჲა დე̄ფანთეჟი, ეჩეჩუ ტაბაგ ოსგა, ლეზობ-ლეთრე ოხჴი̄და.
Line of edition: 13    ჟი ერ ალშდჷმე̄ლი, ეჩქა ხო̄ქვა:
Line of edition: 14       -- ქა̄ვ ანჴიდ ეჯი ყო̄რქა, ახ ლოქ პურმარილ მიუღია, სერ
Line of edition: 15    დეშჲამ ლოქ ხეჩო ხოლა̄მ.

Line of edition: 16       ქო̄ხჴი̄და ჭაშ ბებეს ი ქა ლოხყა̄ლვნა ღულაჲჟი ი ამჟი
Line of edition: 17    ჩვალსყე̄ლიხ.


ეპი ჯანხოთელი. ჩიხარეში. ა. ონიანი. 8. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.