TITUS
Svan Prose Texts IV (Lashkh)
Part No. 144
Previous part

Text: 144 
Page of edition: 182 
Line of edition: 1 
CXLIV. შუკვ ი გზა̄რობ


Line of edition: 2       ჯვინელ დროჲჟი გზა̄რვთე ლი̄ზი ერ ხაკვდახ, ლადგა̄რჲელთე ლი̄ზის
Line of edition: 3    ერ ხემა̄რა̄ლნი, ეჲჟი ღალ ხამა̄რა̄ლნახ. ჲედ ჩაჟ, ჲედ ჩა̄ჟი მჷჲეს
Line of edition: 4    მა̄რე ლუვარ ანჴდენო̄ლ ა დოშ, ალე და̄ს ხახლე̄ნა, ეჲჟი ხოლა შუკვარ
Line of edition: 5    ი ზჷზ ლჷმა̄რ. ჲეს ღალ მა̄რე ლჷმშყედო̄ლინ ქა ხოლა ბოგქა
Line of edition: 6    ჲედ კოჯქა ლა̄ზჟი ი ჲეს -- ჩა̄ჟ. ხვაჲ ხაშყიდხ, ერე მიჩა ლჷლა̄ბდ
Line of edition: 7    ხაშყდას ქა ჩა̄ჟ ლანგზა̄რავჟი ი პატრონ ცარჲელ მეტხე̄ლი აგითე.
Line of edition: 8    მჷლა̄შხს ათხე̄ჲ ხოვზი̄ნეხ, ჩა̄ჟ ერ ათშყედა ლაწლა̄ნდაშ მური ბოგმჷყ.
Line of edition: 9    ჩუ ერ ემშყედ ჩა̄ჟ ი ჩვალდა̄ვშელი, ჩვემჩედ მჷ̄ლა̄შხ, ქო̄ხქვი̄ცა
Line of edition: 10    ჭიშხ ჩა̄ჟიშდ, ჟოხჴი̄და შუკვთეჟი ი ხაყლო̄ნა ჩა̄ჟი ჭიშხს: "ა̄,
Line of edition: 11    საბრაუქ კავშაჲ! ამეჩუ ერ ეჯგე̄ნ ჭიშხ ი ამეჩუ, მა̄მ ლოქ აშყდენო̄ლ
Line of edition: 12    კოჯქა". ამჟი ღალ ლჷმჭი̄რა̄ლინხ ლა̄ზ-ლამჩედჟი. ალ ამბავ, ვოდ
Line of edition: 13    ათხე̄ თავრობდ დო ანსყე გაცხაჲდ შუკვარ, ეჩქაღ ამჟი ლას. აგიხენ
Line of edition: 14    ნა̄ზვ თვით ნაგზი ხაკვდა ლეჩხუმდ ლი̄ზის. ჩა̄ჟშვ ლი̄ზი ი ჭიშხშვ
Line of edition: 15    ლი̄ზი მეგვი ლას. ლელე̄თად ლჷმგენო̄ლინს ქვაბვარისა აშარლექვა.
Line of edition: 16    ლემესს ლუმუ̄შვინხ ი ქვბვარისა აშარლექვა, ხა̄ლ ლეჟა̄შ, ეჲჟი
Line of edition: 17    ლექვა̄შ, ჩუ ლუკვმუნე ლიხ კოჯარ ათხე̄ჲ. შომასი̄ აშარს დოშ
Line of edition: 18    ლჷმაზნხ, ნაფდიე̄მი გუ̄ნღა ლენჴე̄რახენ ლჷმა̄ზნხ ლეჩხუმთე სტა̄რუნი̄ში
Line of edition: 19    თანაღქა, მარა ლენჴე̄რალექვა სურუ ხოლა შუკვარ ლჷმა̄რხ.
Line of edition: 20    მეჲად ლიცარქა ლჷმა̄რ ლე̄ზი ჲეს ეჩხენთე ი ჲეს ამხენთე. ამჟი
Line of edition: 21    ლეტე̄ხვრჲელ ლჷმა̄რ მეჲად. ჲესინ ლიც (ლაჯა̄ნურ) ჟი ლჷმცხემინ ი
Line of edition: 22    ჲედ ჩა̄ჟს ლჷმჲესინ ი ჲედ მა̄რას. ლა̄შხს ჟი ლჷმხურჲელო̄ლინხ
Line of edition: 23    ი ლჷმზჷზინხ ლენჴე̄რათე მუბვგა̄ლას ჩი ზაჲ. მუჟღორთე ნაღალდ
Line of edition: 24    ხაჭმენო̄ლნახ ჟა̄ნისა ლაჯა̄ნურს ლექვა ი ჩჲა̄გ ქა ლჷმბოგინხ
Line of edition: 25    მურგვალ ჭერი̄ლარშვ. მჷსყე ბოგო̄ლი̄ საელბედიო ლჷმა̄რ.
Line of edition: 26    ჭერილართე̄ჲსა სგა ხაკტე̄რო̄ლნა ჭიშხ ჩა̄ჟს, ლა̄ბარ სგა ხაშყდენო̄ლნახ
Line of edition: 27    მე̄ზი ლიცთე̄ჲსა. ალ ამბვარ შუკვარეშ ვოდ ათხანუნ ლას. მუბვგა̄ლა
Line of edition: 28    ქა ერ ლჷმგა̄თვინხ ლიბვგის, ქა ლჷმტეხო̄ლინხ ლა̄შხთე ი
Line of edition: 29    ნაბგუ̄რს ლჷმზორინხ სოფელისა. ბეგარდ ხაგდე̄ნახ ჩი ზაჲ ნაბვგუ̄რ
Line of edition: 30    კაკლარე ლიჴდე. ათხე̄ხი ოხსყახ ნეცინ შუკუ̄ლ სტა̄რუნიში თანაღქა
Line of edition: 31    ი ღო ლენჴე̄რალექვა, მარა შუკვარე მჷპლანავი მუ̄ლჩხუმ (მჷლეშკაშ)
Line of edition: 32    მა̄რე ლჷმა̄რ ი ეჩის ეჯკალიბ აგილეჟა ოთპლანავა შუკვ, ერე
Line of edition: 33    შვანე გზა̄ვრი ლემკახე მა̄მ ლჷმა̄რ. ლეჩხვმარს ოთჲახ შუკვ ხვირი
Line of edition: 34    ცხეკლეჟა. ეჩხენისა ლჷმჲესინხ ლეჩხვმარ მეგმარს ი ზექს ი ათხე̄ჲ
Line of edition: 35    ოსღვახ ლიცრუ̄შ ზექ ი მეგმარ. ალ შუკვ ჟესღრი ხოშა ლჷცხეკ
Line of edition: 36    ტე̄ვრთე̄ჲსა ი ეჩანღო ჩუ იჭო̄ნე ლანქორი თანღი ღელთე̄ჲსა. ჲერუსემი
Line of edition: 37    ნაზჷმშვ ხოჯვდია ლი ი ლეჩხვმარე ლემკახეგარ ლი, ოდო
Page of edition: 183  Line of edition: 1    ლა̄შხიშ -- მა̄მა. ღო მჷშაჲდ ლა̄შხარ ლჷმა̄რხ, მარა ამჟი ოთღორვა შუკვარე
Line of edition: 2    მჷპლანავის ჩი̄მიშვდ. სერ ეჩანღო ჩვემსედ ლენჴე̄რა̄ შუკვარ
Line of edition: 3    ამჟი ი ვოდ ახთანუნ აშ მესდე ლი.

Line of edition: 4       ლიბვგი ხახლე̄ნახ ლანქორნეშ ლიცრე თხუმლექვა ხვირი
Line of edition: 5    ვოკერჩუქვა̄ნქა. მუჟღორთენაღალდ ლჷმბინინხ ლიჩრის. ღვინელს
Line of edition: 6    ლჷმჴედო̄ნხ ჟაჴარშვ, ქეშელაჲშვ ჴეჩვარისა ლჷჭო̄ნას. ეშხუდ ინ
Line of edition: 7    ზო̄რო̄ლხ ფიშირ მჷჩრა ჲეშდვოხუშდთექა ი ხოლა შუკვარქა ლა̄ზჟი
Line of edition: 8    უშხვა̄რ ღალ ხამურჯნახ. ეშხუ ლე̄თ ლეჩხუმხენ ნა̄ზვ მჷჩრა სგა
Line of edition: 9    ლჷმჴედო̄ლინხ ხვირი ვოკერთე̄ჲსა. ეჩეჩუ̄ნა ქვაბვარისა ჩუ
Line of edition: 10    ლჷმგენო̄ლინხ ლელე̄თად ი მე̄რმა ლადეღ ხაცვმინახ ლა̄ბარს ჩა̄რს ი ქა
Line of edition: 11    ხაგნო̄ლნახ ხვირმჷყქა ტე̄ვრს ი ჟი ლჷმჴედო̄ლინხ სტა̄რუნი̄ში თანღი
Line of edition: 12    ლჷცხეკი თხუმთეჟი, ეჩეჩუ კოჭო̄ლ ნაკი̄ლარ ხა̄რ ი ჩა̄ჟრე
Line of edition: 13    (\ ჩა̄რე) ლაბლახ ხა̄რახ ლელე̄თად ი ამეჩუ ლჷმგენო̄ლინხ. ალ მიდამს
Line of edition: 14    ხა̄ჲშხა ლანქორ. კოტო̄ლ ბეჩი ქორო̄ლარ ხაგმე̄ნახ ამეჩუ, ლანქორისა,
Line of edition: 15    მინე ლარდა, ჴვილაშა̄ლ მჷსყე ი ჟიქა̄ნ კა̄რალშვ ლჷ̄ნშგ ლჷმა̄რ
Line of edition: 16    კარაუ̄ლარშა̄ლ. ამექა ქვაბვარ მა̄მ ხა̄რ ი მჷჩრი̄ ლაგნად ლჷმა̄რხ
Line of edition: 17    ალ ქორო̄ლარ ჟი მჷსყე. ათხე̄ჲ ჩვარიხ ეჯ ქორო̄ლარე ნამხვირვალ.
Line of edition: 18    ლანქორნეშ მე̄რმა ძინარს ქა ლჷმთანღინხ ი ვედშვ ქუნმჷწლე̄ბი
Line of edition: 19    მესმა ლადეღ სგა ლჷმჴედო̄ლინხ მინე-მინე აგიარეთე ჲერ
Line of edition: 20    შვიდობიან ი ჲერ მე̄ვარ ზარალიან-ლუკვმატე.

Line of edition: 21       კეცარ ეჯიმაგ არიხ ლა̄შხისა, ერე იმჟი̄ ლეჩხუმს. მარნალი̄
Line of edition: 22    ხუღვახ ი ხაღვე̄ნახ ბეჩიშ. მაგ ლჷმჴიდინ ღვინელს ლეჩხუმხენ.
Line of edition: 23    ლეჩხუმს აშ ლჷმშენინ ყურძენს, ერე ხოშა მეგმართეჟი ხაღვე̄ნახ
Line of edition: 24    ლჷფი̄შვდ ვენახ ი თვით მეგემხენჩუ თვით ლა̄ბ ყურძენს ლჷმხორინხ.
Line of edition: 25    მუღვარალაჲდ ხაღვე̄ნახ ღვინელ ლეჩხვმარს. ეჯიმაგ ხაჴდენო̄ლნახ,
Line of edition: 26    შედი̄ ძვირ ხა̄რახ ღვინლაშ ი ამღა თელდ ჩალი ფასდ ხა̄ვდინახ შვანარს
Line of edition: 27    ღვინელს. ეშხუ და̄დჲა̄ნა ლაზმა დორაჲ ეშხუ აბაზდ ლჷმარდ.
Line of edition: 28    მანათდ ძღჷდ გლაჯიაჲ ლა̄ბს ლჷმყიდინხ ღვინლაშს. ყჷლეხ, ერე
Line of edition: 29    ჯვინელდ თაბარობ ლოქ ლჷმა̄რ ი ეჯღა ხაჴდენო̄ლნახ ალემაგ ღვინელ.
Line of edition: 30    ქალაკოდა̄ჲ სდუგვარს ლჷმჲესინხ შვანარ ლეჩხუმთე ლუნთისა
Line of edition: 31    ლენა̄ყუნიდ ი ქალაკოდა̄ჲ სდუგვისა თვით დორაჲ ღვინელს ხა̄ვდინახ.
Line of edition: 32    და̄დჲა̄ნა ლაზმა დორაჲ ჲერუ ფუთდ ხოშა ლჷმა̄რ. ჲერხი
Line of edition: 33    ქანა თხუმვარს ლჷმჲესინხ ი ეჩე̄ჲსა ხა̄ვდინახ ლა̄ბ ღვინელს. ჲედ
Line of edition: 34    ლჷჯმარე̄ლს ლჷმჲესინხ ი ლჷჯმარე̄ლისა ლჷმჴიდინხ ღვინლა ლა̄ბარს.
Line of edition: 35    ლეჩხუმს ლიცს და̄რ ლჷმთჷრინხ. ჩიგარ ღვინელ ხაღვე̄ნახ
Line of edition: 36    ლეთრად. კეცარს შვანს დეშ ლჷმსყეინხ ი ხეთი̄რი, ერე მა̄ჲ შვანისა
Line of edition: 37    კეცარ ჩუ ე̄სა არიხ, მაგ ლაკო̄დუშ ხეკვეს ლჷმა̄რე̄ლას ნაჴიდ. ნადდ
Page of edition: 184  Line of edition: 1    ხაწე̄ნო̄ლნახ უშხვა̄რ ი ეჲჟი ლაკო̄დუშ ახღვე̄ნახ კეცარ. კეცარ ჲერხი
Line of edition: 2    ეჲზუმ ლიხ, ერე უსგვე̄შდ-იშგვიდე̄შდ ფუთ ხასკდა სგა. ათხე̄ჲ ჩვარიხ
Line of edition: 3    ეჯ კეცარ. შვანისა კეცია̄ქ ვორ (ვოყალ) დე̄სა არი ი ლეჭნე ლი,
Line of edition: 4    ერე კეცარ მაგ სგა̄ნქა (საირმეხენ) ნაჴიდ ხეკვეს ლე̄სეს. გვიანდ,
Line of edition: 5    გამდვრალ მუჟღორდ ლჷმჩერინხ სტა̄რუნი̄ში თანაღქა. ეჩქად მუს
Line of edition: 6    მე̄ვარ გვიანდ ლჷმჴედო̄ლინ. გარგლიხ, ერე ჲეს-ჲესინ ჯვინელდ
Line of edition: 7    ლუნთისა (ბარბლაშჲერმჷყქა) სტა̄რუნი̄ში თანაღქა ჭიშხაგარ ლოქ
Line of edition: 8    ლჷმჴედო̄ლინხ ეჲჟი, ერე ეშხუ ცალ ჟაჴ ღვინელშვ გოში შიყჟი ლოქ
Line of edition: 9    ხაცვმე̄ნახ. ათხე̄ დროჲჟი ეჲჟი ლჷმცხა̄ნე ლი, ერე სტა̄რუნი̄შქა
Line of edition: 10    ბარბლაშიერ ნეპო̄ლი̄ლი̄ დეშ პერნი, ოდო მა̄რე ლა̄ჲდი̄ ცხაჲ დეშერ
Line of edition: 11    ათნაღი სტა̄რუნი̄ში თანაღქა. ეჯზუმ მუსს ხადე̄ს, ერე ქა ლიჭბი და̄ს
Line of edition: 12    ხა̄ჲმედა. ღო ლუნთისა სტა̄რუნი̄ში თანაღ ხოლა ლეთნაღი თანაღ
Line of edition: 13    ლი. ხვაჲ მა̄რე ლჷდა̄ვშელი სტა̄რუნი̄ში თანაღი ლათნაღჟი ათხე̄ხია̄რა.
Line of edition: 14    ლანგზარავხენ ნა̄ზვ ჩუკუ̄ლარ ჲერუ-სემი მა̄რე ეშხუდ მჷთნაღი
Line of edition: 15    ჩვედდა̄ვშა̄ნხ სტა̄რუნი̄ში თანაღჟი. ალჲარ ხაბაჲშა ღვაჟარ
Line of edition: 16    ლჷმა̄რხ.

Line of edition: 17       ლაბოგთე მე̄ზა̄ლა ბოგო̄ლარს ერ ქა ხადე̄სნახ ლაჩერჟი̄ნშვდ,
Line of edition: 18    ქა ერ ლჷმტეხო̄ლინხ ლა̄შხთე, ნაბგუ̄რდ ნაზორ კაკლარშვ სკარს
Line of edition: 19    ლჷმჩომინხ ლემზაგო̄რს ი ძღჷდ ქეიფ ხა̄რახ. ამშა მაშყდვა̄რ მა̄რე̄ლ
Line of edition: 20    ათხე̄ჲ სიდხ ლუვარ ჩიქე ი ა̄მბვიხ ეჩქადა გვეშარს. ათხე გორა
Line of edition: 21    განათლება ლოქ ემჴედე̄ლი ი ჲას ლოქ ხელო̄ნი ლირდე.

Line of edition: 22       ლაჩერჟი ჩა̄ჟარს ვოხუშდ დორჲან ღვინლა ლა̄ბარს ერ ხაცვმინახ,
Line of edition: 23    ლა̄ბი ქა მეჭემ მა̄რე ლჷმცვემინ ეშხუ დორაჲ ღვინელს ი ეჲჟი
Line of edition: 24    ხაჭმენო̄ლნა ქა ლჷლა̄ბ ჩა̄ჟს, ეჲჟი ლჷჴმაშ ლჷმარხ ეჩქადა ღვაჟარ.
Line of edition: 25    შიყჟი ლუცვე ღვინელს შუკვჟი̄ნა ლეხჷრჯავიდ ხაბი̄შდო̄ლნახ
Line of edition: 26    მასძელარს ლეჩხუმს, ეჯღა ერე ლა̄ბარეშდ დო̄სა ოხბი̄რე̄ნხ. თვით
Line of edition: 27    მასძელ მუშვან მა̄რას ჩი̄ს ხაყე̄ნა ი ათხე̄ჲ ხაყა. ჲერხის მინე-მინე
Line of edition: 28    ვენახარ ხაღვე̄ნახ ლჷყიდ ლეჩხუმს, სგა ხაბრიე̄ნახ მასძელიშვდ ი მუჟღორ
Line of edition: 29    ლჷმა̄ზხ ი ლჷმხორინხ მინე ვენახისა ყურძენს ი ეჩა ღვინელს
Line of edition: 30    ქა ლჷმჴიდინხ აგითე. ათხე̄ჲ ხაცვირხ ლეჩხუმს ვენახ ჲერხი შვანარს,
Line of edition: 31    მარა ღვინელს ღალ დეშ ჴჷდეხ. ათხე̄ დროჲჟი ხვაჲ ლი̄ზნანი
Line of edition: 32    ხაკუ ვენახს ი ეჩა შვანარს დე̄სამა ხომჴერახ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.