TITUS
Svan Prose Texts IV (Lashkh)
Part No. 96
Previous part

Text: 96 
Page of edition: 141 
Line of edition: 25 
XCVI. შუშპარ


Line of edition: 26       ღჷნჲე̄რუჟი ხაზნახ შუშპრობ ი ლაქორნილჟი ლა̄ჲდი̄შ. შუშპარ
Line of edition: 27    ღვაჟარსი̄ ხოხალხ ი ზურალე̄ლსი̄. ლაშმუნა̄ლარ ლაშუშპარიაშ
Line of edition: 28    ეჩქადა დროჲჟი დე̄სამა ხაღვე̄ნახ ი ტაშსგარ ხატსინახ ი ეჩეჟი
Line of edition: 29    ლჷმშუშპრინხ. ტაშცახან ლაშუშპარია ლიღრა̄ლ ლა̄ჲდი̄შ ხახლე̄ნახ,
Line of edition: 30    მარა ეჩანღო ოხბინახ დავრა̄ ლიყერ ი ბუჯანტიშ ლა̄ჲდი̄შ.
Line of edition: 31    დავრას აგის ლჷმსყეინხ ჲერხი ღოლჲა̄ქა ტუფიშს, ჲედ დაჴლაშ
Page of edition: 142  Line of edition: 1    ი ჲედ კუმში ფაშიშს. დავრა̄ კარბჟი ფიშირ ფირფიტო̄ლარს
Line of edition: 2    ხორკინახ ი ათხე̄ჲ ხორკინეხ, ჲერვა̄ჲ ერე აგის ასყიხ დავრას.
Line of edition: 3    ლაშუშპარია ლიღრა̄ლს ფიშირ იღრა̄ლხ: ბან, კივან ი მჷბნე, ჲესი-ჲეს
Line of edition: 4    ჲეშდთექა, ხა̄ლ ღვაჟარ მოღრალა, ეშ ზურალე̄ლი̄. ლაღრა̄ლჟი ხატსიხ
Line of edition: 5    ტაშს ფიშირღე̄თა ი ქა ჴედნი მოშუშპარ ზურა̄ლ, ჲედ ღვაჟმა̄რე
Line of edition: 6    ი ჩუ ხონკვე თხუმს, ჲერვა̄ჲ მიჩაცახან ხეკვდი მოშუშპარდ ი ჲერვე̄და
Line of edition: 7    შუშპრეხ ეშხუდ ვო̄ბა ხანს ი ჟი ფეშნიხ. ეჩჷნღო მე̄რმე წყება
Line of edition: 8    ჴედნიხ ლაშუშპარდ, ღო მესმე ი ამჟი, ვოდ შუშპრობ ხე̄რიხ. ჲეს
Line of edition: 9    შდა̄შვდ შუშპრე ეშხუ მა̄რეგარ, ჲეს -- ჲერუ ღვაჟმა̄რე ი ჲეს -- ზურა̄ლ
Line of edition: 10    ი ღვაჟმა̄რე ი ჲეს -- ჲერუ ზურა̄ლგარ. ეშხუ ღვაჟმა̄რე შომა̄ჲ შუშპრე,
Line of edition: 11    ეჯი ჲესი-ჲეს ბუქნას იჩო, მარა ბუქნა̄ ლიჩომ ეჩქად ხოშა ხეზნა̄ნხ
Line of edition: 12    ი ათხე ძვირდგარ ე̄რ იჩო ლაშუშპარჟი ბუქნას. ეჩქადა დროჲჟი
Line of edition: 13    ქორწლობ სემი ლადეღ ხეზნა̄ნხ ჩუ ლჷჭარდ ი ჩუ ხა̄დახ ჩი ლადეღ
Line of edition: 14    ი ჩი ლე̄თ შუშპროპ ი ვორი̄რა მეჲად, მარა შუშპრობს იბნახ
Line of edition: 15    ჩიგარ ხოშა ნაღალდ ლჷმშდჷმან, მახმა̄რჟი ძვირდგარ ე̄რ შუშპრე,
Line of edition: 16    მახმა̄რჟი ლაშუშპარია გუჟი მა̄დ არიხ; ქორწლობჟი ეჩქად ჴანარს
Line of edition: 17    აძჲენა̄ლდახ ი ძღჷდ ხარჯობ იჩმი̄ნო̄ლ, მარა ათხე ბაჟდ ანჴად
Line of edition: 18    მაგ ი დე̄მ ხე̄ჲყრის ლაქორწილჟი ნახარჯობს.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.