TITUS
Svan Prose Texts IV (Lashkh)
Part No. 145
Previous part

Text: 145 
Page of edition: 184 
Line of edition: 33 
CXLIV. ლიჴნი-ლილაში ი ლიზობ-ლითრე


Line of edition: 34       ნამშავხენქა ჯვინელდ ჩინ ხოშულს ლჷმლა̄შინხ ქერს, ღო --
Line of edition: 35    მანა̄შს ი ღო -- ფეტვს. ლჷმლა̄შინხ აჯაღ მენგრა ღედერს, ქირცს ი
Page of edition: 185  Line of edition: 1    ნეცინ ღედერს. ჲეს-ჲეს ზინთხსი̄ ლჷმლა̄შინხ ნა̄ჲრაყუნდ. ლობჲო̄შ
Line of edition: 2    ი სიმინდი ლილა̄ში̄შ დე̄სამა ხამჴერე̄ნახ, ვოდ მახა დროჲნუნ.
Line of edition: 3    სიმინდიშ, ლობჲო̄შ ი კვახნესვი ლილა̄ში ათხე̄ხიგარ ალბინე̄ლი. გუშგვე
Line of edition: 4    ხოშე̄ლუს ჩუ ხეშყადხ, ერე სიმინდს დო̄მ ლჷმლა̄შინხ. დაბისა
Line of edition: 5    ჩუ ლუსგვრე სკამუ̄ლჟი ზექი ბერგი̄ლარშვ ლჷმჟჷგნინხ სიმინდს.
Line of edition: 6    ზექი ბერგი̄ლარ ვოდ ათხანუნ ხეკვა̄რა̄ნხ ნაგბარჟი. ღენწუშე̄ლარ
Line of edition: 7    თელდ კოტო̄ლუ̄ლარ ხაღვე̄ნახ ი ბერჟი ნავღვე̄ნოშ ჴანი მუჭუ̄ლ
Line of edition: 8    ხაგფე̄ნახ მჷკრად. მაჲ ხეკვეს ალჴანე̄ლას ამკალიბ ჴანი მუჭი
Line of edition: 9    მჷკრო̄ლშვ ი, მაჲ საკვრელ ლი, ნამშავხენ მე̄ვარ მერხელდ ი̄რდო̄ლხ
Line of edition: 10    ეჩქად. მა̄ჲ ხაღვე̄ნახ მუჟღორ, ეჩის ქა ლჷმგვეინხ ჩი̄ს ი ვოდ ლუფხვნუნ
Line of edition: 11    ქა ლჷმჟოღვნინხ ვედნ ი ბედნ. კოჭ-კოჭო̄ლს ერ ჩი̄ს ლჷმლა̄შინხ,
Line of edition: 12    სერ ეშხუ რიგი ნამშავ ერ ხოღლატნა ჲედ სურუ ავდრალე
Line of edition: 13    ბედშვ, ჲედ სურუ გვალი̄შ, ჲედ უდროჲდ მუსი ლიჴედშვ ი ჲედ
Line of edition: 14    სკარხალი ბედშვ, ეჩქა ეშხუ რიგი ნამშა̄ჲ მჷქაფ მე̄რმე ნამშავ (ჲედ ქერ,
Line of edition: 15    ჲედ მანა̄შ, ჲედ ფეტვ, ჲედ ღედრო̄ლა) ეში̄ ხაჴდენო̄ლნახ ი თელდ
Line of edition: 16    მაიდობ და̄ს ლოქ ხასმა შვანისა. ჯვინელ მაშყდვა̄რ მეჩი მა̄რე̄ლ
Line of edition: 17    ა̄მბვიხ, ერე თელდ მაიდობ ლოქ ივა ლადეღ და̄ს ხაშყიდ
Line of edition: 18    ლა̄შხისა.

Line of edition: 19       მაიდობს ჟამობს ხაყლო̄ნახ ი ჟი ლჷმხვეტო̄ლინხ მაგ მორბდ
Line of edition: 20    სოფლარისა მერდე ხალს. ეშხუ დროჲჟი ცული ყუო̄ბს ხაყლო̄ნახ
Line of edition: 21    მაიდობს. ამ დროჲჟი ეშხუ კა̄დე̄მი ყუათე მა̄ჲზუმი̄ ღენ ნამშავი
Line of edition: 22    კაკლე̄ლარ ხასკდო̄ლნახ სგა ჲედ ფეტვიშ, ჲედ მანა̄შიშ ი ჲედ იშგენ
Line of edition: 23    მაჴდო̄რა̄შ, ეჯი ხაჯო̄ნა ძღჷდ ფასდ. ალ ცულს, ჲედ კა̄დას, ხა̄ვდინახ
Line of edition: 24    ამზუმ კაკლე̄ლარღა.

Line of edition: 25       მაიდობ ჩი̄მიშ ჟი მუხვტად ჟამშა̄ლ ძვირდგარ ე̄სა ლჷმა̄რ შვა̄ნისა.
Line of edition: 26    სგა ლჷმთქვე ხა̄რახ ლიზა̄რეს ი ზა̄რიანდ ერ ხაჭმენო̄ლნახ
Line of edition: 27    მაჴედი̄ლს, სერ ქა ლჷმჟოღვნინხ მახა მაჴედი სგა ლიჴდა̄ლდ. თელდ
Line of edition: 28    მახე მაჴედ ნამჟღორ (\ მანჟღორ) მანა̄შს ლჷმჲა̄ლვნინხ. მანჟღორ
Line of edition: 29    მანა̄შ დო̄სგ ჴედნი, ივანობა თოისა, ჲედ ეჩა მეშთხან ი ვოდ ჟი
Line of edition: 30    ხაჲა̄ლნახ ლეზობდ მანჟღორ მანა̄შ, ეჩქად პუშს ლჷმზობინხ. პუშ
Line of edition: 31    ბალახ ლი ი ეჯი ქუნს ხაცვრინა მა̄რას მახა მაჴედი სგა ლიჴდა̄ლნუნ.
Line of edition: 32    ეჯ მი̄შარს პუშულდაში მი̄შარს ხაყლეხ ათხე̄ჲ. იშგენ ბალხო̄რასი̄
Line of edition: 33    ხვაჲს ლჷმჴჷმრინხ დიარი მჷქაფ. ლეზობ ბალხო̄რა და̄ს ხოთრა
Line of edition: 34    ეჯიმაგ, შვანარს ერ ხოთრახ. პუშულდაში მი̄შ ჯვინელ მაჴედი
Line of edition: 35    ლიშდე̄ხურა̄ლე მი̄შ ლჷმა̄რ. ეშხუდ ინზო̄რიხ ფიშირ ზურა̄ლ, ბობშ ი
Line of edition: 36    ღვაჟმა̄რე ი ეჲჟი ღჷრიხ ბალხარე ლაჴდად. მაშე̄ნე ლჷმა̄ზნხ ლაღეჲთე
Line of edition: 37    მელგენდ ი მე̄რმა ლადეღ ახღვე̄ნახ ღეი̄ ქაფარ. ღეი მე̄ვარ
Page of edition: 186  Line of edition: 1    ხოჩა ლეზობ ხილ ხაბჟახ. დიარდ ხოშა შენჷრგიშ ამსვა̄ლდს ლოქ
Line of edition: 2    ღეი ხა̄რ.

Line of edition: 3       ხოშე̄ლ ყჷლეხ, ერე ჩუ ლულფხვან ი ბალხო̄რა̄ სგა მეჴდან
Line of edition: 4    დე̄მნარდ ლოქ ლჷმბაჟინხ ნამშავი კვედას, ეჯღა ერე ბალახვშ ქა
Line of edition: 5    ლჷმსე̄ლვინხ თხუმს, სერთხი̄ ჲები ლჷმჲან. ჲებს აშ ადოგავიხ, ერე
Line of edition: 6    ღე̄რი̄ლარგარ ხოსდენიხ, ეჲჟი ხეფე̄ვიხ ბობშ ი ზურა̄ლ. ისგვიმიშგვიობ
Line of edition: 7    ხილარჟი და̄ს ხა̄რ. ალე მაგ ცხეკი მაშენ ლოქ ლი ი ამღა და̄ს
Line of edition: 8    ხეჭვდჲელხ. ხვაჲ ლამარგ ი წევით ხა̄რა ქორს ნამშავი ლიზა̄რეხენ
Line of edition: 9    მეთხვიარა̄ ნაჴიდ ნადირ. ალე ეჲჟი ლჷმგჷრგილინ ქორს, სერთხი̄
Line of edition: 10    ლუგვარ ლახ ი̄რო̄ლ, ერე ეშხუ ნაგზი ერ დო̄სა ხაწდე̄ნხ ხევსს, ეში̄
Line of edition: 11    მაბზა̄რდ ლჷმარდხ. ჲერხი მეზგას ამჟი ნაზა̄რ კეთილ ჲესინ ქა ლეშდბინად
Line of edition: 12    ხაღვე̄ნა ი, კვედობ ერ ხე̄რო̄ლ მეზგას ნამშავიშ, ეჩქას ჟი
Line of edition: 13    ლჷმშდებინხ მაღვე̄ნიან მეზგახენქა ი ქა ლჷმსე̄ლვინხ თხუმს ნაშდებ ნამშავშვ,
Line of edition: 14    მარა ნაშდბუ̄რ ღალ ჲერუ ლალა̄შჟი ეშხუ ლალა̄შ ნამშავ
Line of edition: 15    ხახლე̄ნახ. შიშდ ხა̄რახ ქა ლეტხე, ხა̄ლ მახე მაჴედ ოხჴედნო̄ლხ.
Line of edition: 16    მახა ლუფხვთე ერ ოხშდება̄ნ ე̄ს ჲერუ ლალა̄შ ნამშავ ი ჲერუ ნაგზა̄ჲსა
Line of edition: 17    ერ ახჴედა̄ნ მახე მაჴედ, ეში̄ ქა ლეტხე ხა̄რა ჲერუ ლალა̄ში ნაშდბუ̄რ
Line of edition: 18    აჯაღ მესმე ლალა̄შ. ამკალიბდ ჲერუ ლალა̄შისა სემი ლალა̄შ
Line of edition: 19    ღალ ხა̄რა ქა ლეტხე: თხუმ ჲერუ ლალა̄შ ი ნამთავნ. ლეყდიდ ლახ
Line of edition: 20    ე̄სა ხეთხო̄ლხ, კუმაშს ლჷმვოდინხ, ჲედ ნამშავისა ხა̄ვდინახ ი ეჯჟი
Line of edition: 21    ხაბი̄შდო̄ლნახ მჷწხა̄რუ ნამშავი მაღვე̄ნიანს. ჲეშდ ლაზემ კვეცენღა
Line of edition: 22    ჲერუ-სემი ფურს ხა̄ვდინახ, სერთხი̄ დაგრა̄ლობჟი ლელგვანი ლამარად.
Line of edition: 23    ჲერხი დაბსი̄ ქა ლჷმვოდინ, მაჴედ ერ სგა ლეხშდეხნო̄ლ, კუმაშ
Line of edition: 24    მო̄ ხეყე̄ნო̄ლ ნამშავისა ლევდი. შვანე გიმ (\ გიმ შვანეშ) მაგ
Line of edition: 25    გოხ ლი. უ̄ნწად დე̄სამა ნამშავ ჴედნი ჲადურდ ლა̄ში̄ლა მჷტხე̄ჲ,
Line of edition: 26    ოდო ქა ცხაჲ დე̄მ ხესრინი ნალა̄შს. ლი̄ნწეს ხვაჲ ჲენწ ხაკუჩ ი ხვაჲ
Line of edition: 27    ჲენწი ლინზო̄რეს ხვაჲ კუმაშ ი ალე მე̄ვარ გარჯ ლი გლეხ მა̄რო̄ლაშდ.
Line of edition: 28    შვანს ჯო̄დი ლუნთ ხოხალ, კუმაშ ლესე̄ლვე ლი მეჲად მუჟღვრა
Line of edition: 29    ლიგე̄რგინეშ, ვოდ ლუფხვჲა ლიგე̄რგინუნ ჩუ ლაბმუშ. ლუფხვჲა
Line of edition: 30    ლიგე̄რგი ჲერვეშდისემი აპრილს ლი ი ამზუმ ჯო̄დი ლუნთისა
Line of edition: 31    კუმში ლიჩფეს ჲადურდ ხვაჲ ნენი ხაწჷხ ი ამზუმ ნენი̄ ლიხვრჲელე
Line of edition: 32    ი სგა ლიჴდე ჯო̄დჲა ლახვარხენისა დეშ ხეჩი̄ში: ჲეს ჩვაშდვე
Line of edition: 33    ლეჭმა̄ლის ი დეშ იჭმი ლახვისა, ჲეს ავდრა̄ლობ იჭყრი ი ეჩქა ლიჭმეს
Line of edition: 34    მა̄მ ხაყა ი ამშა ბედშვ დეშ ხოჩშეხ ხვაჲ ჭემი ლიჴდეს ი ლუნთისა
Line of edition: 35    ნენი̄ კვედობ ჩი ზავ ლი. ჲესი-ჲეს ლჷ̄ნშგ კირავ-კარპანს ხაშგბეხ
Line of edition: 36    ნა̄ნშგუნ წვარს ი ეჯნოვშ ჩჷფეხ ქა კუმაშს.

Line of edition: 37       ლიჩფე ხა̄ჲშხა კუმში ქუნი ლიცვრეს ლუნთისა. ლინნი ხა̄ჲშხა
Line of edition: 38    ლეზობი (ნენი̄) ლი̄მნეს. ქა მეჩფან ლუფხვისა კუმაშს ქუნუ̄ლგარ
Page of edition: 187  Line of edition: 1    ხაკე̄ვშახ, ოდო იშგენდ მა̄მა ხაყახ ლესგდიდ. ჯიჯუ̄ლარგარ იკა̄ჩუნა̄ლხ
Line of edition: 2    ჴადარ სგა მეშყდე ნამა̄ჲდუნ ამშა ნჯვდი ლუნთისა ი, ბალხობ
Line of edition: 3    ერ იბნი, ჩუ ერ იბზიხ მაისისა ბალახვშ, ეჩქა ხვაჲ კუმაშ ღალ ხვეტნი.
Line of edition: 4    მეჲად ნამა̄ჲდუნ, ჩუ ერ იბზი ეშხვჟი, ჩუ იდგარი. ამშა მაშედ
Line of edition: 5    ლიმზჷრი ლიგდენი ხებჟა̄ნხ ი ლჷგად ხუღვა̄ნდხ კუმაშხენ მახა
Line of edition: 6    ლუფხვთე უქმდ მაბე̄ლა̄ ცა̄შ. ჲერხი მახე ბალახ ჩვაბე̄ლე კუმაშს ი
Line of edition: 7    ყუ̄ლსგარ იკედ ი ჩუ იდგარი. ლენტხას მუყუ̄ლი ცა̄შს ხაყლეხ გუშგვე
Line of edition: 8    მაბე̄ლა̄ ცა̄შს. ხოლა ნაჩიფ კუმაშ ლუფხვთენაღალდ ქა ვედშვ
Line of edition: 9    იგო̄რწა̄ლხ ი ხვა̄ჲდინ ლალდღიარისა ჩუ ი̄ლხიხ ი სგა შყედნიხ ხრამვთე
Line of edition: 10    ჲედ ღელთე ი ჩუ სედნიხ ლჷდგარ, ლიგნა̄ლ ე̄რ მო̄მ ხა̄ჲმედახ
Line of edition: 11    მინევშ. ალემაგ გარგლა ეხჭამ დაბრე ლი̄ნწეს ი ჲენწი ნავღვე̄ნას.
Line of edition: 12    ჲესვა̄ჲ ჲენწ ხუღვა საყოფდ, ნამშივი̄ ეჩისგარ ხოჴდენი ი ჲესვა̄ჲ
Line of edition: 13    ჲენწ დეშ ხუღვა სამყოფდ, ეჩის ნამშავი̄ დე̄მ ხოჴდენი ი ლევე̄ლი
Line of edition: 14    ხა̄რ. დაბარ ლა̄ჲდი̄ მე̄ვარ მერხელდ გუღვახ. საყოფ გიმ ლეჩხუმს
Line of edition: 15    ი იმრე̄თსგარ ხუღვახ. ჩუბე შვან მე̄ვარ ნახწვი ჴევ ლი. კაკა-პაპანღო
Line of edition: 16    მა̄ჲ დაბარ ხაღვე̄ნახ, ეჯჲარგარ გუღვახ ათხე̄ჲ. ქა ლაცხემ
Line of edition: 17    დე̄მთე გვა̄რ. გიმ მაგ ყა̄ლდი ი გოხ ლი ი ქა დე̄მთე ხეცხი ნამშარათე
Line of edition: 18    ი ნაჯვდათე დაბს ი ამსვა̄ლდ ჩი ზაჲ იფშირი, სერთხი̄ ათხე̄ დროჲჟი,
Line of edition: 19    ოდო ეჩქად დე̄მ ლჷმფიშრო̄ლინხ შვანარ. ჩი ზავჲა თხუმჟი მახე
Line of edition: 20    ნათავ ბობშარს სოფელისა ეჯ ზაჲა ლჷდგარუ ხასრე̄ნა. ეკენობნეშ
Line of edition: 21    მე̄რმა ეკენობნუნ ე სოფელისა აშირ ბობშ ენთენო̄ლ, ეჯ ხანისა აშირ
Line of edition: 22    ი ვო̄შთხვეშდ ჲედ ვოხუშდე̄შდ ლჷდგარუს ლჷმშჷლდნინხ. ალე ჲერხი
Line of edition: 23    მაიდობაშ ი ხოლა ლისე̄ლვე̄მი ტარშვ, ჲედ მე̄რმა-მე̄რმა ზიგი
Line of edition: 24    ბედშვ ი ჲერხი წორობჟი̄ნა დაგრა̄ლობა ბედშვ ი ჲერხი ნავჯიმური̄
Line of edition: 25    ტარი̄ ი̄რო̄ლ. შვანს ეჩქად მე̄ვარ ფიშირ მეზგე ჟი ღო̄თაშდ ემხვეტ,
Line of edition: 26    ვოდ მახე დროი ლიჴდა̄ლნუნ. ათხე შვანარს ხეთხა̄ნხ ლეზობ-ლეთრე,
Line of edition: 27    ჯიმ, ლერექვ. ათხე ლჷდგარუს ზავჲა თხუმჟი მახე ლჷთენ ბობშარ
Line of edition: 28    ხესრინი ქა ი ლიხვეტი მჷქაფ ლაფშირა̄ შუკვს ელა̄გა̄ნდ შვანარ.

Line of edition: 29       ლეზობდ ნამშავხენ ლჷმნაყინხ კერჲაჲჟი კოტო̄ლ ქერი შაფათი̄ლარს
Line of edition: 30    კვახს ი მა̄რე̄მი შელდჟი ალ კოტო̄ლ ქერი შაფათი̄ლს ხა̄ვდინახ
Line of edition: 31    ინჯრი შელდჟი. ხეკვეს ალ ისგვი ნა̄თი ქერი დიარი̄ლ ქა̄ჯა̄რე̄ნ
Line of edition: 32    მე̄რმად დიარი ლინყა̄ლნუნ; მე̄რმა ინჯრნუნ დოშ ეჯე̄რო̄ლ, ლეთმი̄ნე
Line of edition: 33    ჯერო̄ლ მაიდ, სგა და̄რ ჯიქმა. ქა ლჷრბჲელან მეჴდე მუშგვრის
Line of edition: 34    მახან ურბჲელად დიარს დეშ ხა̄მნახ. დიარ ინყო̄ლ მა̄რემი შელდჟი.
Line of edition: 35    ხონ ქა̄ჯა̄რენ, ხონ მო̄დე. ნამსედვს ჩუ იშხვნუდახ ი ლემაიდდ ხე̄რო̄ლხ,
Line of edition: 36    კელდ ე̄სა ხეღვე̄ნო̄ლხ ნამსედუ̄ლ. სადაგ ლადღარჟი ამჟი
Line of edition: 37    ისე̄ლვახ თხუმს, ქერი დიარი მჷქაფ ფეტვრა̄ლ დიარს ლჷმნაყინხ.

Page of edition: 188  Line of edition: 1    ფეტვრა̄დიარ სურუ მეშხე ი ბჷგი ლი ლეზობდ. თაშიშ ი ჭყანი
Line of edition:   l2      უნჩჷდად ლეგ ლეზობ ლი ი ანყეხ ლუფხვისა, შომასი̄ ხოჩა ლა̄შგობ
Line of edition: 3    ხა̄რხ. ათხე̄ დროჲჟი, სიმინდი ლილა̄ში ერ ენბინა̄ნ, ქერი ტეფს
Line of edition: 4    ქა̄მენქა ხატფინეხ ი სგა̄მენ ხოჩდიხ სიმინდს. ამკალიბ დიარს ხა̄ჲშხა
Line of edition: 5    სიმინდა̄რ. ჲესინ ლა̄შგობჟი ლუფხვისა სიმინდს მორჩილ თაშს ხონჩჷდეხ
Line of edition: 6    ი ქა̄ნყეხ, ჲედ ხონჩჷდეხ ლუშხუნ ჭყანს, ჲედ პოხილს. ამკალიბ
Line of edition: 7    დიარს ხატუ̄ლიხ ლუკვნეს. ლუკვნე ი თაშო̄რა̄ დიარალ იქვთუნი
Line of edition: 8    განგალ ლადღარჟი, ოდო ჲენურდ, სადაგ ლადღარჟი, დიარს ხა̄ყიხ
Line of edition: 9    ჲედ ტელე̄ფი̄ ნა̄ყუნს, ჲედ ქალაკოდა̄ჲშს, ჲედ მანჭკვარა̄ჲშს ი
Line of edition: 10    იზბიხ ათვი-ათვი მჷნაყ დიარს, მახა ნაკიდს ყველფხენქა ი ათვი ნა̄ყუნს.
Line of edition: 11    ჩუ ლუქვე̄ლა დიარიშ ი ნა̄ყუნი ლიზობ დე̄სა ხა̄რხ წეს. ნაყუნია̄ქ
Line of edition: 12    ბალხო̄რას ი სოკს ახვრჲელეხ ლუფხვისა ზურალე̄ლ, ჟასდგვიხ
Line of edition: 13    თუთუნი სდუგვარშა̄ლ, ქა̄ფრეხ ქა̄მ მჷჟა̄რისა ი ეჲჟი აშხვნიხ ლუნთისა̄
Line of edition: 14    ნა̄ყუნია̄ქდ. ალ ლენა̄ყუნინქა აჯბიხ ნა̄ყუნდ ღედერს, როგს
Line of edition: 15    (მენგრე ღედერ ლი). ეჩქად მაგ ლჷმლა̄შინხ ღედერს, როგს ი ჩი̄ს
Line of edition: 16    ხაღვე̄ნახ. ჲესინ ღედერი კაკლარს ქერიშ ი მანა̄ში კაკლარს ხანჩჷდეხ
Line of edition: 17    ი ეჲჟი აგვეჲხ. ხოჩა გემა დიარ ლოქ ხეფსი ი ჲესინ ხოჩა
Line of edition: 18    ლჷლღენ ცხვადს ერ აჯბიჟ ლუნთისა, ეჩის ხეჩოხ როფს. როფ ქერი
Line of edition: 19    ფექიშ ლი. ეშხუ ფხა̄ნჭვას ხეჩო მჷნა̄ყუნიზურა̄ლ ლეჯბი ღედრი ცხვადთე̄ჲსა
Line of edition: 20    ი ჟანსგლე ცხვადისა მჷჯაბ ღედერს ი ქა ხოგვშეხ სადილდ
Line of edition: 21    ჲედ ვახშამდ ჩი̄ს ქორი მა̄რას თვითო̄ლაჟი. ღედრი ნა̄ყუნცახან იქჲა̄ქგარ
Line of edition: 22    ანყეხ დიარალს; ჟი ლეგეჭ ხა̄რხ ღედრი ნა̄ყუნი ფაკანდ. ნა̄ყუნვარს
Line of edition: 23    აგვშა̄ლიხ ფაკნიარშვ ი ფაკნიარშვ ხორგავიხ ქორა მა̄რას მა̄რემი
Line of edition: 24    შელდჟი. ღედრი ნა̄ყუნზუმ მაყი̄რიან დე̄სამა გვაბჟა ი ამღა დე̄მ
Line of edition: 25    ანყეხ დიარს, შომასი̄ ღედრი ნა̄ყუნ ხა̄რხ ვახშამდ. ეშხუ ვახშმი ქადა
Line of edition: 26    ზაჲნიზაჲნ ლოქ ესგურნი სგობდ. ალე ლა̄ჲრაკდ არი. ხვა̄ჲდინ
Line of edition: 27    ხაიდხ, მარა ზჷმ-ზვმშგარ იზბიხ. ზომჲერდ იზბიხ ლაგვან-ლაშთხვა̄ლისა
Line of edition: 28    ი ქორწილლაპრისდა̄ლისა. ლეღვს მუშვან მა̄რაზუმს დეშერ
Line of edition: 29    იზბი. ლუნთისა ღჷნჲემურჟი̄ნაშვდ ამა̄რეხ ჩი ხოჩე̄რობა̄მ. აღბაჲს
Line of edition: 30    ხაგნახ ჴანარს, ზომხაჲს, მე̄ჲსარაჲს ი თამფაჲს -- ხამს. ეჯ ლადღარისა
Line of edition: 31    აძჲენა̄ლდახ ი ათხე̄ჲ აძჲენა̄ლიხ ალ ჴანარს ი ხამარს. ამკალიბ
Line of edition: 32    ღჷნჲემური ლადღარე ლიჴედს ძღჷდს ხეხჲადა̄ლხ. ამკალიბ ლადღარჟი
Line of edition: 33    ანყა̄ლიხ ჭიშდვარალს ი ქუთვარს. ალჲარ ნამზჷრუნდი̄ ხამკახხ
Line of edition: 34    ი ჩი̄ს ხა̄მნეხ ჟი ლჷმზგრან.

Line of edition: 35       აღბიერ ჩიქე გვა̄რ ლეღვიშ ი ღო ყველჲერიშ. ლეღვი აღბიერი
Line of edition: 36    მი̄შისა მაგ ცუდდ არი; ნაგზულობშვ გვა̄და ალ მი̄შ უქმდ. ჟი
Line of edition: 37    ხვინზო̄რა̄ლდად სოფელისა მაგ მახეღვაჟარ ი გვა̄და ხუმრობ ი
Page of edition: 189  Line of edition: 1    ლიბჷრგჲელ, ვოდ აღბალე̄თნუნ. აღაბლე̄თ ეჩქად ეშხუდ ინზო̄რო̄ლხ
Line of edition: 2    მეხვბარალ ლჷბობშ-ლჷზვრა̄ლდ. მინე-მინე ქორალხენ ქა ჴჷდახ ლევახშამს
Line of edition: 3    (ლეზობ-ლეთრას) ი ეშხუ მეზგა̄ჲსა ჩუ ისგვრო̄ლხ მაგ ი ხა̄დახ
Line of edition: 4    კაპანიაჲ; ლეთრაულ ეჯ ლე̄თ და̄რ იგნო̄ლ. ჲეს რანგს იყდჷდახ
Line of edition: 5    ეშხუდ მაგ, ჲეს -- არაყს ი ითრახ ეჯ ლე̄თ. აღბა ლე̄თ იჩმჷდახ ნავახშმობერას.
Line of edition: 6    ვახშამი ლჷ̄მან მახანუდ ივახშმა̄ლდახ ნამსედვარჟი. ეჯჟი
Line of edition: 7    ბჷგიდ ხეკვეს ალბიზე̄ლასხ, ერე თანაფნუნ დო̄სა ხა̄რე̄ნხ ლეღვი
Line of edition: 8    გუმა̄რა. ლეღვი ნაჯაბ ხარშვს ლჷცხვადდ ქა იგმჷდახ ლაქვე̄ლად ი
Line of edition: 9    ეჯი ერ ჭყანს ენგენნა, ლჷნჩჷდა დიარს ანყახ; ეჩის ხე̄ჲშხა̄ნ ვოგა̄ნ.
Line of edition: 10    ვოგა̄ნ ეჯკალიბ მჷმყი̄რე ლჷმა̄რ, ერე ჩუ ხოგნა (\ ხოსუყავდა) გუს
Line of edition: 11    მა̄რას, ეჲჟი აბზა ი თანაფნუნ გუ ლჷგნად ი̄რდო̄ლხ ლეღვი გუმა̄რხენ.
Line of edition: 12    ჲესინ ვოგა̄ნს ქაქი გვარდ ლჷმსყეინხ ი ეჲჟი ლჷმზობინხ.
Line of edition: 13    ჲერხიაგის ათხე̄ დროჲჟი̄ ასყიხ ვოგა̄ნს მჷმყი̄რად ი მჷბზად. ლინჩა̄ლისა
Line of edition: 14    თანაფნუნ მაგ მუვჭმი ი̄რო̄ლხ. სამარხვ ნა̄ყუნუნქა დე̄სამა ისყო̄ლ
Line of edition: 15    ქორს. ლეღვი აღაბლე̄თ ვახშმი ტაბგი ლიჴდა̄ლთე ყველფჟი ლჷრკინა
Line of edition: 16    ნა̄ჭას ხატსჷდახ ტაბაგს ი ღვაჟარ ყჷლახ, ერე "ალმას ლოქ
Line of edition: 17    მიშგვი მერჩილ!" ი ხურალე̄ლ ყჷლახ, ერე "ალმას მიშგვი ნაშდექ!"

Line of edition: 18       მახა ლუფხვთე, შომასი̄ ბალხო̄რა იბნე ლიცვალის, ეჩქი ჩიგარ
Line of edition: 19    ლენა̄ყუნიდ მერხელი ნა̄ყუნს იჴმარიხ. მერხელი ნა̄ყუნს ხეჩოხ როფს
Line of edition: 20    ი თელდ ლუფხვ, ხეტ ლადღარჷნქა, მერხელი ნა̄ყუნჷნქა დე̄სამამ იზბიხ,
Line of edition: 21    ვოდ გამდვრალ მუჟღორნუნ. ჟი ხაჟარხ, მარა თჷმი̄შ ლი. თაშო̄რას
Line of edition: 22    ლელუნთად აშხვნიხ კაზალდ მჷსყად, ჲედ ლჷჯმარად მჷსყად
Line of edition: 23    ყველჲერისა̄შდ, ოდო ლუფხვისა დო̄მ ათშხუნნეხ თაშს, ჲედ ლჷჯმარას,
Line of edition: 24    ეჩქა ლუნთისა ლა̄შგობ მა̄ ლი ი ყველჲერისა̄შვო იმხენ ხეკვეს
Line of edition: 25    ანჴჷდიხ თაშ ი ყველს ღალ დეშ ხეყვლენიხ. ჩი̄ს ხეღვე̄ნი თაშ
Line of edition: 26    ი ეშხვსგარ ერ მო̄ ხუღვე̄ნს, ეჯი ძღჷდ შგურდ ხაბჟახ. ხვაინ
Line of edition: 27    იყდიხი̄ ა̄დვ, ჲესვა̄ჲ ლა̄შგობ მო̄ ხე̄რო̄ლ ლუფხვისა. ყველჲერი აღაბლეთ
Line of edition: 28    ერ ინზო̄რიხ ეშხუდ მეხვბარალ, ეჩქა დო̄სა ჯეღვე̄ნი ქა ლეჴდად
Line of edition: 29    თაშ ჲედ ლეღვ, ეჯი ღო კი̄ნჩხი ქვეცად ხაბჟახ. ყველს მეყვლად
Line of edition: 30    ხაბჟახ ი ამღა დო̄სგნეშ ხემა̄რა̄ლხ, ეჯ ლე̄თიშდ ე̄რ მო̄დ ასეხ
Line of edition: 31    შგურა̄ლდ. ეშხუ მეზგამჷყ ლჷხვრჲელე მეხვპარა̄ლ აღაბლე̄თარჟი
Line of edition: 32    მე̄რმა მეზგამჷყ ლჷხვრჲელე მეხვბარა̄ლს ქა ხოზზჷდახ მაკმარუნს
Line of edition: 33    ეშხუ მა̄რე̄მი შივშ: ეშხუ ნაქვიც ლეღვი ნა̄პუს, ეშხუ ნაქვიც
Line of edition: 34    თაშს, ეშხუ ნაკვიშ დიარს ჩხირალჟი ლჷნცო̄ლას ი ეშხუ ქერახს
Line of edition: 35    არაყს ჲედ რანგს. ალ ნაკმარუნი მჷჴდე მა̄რე სგა ჴედნო̄ლ ქორთე
Line of edition: 36    ი ჩუ ხოგმჷდა ტაბაგჟი ეშხუდ მესგვრა ი მევახშმა̄ლა ხალხს. მჷკმრის
Line of edition: 37    ჩვესსგურნახ მინეცახან კაპანია̄ჲდ ი ილხნახ. ვოდ ხოჩა̄მდ ჩუ
Page of edition: 190  Line of edition: 1    დო̄მ ადბიზნახ ი დო̄მ ადშდჷმნახ, ეჲჟი ქა დე̄მ ფუშვდახ მჷკმარის.
Line of edition: 2    ალ ნაკმარუნი მჷქაფ ალ მეზგე მიჩა̄შხენ ქაუდ ხაყვანდა ნაკმარუნი
Line of edition: 3    მჷჴდა მეზგათე მიჩა ნაზჷზ ნაკმარუნს, მა̄ჲ ხეღვე̄ნოლხ ვახშამდ თვით
Line of edition: 4    ნა̄პუს ჩი̄ხენქა. ლელუნთად ხამარს ერ ანე̄შყეხ, შიყრას ი თხუმაყბას
Line of edition: 5    ჩუ იზბიხ ღჷნჲემურჟი ი ფელკარს მიჩა ლჷკელვერდ ჩვალვრა̄ლიხ
Line of edition: 6    ი ქა̄ფრეხ კვამჟი ი ეჲჟი ლჷფრა ლორალს ქა ხორკინეხ. ქორა
Line of edition: 7    ჭვედს ლაკვა̄მა აგის ი ლუშხუნ ხუღვახ თამფიერეშდ ი ლუფხვისა̄შდ.
Line of edition: 8    ათხე̄ დროჲჟი დიარხენ მაგ მაბზა̄რ ლი ი მაიდობ მა̄მ გვარ;
Line of edition: 9    ლეგლირდა̄ლობდი̄ ენკვიდ ი ამღა ლი, ერე შვანისა (ლა̄შხისა) ხალს იფშირი
Line of edition: 10    ლიკვდე̄ მჷქაფ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.