TITUS
Svan Prose Texts IV (Lashkh)
Part No. 146
Previous part

Text: 146 
Page of edition: 191 
Line of edition: 1 
IV. ტოპონიმიკა
Line of edition: 2 
CXLVII. ლაფურ


Line of edition: 3       ლაფურს ხვაჲ დეც ი გიმ ხოყდა̄ნა -- ლახვ ი ბარ მაგ, ჟი ლჷზმე
Line of edition: 4    ლი მეჟევანჲობჟი ი 16000 დესეტინაჲ ლი; ეჩქადა დროჲჟი, ხვ
Line of edition: 5    დგმანუნ, მეზგე̄ლი̄ ხვაჲ ლჷმზიგელიხ, მარა წორისა ლოხვოდახ
Line of edition: 6    მჷრაჭ ჯაფარიძე̄ლეშდ ი ეჩანღო ჟალჲაყრე̄ლიხ ლაფურს მეზგა̄ლა ი
Line of edition: 7    ჟასფხეჟახ ლაზგა̄ლდ თელდ შვანს, ჲერხი ეჩხე შვანს ალზიჷელიხ
Line of edition: 8    ი ჲერხიამხე̄შვანისა. მჷჩიხრეშ მამინოშერალ ლაფურხენ ნაჴედ ლიხ
Line of edition: 9    ი დო̄მღვა̄ნე̄რალი̄. შვანარს ოთდაგრახ ჯაფარიძე̄ლ, ჲერუ ლახვბა,
Line of edition: 10    თოვლიაჲ ი ივანე ი ეჯჲარე წორისა ოთჴი̄დახ ლაფურ მიჩა
Line of edition: 11    ლჷლზიგდ, ხვაჲ წორ ღალ ხა̄რახ ქა ლეჴდე ჯაფარიძე̄ლეშ, ოდო
Line of edition: 12    დე̄მ ლჷმხინინხ შვანარს რაჭთე ი ლეჩხუმთე. ჲეშდჲერუ ზაჲ
Line of edition: 13    ლახრა̄გე̄ნახ, ერე მა̄დ ოთხინახ შვანარ სგა̄მავ ი სერ ჩუ ლესყა̄ლ ღალ
Line of edition: 14    ხა̄რახ ი წორ ქა ლეჴდე. ნასჷყდრალ ათხე̄ჲ ჟი ხეთრახ ლაფურისა
Line of edition: 15    ეჩქა̄შია მეზგე̄ლეშ ი ნაკ დაბარისა -- აღვრე̄ლი̄. უშგულს მეზგა̄ლა
Line of edition: 16    ჩა̄რკვია̄ნარ ი ნიჟარაძე̄ლი̄ ლაფურხენ ნა̄ზვ ლიხ, მესტიას მეზგა̄ლა
Line of edition: 17    ხე̄რგია̄ნარი̄ ლაფურხენ ნა̄ზვ ლიხ; დეშ ათგეჭახ ჯაფარიძე̄ლე ლიფუსდს
Line of edition: 18    ი ეჯღა ალჲაყრე̄ლიხ ლაფურხენ ი ჟასფხეჟახ ლაზგა̄ლდ ეჩხე̄შ ი
Line of edition: 19    ამხე̄ შვანს ი ლაფური დეც ი გიმ ქა̄ლცარჲელე̄ლი მეზგე̄ლხენ ი ჩვემსედ
Line of edition: 20    ალემაგ გიმ უჴმარად.

Line of edition: 21       ეჩანღო ლაფურს ასფუსნე̄ნახ ვარგალ გელვა̄ნარ, ხედჲარი̄ ერე
Line of edition: 22    ეჩქა̄შია დროჲჟი ლა̄შხს ლჷმზიგე̄ლიხ ი ლა̄შხე ფუსნარ ლჷმა̄რხ;
Line of edition: 23    გელვა̄ნარ ლაკვცირდგარ იჴმარდახ ესრენ ლაფური ლაკვცირალს
Line of edition: 24    ი მალყა̄რალს -- სავჲარს -- ხა̄ვდინახ ჯოგრე ლაბლახდ ლუფხვისა ი
Line of edition: 25    ნაბლახუ̄რ ბაჟს ხაჴთინახ გელვა̄ნარს; ეშხვინ ესრენ ახჩჷ̄დე̄ნახ ჟომობ
Line of edition: 26    ბაჟი ლიჴდე̄ ბედჟი სავჲარს ი გელვა̄ნარს ი მაჩე̄ნე გელვა̄ნ --
Line of edition: 27    ლევან -- ჩოთდაგრახ სავჲარს. გელვა̄ნარე ში̄ჲსა ჲადურდ ხვაჲხანს
Line of edition: 28    ა̄რდა ლაფურ, მარა ლა̄შხხენ ერ აჩადხ გელვა̄ნარ ლეჩხუმთე ლაზგა̄ლდ,
Line of edition: 29    ეჩქა ჩვათყიდეხ ინგუშ მილჲონერს ლაფური დეც ი გიმ მაგ
Line of edition: 30    ი ხვაჲ ათას მანთარ ენკიდხ, ჟესკეთლა̄ნხ ლაფური ნაფასს გელვა̄ნარ.
Page of edition: 192  Line of edition: 1    ლაფური მჷყდი ინგუშ მილჲონერ ლას გვარდ ჩერმოევ, მარა
Line of edition: 2    ამნე̄მ დეშ ლოხჩიშ ლისჷრგებლი ლაფური ტყვეფიშ ი ალ რევოლიუციაჲ
Line of edition: 3    ესი̄და ი ჩოსსად ლაფური ჴევ ლეჴმარიდ ლა̄შხარს, ჲერვა̄ჲს
Line of edition: 4    ერ სამჷრთალშვ ხეხვო̄ლ. ათხე ლაფურისა ხაბჷრგახ ლა̄შხრე სოფლარე
Line of edition: 5    ფერმე̄ლ, ხაყახ ფურალე ჯოგარ ი ლუნთ ი ლუფხვ მეჲად
Line of edition: 6    ლაფურისა ხაყახ. ლუფხვისა აჭმეხ ლეჭმე̄ლს ი ლუნთისა ანნიხ ჯოგარს;
Line of edition: 7    ლაფურხენ სავთე ლათნაღ ლი ი რაჭთე ლა̄ჲდი -- სოფელ ღებთე.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.