TITUS
Svan Prose Texts IV (Lashkh)
Part No. 88
Previous part

Text: 88 
Page of edition: 137 
Line of edition: 7 
LXXXVIII. ლისჲოლა̄ლ


Line of edition: 8       ლისჲოლა̄ლს ჲერხი ლიჩა̄რხუნა̄ლს ხატუ̄ლიხ ი ალ ლიშდრა̄ლს
Line of edition: 9    ხაშდბახ ხოშა ნაღალდ მახე ალმე̄ზიარ, ბობშა̄რა ჭყინტო̄ლარ, ი
Line of edition: 10    მა̄დე ლალხოშ მა̄რელ. ლასჲოლა̄ლ ჩა̄რხლარს ხოტა̄ბეხ ი ხოსყიხ მახე
Line of edition: 11    ალმე̄ზი ჭყინტო̄ლარს ხოშა ღვაჟარ ი ბობშარს მე̄ვარ ხასჲამხ
Line of edition: 12    ჩა̄რხილო̄ლარე ლიღვე̄ნე მინე-მინვშდ. ქუნუშ არიხ ბობშარ ლუნთისა
Line of edition: 13    მუსი ლიჴედს ი ერ ხასკბე გიმს მუსს, ეჩქა ქა ღჷრიხ ტყაბ აგითე
Line of edition: 14    ი ჲედ ლამულქვაჲ ე̄რ ხა̄რ, ეჯკალიბ შუკვთე, ჟი ხესგვრიხ ჩა̄რხლარჟი
Line of edition: 15    ი ჩუ ისჲო̄ლიხ. ჲერხი თვით ჲერუ ხესგვრიხ ჩა̄რხლარჟი ი
Line of edition: 16    ეჲჟი ისჲო̄ლიხ. ლასჲოლა̄ლდ ხოცხახ ლუკვრემე შუკვ, ლადი̄ ნასჲოლა̄ლ
Line of edition: 17    შუკვ მჷხარ ჟი ლუკვრემე ლი ი მე̄ვარ ხოგბე ჩა̄რხილს ი
Line of edition: 18    ძღჷდ შტუ̄ლშვ ესღრი ჩა̄რხილო̄ლ. დე მჷცხი აწუხვავი ბობშარს
Line of edition: 19    ლასჲოლა̄ლჟი ი დე მაიდ, ქა მეჩდე ლიხ ძინარნეშ ნებოზდ ლაჩა̄რხუნა̄ლდ
Line of edition: 20    ი ხა̄რხ ლიშღრა̄ლ. ჲერხი ჩა̄რხლარ ეზრი̄სგა̄ლა ლიხ ი ლუფხვისა
Line of edition: 21    ზექი ფიჩხარს ჴჷდეხ ბობშარ. ჲერხი̄ლუ̄ ბობშარ ხოჩა ლჷრექვი̄
Line of edition: 22    მა̄ ლიხ, მარა ლასჲოლა̄ლთე ეში̄ დე̄მ იჟვმეხ ლი̄ზის, ლჷლდე̄სგე
Line of edition: 23    ე ჩუ ლიხ, სერ დე̄მშა სერდე ხა̄რხ. სასა̄ში სოფლი ბობშარ
Line of edition: 24    ჲესი-ჲეს მუა̄შთე ღჷ̄რდახ, ლალცი შედარს აჲესდახ, ვოხრიალს ხოშა
Line of edition: 25    ნაღალდ, ი ჩა̄რხილჟი იყდა̄ნახ შედარს ი მუა̄ში სგიმს იჟღვა̄ნახ
Line of edition: 26    აგითე ი მინე ქორა მა̄რას ასგმუნახ. ლისჲოლა̄ლს დე̄მ ხოდრვანიხ
Line of edition: 27    ბობშარს მინე ხოშე̄ლ, მარა შუკვარ ერ ისჷ̄ლი̄ნიხ ნაჩა̄რხუნა̄ლ,
Line of edition: 28    ეჯი მა̄მ ხასჲამხ სოფლი ხალხს. ჴანარს ერ ხობემხ სევარს, ჲედ ლაზექთე
Line of edition: 29    ი ჲედ ლა̄ნწათე ლა̄ზჟი, ეჩქა სურუ გებ ხა̄რხ ჴანარს ნასჲოლალ
Line of edition: 30    ლჷსჷ̄ლინე ი ჟი ლუკვრემე შუკვარ ი ჴანარე ჭიშხე ლიკვეშდ
Line of edition: 31    ხაყლუ̄ნიხ მე̄ვარ ი ხაჭთეხ ალ შუკვარლექვა მესჲოლა̄ლ ბობშარს
Line of edition: 32    ი შუკვარე მჷმოშლილას ლა̄ზ-ლამჩედდ, მარა ბობშარს ჭათა̄ სერდე
Line of edition: 33    მა̄მ ხა̄რხ ი ეში̄ ისჲოლა̄ლხ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.