TITUS
Svan Prose Texts IV (Lashkh)
Part No. 47
Previous part

Text: 47 
Page of edition: 62 
Line of edition: 3 
XLVII. მჷსავ ი მუშვან


Line of edition: 4       ეშხუ ლადეღ მჷსავ ი მუშვან ალნაზვრე̄ლიხ ლათხვიარს, ეშხვა̄რე
Line of edition: 5    თოფარ ოთსი̄ნჯვახ. მუშვანი თოფ ეჯკალიბ ლჷმა̄რ, ერე სგა̄ნთე
Line of edition: 6    სარკშა̄ლ ლჷმთერო̄ნინ. ალ თოფი გუ̄ნღა სგა ხოყი̄რა მჷსავს მუშვანიშვდ
Line of edition: 7    თოფ ი ჩოთდაგრა. ჩოთო̄ღა̄ლა ლჷდგარ, ჟოხსყა ჟაგი წუნ-
Line of edition: 8    წუხვ, სგა ლახა̄რა ი ლჷმცომინ ეჯნოვშვ ლჷდგარს, ერე წიორს მო
Line of edition: 9    ლოხმამა̄ნ. ერ აცმენდა, ანჴად იმხენი̄ ღენ თეკე̄რი ლა̄ში̄ლ ი ჟესაგა̄ნ
Line of edition: 10    ლჷდგარს. მჷსავს ლახნა̄ქუ̄ნ: "ამკალიბ მეგემ ლოქ ამი დე̄მე არი,
Line of edition: 11    ალე ლოქ იმხენ ემჴედ".

Line of edition: 12       ალ მუშვანს ათსედა ჭყინტგეზალ. ალე ჟალღვაჟმა̄რე̄ლი ი ეშხუ
Line of edition: 13    ლადეღ სავთე ემჩედ, ლუსუ ხოჩა̄მდ ოხთო̄ნა. ეჩუნღო ემტეხ აგითე;
Line of edition: 14    მიჩა მუ იმჟი̄ჲ ღენ ათვაფ, ალე ჩუ ხახლე̄ნა.

Line of edition: 15       მუჟღორ სავჲარ ემჴედხ შვანთე, ალ ჭყინტო̄ლა მუე მჷდგარი̄ჲ
Line of edition: 16    სგა ხანჴრინახ. ჩვალბინავე̄ლიხ ეშხუ ვოჯახისა ი ამეჩუ ეშხუ ლე̄თ
Line of edition: 17    მეღვინდ ლჷდგარ მუშვანი გეზალ ხაყე̄ნახ. ე̄რ ლჷმთჷრინხ, ალ
Line of edition: 18    მჷდგარი მჷსავი კათხთე̄ჲსა ემშყედე̄ლი ეჯკალიბ თეკე̄რი ლა̄ში, მაჲკალიბი̄
Line of edition: 19    ლჷდგარს ესა̄გა̄ნ ლაცომჟი. მჷსავს კათხ ჩოსგა ი ჟოხშურჲელა.
Line of edition: 20    აფხნიკარ ლახჭოდნე̄ნახ:
Line of edition: 21       -- მაჲ ამბავ ლოქ ლი ი იმ ლოქ ოხწუხვავა?
Line of edition: 22       -- ხოჩა გვეშ ლოქ მა̄ ლი, მიჩ ლოქ ე̄რ მუშვან ოთდაგრა ლათხვიარს,
Line of edition: 23    ამეჩუ ლოქ ე̄რ თოფ ხუღვა, ეჩა გუ̄ნღა, ეჩის ლოქ ასგენე̄ნა
Line of edition: 24    წუნწუხვშვ ლაცმენჟი ამკალიბ თეკე̄რი ლა̄ში, ა, ათხე ლოქ ერ კათხთეჲსა
Line of edition: 25    ემშყედ.

Line of edition: 26       ალე ალ ჭყინტემ ჟენუ̄ვნარე მაგ, ალეს დერ ლუსუ ჩუ
Line of edition: 27    ხოხა̄ლდა!

Line of edition: 28       სავჲარ ე̄რ ჩვედშდჷმა̄ლა̄ნხ, ქა̄ნჴად ალ ჭყინტ ი ხოშა მა̄რე̄ლს
Line of edition: 29    ლეხჭოდდა:
Line of edition: 30       -- მაჲკალიბ თოფ ლოქ ხაღვე̄ნა მიჩა მუს?
Line of edition: 31       -- ამკალიბ ი ამკალიბ თოფ ლოქ ხაღვე̄ნა, ლჷშნეულდ ხო̄ქვახ
Line of edition: 32    ეჯჲარს.

Line of edition: 33       სგე̄მჩედ ეჯ ვოთახთე, იმე̄ჲ სავჲარს ხაგდჷდახ, ქოხკი̄და თოფ
Line of edition: 34    ბიდხენქა, ჩოთთი̄რა, ერე ალე მიჩა მუე ნაღვე̄ნ თოფ ლი.

Page of edition: 63 
Line of edition: 1       მე̄რმა ლადეღ, ერ ესღრჷ̄დახ, ჩოსხვი̄და ალ ჭყინტ შუკვისა ი
Line of edition: 2    ჟანხვიტ სავჲარ, ჯეჲ ჩვედი̄ტვა̄ნ. ალეს ეხჭამ სავჲარეშ ი შვანარე
Line of edition: 3    ლი̄ჲმახვა̄ლ. ძღჷდ ამბავ ხა̄დახ, ლიმო̄რავ ი ლისყა̄ლი̄ ეჩჷნღო.


გრიგოლ დონღვანი. ჩიხარეში. ა. ონიანი. 10. VIII. 1957



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.