TITUS
Svan Prose Texts IV (Lashkh)
Part No. 87
Previous part

Text: 87 
Page of edition: 135 
Line of edition: 1 
ნაწილი მეორე
Line of edition: 2 
I. თამაშობა-გართობანი
Line of edition: 3 
LXXXVII. ლიბჷრგჲელ


Line of edition: 4       შომა̄ჲ ერ მაჟებ ხა̄რხ, ეჩქა ხაზნახ მე̄რმე-მერმეკალიბ ლიშდრა̄ლარ,
Line of edition: 5    ხა̄ლ ხოშე̄ლს, ეჲჟი ხოხრე̄ლს, მარა ჩინ ხოფშირა̄მინ ლიბჷრგჲელ
Line of edition: 6    ხაზნახ ჩი̄ს. ლიბჷრგჲელ ლუნთისა -- აღბიერისა -- ხაზნახ
Line of edition: 7    ხოშა ნაღალდ, ეჯღა ერე მაშე̄ნე მაჟებ ეჩქა ხა̄რხ ი ხოჩულ გუჟი
Line of edition: 8    აღბიერისა არიხ, მეჲად ლეღვობ ხა̄რხ ი ჩიგარ მაბზა̄რ ლიხ. ალე
Line of edition: 9    წეს ლას დო̄სგანღო, ერე აღბიერისა ხოჩქა ლეზობ-ლეთრე ხაღვე̄ნა̄ნხ
Line of edition: 10    ჩის, კელდღა ე მეზგას ქუნ ხეგნო̄ლ, მაჟებობი̄ აღბიერისა ლი ი
Line of edition: 11    ღჷნმაღჷნი̄ ეჩქა ხეხვო̄ლიხ მაგ ი უქმობ ხა̄რხ აღბიერისა ხოფშირა̄მინ.
Line of edition: 12    სოფლი ლანე̄სგი̄რ ადგილჟი იხვრჲელიხ მეზგე̄ლხენქა მონყავა
Line of edition: 13    ღვაჟარ, ზურალე̄ლ ი ბობშარ ი ალ წესს "ლინყავს" ხატუ̄ლიხ.
Line of edition: 14    ამჩიქა ცუდდ ლირდეს ი გარგლას ლიშდრა̄ლს ხაცხე̄ნეხ ი ჟი იბნეხ
Line of edition: 15    ლიბჷრგჲელს. თვით მებჷრგჲელს ხაყა მიჩა-მიჩა პარტიაჲ ი ჟი იბნეხ
Line of edition: 16    ლიბჷრგჲელს, ხედისი̄ ჩვენდე̄ს, მე̄რმას ხოცა̄დიხ ი ჩუ მჷდე̄სს სგა
Line of edition: 17    ხაფხჭიხ ი ჟი ხობდერხ ჟიბავ. იბჷრგჲელხ ტანდ-ი-ტანდ, ბარჯა̄ლშვ
Line of edition: 18    უშხვა̄რთე ლჷბა̄ჯგე, ჲერხი ჩუ ხოჴვიჩ მეჴრა̄ლჩუქვა̄ნთე ი ალეს
Line of edition: 19    დემ ხამბეხ, ჲერხის ფოყს ლიჭო̄ნე ხაზნა ლაბჷრგჲელჟი ი ეჩქა ხოჩულდ
Line of edition: 20    იდე̄ს მიჩა მებჷრგჲელს, ჲერხის კვანტ ხაზნი ი ალ ჴერჴი̄
Line of edition: 21    ხოჩა ლი ლაბჷრგჲელჟი, ჲერხის ლინჭუ̄რე ხაზნა ი ეჩქა ლახ კვანტს
Line of edition: 22    ოხდე̄ს, შიშდ ჩუ იდე̄ს მიჩა მებჷრგჲელს, იშგენ ჴერჴალ ძვირდგარ
Line of edition: 23    ე̄ს ხოხალხ. მუს ერ ხა̄ზ, ეჩქა ხოცხახ ლიბჷრგჲელ, ეშხვს ჩვენდე̄ს,
Line of edition: 24    მე̄რმას ხოჴდეხ შიშდ ი ჩუ̄დ აბჷრგა̄ლვნეხ. მებჷრგჲელხენ ლერექვი
Line of edition: 25    ლიგდური მა̄ ლი წეს. ჲეს ჩოქს ხაყრა̄ლვნე ეშხუ მებჷრგჲელ მე̄რმას,
Line of edition: 26    მარა ჩოქი ლიყერჟი ხეკვეს ჟი უდ ანკაჩას ი ჟი ლითლე მა̄ ლი
Line of edition: 27    წეს.

Page of edition: 136 
Line of edition: 1       უტკუნ დოშდილადეღს ხატუ̄ლიხ ყველჲერი აღბა ლადღი მე̄რმა
Line of edition: 2    ლადეღს -- დოშდიშს -- ი ხოშა ლინჩა̄ლი̄ ეჯ ლადეღ იბნი. ალ ლადეღ
Line of edition: 3    უქმ ხა̄რხ ლა̄შხარს ჩი̄ს ი ალ ლადეღს ხატუ̄ლიხ "ლიმუ̄რყვამა̄ლს".
Line of edition: 4    ლიმუ̄რყვამა̄ლ ლადღიშდ ამა̄რეხ თელდ ხოჩა მებჷრგჲელს. აღბიერისა
Line of edition: 5    ი ყველჲერისა მეჲად ეჯღა იბჷრგჲელხ, ერე თელდ ხოჩულ
Line of edition: 6    მებჷრგჲელ ხედი̄ჲ ღენ ეხთიში ალემაგ მებჷრგჲელ ხალხისა, ეჯის
Line of edition: 7    ადჲესხ ლიმუ̄რყვამა̄ლთე სოფელხენ, ამჟი მე̄რმა სოფელს ხეყე̄ნი
Line of edition: 8    ამჟი ქალჷთიშ ხოჩა მებჷრგჲელ ი ანჴდე ეჯ ლადეღ ლიმუ̄რყვამა̄ლთე,
Line of edition: 9    ამჟი მესმა ი მე̄ვშთხვა სოფლარსუდ ხეყე̄ნიხ ამკალიბარ ქალჷთიშ
Line of edition: 10    მებჷრგჲელა ი ეშხუ სოფელ ხემქარა̄ლ მე̄რმა სოფელს ლაბჷრგჲელისა.
Line of edition: 11    ალ ლადეღ მუს ხა̄ზ ჩჲა̄გ ი მუ̄რყვამს იგემხ კჷ̄ლთხის, მუსიშს,
Line of edition: 12    ნე̄სგა სუფისა, თელდ ლა̄შხ ალ ლადეღ იხვრჲელი სოფელ ჟაჴუნდრი
Line of edition: 13    ჯგჷრა̄გი საყდრი სუფისა, ალ სუფისა ლჷ̄გ ცაცხვი მეგემ,
Line of edition: 14    მარა ამზუმ ძღჷ̄დ მეგემ ჩუ̄ჲ და̄ს ხოწვა, თელდ ხოშა მენგრე, ირა̄ვ
Line of edition: 15    ცაცხვ ლი, ჩხარა მეტრ ლოქ ლი ნანგრან ალ ცაცხვი მეგემ ი ლიბჷრგჲელ
Line of edition: 16    სოფლარეშ ალ მეგმი ჩუქვა̄მ იჩმი̄ნი ჩიგარ; ალ ლადეღ
Line of edition: 17    მებჷრგჲელ ღვაჟარგნქა ჴედნიხ ჩი სოფლარხენ იშგენ მოცალ ხალხ
Line of edition: 18    ბობშ ი ზურა̄ლ, ჲესვა̄ჲ კელდ ლი̄ზი ხა̄ჲმედა ლასეირდ ი ხოსგდიხ
Line of edition: 19    მებჷრგჲელას, ხედ სოფლი მებჷრგჲელდ ლოქ ედმურჯას ჲაღო
Line of edition: 20    ი მო̄რყვამ ერ ხო̄გხ მუსიშ, ხედი ღენ სოფლი მებჷრჷჲეი̄ ადკა̄ფნე,
Line of edition: 21    მუსი მუ̄რყვამსი̄ ეჩხა̄ვ აკა̄ფეხ, ლეჟა̄ვიშ ი̄რია̄ ლექვა̄ვიშ მჷკა̄ფე,
Line of edition: 22    ჟიბავიშ ი̄რია̄ ჩუბავიშ, ზავჲა მაჴედი̄ ეჯ სოფლი ხალხს ხა̄რ
Line of edition: 23    ანღელს, ხედ სოფლი მებჷრჷჲელი̄ ი̄რი მჷსრე ჩი̄მიშ ი ლუმურჯე
Line of edition: 24    ლაბჷრგჲელისა. ალ ლადეღ ხვაჲ წესარს ასრულეხ ლაჭშხაშიაშს, ეჩქად
Line of edition: 25    უსგვა წეს ისრულო̄ლ: მორილ-მიაქელა, მე̄ლია ი ტელე̄ფიე ი იშგენ
Line of edition: 26    ლიჭშხაშიარ. შუშპრობ ლა̄ჲდი მე̄ვარ ლი ალ ლადეღ ამეჩუ;
Line of edition: 27    ლიზობ-ლითრე ი სკარობ მა̄ ხაზნახ ალ ლადეღ, ეჯღა ერე ხოშა ლინჩა̄ლი
Line of edition: 28    ლაბნა ლადეღ ლი ი ლიზჲარება̄ლი ალ ლადეღ იბნო̄ლ სოფლარისა
Line of edition: 29    ი მოზჲარება ხალხ ხჷტმე ლასხ -- ლეზობს დე̄მ იზბჷდახ ი დე
Line of edition: 30    ლეთრას ითრახ, ვოხდრისი ლიფოდა̄ლ ცხაჲ მა̄ შიდჷ̄ნ.

Line of edition: 31       ლიმუ̄რყვამა̄ლ ლაღეღ სამყურ ხაღვე̄ნახ საყდარისა სპილენჯიშ,
Line of edition: 32    ძოჷდ ჯო̄დი სამყურ, ი ეჩის ლჷმშუმნინხ ხალხი ლანზო̄რად
Line of edition: 33    ჟაჴუნდრი სუფთეჟი. ხოჩა მებჷრგჲელ მა̄რას ფალავანდს ხატუ̄ლდახ
Line of edition: 34    ი მიჩა-მიჩა ფალავანდს ჴჷდა სოფელ ალ ლადეღ ამეჩუ. ლექვა̄
Line of edition: 35    ლა̄შხხენ ჩი̄ს ლჷმდე̄სინ გოჩშა ჲეჯა, ეჩანღო ლჷმა̄რ ხოჩა მებჷრგჲელ
Line of edition: 36    ფალავანდ ბასლომაჲშა ლევენტი ი დავით ბესშა, დე̄ვდრჲა̄ნა
Line of edition: 37    გვარიშ, ბასლომაჲშა, ლევენტის ხოჩა კვანტარ ხახლე̄ ნა ლაბჷრგჲელჟი
Page of edition: 137  Line of edition: 1    ი ეჯღა ლჷმდე̄სინ ჩი̄ს. მეჴრა̄ლშვ ლიგდური ხახლე̄ნახ ლაბჷრგჲელჟი
Line of edition: 2    ი მოგორდის ხაჩმინახ ფალავანდარ უშხვა̄რ, მარა ლუშნუ
Line of edition: 3    ლიბჷრგჲელ ხოშა ნაღალდ უშხვა̄რე ბარჯა̄ლე ლჷდად ლჷმა̄რ წეს,
Line of edition: 4    ჟიბეტანჲა ლერქვალს ქა ლჷმჷ̄ღინხ ჲესი-ჲეს ი ლა̄რტყს ქა ლჷმბემინხ
Line of edition: 5    მერმე̄მი ლაგდურდ ლაბჷრგჲელჟი. ათხე̄ დროჲჟი მაბჟა დო̄რ
Line of edition: 6    ხაშდბა ალ წესარს.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.