TITUS
Svan Prose Texts IV (Lashkh)
Part No. 140
Previous part

Text: 140 
Page of edition: 166 
Line of edition: 1 
II. გადმოცემები
Line of edition: 2 
CXL. გალფხა̄ნშა ვოთარ


Line of edition: 3       ვოთარ გალფხა̄ნშა ვარგ ლჷმა̄რ, ლჷმზიგელი ჩო̄ლურს, ლახვბა
Line of edition: 4    ხაყე̄ნა თენგიზ ი გიგო. მინე მუს მურზაყან ხა̄ჲშხე̄ნა; ალჲარ
Line of edition: 5    ლჷმა̄რხ ჩო̄ლჲა ფუსნარ. ვოთარ ლჷმა̄რ მაჩე̄ნე მიჩა ლახვბა̄ჲსა; ეჯი
Line of edition: 6    ოთლჷშნახ დეპუტატდ, ვარგალე გვარი ლითხე̄ლი ერ ლჷმა̄რ, ეჩქა,
Line of edition: 7    ხელწფობ ერ ემჴედ კავკასიაჲთე, ეჩქა. ვოთარს დე ლი̄ჲრენი ე̄სა
Line of edition: 8    ხახლე̄ნა ი დე ლიჭვდა̄ნე ლაირიშ, მარა ეში̄ ძღჷდ ლჷჩინ ლჷმა̄რ.
Line of edition: 9    ეშხვინ ალ ვოთარ ემჴედ ლეჟა̄ ლა̄შხთე, სოფელ მაუნდს ლჷმზიგე̄ლიხ
Line of edition: 10    ზორთიშა; ზორთიშა ათხე̄ჲ ჩუ იზგეხ მაუნდს. ზორთიშა ღვჟარ
Line of edition: 11    ეჩთა̄ნ ლჷჴმაშ მეზგე ლჷმა̄რხ, ერე ხატხჲელნახშა̄ლ გალფხა̄ნარს.
Line of edition: 12    სგა ერ ემჴედ ვოთარ მაუნდთე̄ჲსა, სგა ლახჴე̄დუნე̄ნა ზორთიშა
Line of edition: 13    ჲეზვთე̄ჲსა, ქო̄ხტუ̄ლა ზორთიშა მა̄რე̄მიშდ ი, ქა ერ ემჴედ ეჯი
Line of edition: 14    ვოთარიშთექა, ეჩქა ოსწა̄ნა ვოთარს დაშნაჲ, ხოყი̄რა ი ჩოთქაჩა. ეჩქად
Line of edition: 15    მჷრ ხახჷ̄რე̄ნა ზორთიშე̄რეშდ ვოთარს ი ეჯღა ოთქაჩა ზორთიშა მა̄რე.
Line of edition: 16    ამეჟი ქა̄ლშჷ̄დე̄ლიხ ყო̄რქა ზორთიშე̄რალ ი ახჭემახ ვოთარს,
Line of edition: 17    მარა ვოთარ ჩვალუ̄ტვე̄ლი, ალახ მა̄რე ჩვადქაჩე. შუკვჟი ლეკოსა̄ნდარე
Line of edition: 18    ჴან-უ̄ღვა ელმა̄ზნ ქა ლჷსკო̄რად ნახვწი შუკვისა ი ვოთარს
Line of edition: 19    ლა̄ტვ მა̄მ ხა̄რა, სგა ხაჲა̄ლნახ ზორთიშე̄რალ, მარა ეჲჟი სკინაჲ ლჷმა̄რ,
Line of edition: 20    ერე სევჟი ერ ჭიშხარს ხატსინა, ქა ხასკნინა ლუვღვი̄ნა ჴანარს
Line of edition: 21    ი მე̄რმა სევჟი ხატსინა ჭიშხარს ი ამჟი ფიშირ ჴანუ̄ღვაქა ერ ქო̄თსკინა̄ლა,
Line of edition: 22    სგე̄მჩედ ნამა̄ტვ ლალჴჷრდ ყაფოშა ბუჭუ̄შთე̄ჲსა ლეკოსა̄ნდს.
Line of edition: 23    ზორთიშე̄რალ სგა ლახჭებდე̄ნახ ჴანარღოშგინ ი დეშ ლახჲე̄ნახ სგა
Line of edition: 24    ვოთარს ი ჩვათჩედახ ამჟი. ძღჷდ ლამარგიშ ლჷმა̄რ ვოთარ. ალ ამბავ
Line of edition: 25    ანა̄მბვე ვოთარი ფამლიდ ნარდვ იტიდ, ხედი̄ში დი ოხყევნახ
Line of edition: 26    ზითევდ ქეთევანიშდ ფარნაოზ გელვა̄ნს. იტი̄ დის ხა̄ჲშხე̄ნა ნაისახარ
Line of edition: 27    ი ნაისახარს ახთენე̄ნა ვოთარიშმჷყ ალ იტი ბერაძე ალ ამბვი მუ̄მბვი
Line of edition: 28    ი ვოთარი სგა მჷნჴრი ზორთიშა ლაცვა̄ლჟი; მეჩი ლი მე̄ვარ ათხე
Line of edition: 29    ი ჩუ ი̄რი 100 ლჷზაჲ.


ა. ონიანი. 31. VIII. 1958


Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.