TITUS
Svan Prose Texts IV (Lashkh)
Part No. 93
Previous part

Text: 93 
Page of edition: 139 
Line of edition: 27 
XCIII. თხუმჟიქა̄ნქა ლისკნე


Line of edition: 28       თხუმჟიქა̄ნქა ლისკნა̄ლს ბობშარგარ დე̄მ ხაშდბახ, ხოშე̄ლსი̄
Line of edition: 29    ხაზნახ ალ ლიშდრა̄ლ, ჩუ ისკო̄რიხ მეწვინდ უსგვა-იშგვიდ ი ჲედ
Line of edition: 30    ხოფშირა, თხუმს ჩუ ინკვეხ ი ღოშგინისა ხაჭიმ ეშხუ ი ჩიქ მიჩა
Line of edition: 31    სგობინ მეგნა̄ თხუმჟიქა̄ნქა ასკნე, ღო მე̄რმე̄მი თხუმჟიქა̄ნქა, ღო
Page of edition: 140  Line of edition: 1    მესმე̄მიშ ი ამჟი ქე̄ნხირსი ჩი̄ს, ჲერვა̄ჲ ჩუ ლჷ̄გხ, ი ქე̄რ ენხირსი ჩი̄ს,
Line of edition: 2    ჯეი̄ ჩვენნიკვე თხუმს ი ჩვესგენი, ეჩის მიჩა ღოშგინ მეგნე ახჭიმ ი
Line of edition: 3    ეჯი ქენხირსი ჩი̄ს, ღოშჷინპილს ლჷგნა̄ სგობინ ჩვესჷენი თხუმლჷნი̄კვ
Line of edition: 4    ალეი̄ ი ამჟი მესმეუდ ეხჭემნი, ღო იშგენუდ, ვოშვა̄ჲ ჩუ ი̄რდიხ ი
Line of edition: 5    ამჟი ლაცა̄დუნუშ ქა ქეხნი ლჷსკო̄რე ხაზ ჯო̄დიჟი ი ვოდ ჟი დო
Line of edition: 6    ეხფეშნიხ ი ჟი დო ეხჟარიხ თხუმჟიქა̄ნქა ლისკნა̄ლ, აშ იშდრა̄ლნიხ
Line of edition: 7    ი ეჩანღო ჩუ ფხეჟნიხ მაგ. ჲესი-ჲეს ხაზნხ მე̄რმა-მე̄რმა რიგიშ
Line of edition: 8    ლისკნა̄ლ: ეშხვს -- ხონკლათხა მა̄რას -- ჩვაგნეხ ეშხუ აგის,
Line of edition: 9    აქნე ეშხუ ჯო̄დჲახენ, ხატსი ბარჯა̄ლჟი შიარს ჩუ ლჷგნა მა̄რას ი ქა̄სკნე
Line of edition: 10    თხუმჟიქა̄ნქა; ე ბაშლჷყ ხეგმი თხუმჟი, ჲედ -- ფაყვ, ხეკვეს ეჯი
Line of edition: 11    მო̄დ ახკვარვნას თხუმხენჩუ ი ეჩქა ლი ხოჩა ნასკინ. ამჟი მე̄რმეუდ
Line of edition: 12    ადსკინნე, ღო მესმე ი ამჟი იშგენ, ჲერვა̄ჲ ი̄რდიხ ი ლისკნე ხეკვდი̄ხ.
Line of edition: 13    ჲესი-ჲეს ფა̄უს იყდა̄ნი ჲერუ მა̄რე, ეშხუ თხუმისა ეშხუ ხეგდურნი
Line of edition: 14    ფა̄უს ი მე̄რმა თხუმისა -- მე̄რმე ი ლალა̄რტყილი ნამწვინქა ი ჲედ
Line of edition: 15    მუჭოდი ნამწვინქა ჩვაჩრავიხ ალ ფა̄უს ი მჷსკნე იქნე ჯო̄დჲახენ
Line of edition: 16    ი ქა̄სკნე ალ ლჷყდა̄ნა ფა̄უქა ეჲჟი, ერე ჭიშხარ მო̄დ ოხრჷკას ფა̄უს
Line of edition: 17    ი მო̄დ ათკვარვნას ფა̄უ შიარხენქა ეჩა სგა მუგდურა̄ლას; ალ ლისკნა̄ლსი
Line of edition: 18    ვო̄ბაშინ იშდრა̄ლხ. ფა̄უ̄ მჷყდა̄ნა̄ლას ფა̄უ შიე გუგვარჟი
Line of edition: 19    ხოყდა̄ნახ, ერე კოჭო̄ლ ქა მა̄ჲ ლეხფედი, შიშდ ქა შყედნი შიე
Line of edition: 20    გუგვარხენ, ოდო ლაგღურუშ ერ ლეჲყედნახ ი ქა მჷსკნა მა̄რად ჭიშხ
Line of edition: 21    ოხრჷკის ალ ფა̄უს, ფა̄უ ჩუ მო̄დ აშეყს, ეჩქა ქა მჷსკნე მა̄რე ეჲჟი
Line of edition: 22    ბჷგიდ ესრეღვნი, ერე ნიჩვარს ენჟომნე ი მერდად ენმოშნილი.
Line of edition: 23    ფა̄უს აშიდ იყდა̄ნიხ, ერე ჭიშხე ლირეკ შიშდ ჩვაკვა̄ნე ი მა̄რას მა̄
Line of edition: 24    ხა̄რ ლემყალ ლირეღვდ ძირს.

Line of edition: 25       აჯაღ მესმე რიგი ლისკნა̄ლ ხაზნახ ბობშარს ი მახეღვაჟარს ჩი̄ს,
Line of edition: 26    ალ ლისკნა̄ლ ჲერუ რიგიშ ლი: ეშხუ წკუპდ ლისკნე ი მე̄რმე ლალტხუშ
Line of edition: 27    ლისკნე. წკუპდ ლასკნაჟი ჭა უქნად ხჟკვეს ადსკინახ ეშხუ ლჷლშანა
Line of edition: 28    აგიხენ ი ლალტხუშ ლასკნაჟი ჯო̄დჲახენ ლაქნუშ. წკუპდ ლისკნე
Line of edition: 29    ხოშა გარჯ ლი ი ლალტხუშ ლისკნე ი ქა ლაქნუშ ხიშა მა̄ ლი ლეგჷრჯე
Line of edition: 30    ი ნასკინი̄ ხოშა იჩმი̄ნი. ჟი იზმეხ, ხედი̄ში ნასკინ ხოშა ი̄რი
Line of edition: 31    ი მჷსრეჲ ეჯი ირი ლსკნა̄ლისა.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.