TITUS
Svan Prose Texts IV (Lashkh)
Part No. 168
Previous part

Text: 168 
Page of edition: 202 
Line of edition: 5 
CLXVIII. სტა̄რუნი̄შ


Line of edition: 6       ალე ლახვ ლი სასა̄შარეშ ი ჭემარსი̄ იმა̄ჯიხ ამხენ. ლეჩხვმარ
Line of edition: 7    სტა̄რუნი̄შს ჟახად "ჯვარის მთას" ხატუ̄ლიხ. ამექა ლეჩხუმთე ლა̄ზ
Line of edition: 8    ლაჩა̄ჟ შუკვ ხა̄ბ, მარა ალ შუკვ ლუფხვისაგარ იმარგ, ოდო ლუნთისა
Line of edition: 9    ლაჩა̄ჟ მა̄დე̄ჲ ლაქვეითი̄ მა ლი. ძღჷდ მუსს ხადე̄ს ლუნთისა ი ლაჟაჲ
Line of edition: 10    ლი მე̄ვარ ი, ვოდ ჟი დო იჩვფი მუს, ეჩქად დეშერ აბდავი სტა̄რუნი̄შქა
Line of edition: 11    ლი̄ზის დე ლჷჩა̄ჟ ი დე ქვეით. სტა̄რუნი̄ში ლახვთე ჴანარს
Line of edition: 12    ჴჷდეხ ლალგვარდ ლუფხვისა სოფლარ: სასა̄შარ, მებცარ ი ლეკოსა̄ნდარ.
Line of edition: 13    ვოთა̄ვარ ხო̄გხ ლელე̄თა ლალგენდ ჴანარე მჷლდღას ი ჴანრე
Line of edition: 14    ჯოგარსი̄ მინე ლარდა ვოთა̄ვარმჷყ ახვრჲელეხ ნებვზუ̄შ ი ხელჩეხ,
Line of edition: 15    ლე̄თშვ ნადირ დო̄სა ოხშგებეს ჴანარს ი დო̄სა ადმოცალას კუმაშ. ქა
Line of edition: 16    ჴედნიხ ვოთა̄ვხენქა ქა̄მთე ი იქ ქანა̄ლხ. მახა ლუფხვს ჴანი ჯოგ ლაჯოგისა
Line of edition: 17    ხაყახ, ეჩეჩუ ლიცი ტუბაჲ ლჷ̄გ, ითრეხ ჴანარ, ლუფხვისა
Line of edition: 18    ხონკლათხა აგითე აჲესხ -- ლატყვიართე -- ხონგრილა ლოქ ხე̄რიხ ჴანარს.
Line of edition: 19    სტა̄რუნი̄ში თანაღს ხაჭრა როკალ, ლჷკოჯ თანაღ ი ლათხვიარ.
Line of edition: 20    სტა̄რუნი̄ში ლახვს ეშხუ კჷ̄ლთხი ციხვა ხა̄რ ი ეჩის ლატყვიარ
Line of edition: 21    ხა̄ჲშხა. ამე, ლატყვიარი ლესგისა, ჯვინელდ ლჷმკიდინხ სასა̄შარე ხოშელ
Line of edition: 22    ტყვიჲს, ლჷმჷ̄ჲნინხ ი სავთე ლჷმჲესინხ ლევდიდ ი ეჩა ნაცა̄დდ
Line of edition: 23    ნაბდარს ლჷმჴიდინხ სავხენ. ამშა მაშყდვა̄რ მეჩი მა̄რე̄ლ -- თაისავ
Line of edition: 24    გოგიშა ი თათავ გოჩშა -- ათხე̄ხიგარ ადგა̄ნდახ ი ეჯჲარე ნა̄მბავს
Line of edition: 25    ხვა̄ჲრენი მი ამშა მჷ̄ჲრენი. ალ ტყვიჲი მადენი ჭას მეწყე̄რ ახსგურე̄ნა
Line of edition: 26    ათხე̄ხი ი ეჯ მეწყე̄რს ოთქარვა, ოდო ათხე̄ჲ იკდჷნო̄ლხ ტყვიჲს
Line of edition: 27    ეჩხენჟი, ჟახადი̄ ეჯღა ხა̄ჲშხა ალ ზაგარს ლატყვიარ, ერე ტყვიჲ ერ
Line of edition: 28    ლჷმარდ ამე. და̄ს ხოთხე̄ლნა, ოდო არგებს ჟეთლაკე̄ნდეხ ეჯ ტყვიჲი
Line of edition: 29    მადენი ჭას. ამხენქა ანღრი სგიმრაშულ. ალე ეზრი̄სგა̄ლა ლიც ლი,
Line of edition: 30    ლეგვე̄რალე მჷსპჷნე ი ლილუ̄ხვა̄ლ ჩუ ხაზნა ჲესი-ჲეს. ეშხვინ
Line of edition: 31    ედლუ̄ხვა̄ნ ალ სგიმრაშულ, 1908 ზაისა, ლუფხვისა ი სასა̄ში სოფელ ქა
Line of edition: 32    ღო̄თაშდ ადჲე ი ხოჩა სგიმს ახსგუ̄რდა ი ჩვადქარვე. ლატეხ ლეთრე
Line of edition: 33    სგიმ ლას ალე სასა̄ში თხუმისა. სგიმრაშული ლილუ̄ხვე̄ ლჷყა̄ლვა
Line of edition: 34    სასა̄სში სოფელს ლიმზჷრ ი ლიდბაშ ოხგადა ლიმხა̄რწი ლადეღ, ერე
Page of edition: 203  Line of edition: 1    სგიმრაშულ ლოქ დო̄სა ედლუ̄ხვე̄ნდეს, მარა ლიმზჷრ ი ლიდბაშ დე̄სამა
Line of edition: 2    ლეხშად ამშა ლილუ̄ხვა̄ლს ეშე. ალ სგიმდ ხოთხელნახ სასა̄შარს, მარა
Line of edition: 3    ჩიქე დეშ ენთხეხ. სტა̄რუნი̄ში თანაღხენ ლეჩხუმ ი ნაკ იმრე̄თ
Line of edition: 4    ხოჩა̄მდ თერახ. ალ ზაგარჟი საყდარ ლჷ̄გა̄ნ ესრენ ჯგჷრა̄გი ჟახაჟი̄ნაშ,
Line of edition: 5    ათხე საყდარი ნამხვირვალ ჟი ხეთრახ ალ ზაგარჟი. ამეჩუ ათხე
Line of edition: 6    უთინე̄ლ ლჷ̄გ ი ჲერვა̄ჲ ქა ხელკი, მაგ უსტა̄რუნს ი̄ჲრენი. ამხენ ნაჲეს
Line of edition: 7    ხატ ჴე̄რი̄ საყდარისა ხასგვჷინა ი ჯგჷრა̄გ სტა̄რუნი̄შიშს ხატუ̄ლიხ
Line of edition: 8    ათხე. არაკს ა̄მბვიხ ამჟი, ერე ალ ზაგარჟი ლოქ ლჷმზიგე̄ლი ბებვშა
Line of edition: 9    გვარ ი ალ საყდრი მულზონ ლოქ ლჷმა̄რ. ეჩქადა დროჲჟი̄ნ თაბარობ
Line of edition: 10    ლოქ ლჷმა̄რ, მუს ლოქ დე̄მ ლჷმჴედო̄ლინ ი მუსი ლიჴედ ლოქ
Line of edition: 11    ალბინე̄ლი ი სურუ ერ ალმჷცხა̄ნე̄ლი, ეჩქა ლოქ დეშ ემგეჭ ეჯ მეზგე
Line of edition: 12    ალ ზაგარჟი ი ემჩედ ლოქ ლაზგა̄ლდ ჩო̄ლურთე, სოფელ საყდართე
Line of edition: 13    ი ეჩე ლოქ ალზიგე̄ლი ი ლადი̄ საყდარი სოფელისა იზგეხ ბებვშა გვარალ
Line of edition: 14    ი საყდრი მულზონ ლიხ. ალ სტა̄რუნი̄ში თანაღჟი, უთინე̄ლ
Line of edition: 15    ლეჟა̄ნ, კჷ̄ლთხი ციხვაჟი ლი ძღჷდ სკო̄დი ლიცი ტუბაჲ ი შომა̄ჲ ერ
Line of edition: 16    გვალიობ იბნი, ეჩქა ღჷრიხ ალ ტუბაჲთე ი ლჷდგარ ციცვს აკვა̄ნეხ,
Line of edition: 17    ჲედ იშგენს ე̄მამ ი ჩუ ლოქ ედჲავდრი.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.