TITUS
Svan Prose Texts IV (Lashkh)
Part No. 76
Previous part

Text: 76 
Page of edition: 103 
Line of edition: 22 
LXXVI. მზეთუნახავ


Line of edition: 23       ლჷმარდე̄ლიხ ჩხარა ლახვბა. დედე̄ჲ მამა დე̄სა ხაყე̄ნახ. მაჲ
Line of edition: 24    ჩომნიხ გაჭი̄ვრებულუდ, ჲეხვდ და̄რ ხეჭმენიხ. ანჴადხ ი აჩადხ
Line of edition: 25    მეცართე. მეცარდ ხე̄ქვ, ერე ჩუ̄ვ ლოქ ესჷ̄გა̄ნხ ეშხუ ლა̄რა̄ჲსა ი ქა̄ვ
Line of edition: 26    ლოქ ლენქიო̄ლეხ ისრალ ი ჲეშა ქორჟი̄ნენი̄ ლოქ ხო̄ჲხენი, ეჩხენქა
Line of edition: 27    ლოქ ათჭიმხ ჲეხვარ.

Line of edition: 28       ედქიო̄ლეხ ისრალ ი არა ლახვბა̄შ კე̄სარი ქორჟი ხეახ ი ხოხრო̄ლაშ
Line of edition: 29    -- ლენჭყისა. კე̄სარს ხეყე̄და ჩხარა დი̄ნა ი არა დი̄ნა ქე̄თჭამხ
Line of edition: 30    ი ხოხრო̄ლდ ბაყაყე̄ლ ადჲე. შომასი̄ კე̄სარი დი̄ნო̄ლარ ირბჲელდახ,
Line of edition: 31    ქა̄ნჴდენო̄ლ ბაყაყე̄ლ ი ფეჩი ჭიშხს ჟი ლეხტკჷპე̄რო̄ლ, ანჴდენო̄ლხ
Line of edition: 32    კე̄სარი გეზლი̄რ, ჟენკედნახ ლაფათქავშ ი ქა̄დკვა̄ნნახ ქა̄მთე, მარა
Line of edition: 33    ბაყაყე̄ლ ეში̄ სგა ტეხნო̄ლ. დეშ აიტანეს კე̄სარი გეზლი̄რდ ალე ი
Line of edition: 34    ჩოთგეხ კუხნო̄ლ მო̄შ ი ქე̄თე̄თა̄ნ ალ ჭყინტო̄ლ ხოშა ლახვბას.
Page of edition: 104  Line of edition: 1    შომასი̄ ერე ჭყინტო̄ლ ესღრჷ̄და ლამშაჲთე, ე̄რ ჴჟდნო̄ლ აგითე,
Line of edition: 2    ლჷპრიალი̄ნე ხეხვო̄ლ მაგ. ჩინაირი ლეზობ ხეხვო̄ლ სტოლჟი. ანჴად
Line of edition: 3    ეშხვინ ალ ჭყინტო̄ლ ი, შომასი̄ ესღრჷ̄და ლამშაჲთე, სგე̄დსგიდდა
Line of edition: 4    კუხნათე. ხოსგდი მარა, იმ ხოსგდი: ალ ბაყაყე̄ლდ ქე̄დშყვიფ ბად.
Line of edition: 5    კრინტ მა̄ ხოკი̄და, ეჲჟი ლახა̄და ლამშაჲს, ჩინაირი ლეზობს ჴჷდე
Line of edition: 6    ქა სტოლთეჟი. ხოსგდი ჭყინტო̄ლ, მარა იმ ხოსგდი: ბაყაყხენქა
Line of edition: 7    ქა̄ნჴად მზეთუნახავ, ვოქრე ლუსდგვარა̄ლ ჩუ ხორიკ.

Line of edition: 8       სგა̄დსკინე ჭყინტო̄ლდ ი ჟესფხიჭე ბადს ი აშხი. მზეთუნახავ
Line of edition: 9    ვარს ხაყლე, მარა ჭყინტო̄ლდ ეში̄ მა̄დ ედჯირვე ი ჩვადშიხე.

Line of edition: 10       ალე ემმეჴრე კე̄სარი გეზალდ ი ლახა̄და ლაცლავა̄ლს, მარა ჭყინტო̄ლ
Line of edition: 11    ეში̄ დეე̄ იჩმჷდა. ეჩქა ანჴად კე̄სარი გეზალ ი ოთქვიც, ეშხულადეღისა
Line of edition: 12    ჲეშდჲერუ ლადღი ლეჴნი ჩოთჴანა̄ნ, ჩოთლა̄შა̄ნ, ქო̄ხჭა̄და̄ნ
Line of edition: 13    ი ეჯი კაკალ ჟოხფა̄ნდა̄ნ ი ბეღელთე სგო̄თში̄და̄ნ. იგვნი ჭყინტო̄ლ.
Line of edition: 14    მაჲ ჩომნის, ალეს ჯეჲ დეშ იჩო ი ჲეხვს ქა ხოღე̄შხ, მარა
Line of edition: 15    მზეთუნახავდ ხე̄ქვ, ერე აჩადუ ლოქ ი იმელეჟა̄ჲ ჯეჲ ემჴედე̄ლი,
Line of edition: 16    ეჩელექვა ჩუ̄ვ ლოქ ლახტუ̄ლე: დედამთილო, მამამთილო, გიშერაჲ
Line of edition: 17    ი წიქერაჲ ჟემზჷზედ გაცხაჲდ ჟანფიშვდხ გიშერაჲ ი წიქერაჲ ი
Line of edition: 18    ჭყინტო̄ლ აჴნი, აჴნი, მარა იმბოზა̄ლ, დეშ ადჴანე. მაფშა̄რ ჭყინტო̄ლს
Line of edition: 19    ლაჴანისა ჩვადგე̄დდა. წიქერაჲდ ხე̄ქვ გიშერაჲს, ერე მიჯნემდ
Line of edition: 20    ქა̄ვ ლოქ ლოხბღუ̄ლე, ჯეჲ ლოქ ქა ოხრიკე მჷჟს მუჭს ი ლიმა̄ჲდა̄ლთექა
Line of edition: 21    ქა ლოქ ანტხე. ლოხბღუ̄ლე გიშერაჲდ, ჟანჲეცხვნე ჭყინტო̄ლ
Line of edition: 22    ი წიქერაჲდ ოხრიკ მუჭ მჷჟს ი ქა̄ნტიხ ლიმა̄ჲდა̄ლთექა. ენბინეხ
Line of edition: 23    (\ ემბინეხ) ლიჴნი ი ქა̄დჴანეხ, ჩვადლა̄შეხ ი ჟანჭა̄დეხ. ლიფა̄ნდი̄შ
Line of edition: 24    მაჲ ჩომნიხ! მზეთუნახავდ ხე̄ქვ ჭყინტო̄ლს, ერე იმელეჟა̄ჲ ჯეჲ
Line of edition: 25    ლოქ ემჴედე̄ლი, ეჩელექვა̄ვ ლოქ ლახტუ̄ლე, ერე ფურ ლოქუ
Line of edition: 26    ოხზჷზეხ ჟი.

Line of edition: 27       აჩად ჭყინტო̄ლ ი ანჴიდ ფურ, ხედსი̄ ლესგისა ნაჭვბე̄რუნ ხა̄და.
Line of edition: 28    ქო̄ხკიდ ნაჭვბე̄რუნ ი ეჲშელდ ბუჭუნჭელაჲ ანჴად, ერე თელდ დაბ
Line of edition: 29    ქა̄ნგოშლე. ანჴადხ ალ ბუჭუნჭელო̄ლარ ი ალ კაკალს იკედხ ი შჷდეხ
Line of edition: 30    ბეღელთე̄ჲსა, ნებოზს გოში ლას ბეღელ. კე̄სარი გეზალდ ხე̄ქვ,
Line of edition: 31    ერე ეშხუ კაკალ ლოქ ხაკლი, ანჴად ჴა̄ჩუ̄ლ ი ჩხი̄ლი, ჩხი̄ლი, ეშხუ
Line of edition: 32    კაკალ სგა̄დკვა̄რ ბეღელთე̄ჲსა. გადარჩა ჭყინტო̄ლ ი ჩოთსად
Line of edition: 33    მზეთუნახავ.

Line of edition: 34       ჭყინტო̄ლა ლახვბას ხახჷრბჷ̄ნხ ი ლეხჭოდდახ, ერე იმხენ ლოქ
Line of edition: 35    ოხჴი̄და მზეთუნახავ? იმხენ ლოქ ი ჩუ ლოქ ოთო̄შვა ლაკირ, სგა
Line of edition: 36    ლოქ ოთკვა̄რა ბაყაყე̄ლ ი ქა ლოქ ემჴედე̄ლი მზეთუნახავ.

Page of edition: 105 
Line of edition: 1       ადა̄შვეხ თვით ლაკირ. სგა̄შიდხ მინე ლა̄ჲხვა ი დე̄სმა ოხჴადხ
Line of edition: 2    ქა. ჭყინტო̄ლს ლეხჭოდდახ: -- იმნარ დო̄მა ლოქ ახჴედახ, მაჲ ლოქ
Line of edition: 3    ხოხალ ამშა ბედჟი?

Line of edition: 4       -- მიჩ ლოქ ქა̄ხჴედა, ამჟი ანურტყველა̄ლვნე ჭყინტო̄ლდ
Line of edition: 5    ლახვბა.

Line of edition: 6       მზეთუნახავდ ი მიჩა ჭაშდ ჩვადგეხ კოშკ, სგა̄ჩადხ ეჩხა̄ვთე̄ჲსა
Line of edition: 7    ი ა̄რდახ. ვოდ ი̄რდო̄ლხ, ხოჩა̄მდ.

Line of edition: 8       ჯამზჷრახ ღე̄რბათდ! დე̄სმა ლი სერ.


ვაჟა ონიანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.