TITUS
Svan Prose Texts IV (Lashkh)
Part No. 49
Previous part

Text: 49 
Page of edition: 63 
Line of edition: 14 
IXL. ჴადი ზიგ


Line of edition: 15       ჯვინელ დროჲჟი მე̄ვარ ლეგლირდა̄ლობ ხახლენა ი ხვაჲს ღალ
Line of edition: 16    ლჷმხვიტინ ალ ლეგლირდე. იშგენ ჟაგნაჟგუნ მა̄მ ხახლე̄ნახ
Line of edition: 17    ლიმზჷრლიჴჷ̄რა̄ლგნქა ი ლჷმგადინხ უქმარს მე̄რმა-მე̄რმა ლეგლირდე̄მი
Line of edition: 18    ჟახაჟი ი ეჯ ლადეღ ჟი ლჷმნაზვრო̄ლინხ ეშხუდ, ქა ლჷმნაყინხ
Line of edition: 19    ტაბლარს, სგა ხაჴჷ̄რა̄ლნახ ლეგლირდე̄მი მუფშვდა ღე̄რბათს, ერე ჟენლეჩას
Line of edition: 20    მინ ლეგლირდეხენქა. ნატუ̄სუნს ხატუ̄სნახ ი ეჩანღო ჩუ
Line of edition: 21    ლჷმსგურო̄ლინხ სკარდ მაგ ეშხუდ. ალ ლიმზჷრი ლიგდენის ი
Line of edition: 22    სკარობს ჲედ სოფლობშვ ლჷმჩომინხ ეშხუდ მაგ, ჲედ გვარიშ ი გვარი
Line of edition: 23    შელდჟი. ნაჲ გვაგად ლიმზჷრ ულშა საფტინ ლადელ ი ამ ლადეღ
Line of edition: 24    ხაჴჷ̄რა̄ლნახ ჴადი ზიგი მუფშვდა ღე̄რბათს ჴადი ზიგხენ ლილჩეს. ალ
Line of edition: 25    წეს ვოდ ათხე̄ დროჲნუნ ხოგაჭხ გუშგვე ხოშე̄ლუს. იმვა̄ჲ აგის
Line of edition: 26    ხვამზჷრდად, ეჯ გიმს ლეჴნი-ლელა̄შდ სგა დეშერ ხეფდა̄ლდა ი ჩვა̄რდა
Line of edition: 27    ათხე̄ხიდ ამჟი უყდ.

Line of edition: 28       მაშე̄ნა ლემყალ ლეგლირდად ი ამსვა̄ლდა მჷდგარიდ ჴადი ზიგ
Line of edition: 29    ხაბჟე̄ნახ ი ათხე̄ჲ მე̄ვარ ხაყლუ̄ნიხ ჴადი ზიგიშვდ. ლამზჷრ აგის
Line of edition: 30    ხილ მა̄ჲ არი, ალეს თელდ გვარ ი̄თე. ამკალიბ ლიმზჷრ ჲერხი აგის
Line of edition: 31    თელდ სოფელს ხაგდე̄ნა. თელდ სოფელ ლჷმხურჲელო̄ლინ, სკარსი̄
Page of edition: 64  Line of edition: 1    ლჷმჩომინხ თამფიერისა. ხოშა თანაფ ლადეღ ღჷ̄რდახ ლამზჷრდ
Line of edition: 2    ლჷჯითე, ეჩეჩუ ხემზჷრხ ბეყჷნდერს. ბეყჷნდერი ჟახაჟი ლჷ̄გ მე̄ვარ
Line of edition: 3    ჯვინელ დროჲა საყდარ ი სოფელ ჟემხვეტე̄ლი ზიგხენ. ათხე ჟი
Line of edition: 4    ხეთრახ ჯვინელ ქორალე ნამხორალ, მარა ქორო̄ლარ მე̄ვარ კოჭო̄ლუ̄ლარ
Line of edition: 5    ლჷმა̄რხ. ათხე̄ დროჲჟი და̄რ იგემ ამჟი კოტო̄ქ ქორო̄ლარს.

Line of edition: 6       ბეყჷნდერი მიდამისა ხვაჲ ნამხორვალ არის ქორალეშ, ეშხუ
Line of edition: 7    საყდარ ამეჩუ ხაღვე̄ნახ ი მე̄რმე -- ლაშო̄შ. ლაშო̄ში საყდარ ლჷ̄ნშგ
Line of edition: 8    ლჷ̄მა̄რ სპილენჯი ნა̄ნშგუნშვ ი ეჩა ნა̄ნშგუნ სპილენჯ ახხვი̄დახ ვორა
Line of edition: 9    ლაშთხარჟი ლა̄შხარს ი ეჯნოვშ ლა̄ჲრაყ ცხვადვარ ანსყეხ.


არდევან ონიანი. სასაში. მ. ქალდანი. 13. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.