TITUS
Svan Prose Texts IV (Lashkh)
Part No. 50
Previous part

Text: 50 
Page of edition: 64 
Line of edition: 10 
æ. ჟამობ


Line of edition: 11       გარგლიხ, ერე ფორჲე̄ლუ̄ჲსა ქალაქ ლოქ ლჷმა̄რ ჯვინელ დროჲჟი ი
Line of edition: 12    ჟამობჟი ლოქ ემხვეტ ხალხ. ეჩა ნაფდიაქა ჲერუ-სემი აგის აჯაღ
Line of edition: 13    არიხ საყდრი ნამხორვალ. ალჲარ ლიხ: ლაშო̄შს, ლაგვირკა̄შს ი
Line of edition: 14    ბარბალნაკს. გაცხაჲდ ქალაქ მჷრე̄ს ლას, ოდო ამშელდ საყდარ მაჲ
Line of edition: 15    ხე̄რო̄ლხ, სოფელ ერ ლჷმა̄რე̄ლას.

Line of edition: 16       ჟამ ჴადი ზიგდ ხოშილს ლჷმხვიტინ ხალხს. ჟამობჟი მაიდი̄
Line of edition: 17    ლჷმა̄რ ი ეჯი̄ ლჷმხვიტინ ხალხს. მაჴედ დე̄სა ხაჴდენო̄ლნახ ი ჟი ღალ
Line of edition: 18    ლჷმხვეტო̄ლინხ მაიდშვ. იმე̄ჲ ე̄სა ჯვინელ ნასვფელ არი, ეჯი მაგ
Line of edition: 19    ჟამობჟი ლოქ ემხვეტ ი ეჯ ნასვფელ ნამხორვალს ათხე ნაჟამვარს
Line of edition: 20    ხატუ̄ლიხ. ჩო̄ლურიშ ი ლა̄შხი ნე̄სგა ათხე ეჩთა̄ნ ლეწფერი ცხეკ
Line of edition: 21    ხაზვიბ, ერე დე̄მე არი ეჩთან ლეწფერ ი ეჯ ლეწფერისა არი სპონტიო
Line of edition: 22    ბეჩვშ ნაგემ ნასჷყდარ ი ნასვფელი̄ ჟი ხეთი̄რი. ამჟი ხეთრა
Line of edition: 23    ლაფურხენ ი ლაცვა̄შ ი ალე მაგ ნასვფელარ ნაჟამვირ ლოქ ლიხ.

Line of edition: 24       დეცილს ი ბეყჷნდაშს, ჩო̄ლურიშ ი ლა̄შხე ნე̄სგა, ძღჷდ სოფლარ
Line of edition: 25    ლჷმა̄რხ. ათხე ნასჷყდარალ ი ნამზიგვარ ჩჲაგ ჟი ხეთრახ. ზაისა
Line of edition: 26    ეშხვინ ნასჷყდარმჷყ ჟი იხვრჲელი სოფელ ი ლიმზჷრს ი სკარობს იჩოხ
Line of edition: 27    ჟამხენ ნაგადს. ეჯზუმ მაიდობ ლჷმა̄რ ჟამობჟი, ერე ეშხუ კა̄დე̄მი ყუათეჲსა
Line of edition: 28    სგა მა̄ჲ ეთსკჷ̄დო̄ლ კაკლარ ჲედ ფექ, ფეტვიშ ი̄რო̄ლ ა̄ ქერიშ,
Line of edition: 29    ჲედ კვეცნაშ, ეჯი ხაჯო̄ნა უდუ̄ნი ფასდ. კაკლო̄რა̄ ლაზმად კა̄დე̄მი
Line of edition: 30    ყუა ხაღვე̄ნახ ჟამობჟი ი ეჩის ხაყლო̄ნახ კა̄დე̄მი ყუობს (//ცული
Line of edition: 31    ყუობს). ცული ყუათეჲსა ლამსკჷდ კაკლარისა ხვა̄ჲდინ მა̄რე̄მი ქონს
Line of edition: 32    ქა ლჷმჴიდინხ ფასდ. ხორჲელაჲ და̄ს ხაშყიდ შვანისა ი ჟამობა
Line of edition: 33    ამბავს მაგ ა̄მბვი ი ჴადი ზიგი ამბავს ლა̄ჲდი̄. აშ მუღვაჲ ხვაჲს ლჷმხვიტინ,
Line of edition: 34    მარა ჟამობ, ვორგულდ ესჴიდ, თელდ ჟი ლჷმჭკიჟინ სოფელს,
Page of edition: 65  Line of edition: 1    ამჟი ერე მუ̄მბვი̄ ძვირდ გარ ე̄სა ლჷმსედო̄ლინ ლუარ. ათხე ხეთრახ
Line of edition: 2    ვობო̄ლს ნამზიგვარ ჟამობჟი̄ნა ნამხვიტ. მაგ ჟემხვეტხ ალ სოფელისა.
Line of edition: 3    ეშხუ ვოჴარ ბობში̄ლ გარ ემსედე̄ლი, ვობლო̄ლ ი ამხენქა ეჯ
Line of edition: 4    მიდამს ასჟახე̄ნა ვობო̄ლ. ვობო̄ლიე̄რუ ათხე̄ჲ ჟი ხა̄ჲშხა ეჯ მიდამს ი
Line of edition: 5    ალ ვობო̄ლი ნათსავ ხეკვეს ლე̄სეხ, ათხე ერ ჟაჴუნდერს იზგეხ
Line of edition: 6    ბასლომაჲშე̄რალ. ფიშირღე̄თ მეზგე ლიხ ათხე ბასლომაჲშე̄რალ.
Line of edition: 7    ალჲარ ლოქ ლიხ ჟამობჟი̄ნა ნა̄ზვ ვობო̄ლხენქა ი ეჯ ვობო̄ლი ნაყარ ლოქ
Line of edition: 8    ლი, ხედი̄ ქა̄ხსედა ჟამობს. იშგენ სოფლარ მაგ მახე სოფლარ ლიხ,
Line of edition: 9    ჟამობჷნღო̄შ. ჟამი ჟახე ათხე საყდურდ არი ჩუ მესდე სოფელისა
Line of edition: 10    ი ჟი ლახ ე̄რ იმჯა̄რვი ჲერვა̄ლემიშთე, ეჩქა ხაყლეხ საყდურდ: "ჰატ,
Line of edition: 11    ლოქ სი ჟამ!".

Line of edition: 12       ლჷჯი̄ ნაფდიას ლი ეშხუ აგის ლუზუ̄გვე სუკ მე̄ვარ კჷ̄ლთხიქა ი
Line of edition: 13    მაგ სგა ხაკვი̄შა ი ყჷლეხ, "ალ ლუზუ̄გვა სუკისა ჩუ ლოქ ხაშთხვა
Line of edition: 14    განძო̄რა ჟამობჟი̄ნა ნაშხუნ. " ეჯ სუკს ხა̄ჲშხა ჟახად ბარბალნაკ.
Line of edition: 15    ამეჩუ ლოქ ლჷმგენე̄ლი საყდარ ი ეჯი ლოქ ოთშდუხვახ, მარა ქალიშთხრის
Line of edition: 16    ი ლითხე̄ლის ათხად დეშერ ლახკვეჲა.


არდევან ონიანი. სასაში. მ. ქალდანი. 13. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.