TITUS
Svan Prose Texts IV (Lashkh)
Part No. 75
Previous part

Text: 75 
Page of edition: 101 
Line of edition: 7 
LXXV. ღარიბ ჲეხვ-ჭასი გეზალ


Line of edition: 8       ლჷმარდელიხ ეშხუ ღარიბ ჲეხვ-ჭაშ. ჩუ ხაყე̄ნახ ეშხუ ჭყინტო̄ლ.
Line of edition: 9    ეშხუ ლადეღ აჩად ლამპო̄ლთე. ალე ჭყინტო̄ლ თელ ლაღეღ
Line of edition: 10    ხეჭმინა̄ლდა ნეპო̄ლარს ი ნებოზს იმჟვა̄ჲ ლას ჩვადჷრმე ნეჯვიდშვ
Line of edition: 11    წჷრნი ნეპო̄ლი̄ლ. აგითე ლიჴედ ე̄რ ხეკვად, ეჩქა ნეპო̄ლი̄ლდ ხე̄ქვე:
Line of edition: 12    -- ნუმა̄ვ აჲეს ი ხოჩე̄მი ნაჩომს ჯეჲ ლოქ ქა̄თტიხე. ჭყინტო̄ლდ
Line of edition: 13    ჩვაფიშვდ. ნეპო̄ლი̄ლდ ხე̄ქვე: -- ჯეჲ ლოქ ბუნტყულს შჷდნი ი ეხჭამუ
Line of edition: 14    ლოქ. ჭყინტო̄ლ ეთჭამ. ერ აჴადხ წჷრნი ნეპო̄ლი̄ლა ქორნუნ,
Line of edition: 15    ეჩქა ეჯნე̄მ ჩვადშგურა̄ნე: -- ქორთე ლოქ ადრიხ, მიჩა აგი̄შარ ჩი̄ს
Line of edition: 16    ლოქ ქა ლახჭარჟიხ, მარა მიჯნე̄მდ ლეჷვე̄რი̄ლ ლოქუ ხაშგმინ, ეთმაჭნიხ
Line of edition: 17    ლოქ ა̄დუ, მარა ეში̄ ლოქ ქა ლახო̄დიხ. შუკვჟი ხატულდა̄ვ ლოქ
Line of edition: 18    "ბუსკა, ბუსკა!" ი ეჯი̄ჲ ლოქ ეთჭემნი. შომა̄ჲ ლოქ მიჩა ში ესწჷხჷ̄ნდეს,
Line of edition: 19    ეჩქა მიჩა ჟახე̄ვ ლე̄ქვ ი ეშჩუ ლოქ ანჴდენი.

Line of edition: 20       სგა̄ჩად ქორთე. ნეპო̄ლ ჭყინტდ ესსიპდა ი ქო̄ხო̄მბვე მაგ მიჩა
Line of edition: 21    აგი̄შარს. ნეპო̄ლი̄ლა დედედ ი მამად უზმად ოხჴიდხ ვოქრ-ვერცხ,
Line of edition: 22    მარა ჭყინტო̄ლდ ლეგვე̄რ ხაშგმინ. ათმაჭი̄ნდახ, მარა ეში̄ ქა ლახო̄მხ.
Line of edition: 23    ჭყინტო̄ლ ესღრი ი ლეგვე̄რ ხაჭიმ. ნე̄სგა შუკვთე ე̄რ აჴადხ, ჭყინტო̄ლდ
Line of edition: 24    ესფიქრე: ლეგვე̄რ ლოქ იმნარ ხაკუ, ლეგვეჲ ლოქ დე̄სმა
Line of edition: 25    ხუღვა. ესნატჲელენეპო̄ლი̄ლ ი ეჯი ეშჩუ ანჴად ი ქა ლეხჭოდდა: -- იმ
Line of edition: 26    ლოქ ოხწუხვავა? -- იმ ლოქ ი ლეგვე̄რ იმნარ ლოქ ხაკვდახ, ლეგვეჲ
Line of edition: 27    ლოქ დე̄სმა ხუღვახ. ნეპო̄ლი̄ლდ ჩვადშგურა̄ნე: -- ქე̄რ ლოქ ხე̄ქვნე
Line of edition: 28    ლეგვე̄რი̄ლს, ჟი̄ვ ლოქ ანმა̄რე ლეზობ, მა̄ჲ ლოქ კელდღა ჩვე̄მე არი,
Line of edition: 29    ეჯი ლოქ ჟანმა̄რნე.

Line of edition: 30       აჩად აგითე ალე ჭყინტო̄ლ ი ადჲე ლეგვე̄რ ქორთე. ერ აჩად,
Line of edition: 31    მიჩა მუდ ქო̄სყუ̄ლე: ატ ჯეჲ ლაჟგიარ, იმ ლოქ ხაღლინა, ამზუმ ხანს
Line of edition: 32    იმე ლოქ ხაკვა̄რე̄ნა ი მაბჟა ოხჴი̄და̄ჲ ლოქ დე̄სმა? ჭყინტო̄ლდ ხე̄ქვე:
Line of edition: 33    -- ლეგვე̄რ ლოქ ოხჴი̄და. მამა ხოშა̄მ ედჷმჯა̄რვა̄ნ ი ხე̄ქვე: --
Line of edition: 34    იმნარ შავდ ლოქ ხაკვდახ ლეგვე̄რ, ლეგვეჲ ლოქ დე̄სმა ხუახ. ეჩქა
Page of edition: 102  Line of edition: 1    ჭყინტო̄ლდ ხე̄ქვე ლეგვე̄რს: -- ჟი̄ვ ლოქ ანმა̄რე ლეზობ. ლეგვე̄რხენქა
Line of edition: 2    ქა̄ნჴადხ ზურალე̄ლ, ქა̄ნგენეხ ტაბაგ, ქა̄ნჴიდხ ლეზობ ი ეჩუნღო
Line of edition: 3    სგა̄ტახხ. კოჭო̄ლ ხანისა ჩვედკუპწა̄ნხ. ეჩუნღო ჭყინტო̄ლა მუ̄ლუ̄ლდ
Line of edition: 4    ჩვაწჲე მეფე. ერ ანჴად მეფე, ეჩქა ჭყვინტო̄ლდ ხე̄ქვე ლეგვე̄რს:
Line of edition: 5    -- ეჲკაიბ ლეზობ ლოქუ ანმა̄რე, მა̄ჲ ლოქ მეფეს ხესკო̄ლდეს!

Line of edition: 6       ლეგვე̄რხენქა ქა̄ნჴადხ მჷშდბა, ქა̄ნგენეხ ტაბაგ ი ჟანმა̄რეხ
Line of edition: 7    ჩინაირ ლეზობ. ალეს ე̄რ ხეწად მეფე, ხე̄ქვე მიჩა მჷნჴრიალს, ერე
Line of edition: 8    ქო̄თღა̄ნხ ლეგვე̄რ. ჯარი მა̄რე̄ლდ სგახაფხიჭეხ ლეგვე̄რს ი ოხღვახ
Line of edition: 9    ყო̄რალქა, მარა ლეგვე̄რ ჩვედბე̄ლა̄ნ. ეჩქა ჩვახვირხ ქორ ი ეჲჟი
Line of edition: 10    ადჲეხ. ამუნღო აჯახ ჩვედღარბა̄ნხ. აგი̄შარ სგე̄თჴჷ̄რა̄ნხ: -- აჯაღ
Line of edition: 11    ლოქ ნო̄თი ესმა ითხას.

Line of edition: 12       ჭყინტო̄ლ ატახ ეჩხა̄ვ, იმე̄ჲ ნეპო̄ლი̄ლ ადჷრმე ი ესნატჲელე
Line of edition: 13    ნეპო̄ლი̄ლ, ეჯი ეშჩუ ანჴად ი ხე̄ქვე: -- მაჲ ლოქ ხაწჷხ? ჭყინტო̄ლდ
Line of edition: 14    მაგ ქო̄ხო̄მბვე. ნეპო̄ლი̄ლდ ქა̄ვდ ხათო̄ნე, ერე მინეშთე ლოქ ე̄რ
Line of edition: 15    ადრიხ, მიჩა აგი̄შარს ნო̄სჲამუ ლოქ ეხბი̄შდა ვილო̄ლსერ. ეჯის შიყქა
Line of edition: 16    ლოქ ერ ტოტს ოსცვი̄ნე, ვოქრს ლოქ შჷდე ღოშგინქა. აჩადხ ნეპო̄ლი̄ლა
Line of edition: 17    აგითე ი, იმჟვა̄ჲ პირველდ, ქო̄ხჴიდხ მაგ მასარდ, მარა ჭყინტო̄ლდ
Line of edition: 18    ვოქრე ვილო̄ლ ხაშგმინ. ათმაჭი̄ნდახ ა̄დუ, მარა ეში̄ ქა ლახო̄მხ.
Line of edition: 19    ანჴად აგითე ჭყინტო̄ლ ი ანჴიდ ვილო̄ლ. მიჩა მუ აჯაღ ლჷმჯა̄რვე ოსხვი̄და
Line of edition: 20    ი ხექვე: -- იმნარ ლოქ ხაკვდა ვილ? ეჩქა ჭყინტო̄ლდ
Line of edition: 21    ქო̄სცვიე ტოტ შიყქა ი ვილო̄ლდ ეშ ადბი̄ნდღე ვოქრ ღოშგინქა.
Line of edition: 22    ამუნღო აჯაღ ჩვედკუპწა̄ნხ. ეშხვინ ჭყინტო̄ლა მამა აჩად ბაზართე,
Line of edition: 23    ჟენღვაჭრე მაგ მასარდ ი ქო̄სცვიე შიყქა ტოტ ვილს, მარა ეჯნე̄მ დე̄სმა
Line of edition: 24    ანშიდ ღოშგინქა. მა̄რო̄ლდ ნაღვჭარ მაგ ღოშდ ლახტის. ესრენ
Line of edition: 25    ემჴედ ე̄რე, ჟოხცა̄დუნა ვილარ. ხოჩა მიჩ ოთჲა ი ხოლა ჩოსცვი̄რა.
Line of edition: 26    ანტახ აგითე ლეჟრი მა̄რო̄ლ ი მაგ ქო̄ხო̄მბვე აგი̄შარს. ამუნღო აჯაღ
Line of edition: 27    ჩვედღარბა̄ნხ. სგაუდ ეთჴჷ̄რა̄ნხ მინე გეზალს: -- აჩადუ ლოქ აჯაღ,
Line of edition: 28    ნო̄თი ლოქ ე̄სმა ლახო̄მახ. აჯაღ აჩად ჭყინტო̄ლ ეჩხა̄ვ ი ესნატჲელე
Line of edition: 29    ნეპო̄ლი̄ლ ი ეჯი ეშჩუ ანჴად. ლეხჭოდდა, მაჲ ლოქ ხაწჷხ? იმ ლოქ
Line of edition: 30    ოხწუხვავა? ჭყინტო̄ლდ ქო̄ხო̄მბვე მინე ამბავ. ეჩქა ნეპო̄ლი̄ლდ
Line of edition: 31    ხე̄ქვე: -- ნუმა̄ვ ლოქ ხაყლუ̄ნი, მიჩა აგი̄შარ აჯაღ ლოქ მასარდ ლახო̄დიხ
Line of edition: 32    ვოქრს ი ვერცხს ჩი̄ს, მა̄ჲ ლოქ ხეკვდი, მარა ნო̄სმამ ლოქ
Line of edition: 33    იკვდუნე ვოქრე ფა̄ვუ̄ლგნქა. ჩუ ლოქ ჩვეთმაჭნიხ ეჩა ლივდი, მარა
Line of edition: 34    ეში̄ ლოქ ქა ლახო̄დიხ. გაცხაჲდ ნეპო̄ლი̄ლა დედედ ი მამად მაგ
Line of edition: 35    მასარდ ოხჴიდხ, მარა ჭყინტო̄ლდ ვარ ხე̄ქვ: -- მიჩ დე̄სამა ლოქ ხაკუ,
Line of edition: 36    ე ლოქ ლახო̄დიხ ვოქრე ფა̄ვუ̄ლს ეზარ ი დო̄რღვა̄ჲ იშგენ დე̄სამა
Line of edition: 37    ლოქ ხაკუ. მე̄ვარ ათმაჭი̄ნდახ, მარა ეჩუნღო ეში̄ ქა ლახო̄მხ.

Page of edition: 103 
Line of edition: 1       ანღრი აგითე ჭყინტო̄ლ ი აჭკუარი: ლეზობ დე̄სა ლოქ ხუახ ი
Line of edition: 2    ფა̄უ ლოქ იმნარ ხაკვდა! სჷა ლეხი̄და ეჩქა ნეპო̄ლი̄ლ ი ლეხჭოდდა:
Line of edition: 3    -- იმნარ ლოქ ლი ლჷწხვავე? ჭყინტო̄ლდ ქა ხე̄ქვე, იმვა̄ჲ აჭკუარდა.
Line of edition: 4    ეჩქა ნეპო̄ლი̄ლ ქე̄ხბი̄შდა ფა̄ვუს ი ხე̄ქვე: -- ა, საბა, ათხე ალე ჭყინტო̄ლ
Line of edition: 5    ჩუ̄ვ ლოქ ადტყეცნე იმჟვა̄ჲ ლოქ ხეხო̄ლდეს. ესტრიალი̄ნა̄ნ
Line of edition: 6    ფა̄ვუ̄ლ ი ხორე̄ნსკე ი ხორე̄ნსკე ჭყინტო̄ლს ი ჩვადტყეცნე ბჷგიდ.
Line of edition: 7    ეჩქა ნეპო̄ლდ ხექვე: -- ამჟი ლოქ ხოხალ ალე ფა̄ვუ̄ლს. ათხე ადჲე̄ვ
Line of edition: 8    ლოქ ალე ი მეფეს ლოქ ე̄რ ლეგვე̄რ ოთღა, ქა̄ვ ლოქ ათტიხვნე.
Line of edition: 9    ეჩუნღო ქალაქთე ლოქუ ადჲე, ჟი ლოქ ენთხე̄ლნე ვილი ქვითს ი
Line of edition: 10    ქა ლოქ ოთღე̄შ. ჭყინტო̄ლ აჩად აგითე. ფა̄უს ე̄რ ხეწადხ მიჩა აგი̄შარ,
Line of edition: 11    ხე̄ქვეხ: -- მინს ჯეჲ ლეზობი ლათხე̄ლითე ლოქ ოთზჷზახ ი
Line of edition: 12    მა̄დე̄ჲ ფა̄უ̄შ. ეჩქა ჭყინტო̄ლდ ხე̄ქვე ფა̄უს: -- იმჟვა̄ჲ ლოქ ხეხო̄ლდეხ
Line of edition: 13    მიჩა დედეს ი მამას, ეჲჟი̄ვ ლოქ ხოჩიდ. ესტრიალი̄ნე ფა̄უდ,
Line of edition: 14    ხორე̄ნსკე ი ხორე̄ნსკე ჭყინტი დედეს ი მამას, იმჟვა̄ჲ ხეხო̄ლხ, ეჲჟი
Line of edition: 15    ადტყეცნე. ეჩუნღო ფა̄უ̄ლ ოთშგაბ მეფეს ი მიჩა ხალხს ი ქა̄თტყვიფ
Line of edition: 16    ლაყერშვ მაგ. ლენჟოღვა̄ნე ლეგვე̄რი̄ლ ი ანჴიდ აგითე. ეჩუნღო
Line of edition: 17    ატახ ქალაქთე, ქვითს ვილო̄ლ ჩუ ლუპჟუნე ხაყე̄ნა ჩხარა ლჷკჷლისა.
Line of edition: 18    ჩიქ ქვითს ათშგიბ გვე̄რე ლაყერშვ, ეჩანღო ჩხარა კლიტულ მაგ
Line of edition: 19    ჩვადკუშუ̄რე ი ვილო̄ლ ქა̄ნჴიდ ქა̄მთე, ლენჟოღვა̄ნე ი ანჴიდ აგითე.
Line of edition: 20    მაგ ე̄რ ჟანხურჲელე, ხა̄დახ ხოჩა ლირდე.

Line of edition: 21       ეშუ ჯამზჷრას ღერთემ!



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.