TITUS
Svan Prose Texts IV (Lashkh)
Part No. 51
Previous part

Text: 51 
Page of edition: 65 
Line of edition: 17 
LI. ტურისტალ


Line of edition: 18       მოსკოვხენ ტურისტალ ანღრჷ̄დახ ესრენ სავჲა თანაღქა შვანთე.
Line of edition: 19    ლასხ ჲეხვ-ჭაშ ი მინე დენაგეზალ. ხოლა ამინდ ლას ი ქე̄ხძგვაბ ჟაჲ,
Line of edition: 20    ჲეხვ-ჭაშ ქა ლოხჩაშხ ი ალჲარე ჷეზალ ადჲე ჟაჲემ. ჟაჲ ე̄რ ჩვედჩერვა̄ნ,
Line of edition: 21    დი̄ნა̄ჲ ჩვადჩერვე, მარა ლერექვ დე̄სა ხესად სგა, ჩუ ხეკვა̄რა̄ნ
Line of edition: 22    ლჷდგარშა̄ლ.

Line of edition: 23       ამჟი̄ნ ესრენ ეშხუ მუშვან ყაჩაღ არი ცხეკისა ი ჩვესწვე̄ნე ალ
Line of edition: 24    დინა კარავხენქა. აჩად, ჟენტო̄ტე ალ დი̄ნა, ადჲე კარავთე, ტუფვართეჲსა
Line of edition: 25    სგა̄თჭო̄ნე, ლემესმოყ ხოჩა̄მდ ჩვადტებდე ი დი̄ნად ჟენბინე
Line of edition: 26    ქუნე ლი̄ჲბი̄ნე. ჟენხოჩვა̄ნ, მარა ლუშნუ ალეს მა̄ ხოხალ ი ლურუსუ
Line of edition: 27    -- ჭყინტს. ჩვარიხ ამჟი ეშხუ ზაჲ ი ჭყინტ ხა̄მნე დი̄ნას ნათხვიარემი
Line of edition: 28    ლეღვს ი ამნოვშ ასე̄ლვე. ალ ეშხუ ზაისა დი̄ნად ჟახთო̄ნვნე
Line of edition: 29    ჭყინტს ლურუსუ გარგლა, ეჩღო̄ნ ლაჲწიე მოსკოვთე -- მიჩა დიეშთე
Line of edition: 30    ი მუშეთე, ამნე̄მ ვარ ხე̄ქვ:
Line of edition: 31       -- მიჩ ლოქ სოფელთე ლა̄ზ მა̄მა ხა̄რ, მა̄რე ლოქ ლახდაგრა.
Line of edition: 32       -- ჲაღო სოფელქა ლე̄თშუ ლოქ აჩადხ უქბოვშ ი ეჩუნღო
Line of edition: 33    ლოქ მიჩ ხოხალ.

Line of edition: 34       აჩადხ გაცხაჲდ ი აჴადხ მოსკოვნუნ. ამეჩუ დი̄ნად ადზგზე ჭყინტ
Line of edition: 35    მიჩა დიეშ ი მუეშთე:
Page of edition: 66 
Line of edition: 1       -- ქავ ხე̄ქვ მიჩა ამბავ თხუმნეშ ვოკერნუნ

Line of edition: 2       ამჟი ეჯღა ჩომინ, ერე უცეფ მო̄ ლახბე̄ნყვა̄ნ მიჩა დის ი მუს --
Line of edition: 3    მასჲდშვ ჩუ დო̄სამა ხაყრა̄ნხ.

Line of edition: 4       ამნე̄მ ქო̄ხო̄მბვე მაგ, მარა ეჯჲარდ მა̄დ ედჯირვეხ, აჩად სერ ი
Line of edition: 5    ოხჴიდ მინე დი̄ნა. ხა̄დახ ძღჷდ ლიხჲდა̄ლ.

Line of edition: 6       ეჩანღო ჩვადჲეხვჭაშეხ ალჲრ, ქა ლახა̄დახ ეშჩუ ჲეშდ ზაჲ,
Line of edition: 7    გეზლი̄რი̄ ქა ლეხვოდა̄ნხ. ეჩღო ლე̄ქვ ჭყინტემ:
Line of edition: 8       -- ღჷრი ლოქ მიჩა დედე̄შ ი მამა̄ ლაწედთე -- შვანთე.

Line of edition: 9       მიჩა ჲეხვ დე̄მ ფუშდდა, მარა ეში̄ მა̄დ ენჟომე ლი̄ზი. ამი
Line of edition: 10    ჟოხმეჴრეხ მიჩა ამხვარდ ი ჩოთდარჯეხ. ჟოხჩიშ ამნე̄მ ი ჲერუ მა̄რე
Line of edition: 11    აჯაღ სგა ლახდაგა̄ნ. ჩვადჷრმეხ ი ქო̄თქვიცხ ჲეშდ ზაჲ. ადჲეხ ი
Line of edition: 12    ჩუ ხეყე̄დახ იმე̄ჲ ღენ მოსკოვი ფე̄დჲას. ეჩე ლეგდ აჴად. ვოდ ერე
Line of edition: 13    ლადგარს მო̄ ლახა̄გა̄ნ, ეჩქად მა̄დ ახმეჴრა̄ლვნე მიჩა ჲეხვს ი გეზალს.
Line of edition: 14    ათხე ოხზჷზე ქაღალთ. შიშდ ანჴადხ ალჲარ, ჟოხო̄რზინეხ ი ჟანხოჩვეხ.
Line of edition: 15    ქერ ანჴად ქა̄მთე, აჩად ი ჩვა̄რდა მიჩა ჲეხვიშ ი გეზალცახან
Line of edition: 16    მოსკოვს, მარა აჯაღ ლახა̄და აგითე ლი̄ზი̄ მანდ. დე̄მღა ფუშდდახ,
Line of edition: 17    მარა მიჩა მა̄დ ენჟომე ი ანჩად შვანთე. ჟი̄ვდ ოხმეჴრეხ მიჩა
Line of edition: 18    ამხვარდ, ჩოხდარჯეხ ი ჩვადგარხ. ჯეჲ შვანს ადშდუხვეხ ი ჲეხვ ი
Line of edition: 19    გეზალ მოსკოვს ოთსად.


არსენა ონიანი. სასაში. ა. ონიანი. 11. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.